Санхүүгийн зохицуулах хорооны
2024 оны 12 дугаар сарын 27-ны өдрийн

657 дугаар тогтоолын хавсралт

ВИРТУАЛ ХӨРӨНГИЙН ҮЙЛЧИЛГЭЭ ҮЗҮҮЛЭГЧИЙН
ҮЙЛ АЖИЛЛАГААНЫ ЖУРАМ

НЭГ.НИЙТЛЭГ ҮНДЭСЛЭЛ

1.1.Санхүүгийн зохицуулах хороо (цаашид "Хороо" гэх)-оос виртуал хөрөнгийн үйлчилгээ үзүүлэгч болон түүний санхүүгийн тайланд аудит хийх хуулийн этгээдийг бүртгэх,  виртуал хөрөнгийн үйлчилгээ үзүүлэгчийн зохистой засаглал, үйл ажиллагаа, өөрийн хөрөнгийн хэмжээ, тайлан мэдээ болон мэргэжлийн холбоонд тавигдах шаардлагыг тогтоохтой холбогдох харилцааг энэ журмаар зохицуулна. 

ХОЁР.ВИРТУАЛ ХӨРӨНГИЙН ҮЙЛЧИЛГЭЭ ҮЗҮҮЛЭГЧИЙГ БҮРТГЭХ

2.1.Виртуал хөрөнгийн үйлчилгээ үзүүлэгчээр бүртгүүлэхээр хүсэлт гаргагч (цаашид "хүсэлт гаргагч" гэх) нь дараах шаардлагыг хангасан байна:

2.1.1.Виртуал хөрөнгийн үйлчилгээ үзүүлэгчийн тухай хуулийн 7 дугаар зүйлд заасан;

2.1.2.Энэ журмын 2.2-2.13-т заасан бүтэц, зохион байгуулалт, хүний нөөц болон бусад шаардлага;

2.1.3.Виртуал хөрөнгийн үйлчилгээ үзүүлэгчийн тухай хуулийн 6.1.1-6.1.5-д заасан үйлчилгээг эрхлэх хүсэлт гаргагчийн хувь нийлүүлсэн хөрөнгийн доод хэмжээ тус бүр 400.0 сая төгрөгөөс доошгүй байх; 

2.1.4.Виртуал хөрөнгийн үйлчилгээ үзүүлэгчийн тухай хуулийн 4.1.4, 7.2-т тус тус заасан холбогдох этгээд, эрх бүхий албан тушаалтан нь Хорооноос баталсан тохиромжтой этгээдийг тодорхойлох журамд заасан шаардлагыг хангасан байх.

2.2.Хувь нийлүүлсэн хөрөнгө нь зээлийн эх үүсвэрээс бусад мөнгөн хөрөнгөөс бүрдсэн байх ба энэ журмын 2.1.3-т заасан үйлчилгээг хавсран эрхлэх тохиолдолд хувь нийлүүлсэн хөрөнгийн доод хэмжээг тус бүрээр нэмэгдүүлэн тооцно.

2.3.Хүсэлт гаргагч тав буюу түүнээс дээш гишүүнтэй төлөөлөн удирдах зөвлөлтэй байх ба тэдгээрийн хоёроос доошгүй нь хараат бус гишүүн байна.

2.4.Энэ журмын 2.3-д заасан төлөөлөн удирдах зөвлөл дараах дүрэм, журам, бодлогын баримт бичгийг баталсан байна:

2.4.1.төлөөлөн удирдах зөвлөлийн үйл ажиллагааны журам;

2.4.2.компанийн дөрвөн жилийн бизнес төлөвлөгөө;  

2.4.3.Мөнгө угаах болон терроризмыг санхүүжүүлэхтэй тэмцэх тухай хуульд заасан шаардлагыг хангасан мөнгө угаах болон терроризмыг санхүүжүүлэх эрсдэлийг бууруулах, удирдах талаар хэрэгжүүлэх төлөвлөгөө, дотоод хяналтын хөтөлбөр;

2.4.4.мэдээллийн ил тод байдал, тайлагналын журам; 

2.4.5.MNS ISO/IEC 27001 стандартын шаардлага, Кибер аюулгүй байдлын тухай хуульд нийцүүлсэн мэдээллийн технологийн аюулгүй байдлыг хангах үйл ажиллагааны журам;

2.4.6.дотоод мэдээллийг хууль бусаар ашиглахаас сэргийлэх журам; 

2.4.7.арилжааг урвуулан ашиглахаас сэргийлэх, хяналт тавих журам;

2.4.8.үйл ажиллагааг түр зогсоох, хязгаарлалт тогтоох, татан буугдах, үйлчилгээ зогсох, кибер халдлага, түрэмгийлэлд өртөх зэрэг онцгой нөхцөл байдал үүссэн үед авах арга хэмжээний нарийвчилсан төлөвлөгөө;

2.4.9.Виртуал хөрөнгийн үйлчилгээ үзүүлэгчийн тухай хуулийн 6.1.1-6.1.5-д заасан тухайн үйлчилгээг эрхлэхтэй холбоотой үйл ажиллагааны журам;

2.4.10.бусад шаардлагатай журам.

2.5.Хүсэлт гаргагч Виртуал хөрөнгийн үйлчилгээ үзүүлэгчийн тухай хуулийн 6.1.1-6.1.2-т заасан үйлчилгээг эрхлэхтэй холбоотой журамд өөрийн программ хангамж дээр виртуал хөрөнгийг арилжих, арилжаанаас хасахтай холбогдох зохицуулалтыг тусгасан байна.

2.6.Хүсэлт гаргагч Виртуал хөрөнгийн үйлчилгээ үзүүлэгчийн тухай хуулийн 6.1.5-д заасан үйлчилгээг эрхлэхтэй холбоотой журамд дараах зүйлсийг тусгасан байна:

2.6.1.нийтэд санал болгох виртуал хөрөнгө гаргагч болон тухайн виртуал хөрөнгө, түүний танилцуулгад тавигдах шаардлага;

2.6.2.нийтэд санал бол гох виртуал хөрөнгө гаргагчийн биелүүлэх үүрэг, виртуал хөрөнгийн үйлчилгээ үзүүлэгчид хүргүүлэх мэдээллийн агуулга, хугацаа;

2.6.3.нийтэд санал болгон гаргасан виртуал хөрөнгийг бүртгэлээс хасах нөхцөл;

2.6.4.бусад.

2.7.Хүсэлт гаргагч дараах бүтэц, зохион байгуулалт, тухайн чиглэлээр мэргэшсэн хүний нөөцтэй байна:

2.7.1.дотоод хяналт, эрсдэлийн удирдлагыг хэрэгжүүлэх нэгжтэй, эсхүл хариуцсан ажилтантай байх;

2.7.2.мэдээллийн технологи, аюулгүй байдал хариуцсан нэгжтэй, эсхүл хариуцсан ажилтантай байх;

2.7.3.харилцагчийн үйлчилгээний нэгжтэй, эсхүл хариуцсан ажилтантай байх;

2.7.4.Мөнгө угаах болон терроризмыг санхүүжүүлэхтэй тэмцэх тухай хуулийн хэрэгжилтэд хяналт тавих болон комплайнсын хяналтыг хэрэгжүүлэх чиг үүрэг бүхий хариуцсан нэгжтэй, эсхүл хариуцсан ажилтантай байх ба хэрэгжилтэд хяналт тавих этгээд нь төлөөлөн удирдах зөвлөл байх;

2.7.5.Виртуал хөрөнгийн үйлчилгээ үзүүлэгчийн тухай хуулийн 6.1.1-6.1.5-д заасан үйлчилгээг эрхлэхтэй холбоотой үйл ажиллагааг хариуцсан нэгжтэй, эсхүл хариуцсан ажилтантай байна.

2.8. Энэ журмын 2.7-д заасан ажилтан нь Виртуал хөрөнгийн үйлчилгээ үзүүлэгчийн тухай хуулийн 7.2.2, 7.2.3-т заасан шаардлагыг хангасан, хуульд өөрөөр заагаагүй бол ашиг сонирхлын зөрчил болон виртуал хөрөнгө гаргагч, эзэмшигч, харилцагчид хохирол учруулахуйц нөхцөл байдал үүсгэх тохиолдолд давхар ажил хавсран эрхэлдэггүй байна.

2.9.Энэ журмын 2.7.1-2.7.3-д заасан нэгж, эсхүл ажилтны чиг үүргийг гэрээний үндсэн дээр бусад мэргэжлийн байгууллагаар гүйцэтгүүлж болно.

2.10.Хүсэлт гаргагч виртуал хөрөнгийн үйлчилгээг шуурхай, тасралтгүй үзүүлэхэд шаардлагатай үйл ажиллагааны онцлогт тохирсон тусгай программ хангамжтай байх бөгөөд уг программ хангамж нь дараах шаардлагыг хангасан байна:

2.10.1.арилжаанд оролцогчид нэгнийгээ таньж мэдэх боломжгүй байх;

2.10.2.харилцагчийн хувийн мэдээлэл гуравдагч этгээдээс нууц байх;

2.10.3.зах зээлийн шаардлагад нийцүүлэн хөгжүүлэх, шинэчлэх боломжтой байх;

2.10.4.олон нийтэд мэдээлэл хүргэх хэсэг буюу нээлттэй самбартай байх;

2.10.5.арилжааны хяналтын системтэй байх;

2.10.6.албан ёсны лицензтэй аюулгүй байдлыг хангах системтэй байх.

2.11.Хүсэлт гаргагч энэ журмын гуравдугаар хавсралтад заасан MNS ISO/IEC 27001 мэдээлэл технологийн стандартын сүүлийн хувилбарыг хангаж, хөндлөнгийн эрх бүхий байгууллагаар баталгаажуулсан байна.

2.12.Хүсэлт гаргагч гадаад улсын виртуал хөрөнгийн үйлчилгээ үзүүлэгч, бусад мэдээллийн технологийн чиглэлээр үйл ажиллагаа явуулдаг этгээдийн программ хангамж, үүлэн технологи, эсхүл дата төвийг ашигладаг бол энэ журмын гуравдугаар хавсралтын 11 дэх хэсэг хамаарахгүй бөгөөд энэ талаар холбогдох нотлох баримт бичгийг бүртгүүлэх хүсэлтийн хамт Хороонд ирүүлнэ. 

2.13.Хүсэлт гаргагч энэ журмын дөрөвдүгээр хавсралтад заасан баримт бичгийг нотлох баримтын хамт Хороонд бичгээр болон цахимаар ирүүлнэ.

2.14.Хороо шаардлагатай тохиолдолд хүсэлт гаргагчаас ирүүлсэн баримт бичгийн талаар холбогдох этгээдээс тодруулж, дүгнэлт гаргуулж, лавлагаа авч болно.

2.15.Хүсэлт гаргагчийн үйл ажиллагаа явуулах ажлын байр, тоног төхөөрөмж, программ хангамж нь энэ журмаар тогтоосон шаардлагыг хангасан эсэхийг Хорооны холбогдох албан тушаалтан газар дээр нь шалгаж, танилцаж болно.

2.16.Хорооноос хүсэлт гаргагчийг виртуал хөрөнгийн үйлчилгээ үзүүлэгчээр бүртгэсэн тохиолдолд виртуал хөрөнгийн үйлчилгээ үзүүлэгчийн нэгдсэн бүртгэлд бүртгэн, зохих зааврын дагуу хувийн хэрэг нээн хөтөлнө.

2.17.Хүсэлт гаргагч нь виртуал хөрөнгийн үйлчилгээ үзүүлэгчээр бүртгүүлсэн тохиолдолд компанийн дүрэм, улсын бүртгэлийн гэрчилгээнд холбогдох тэмдэглэгээг хийлгэж, хуулбарыг шийдвэр гарсан өдрөөс хойш ажлын 15 өдрийн дотор Хороонд ирүүлнэ.

2.18.Хороо дараах үндэслэлээр хүсэлт гаргагчийг виртуал хөрөнгийн үйлчилгээ үзүүлэгчээр бүртгэхээс татгалзана:

2.18.1.бүртгүүлэхээр ирүүлсэн баримт бичгийг хуурамчаар үйлдсэн;

2.18.2.эрх бүхий албан тушаалтан болон холбогдох этгээд нь Хорооноос тогтоосон тохиромжтой этгээдэд тавигдах шалгуурыг хангаагүй;

2.18.3.Виртуал хөрөнгийн үйлчилгээ үзүүлэгчийн тухай хууль тогтоомж болон энэ журамд заасан нөхцөл, шаардлагыг хангаагүй.

2.19.Хороо виртуал хөрөнгийн үйлчилгээ үзүүлэгчээр бүртгэхээс татгалзсан тохиолдолд энэ талаарх үндэслэл бүхий тайлбарыг хүсэлт гаргагчид Хорооны даргын албан бичгээр мэдэгдэнэ.

ГУРАВ.ВИРТУАЛ ХӨРӨНГИЙН ҮЙЛЧИЛГЭЭ ҮЗҮҮЛЭГЧИЙН

ҮЙЛ АЖИЛЛАГААНД ТАВИГДАХ НӨХЦӨЛ, ШААРДЛАГА

3.1.Виртуал хөрөнгийн үйлчилгээ үзүүлэгч (цаашид "ВХҮҮ" гэх) нь Хорооноос баталсан "Компанийн засаглалын кодекс" болон түүнд нийцүүлсэн дүрэм, журам, заавар, аргачлалыг үйл ажиллагаандаа дагаж мөрдөнө.

3.2.ВХҮҮ харилцагчийн эрх ашгийг хамгаалж, виртуал хөрөнгийн зах зээлийн шударга өрсөлдөөнийг дэмжиж ажиллана.

3.3.Виртуал хөрөнгийн үйлчилгээ үзүүлэгчийн тухай хуулийн 6.1.1, 6.1.2-т заасан үйл ажиллагааг эрхлэхэд дараах шаардлагыг хангаж ажиллана:

3.3.1.харилцагчийн захиалгын үнэ ханш, цаг хугацааны дарааллын дагуу арилжааг шударгаар зохион байгуулах;

3.3.2.харилцагчийг арилжааны талаарх мэдээлэлтэй тухай бүр танилцах боломжоор хангах;

3.3.3.дотоод мэдээллийг хууль бусаар болон арилжааг урвуулан ашиглахаас урьдчилан сэргийлэх чиглэлээр дараах захиалга, арилжаанд дотоод хяналт, шалгалтыг тогтмол хэрэгжүүлэх:

3.3.3.1.өндөр үнийн дүнтэй;

3.3.3.2.үнэ ханшийн өсөлт, бууралт ихтэй;

3.3.3.3.үнэ ханшид нөлөөлөхүйц үнээр, цөөн тоо ширхгээр арилжсан;

3.3.3.4.холбогдох болон нэгдмэл сонирхолтой этгээдүүдийн хооронд тав ба түүнээс дээш удаа арилжаа хийгдсэн;

3.3.3.5.хэвийн бус, анхаарал татсан гэж үзсэн бусад.

3.3.4.энэ журмын 3.3.3-т заасан захиалга, арилжаанд хийсэн хяналт, шалгалтаар Эрүүгийн хуулийн 18.19, 18.20 дугаар зүйлд тус тус заасан гэмт хэргийн шинжтэй үйлдэл байж болзошгүй гэж сэжиглэсэн тохиолдолд 24 цагийн дотор мэдээллийг нотлох баримтын хамт Цагдаагийн ерөнхий газар, Тагнуулын ерөнхий газарт хүргүүлж, Хороонд мэдээлэх.

3.3.5.виртуал хөрөнгийн арилжааны хэлцэл биелсний дараа дор дурдсан мэдээллийг харилцагч авах боломжтой байх:

3.3.5.1.виртуал хөрөнгийн нэр;

3.3.5.2.хэлцэл биелсэн хугацаа;

3.3.5.3.арилжсан виртуал хөрөнгийн хэмжээ, үнэ ханш;

3.3.5.4.бусад шаардлагатай мэдээлэл.

3.3.6.арилжааг дараах аргаар зохион байгуулах боломжтой байх:

3.3.6.1.зах зээлийн үнийн арга (market order);

3.3.6.2.нөхцөлт захиалгын арга (limit order).

3.3.7.арилжаанаас хассан виртуал хөрөнгийн мэдээллийг тайлбарын хамт 24 цагийн дотор Хороонд албан бичгээр хүргүүлэх.

3.4.Виртуал хөрөнгийн үйлчилгээ үзүүлэгчийн тухай хуулийн 6.1.3-д заасан үйл ажиллагааг эрхлэхэд дараах шаардлагыг хангаж ажиллана:

3.4.1.Шилжүүлэгч ВХҮҮ нь гурван сая төгрөг болон түүнээс дээш үнийн дүнтэй виртуал хөрөнгийг шилжүүлэхэд дараах мэдээллийг хүлээн авагч ВХҮҮ-д хүргүүлсэн байна:

3.4.1.1.шилжүүлэгчийн овог, нэр/хуулийн этгээдийн нэр; 

3.4.1.2.шилжүүлэгчийн регистрийн дугаар;

3.4.1.3.шилжүүлгийн дугаар, эсхүл шилжүүлэгчийн хэтэвчний хаяг; 

3.4.1.4.шилжүүлэгчийн бүртгэлтэй хаяг; 

3.4.1.5.шилжүүлгийн зорилго; 

3.4.1.6.хүлээн авагчийн овог, нэр /хуулийн этгээдийн нэр;

3.4.1.7.хүлээн авагчийн бүртгэлтэй хаяг;

3.4.1.8.хүлээн авагч талын улсын нэр;

3.4.1.9.хүлээн авагч талын ВХҮҮ-ийн нэр;

3.4.1.10.шаардлагатай бусад.

3.4.2.Хүлээн авагч ВХҮҮ нь гурван сая төгрөг болон түүнээс дээш үнийн дүнтэй виртуал хөрөнгийг хүлээн авахдаа шилжүүлэгч ВХҮҮ-ээс дараах мэдээллийг авсан байна:

3.4.2.1.шилжүүлэгчийн овог, нэр/хуулийн этгээдийн нэр;

3.4.2.2.шилжүүлэгчийн регистрийн дугаар;

3.4.2.3.шилжүүлгийн дугаар, эсхүл шилжүүлэгчийн хэтэвчний хаяг;

3.4.2.4.шилжүүлэгчийн бүртгэлтэй хаяг;

3.4.2.5.хүлээн авагчийн овог, нэр;

3.4.2.6.шилжүүлгийн дугаар, эсхүл хүлээн авагчийн хэтэвчний хаяг.

3.4.3.Бүртгэлгүй хэтэвчнээс шилжүүлэг хүлээн авах тохиолдолд энэ журмын 3.4.2-т заасан мэдээллийг авсан байх;

3.4.4.Шилжүүлэгч ВХҮҮ энэ журмын 3.4.2-т заасан мэдээллийг нэн даруй буюу шилжүүлэг хийхээс өмнө, эсхүл шилжүүлэг хийгдэх хугацаанд аюулгүй хэлбэрээр хүргүүлсэн байх; 

3.4.5.Шилжүүлэгч болон хүлээн авагч ВХҮҮ нь энэ журмын 3.4.1, 3.4.2-т заасан мэдээллийг дамжуулах, хүлээн авахаас өмнө хамтрагч ВХҮҮ-ийг тодорхойлж, харилцагчийг таньж мэдэх үйл ажиллагааг хэрэгжүүлж, мэдээллийн нууцлал, аюулгүй байдлыг хангасан эсэхийг үнэлсний үндсэн дээр шилжүүлгийг хийх;

3.4.6.Шилжүүлэгч ВХҮҮ дундын ВХҮҮ-ээр дамжуулан шилжүүлгийг хийсэн тохиолдолд энэ журмын 3.4.1, 3.4.2-т заасныг хэрэгжүүлэх; 

3.4.7.Шилжүүлэгч ВХҮҮ нь шилжүүлэг хийж байгаа харилцагчийн мэдээлэл, хүлээн авагч ВХҮҮ нь хүлээн авч буй харилцагчийн мэдээллийн үнэн бодит байдлыг шалгасан байх;

3.4.8.ВХҮҮ харилцагчийг таньж мэдэх эрсдэлд суурилсан аргачлалыг хэрэгжүүлж, өндөр эрсдэлтэй гэж үзсэн этгээд рүү шилжүүлэг хийхгүй болон түүнтэй бизнесийн харилцаа тогтоохгүй байх;

3.4.9.Шилжүүлэгч болон хүлээн авагч ВХҮҮ нь энэ журмын 3.4.1, 3.4.2-т заасан мэдээллийг эрх бүхий байгууллагад түргэн шуурхай гаргаж өгөхөд бэлэн хадгалах;

3.4.10.харилцагчийн виртуал хөрөнгийг шилжүүлэхдээ багадаа хоёр шатлалт танилт хийж, IP хаяг, хэтэвчний хаягийн үнэн зөв, бодит байдлыг баталгаажуулах.

3.5.Виртуал хөрөнгийн үйлчилгээ үзүүлэгчийн тухай хуулийн 6.1.4-т заасан үйл ажиллагааг эрхлэхэд дараах шаардлагыг хангаж ажиллана:

3.5.1.ВХҮҮ өөрийн хөрөнгийг 100 дахин нэмэгдүүлснээс хэтрэхгүй харилцагчийн виртуал хөрөнгийг хадгалж, удирдах;

3.5.2.ВХҮҮ өөрийн хөрөнгийн хэмжээний шалгуурыг улирал бүр тооцож, энэ журмын 3.5.1-т заасан шаардлагыг хангаж ажиллах;

3.5.3.ВХҮҮ виртуал хөрөнгийг харилцагчийн даалгавраар хадгалах, удирдахдаа багадаа хоёр шатлалт танилт хийж, IP хаяг, хэтэвчний хаягийн үнэн зөв, бодит байдлыг баталгаажуулах.

3.6.Виртуал хөрөнгийн үйлчилгээ үзүүлэгчийн тухай хуулийн 6.1.5-д заасан үйл ажиллагааг эрхлэхэд дараах шаардлагыг хангаж ажиллана:

3.6.1.ВХҮҮ виртуал хөрөнгийг нийтэд санал болгох, худалдахтай холбоотой ажлыг зохион байгуулахаас өмнө тухайн виртуал хөрөнгө гаргагчтай хамтын ажиллагааны гэрээ байгуулсан байх;

3.6.2.ВХҮҮ виртуал хөрөнгө гаргагчийн виртуал хөрөнгийг нийтэд санал болгох, худалдахтай холбоотой ажлыг зохион байгуулахаас өмнө дараах мэдээлэлд үндэслэж шийдвэр гаргасан байна:

3.6.2.1.виртуал хөрөнгө, түүний төсөл нь эдийн засгийн үр ашигтай, бодитой, хэрэгжихүйц эсэх;

3.6.2.2.виртуал хөрөнгө гаргагч, түүний эцсийн өмчлөгч, эрх бүхий албан тушаалтан нь эдийн засгийн гэмт хэрэгт холбогдож байгаагүй, хугацаа хэтэрсэн өр зээлгүй, бизнесийн нэр хүндтэй, мэргэжлийн багтай эсэх;

3.6.2.3.виртуал хөрөнгийн суурилсан блокчэйн нь бүрэн хөгжүүлэлт хийгдэж, кибер аюулгүй байдлыг хангасан эсэх;

3.6.2.4.бусад.

3.6.3.ВХҮҮ виртуал хөрөнгө гаргагчийн виртуал хөрөнгийг нийтэд санал болгох, худалдах танилцуулгад дор дурдсан мэдээллийг тусгуулсан байна:

3.6.3.1.танилцуулга нь монгол хэл дээр бичигдсэн байх;

3.6.3.2.виртуал хөрөнгийн хэрэглээ, гаргаж буй зорилго, блокчэйний төрөл;

3.6.3.3.виртуал хөрөнгө гаргагчийн оноосон нэр, оршин байгаа газрын шуудангийн болон холбоо барих хаяг, эрхэлж байгаа үйл ажиллагааны талаар;

3.6.3.4.виртуал хөрөнгө гаргагчийн хувьцаа эзэмшигч, түүний эцсийн өмчлөгчийн талаарх мэдээлэл, эзэмшиж байгаа хувьцааны тоо, хувь хэмжээ;

3.6.3.5.виртуал хөрөнгө гаргагчийн бүтэц, зохион байгуулалт, эрх бүхий албан тушаалтны нэр, зураг, ажлын туршлага, бусад нэмэлт мэдээлэл;

3.6.3.6.виртуал хөрөнгө гаргагчийн сүүлийн нэг жилийн санхүүгийн тайлан, түүний талаар аудитын байгууллагаас гаргасан дүгнэлт;

3.6.3.7.нийтэд санал болгох виртуал хөрөнгийн тоо хэмжээ, санал болгох үнэ;

3.6.3.8.татан төвлөрүүлсэн хөрөнгийн зарцуулалт, үйл ажиллагааны төлөвлөгөө;

3.6.3.9.виртуал хөрөнгийн хуваарилалт, тархалтын мэдээлэл;

3.6.3.10.виртуал хөрөнгө гаргагчийн үйл ажиллагаанд учирч болох эрсдэлийн талаарх мэдээлэл;

3.6.3.11.виртуал хөрөнгөнд хийсэн технологийн аудитын дүгнэлт;

3.6.3.12.шаардлагатай гэж үзсэн бусад мэдээлэл.

3.6.4.ВХҮҮ виртуал хөрөнгийн танилцуулга, холбогдох баримт, мэдээллийг нийтэд санал болгох, худалдах ажиллагааг зохион байгуулахаас өмнө ажлын 10 өдрийн дотор Хороонд хүргүүлнэ.

3.6.5.ВХҮҮ виртуал хөрөнгийн танилцуулга, токеномикс, үйл ажиллагааны төлөвлөгөөний хэрэгжилтэд тогтмол хяналт тавьж, эрсдэлийг бууруулах арга хэмжээг авч хэрэгжүүлэн хагас жил тутамд тайланг дараа сарын 20-ны өдрийн дотор Хороонд ирүүлнэ.

3.7.ВХҮҮ дараах мэдээллийг өөрийн программ хангамж болон цахим хуудсанд ил тод, нээлттэйгээр байршуулж ажиллана.

3.7.1.Виртуал хөрөнгийн үйлчилгээ үзүүлэгчийн тухай хуулийн 9.1.1-9.1.13, 10.13-д заасан мэдээлэл;

3.7.2.арилжааны программ хангамжийг ашиглахтай холбоотой заавар, зөвлөмж, гарын авлага;

3.7.3.олон нийттэй харилцах утас, цахим шуудан, олон нийтийн сүлжээний хаяг, үйл ажиллагаа явуулж буй хаяг байршил;

3.7.4.өөрийн программ хангамжаар дамжуулан арилжиж буй дотоодын нийтэд санал болгон, худалдсан виртуал хөрөнгийн танилцуулга;

3.7.5.бүтээгдэхүүн, үйлчилгээний шимтгэл, хураамжийн талаарх мэдээлэл;

3.7.6.виртуал хөрөнгийн блокчэйн дээрх бүртгэлийн дугаар, ялгах тэмдэг, нийт гаргасан болон арилжиж буй тоо ширхэг, үнэлгээ, ханш, арилжааны дүн;

3.7.7.виртуал хөрөнгийн бүртгэлийн шаардлага, шалгуур, дүрэм, журам;

3.7.8.харилцагчийн санал, гомдлыг хүлээн авах, шийдвэрлэх ажиллагааны талаарх мэдээлэл;

3.7.9.ВХҮҮ-ийн үндсэн үйл ажиллагааны танилцуулга, санхүүгийн тайлан, бизнест шууд нөлөө үзүүлэхүйц хэлцлийн талаар;

3.7.10.үйл ажиллагаанд ашиглах программ хангамж, систем болон мэдээлэл, технологийн өөрчлөлт, шинэчлэлтийн талаар.

3.8. ВХҮҮ өөрийн программ хангамжаар дамжуулан нийтэд санал болгон, худалдсан виртуал хөрөнгө гаргагчийн үйл ажиллагааны дараах өөрчлөлтийн талаарх мэдээллийг тухай бүр мэдээлнэ:

3.8.1.эрх бүхий албан тушаалтны өөрчлөлт;

3.8.2.виртуал хөрөнгийн танилцуулга, токеномикс, үйл ажиллагааны төлөвлөгөөний өөрчлөлт, тэдгээрийн гүйцэтгэл буурсан;

3.8.3.бүтэц, зохион байгуулалтад орсон өөрчлөлт;

3.8.4.эрх бүхий албан тушаалтан, ажилтан эдийн засгийн гэмт хэрэгт холбогдсон нь шүүхээр тогтоогдсон;

3.8.5.ВХҮҮ-ийн үйл ажиллагааны дотоод журамд заасан бусад мэдээлэл.

3.9.ВХҮҮ харилцагчийн эрх ашгийг хамгаалах үйл ажиллагааны хүрээнд дараах арга хэмжээг авч хэрэгжүүлнэ:

3.9.1.харилцагчийн өргөдөл, гомдлын бүртгэл хөтөлж, хүлээн авснаас хойш ажлын 7 өдрийн дотор хариу хүргүүлэх;

3.9.2.харилцагч, олон нийтийн виртуал хөрөнгийн эрсдэлийн талаарх мэдлэгийг дээшлүүлэхэд чиглэсэн ажлыг улирал бүр зохион байгуулах;

3.9.3.өөрийн ажилтнаас харилцагчийн хувийн мэдээллийг гадагш задруулахгүй, ажлын шаардлагаас бусад зорилгоор ашиглахгүй байх талаар баталгааг авах.

3.10.ВХҮҮ виртуал хөрөнгийн арилжааг урвуулан ашиглахаас сэргийлэх зорилгоор дараах мэдээллийг тогтмол, эсхүл тухай бүр программ хангамж болон цахим хуудсанд ил тод, нээлттэйгээр урьдчилан байршуулж, олон нийтэд мэдээлнэ:

3.10.1.арилжааны программ хангамж дахь виртуал хөрөнгийн үнэ ханш нь олон улсын зах зээл дээрх дундаж үнээс харьцангуй доогуур, эсхүл дээгүүр байх тохиолдолд үнийн зөрүүг тогтворжуулан хөрвөх чадварыг нэмэгдүүлэх зорилгоор хийж буй тухайн ВХҮҮ-ийн арилжааны талаар;

3.10.2.виртуал хөрөнгө гаргагч нь тухайн виртуал хөрөнгийн үнэ ханшийг огцом унахаас сэргийлэх зорилгоор ВХҮҮ-тэй тохиролцож, холбогдох гэрээ байгуулсны үндсэн дээр өөрөө эргүүлэн худалдан авах ажиллагааны талаар. 

3.11.ВХҮҮ нь энэ журмын гуравдугаар хавсралтад заасан мэдээлэл технологийн стандартын сүүлийн хувилбарыг үйл ажиллагаандаа мөрдөж ажиллана. 

3.12.ВХҮҮ хууль тогтоомж, энэ журамд заасан мэдээллийг бүрэн гүйцэд, үнэн зөв, агуулгын хувьд хоёрдмол утгагүйгээр тогтоосон хугацаа болон тухай бүрд харилцагч, олон нийтэд мэдээлж, Хороонд хүргүүлж тайлагнана.

3.13.ВХҮҮ жилийн санхүүгийн тайланг дараа оны 02 дугаар сарын 10-ны өдрийн дотор, хагас жил, улирлын санхүүгийн тайланг дараа сарын 20-ны өдрийн дотор Хороонд тогтмол хүргүүлнэ.

3.14.ВХҮҮ аудитын хуулийн этгээдээр баталгаажуулсан жилийн санхүүгийн тайлан, дүгнэлтийг дараа оны 5 дугаар сарын 01-ний өдрийн дотор Хороонд хүргүүлнэ.

3.15.ВХҮҮ дараах мэдээллийг агуулсан үйл ажиллагааны жилийн тайланг дараа оны 3 дугаар сарын 01-ний өдрийн дотор Хороонд тогтмол хүргүүлж, олон нийтэд мэдээлнэ:

3.15.1.тайлант жилд ВХҮҮ-ийн орлогод нөлөөлсөн хүчин зүйлс;

3.15.2.санхүүгийн нөөцөөр бизнесийн үйл ажиллагаанаас бий болсон өр төлбөрийг бүрэн хариуцах болон шаардлагатай тохиолдолд гадаад, дотоод эх үүсвэрээс санхүүжилт татах боломжтой эсэх;

3.15.3.бүтээгдэхүүн, үйлчилгээний шинэчлэл, төрөлжилт, өөрчлөлт;

3.15.4.хадгалж, удирдаж байгаа харилцагчийн виртуал болон мөнгөн хөрөнгийн тоон үзүүлэлт;

 3.15.5.ашиглаж буй программ хангамж, систем, мэдээлэл, технологийн дэд бүтцийн тасралтгүй, найдвартай ажиллагаа, нууцлал, аюулгүй байдалд хийлгэсэн эрсдэлийн үнэлгээний дүгнэлт, эрсдэлийг бууруулах, урьдчилан сэргийлэх арга хэмжээ;

 3.15.6.сонирхлын зөрчилтэй болон их хэмжээний хэлцэл, тухайн хэлцэлд оролцогч талууд;

 3.15.7.эрсдэлийн удирдлагын хэрэгжилт, дотоод аудитын ажлын тайлан;

 3.15.8.бусад мэдээлэл.

3.16. Энэ журмын 2.7-д заасан ажилтан нь давхар ажил эрхлэх тохиолдолд ажил олгогчдоо урьдчилан мэдэгдэнэ. Ажил олгогч тухайн ажил чиг үүрэг нь ашиг сонирхлын зөрчил болон виртуал хөрөнгө гаргагч, эзэмшигч, харилцагчид хохирол учруулахуйц нөхцөл байдал үүсгэх эсэхийг урьдчилан магадлан шалгасны үндсэн дээр ажилтанд давхар ажил эрхлэх зөвшөөрлийг олгоно.

3.17. Ажил олгогч нь энэ журмын 3.16-д заасан магадлан шалгах ажиллагааг хийж, ажилтанд зөвшөөрөл олгохоос өмнө холбогдох баримт бичгийг Хороонд ирүүлнэ.

3.18.ВХҮҮ оноосон нэр, хаяг байршил болон холбогдох этгээдээс бусад хувьцаа эзэмшигч өөрчлөгдсөн тохиолдолд компанийн дүрэм, улсын бүртгэлийн гэрчилгээний хуулбарыг ажлын таван өдрийн дотор Хороонд хүргүүлнэ.

3.19.ВХҮҮ хувь нийлүүлсэн хөрөнгийн хэмжээ, холбогдох этгээд болон эрх бүхий албан тушаалтныг өөрчлөх тохиолдолд энэхүү журмын тавдугаар хавсралтад заасан баримт бичгийг нотлох баримтын хамт Хороонд бичгээр болон цахимаар ирүүлж, урьдчилан шийдвэрлүүлнэ.

3.20.Хороо энэхүү журмын 3.16-д заасан баримт бичгийг бүрэн гүйцэд ирүүлснээс хойш ажлын 10 өдрийн дотор шийдвэрлэнэ.

ДӨРӨВ.ВИРТУАЛ ХӨРӨНГИЙН ҮЙЛЧИЛГЭЭ ҮЗҮҮЛЭГЧИЙН

ҮЙЛ АЖИЛЛАГААГ ХЯЗГААРЛАХ, ТҮР ЗОГСООХ, БҮРТГЭЛЭЭС ХАСАХ

4.1.Виртуал хөрөнгийн үйлчилгээ үзүүлэгчийн тухай хуулийн 10.10-т заасан үйл ажиллагаа болон тухайлсан виртуал хөрөнгө, түүнтэй холбоотой бүтээгдэхүүнд Хорооноос мөнгө угаах, терроризмыг санхүүжүүлэхтэй тэмцэх зорилгоор хязгаарлалт тогтоож болно.

4.2.Хязгаарлалт тогтоох нь ВХҮҮ-ийн зайны болон газар дээрх хяналт шалгалт, бусад эрх бүхий байгууллагын дүгнэлт, зөвлөмж, мэдэгдэл, анхааруулга, тодорхойлолт зэрэгт үндэслэнэ.

4.3.ВХҮҮ хязгаарлалтаас чөлөөлүүлэх хүсэлтээ нотлох баримтын хамт Хороонд ирүүлж болох бөгөөд ирүүлсэн хүсэлтийг ажлын 20 өдрийн дотор Хороо шийдвэрлэнэ.

4.4.Энэ журмын 4.2-т заасан үндэслэл болсон шалтгаан, нөхцөл байдал арилсан гэж Хороо үзвэл хязгаарлалтаас чөлөөлнө.

4.5.Хорооноос дараах тохиолдолд ВХҮҮ-ийн үйл ажиллагааг гурван сар хүртэл хугацаагаар түр зогсоож болно:

 4.5.1.Виртуал хөрөнгийн үйлчилгээ үзүүлэгчийн тухай хууль, бусад холбогдох хууль тогтоомж болон салбарын зохицуулалтын журамд заасан нөхцөл, шаардлагыг хангаж ажиллах талаар Хороо, түүний эрх бүхий албан тушаалтан эсхүл улсын байцаагчаас хүргүүлсэн албан шаардлагыг заасан хугацаанд хангаж ажиллаагүй, үүргээ биелүүлээгүй;

 4.5.2.Хороо, түүний эрх бүхий албан тушаалтан, эсхүл улсын байцаагчаас ВХҮҮ-ийн үйл ажиллагаатай холбоотойгоор удаа дараа хүргүүлсэн мэдэгдэл, анхааруулгын биелэлтийг хангаагүй;

 4.5.3.гэмт хэрэг үйлдэх замаар үйл ажиллагаа эрхэлж байгаа талаар эрх бүхий этгээдээс үндэслэл бүхий хүсэлт гаргасан.

4.6.Түр зогсоосон нөхцөл байдал арилсан бол ВХҮҮ үйл ажиллагааг сэргээлгэх хүсэлтээ нотлох баримтын хамт Хороонд ирүүлнэ.

4.7.Хорооноос дараах тохиолдолд ВХҮҮ-ийг бүртгэлээс хасна:

4.7.1.Виртуал хөрөнгийн үйлчилгээ үзүүлэгчийн тухай хууль, бусад холбогдох хууль тогтоомж болон салбарын зохицуулалтын журамд заасан нөхцөл, шаардлагыг цаашид хангаж ажиллах боломжгүй болсон нь тогтоогдсон;

4.7.2.бүртгүүлснээс хойш гурван сарын дотор Виртуал хөрөнгийн үйлчилгээ үзүүлэгчийн тухай хуулийн 6.1-т заасан үйл ажиллагааг эрхэлж эхлээгүй;

4.7.3.бүртгэлээс хасуулах тухай хүсэлтийг Хороонд ирүүлсэн, эсхүл татан буулгах тухай хувьцаа эзэмшигчдийн хурлын болон шүүхийн шийдвэр гарсан;

4.7.4.баримт бичгийг хуурамчаар үйлдэн Хороонд бүртгүүлсэн нь тогтоогдсон;

4.7.5.түр зогсоосон хугацаанд үндэслэл болсон нөхцөл байдал, зөрчлийг арилгаагүй;

4.7.6.гэмт хэрэг үйлдэж харилцагчид их хэмжээний хохирол учруулсан нь тогтоогдсон.

4.8.ВХҮҮ-ийг бүртгэлээс хассан шийдвэр хүчин төгөлдөр болсноос хойш нэг жилийн дотор тухайн компанийг дахин бүртгүүлэхтэй холбоотой хүсэлтийг хүлээн авахгүй.

4.9.ВХҮҮ-ийн бүртгэлээс хасагдсан компани нь төлөвлөгөө, харилцагчтай байгуулсан гэрээнд заасны дагуу холбогдох арга хэмжээг авч, тайланг ажлын 20 өдрийн дотор Хороонд ирүүлнэ.

4.10.Хороо ВХҮҮ-ийн үйл ажиллагааг түр зогсоосон, сэргээсэн, бүртгэлээс хассан, хязгаарлалт тогтоосон, хязгаарлалтаас чөлөөлсөн шийдвэрээ олон нийтэд нээлттэй байршуулна.

4.11.Энэ журмын 4.5-д заасны дагуу түр зогсоосон, эсхүл 4.7-т заасны дагуу бүртгэлээс хассан нь харилцагчийн зөвшөөрлөөр түүний виртуал болон мөнгөн хөрөнгийн зарлагын гүйлгээ хийх  ВХҮҮ-ийн эрхийг хязгаарлахгүй.

 ТАВ.ВИРТУАЛ ХӨРӨНГИЙН ҮЙЛЧИЛГЭЭ ҮЗҮҮЛЭГЧИЙН

САНХҮҮГИЙН ТАЙЛАНД АУДИТ ХИЙХ ХУУЛИЙН ЭТГЭЭДИЙГ БҮРТГЭХ

5.1.Виртуал хөрөнгийн үйлчилгээ үзүүлэгчийн санхүүгийн тайланд аудитын хуулийн этгээд (цаашид "аудитын хуулийн этгээд" гэх) дараах нөхцөл, шаардлагыг хангасан байна: 

5.1.1.санхүү, төсвийн асуудал эрхэлсэн төрийн захиргааны тѳв байгууллагаас олгосон аудитын үйл ажиллагаа эрхлэх тусгай зөвшөөрөлтэй, аудитын үйл ажиллагааг хоёроос доошгүй жил эрхэлсэн байх; 

5.1.2.дөрвөөс дээш орон тооны аудитортой байх; 

5.1.3.хувь нийлүүлсэн хөрөнгийн хэмжээ 30.0 сая төгрөгөөс дээш байх; 

5.1.4.аудитор нь мэргэжлийн хариуцлагын даатгалын гэрээг байгуулсан байх;

5.1.5.аудитор нь мэргэжлийн ёс зүйн зөрчилгүй байх;

5.1.6.аудитор нь Хороо болон Виртуал хөрөнгийн үйлчилгээ үзүүлэгчийн тухай хуулийн 10.8-д заасан мэргэжлийн холбооноос хамтран зохион байгуулсан багц сургалтад хамрагдсан байна.

5.2.Энэ журмын 5.1-т заасан нөхцөл, шаардлагыг хангасан аудитын хуулийн этгээд нь бүртгүүлэх хүсэлт гаргахдаа энэ журмын наймдугаар хавсралтад заасан баримт бичгийг нотлох баримтын хамт бичгээр болон цахим хэлбэрээр Хороонд ирүүлнэ.  

5.3.Хороо энэ журмын 5.2-т заасан баримт бичгийг бүрэн гүйцэд ирүүлснээс хойш ажлын 15 өдрийн дотор бүртгэх эсэхийг шийдвэрлэнэ.  

5.4.Хороо аудитын хуулийн этгээдээр бүртгэхээс татгалзсан тохиолдолд энэ талаарх үндэслэл бүхий тайлбарыг хүсэлт гаргагчид Хорооны даргын албан бичгээр мэдэгдэнэ.

5.5.Аудитын хуулийн этгээд бүртгэлээс хасуулах хүсэлт болон оноосон нэр, хаяг байршил, гүйцэтгэх захирал, аудитор өөрчлөгдсөн мэдээллийг тухай бүр энэ журмын долоодугаар хавсралтад заасан холбогдох баримт бичгийн хамт Хороонд ирүүлнэ. 

5.6.Аудитын хуулийн этгээдийн бүртгэлийн хүчинтэй хугацаа санхүү, төсвийн асуудал эрхэлсэн төрийн захиргааны төв байгууллагаас тухайн аудитын хуулийн этгээдэд олгосон тусгай зөвшөөрлийн хугацаатай адил байна.

5.7.Хороонд бүртгэгдсэн аудитын хуулийн этгээдийг дараах үндэслэлээр бүртгэлээс хасна:  

5.7.1.өөрийн хүсэлтээр; 

5.7.2.Хорооноос өгсөн үүрэг даалгаврыг удаа дараа биелүүлээгүй;

5.7.3.бүртгүүлэхдээ хуурамч баримт бичиг бүрдүүлсэн нь тогтоогдсон;

5.7.4.холбогдох хууль тогтоомж болон энэ журмын нөхцөл, шаардлагыг хангахгүй болсон;

5.7.5.виртуал хөрөнгийн үйлчилгээ үзүүлэгчийн нууцтай холбогдсон мэдээллийг бусдад задруулсан, дамжуулсан нь тогтоогдсон;

5.7.6.хуурамч дүгнэлт гаргасан;

5.7.7.санхүү, төсвийн асуудал эрхэлсэн төрийн захиргааны тѳв байгууллага аудитын үйл ажиллагаа эрхлэх тусгай зөвшөөрлийг хүчингүй болгосон.

5.8.Энэ журмын 5.7.1-т зааснаас бусад үндэслэлээр бүртгэлээс хасагдсан аудитын хуулийн этгээд нь бүртгэлээс хасагдсан өдрөөс хойш гурван жилийн хугацаанд Хороонд дахин бүртгүүлэхээр хандахгүй. 

5.9.Хороо аудитын хуулийн этгээдийн үйл ажиллагаанд аудитын чанарын хяналт шалгалтыг дангаар, эсхүл санхүү, төсвийн асуудал эрхэлсэн төрийн захиргааны төв байгууллагатай хамтарч хийж болно.

5.10.Аудитын хуулийн этгээдийг бүртгэсэн, эсхүл бүртгэлээс хассан тохиолдолд ажлын таван өдөрт багтаан тухайн болон санхүү, төсвийн асуудал эрхэлсэн төрийн захиргааны төв байгууллагад албан бичгээр мэдэгдэж, Хорооны цахим хуудсанд байршуулна.

ЗУРГАА.ВИРТУАЛ ХӨРӨНГИЙН ҮЙЛЧИЛГЭЭ ҮЗҮҮЛЭГЧИЙН 

МЭРГЭЖЛИЙН ХОЛБОО

6.1.Виртуал хөрөнгийн үйлчилгээ үзүүлэгчийн мэргэжлийн холбоо (цаашид "мэргэжлийн холбоо" гэх)-г энэ журамд тавигдсан шаардлагыг хангасан эсэхийг Хорооны хуралдаанаар тодорхойлж,  санамж бичиг байгуулан хууль тогтоомжийн дагуу хамтран ажиллана. 

6.2.Мэргэжлийн холбоо дараах шаардлагыг хангасан байна:

6.2.1.хуулийн этгээдийн улсын бүртгэлд бүртгүүлсэн, оноосон нэр, тэмдэг, албан бичгийн хэвлэмэл хуудас, харилцах данстай байх;

6.2.2.Монгол Улсын нутаг дэвсгэрт үйл ажиллагаа эрхэлж буй Хороонд бүртгэлтэй ВХҮҮ-ийн 51-ээс доошгүй хувийг гишүүнээр элсүүлсэн байх; 

6.2.3.Виртуал хөрөнгийн үйлчилгээ үзүүлэгчийн тухай хуулийн 7.1.2, 7.1.5, 7.1.6-д заасан шаардлагыг хангасан талаар дүгнэлт гаргах мэргэжлийн чадамжтай байх; 

6.2.4.ВХҮҮ-ийн салбарын хөгжлийн бодлого, стратеги төлөвлөгөөтэй, гишүүддээ мэргэжил арга зүйн дэмжлэг үзүүлэх чадамжтай байх;

6.2.5.мэргэжлийн ёс зүйн хариуцлага хүлээлгэх дотоод хяналтын бүтэцтэй байх. 

6.3.Мэргэжлийн холбооны удирдах зөвлөлийн дарга, гишүүн, гүйцэтгэх захирал нь Хорооноос баталсан тохиромжтой этгээдийг тодорхойлох журамд заасан шалгуурыг хангасан байна.

6.4.Мэргэжлийн холбооны бүх гишүүдийн хурлаар баталсан Мэргэжлийн холбооны дүрэм болон холбогдох бусад дүрэм, журам нь Виртуал хөрөнгийн үйлчилгээ үзүүлэгчийн тухай хууль, Төрийн бус байгууллагын тухай хууль болон Хорооны холбогдох журамд нийцсэн байна.

6.5.Мэргэжлийн холбоо энэ журмын есдүгээр хавсралтад заасан хамтран ажиллах санамж бичиг байгуулах хүсэлтийг холбогдох баримт бичгийн хамт Хороонд ирүүлнэ.

6.6.Хороо энэ журмын 6.5-д заасан  бүрэн гүйцэд баримт бичгийг хүлээн авсан өдрөөс хойш ажлын 20 өдрийн дотор хянаж, хамтран ажиллах санамж бичиг байгуулах эсэх тухай хүсэлт гаргагчид албан бичгээр мэдэгдэнэ.

6.7.Мэргэжлийн холбоо дараах зарчмыг үйл ажиллагаандаа баримталж ажиллана: 

6.7.1.хууль тогтоомж, Хорооноос баталсан журмыг мөрдөх; 

6.7.2.гишүүдийн хууль ёсны ашиг сонирхлыг хамгаалж, тэдгээрийн санал санаачилгыг дэмжих;

6.7.3.гишүүнчлэлийн хураамжийн зарцуулалт, тайлагнал ил тод, нээлттэй байх; 

6.7.4.гишүүдийн мэдээллийн нууцыг хадгалах;

6.7.5.ВХҮҮ-ийн зах зээлийн нөхцөл байдал, гишүүдийн үйл ажиллагаанд үнэлэлт, дүгнэлт өгөхдөө судалгаа шинжилгээнд суурилсан байх.

6.8.Мэргэжлийн холбоо нь гишүүд болон мэргэжлийн оролцогчдод зориулсан сургалтын хөтөлбөр боловсруулж, Хороогоор батлуулна.

6.9.Мэргэжлийн холбоо нь гишүүдийн тоонд орсон өөрчлөлтийн мэдээг бүтэн жилээр Хороонд ирүүлнэ.

6.10.Мэргэжлийн холбооны хаяг байршил, удирдах зөвлөлийн дарга, гишүүн, гүйцэтгэх захирал өөрчлөгдөх тухай бүр энэ журмын аравдугаар хавсралтад заасан хүсэлтийг холбогдох баримт бичгийн хамт Хороонд ирүүлнэ.

---oоОoо---

"Виртуал хөрөнгийн үйлчилгээ үзүүлэгчийн үйл

ажиллагааны журам"-ын нэгдүгээр хавсралт

ВИРТУАЛ ХӨРӨНГИЙН ҮЙЛЧИЛГЭЭ ҮЗҮҮЛЭГЧЭЭР БҮРТГҮҮЛЭХИЙГ

ХҮССЭН ӨРГӨДӨЛ

Бүртгүүлэхээр мэдүүлж байгаа мэдээлэл, нотлох баримтыг бүрэн гүйцэд, үнэн зөв гаргаж өгсөн бөгөөд хэрэв уг бүрдүүлсэн баримт бичигт аливаа худал ташаа зүйл байвал хариуцлагыг бид хүлээх болно.

Өргөдөл, холбогдох баримт бичгийг хянан шалгаж, виртуал хөрөнгийн үйлчилгээ үзүүлэгчээр бүртгэж өгнө үү.

Бид үйл ажиллагаандаа Мөнгө угаах болон терроризмыг санхүүжүүлэхтэй тэмцэх тухай хууль, Виртуал хөрөнгийн үйлчилгээ үзүүлэгчийн тухай хууль болон бусад холбогдох хууль тогтоомж, журам заавруудыг мөрдлөг болгон ажиллах ба Санхүүгийн зохицуулах хорооноос тавьсан шаардлагуудыг бүрэн хангаж, биелүүлж ажиллана.

Өргөдөл гаргах эрх бүхий этгээд (тохирохыг сонгож "√" тэмдэглээ хийнэ.):

     Гүйцэтгэх удирдлага                               

     Үүсгэн байгуулагч, хувьцаа эзэмшигч

     Итгэмжлэлээр эрх олгогдсон бусад этгээд

Овог, нэр: ________________________

Регистрийн дугаар: _______________

Албан тушаал:  ____________________

Утасны дугаар:     __________________

Өргөдөл гаргагч:

 "Виртуал хөрөнгийн үйлчилгээ үзүүлэгчийн үйл

ажиллагааны журам"-ын хоёрдугаар хавсралт

ЭРХ БҮХИЙ АЛБАН ТУШААЛТАН БОЛОН БУСАД МЭРГЭШСЭН ХҮНИЙ НӨӨЦИЙН ТОДОРХОЙЛОЛТ

1.Ерөнхий мэдээлэл

2.Боловсрол (Ерөнхий боловсролын сургуулийг оролцуулан бичнэ)

3.Ажлын туршлага

4.ТУЗ-ийн дарга, гишүүн, гүйцэтгэх удирдлага бусад мэргэшсэн хүний нөөцийн холбогдох этгээдийн байдал

(Компанийн тухай хуулийн 89.2-т заасан нэгдмэл сонирхолтой этгээдийн мэдээлэл)

Миний бие дээр мэдүүлсэн мэдээллийг бүрэн дүүрэн, үнэн зөв болохыг баталж байна.

Тодорхойлолт гаргасан:

"Виртуал хөрөнгийн үйлчилгээ үзүүлэгчийн үйл

ажиллагааны журам"-ын гуравдугаар хавсралт

ВИРТУАЛ ХӨРӨНГИЙН ҮЙЛЧИЛГЭЭ ҮЗҮҮЛЭГЧИЙН ҮЙЛ

АЖИЛЛАГААНДАА МӨРДӨХ МЭДЭЭЛЛИЙН ТЕХНОЛОГИЙН СТАНДАРТЫН ЖАГСААЛТ

  "Виртуал хөрөнгийн үйлчилгээ үзүүлэгчийн үйл

ажиллагааны журам"-ын дөрөвдүгээр хавсралт

ВИРТУАЛ ХӨРӨНГИЙН ҮЙЛЧИЛГЭЭ ҮЗҮҮЛЭГЧИЙГ БҮРТГЭХЭД

ИРҮҮЛЭХ БАРИМТ БИЧИГ

"Виртуал хөрөнгийн үйлчилгээ үзүүлэгчийн үйл

ажиллагааны журам"-ын тавдугаар хавсралт

ВХҮҮ-ийн хувь нийлүүлсэн хөрөнгийн хэмжээ, холбогдох этгээд болон эрх бүхий албан тушаалтанд өөрчлөлт оруулах тухай өргөдөлд хавсаргах баримт бичиг

  "Виртуал хөрөнгийн үйлчилгээ үзүүлэгчийн үйл

ажиллагааны журам"-ын зургаадугаар хавсралт

ВХҮҮ-ийн хувь нийлүүлсэн хөрөнгийн хэмжээ, холбогдох этгээд болон

эрх бүхий албан тушаалтанд өөрчлөлт оруулах тухай өргөдөл

Өргөдөл гаргасан:

_________________                              _________________     ________________

(Эрх бүхий албан тушаалтан)                          (гарын үсэг)                                (огноо)

"Виртуал хөрөнгийн үйлчилгээ үзүүлэгчийн үйл

ажиллагааны журам"-ын долоодугаар хавсралт

АУДИТЫН ХУУЛИЙН ЭТГЭЭДИЙН ӨРГӨДӨЛ

Бүртгүүлэхээр мэдүүлж байгаа нотлох баримтыг бүрэн гүйцэд, үнэн зөв гаргаж өгсөн бөгөөд хэрэв уг бүрдүүлсэн баримт бичигт аливаа худал ташаа зүйл байвал хариуцлагыг бид хүлээх болно.

Өргөдөл, холбогдох баримт бичгийг хянан шалгаж, виртуал хөрөнгийн үйлчилгээ үзүүлэгчийн санхүүгийн тайланд аудит хийх хуулийн этгээдээр бүртгэнэ үү.

Бид үйл ажиллагаандаа Мөнгө угаах болон терроризмыг санхүүжүүлэхтэй тэмцэх тухай хууль, Виртуал хөрөнгийн үйлчилгээ үзүүлэгчийн тухай хууль, Аудитын тухай хууль болон бусад холбогдох хууль тогтоомж, стандарт, журам, заавруудыг мөрдлөг болгон ажиллах ба Санхүүгийн зохицуулах хорооноос тавьсан шаардлагуудыг бүрэн биелүүлж ажиллана.

Өргөдөл гаргах эрх бүхий этгээд /тохирохыг сонгож "√" тэмдэглэгээ хийнэ./:

  Гүйцэтгэх удирдлага                               

    Үүсгэн байгуулагч, хувьцаа эзэмшигч

  Итгэмжлэлээр эрх олгогдсон бусад этгээд

Нэр: ________________________

Регистрийн дугаар: _______________

Албан тушаал:  ____________________

Утасны дугаар:     __________________ 

ӨРГӨДӨЛ ГАРГАГЧ:

Хуулийн этгээдийн

Тэмдэг           _____________________________        /_____________________ /

                     (Гарын үсэг)                                 (Гарын үсгийн тайлал)

  "Виртуал хөрөнгийн үйлчилгээ үзүүлэгчийн үйл

ажиллагааны журам"-ын наймдугаар хавсралт

АУДИТЫН ХУУЛИЙН ЭТГЭЭДИЙН ӨРГӨДӨЛД ХАВСАРГАХ

БАРИМТ БИЧГИЙН ЖАГСААЛТ

"Виртуал хөрөнгийн үйлчилгээ үзүүлэгчийн үйл

ажиллагааны журам"-ын есдүгээр хавсралт

МЭРГЭЖЛИЙН ХОЛБООНЫ ХАМТРАН АЖИЛЛАХ САНАМЖ БИЧИГ БАЙГУУЛАХ ХҮСЭЛТ

Үнэн зөв мэдээлсэн:

Удирдах зөвлөлийн дарга гарын үсэг огноо

 "Виртуал хөрөнгийн үйлчилгээ үзүүлэгчийн үйл

ажиллагааны журам"-ын аравдугаар хавсралт

МЭРГЭЖЛИЙН ХОЛБООНЫ УДИРДАХ ЗӨВЛӨЛИЙН ДАРГА, ГИШҮҮН, ГҮЙЦЭТГЭХ ЗАХИРАЛ, ХАЯГ БАЙРШЛЫН ӨӨРЧЛӨЛТИЙГ МЭДЭЭЛЭХ ХҮСЭЛТ