Засгийн газрын 2023 оны 07 дугаар

сарын 19-ний өдрийн 278 дугаар

тогтоолын хавсралт

ТӨСВИЙН ХӨРӨНГӨ ОРУУЛАЛТААР ХЭРЭГЖҮҮЛЭХ ТӨСӨЛ,

 АРГА ХЭМЖЭЭГ ТӨЛӨВЛӨХ, САНХҮҮЖҮҮЛЭХ,

 ХЯНАХ, ТАЙЛАГНАХ ЖУРАМ

Нэг.Нийтлэг үндэслэл

1.1.Энэ журмын зорилго нь улсын төсөв, орон нутгийн төсвийн хөрөнгө оруулалтын төлөвлөлт, хэрэгжилт, санхүүжилт, хяналт, өмч бүртгэл болон тайлагналтын удирдлагыг боловсронгуй болгох замаар түүний үр ашиг, ил тод нээлттэй байдлыг дээшлүүлэхэд оршино.

1.2.Барилга байгууламж, их засвар, тоног төхөөрөмж, зөвлөх үйлчилгээ зэрэг төсвийн хөрөнгө оруулалтаар хэрэгжүүлэх төсөл, арга хэмжээг төлөвлөх, санхүүжүүлэх, хянах, тайлагнах, тэдгээртэй холбогдсон харилцаанд энэ журмыг баримтална.

1.3.Төсвийн хөрөнгө оруулалтаар хэрэгжүүлэх төсөл, арга хэмжээг төлөвлөх, санхүүжүүлэх, хянах, тайлагнах үйл ажиллагаанд Төсвийн тухай хууль, Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хууль, Төрийн хэмнэлтийн тухай хууль, Барилгын тухай хууль, Өрийн удирдлагын тухай хууль, Хөгжлийн бодлого, төлөвлөлт, түүний удирдлагын тухай хууль, холбогдох бусад хууль тогтоомж, энэ журмыг удирдлага болгоно.

1.4.Улсын болон орон нутгийн төсвийн хөрөнгө оруулалт, улсын төсвөөс эргэн төлөгдөх нөхцөлтэй концессын гэрээний эргэн төлөлт, төсвөөс санхүүжих төр, хувийн хэвшлийн түншлэлийн төсөл, арга хэмжээ, Засгийн газрын тусгай сангийн хөрөнгө оруулалтаар санхүүжүүлэх барилга байгууламж, тоног төхөөрөмж, их засвар, бараа, ажил, үйлчилгээг төлөвлөх, санхүүжүүлэх, хяналт тавих, тайлагнахад энэ журмыг мөрдлөг болгоно.

1.5.Төсвийн хөрөнгө оруулалтаар хэрэгжүүлэх төрийн болон албаны нууцад хамаарах төсөл, арга хэмжээг төлөвлөх, санхүүжүүлэх, хянах, тайлагнах үйл ажиллагааг холбогдох журмыг баримтлан хэрэгжүүлнэ.

1.6.Энэ журмын 1.5-д зааснаас бусад төсвийн хөрөнгө оруулалтын төсөл, арга хэмжээг төлөвлөх, хэрэгжүүлэх, санхүүжүүлэх, хяналт тавих, тайлагнах, мэдээллийн сан бүрдүүлэх зэрэг үйл ажиллагааг Төсвийн тухай хуулийн 291.4-т заасны дагуу Төсвийн хөрөнгө оруулалтын удирдлагын цахим систем (цаашид "цахим систем" гэх)-ээр хэрэгжүүлнэ.

1.7.Санхүү, төсвийн асуудал эрхэлсэн төрийн захиргааны төв       байгууллага нь энэ журмын хэрэгжилтийг зохион байгуулж ажиллана.

1.8.Энэ журамд хэрэглэсэн нэр томьёог холбогдох хууль тогтоомжид заасны дагуу тодорхойлж, тайлбарлана.

Хоёр.Төсвийн хөрөнгө оруулалтын үйл ажиллагаанд

 оролцогч эрх бүхий этгээдийн чиг үүрэг

2.1.Санхүү, төсвийн асуудал эрхэлсэн төрийн захиргааны төв        байгууллага нь төсвийн хөрөнгө оруулалтаар хэрэгжүүлэх төсөл, арга хэмжээний төлөвлөлт, төсөвлөлт, санхүүжилт, хяналт, тайлагналтын удирдлагыг хариуцан ажиллах бөгөөд дараах чиг үүргийг хэрэгжүүлнэ:

      2.1.1.Төсөл, арга хэмжээний саналыг энэ журамд зааснаар хүлээн авах, боловсруулах, нэгтгэх, төсвийн хөрөнгө оруулалтын санхүүжилт, хяналт, тайлагналтын удирдлагыг хэрэгжүүлэх;

      2.1.2.Төсөл, арга хэмжээний төсвийн эрсдэлийн үнэлгээг хийх, тухайн төсөл, арга хэмжээг санхүүжүүлэх хөрөнгийн эх үүсвэр болон улсын төсөвт үзүүлэх нөлөөллийг тооцож, дүгнэлт гаргах;

      2.1.3.Төсөл, арга хэмжээг холбогдох журам, аргачлалын дагуу үнэлж, эрэмбэлсний үндсэн дээр төсвийн төсөлд тусгах санал боловсруулах;

      2.1.4.Дунд хугацааны төсвийн хүрээний мэдэгдэл болон жилийн төсвийн хязгаарт багтаан төсөл, арга хэмжээний нийт санал боловсруулах;

      2.1.5.Төсвийн хөрөнгө оруулалтын талаар судалгаа, дүн шинжилгээ хийх, цаашид хэрэгжүүлэх арга хэмжээний санал боловсруулах;

      2.1.6.Хууль, журмын шаардлага хангасан төсөл, арга хэмжээний гүйцэтгэлийн санхүүжилтийн эрхийг нээх, шаардлага хангаагүй төсөл, арга хэмжээний гүйцэтгэлийн санхүүжилтийг олгохгүй байх;

      2.1.7.Шаардлагатай баримт бичиг, мэдээллийг төсвийн ерөнхийлөн захирагч, төрийн байгууллага, холбогдох бусад этгээдээс гаргуулж авах;

      2.1.8.Төсвийн хөрөнгө оруулалтаар хэрэгжүүлж байгаа болон санхүүжүүлсэн төсөл, арга хэмжээний хэрэгжилттэй танилцах, үнэлэх, төсвийн үр ашиг, ач холбогдол, үр дүнг тооцох чиглэлээр зохих арга хэмжээ авч ажиллах, энэ хүрээнд аргачлал, үнэлгээний арга зүйг боловсруулж, хэрэгжүүлэх;

      2.1.9.Төсвийн хөрөнгө оруулалтаар санхүүжүүлсэн төсөл, арга хэмжээний өмчийн удирдлага, ашиглалтыг хянах;

      2.1.10.Цахим системийн удирдлагыг хэрэгжүүлэх, хэвийн үйл ажиллагааг хангах;

      2.1.11.Төсвийн хөрөнгө оруулалтын чиглэлээр мэргэжил, арга зүйн зөвлөгөө өгөх, сургалт, хэлэлцүүлэг зохион байгуулах, чадавхжуулах арга хэмжээг хариуцах;

      2.1.12.Төсвийн хөрөнгө оруулалтын удирдлагыг сайжруулах чиглэлээр төрийн захиргааны төв байгууллага, аймаг, нийслэл болон бусад холбогдох байгууллагын төсвийн хөрөнгө оруулалтын үйл ажиллагаанд үнэлэлт дүгнэлт өгөх, шаардлагатай арга хэмжээг авч хэрэгжүүлэх;

      2.1.13.Төсвийн ерөнхийлөн захирагч болон аймаг, нийслэлийн төсвийн хөрөнгө оруулалтын асуудал хариуцсан нэгжийн үйл ажиллагаанд хяналт, үнэлгээ хийх.

2.2.Төсвийн ерөнхийлөн захирагч дараах чиг үүргийг хэрэгжүүлнэ:

      2.2.1.Төсөл, арга хэмжээний саналыг холбогдох хууль, журам болон аргачлалд заасан шалгуур үзүүлэлтээр үнэлэн, эрэмбэлэх, төсөл, арга хэмжээг хэрэгжүүлэх санхүүжилтийн эх үүсвэрийг оновчтой тогтоох;

      2.2.2.Төсөл, арга хэмжээний саналд энэ журамд заасны дагуу судалгаа хийж, эрэмбэлэн төсвийн хөрөнгө оруулалтаар хэрэгжүүлэх нэн тэргүүний ач холбогдолтой төсөл, арга хэмжээнүүдийг тодорхойлох, жагсаалт гаргах;

      2.2.3.Тухайн жилд хэрэгжүүлэх төсөл, арга хэмжээний саналыг санхүү, төсвийн асуудал эрхэлсэн төрийн захиргааны төв байгууллагад хүргүүлэх;

      2.2.4.Төсөл, арга хэмжээний саналд үндсэн хөрөнгийн ашиглалттай холбоотой урсгал зардал, орон тоо, санхүүжүүлэх эх үүсвэр зэрэг холбогдох тооцоог хавсаргаж, төсөвт нөлөөлөх ачааллын талаарх дүгнэлтийг гаргасан байх;

      2.2.5.Энэ журмын хүрээнд гарсан аргачлал, заавар, гарын авлагыг үйл ажиллагаандаа мөрдөж, хэрэгжилтийг хангах;

      2.2.6.Төсөл, арга хэмжээний гүйцэтгэл, хэрэгжилт, санхүүжилт, хяналт, тайлагналт, бүртгэлийг холбогдох хууль, журмын хүрээнд зохион байгуулж, хангах, хяналт тавих, бүрэн хариуцах;

      2.2.7.Төсвийн хөрөнгө оруулалтын чиглэлээр тухайн салбарын судалгаа, дүн шинжилгээ хийх, танилцуулга, мэдээлэл бэлтгэх;

      2.2.8.Төсвийн хөрөнгө оруулалтын төлөвлөлт, хэрэгжилт, санхүүжилт, тайлагналтыг цахим системээр дамжуулан гүйцэтгэх, хэрэгжүүлэх, мэдээллийн сан бүрдүүлэх, ил тод, нээлттэй байдлыг хангах;

      2.2.9.Төсвийн хөрөнгө оруулалтаар хэрэгжүүлж байгаа төсөл, арга хэмжээний гүйцэтгэлийн санхүүжилтийн хяналтыг хэрэгжүүлэх, хянан баталгаажуулах;

      2.2.10.Төсвийн хөрөнгө оруулалтаар хэрэгжүүлж байгаа болон санхүүжүүлсэн төсөл, арга хэмжээний өмч бүртгэл, ашиглалтыг хариуцан хэрэгжүүлэх;

      2.2.11.Төсвийн хөрөнгө оруулалтын тайлан, үр дүн, үр ашгийг тооцох, мэдээллийн сан бүрдүүлэх;

      2.2.12.Төсвийн хөрөнгө оруулалтаар хэрэгжүүлж байгаа төсөл, арга хэмжээний гүйцэтгэлийн санхүүжилтийн баримт бичгийг хууль, журамд нийцүүлэн бүрэн, үнэн зөв бүрдүүлэх;

      2.2.13.Төсвийн хөрөнгө оруулалтаар хэрэгжүүлэх төсөл, арга хэмжээний төлөвлөлт, санхүүжилт, хэрэгжилт, гүйцэтгэл, хяналт, ил тод, нээлттэй байдал болон тайлагналтын үйл ажиллагаа, үр ашиг, үр дүнг бүрэн хариуцаж ажиллах;

      2.2.14.Тухайн жилийн төсвийн тухай хуулиар өөрийн багцад батлагдсан төсөл, арга хэмжээг хэрэгжүүлэх төлөвлөгөөг баталж, хэрэгжилтийг хангаж ажиллах;

      2.2.15.Аймаг, бүс нутаг, улсын хэмжээнд хэрэгжүүлэхээр батлагдсан төсөл, арга хэмжээний багцын задаргааг тухайн жилийн төсвийн тухай хуулиар батлагдсан хэрэгжих хугацаа, зориулалт, төсөвт өртөг, тухайн онд санхүүжих дүнд нийцүүлэн санхүү, төсвийн асуудал эрхэлсэн Засгийн газрын гишүүнтэй хамтран хуваарилах; (Засгийн газрын 2025 оны 108 дугаар тогтоолоор нэмэлт орсон)

      2.2.16.Төсвийн хөрөнгө оруулалтын төлөвлөлт, санхүүжилт, хяналт, тайлагналтын үе шатуудад холбогдох мэдээлэл, баримт материалын иж бүрдлийг цахим системд оруулж, албан бичгээр баталгаажуулан санхүү, төсвийн асуудал эрхэлсэн төрийн захиргааны төв байгууллагад хүргүүлэх бөгөөд тэдгээрийн иж бүрэн, үнэн зөв байдлыг хариуцах.

2.3.Аймаг, нийслэлийн Засаг дарга дараах чиг үүргийг хэрэгжүүлнэ:

      2.3.1.Улсын төсвийн хөрөнгө оруулалтын талаар:

               2.3.1.1.тухайн орон нутагт хэрэгжүүлэх төсөл, арга хэмжээний саналыг холбогдох хууль, журам болон аргачлалд заасан шалгуур үзүүлэлтээр үнэлэх, эрэмбэлэх;

               2.3.1.2.тухайн жилд хэрэгжүүлэх төсөл, арга хэмжээний саналыг төсвийн төсөлд тусгуулахаар тухайн асуудал эрхэлсэн төрийн захиргааны төв байгууллагад хүргүүлэх;

               2.3.1.3.төсвийн хөрөнгө оруулалтын төсөл, арга хэмжээний саналд үндсэн хөрөнгийн ашиглалттай холбоотой урсгал зардал, орон тоо, санхүүжүүлэх эх үүсвэр зэрэг холбогдох тооцоог хавсаргаж, төсөвт нөлөөлөх ачааллын талаарх дүгнэлтийг гаргасан байх;

               2.3.1.4.энэ журмын хүрээнд гарсан цахим систем, аргачлал, заавар, гарын авлагыг үйл ажиллагаандаа мөрдөж, хэрэгжилтийг хангах;

               2.3.1.5.төсвийн ерөнхийлөн захирагчаас эрх шилжүүлэн тухайн орон нутагт хэрэгжүүлж байгаа төсөл, арга хэмжээний гүйцэтгэл, хэрэгжилт, санхүүжилт, хяналт, тайлагналт, бүртгэлийг хууль, журмын хүрээнд зохион байгуулж, хангах, хяналт тавих, хариуцах;

               2.3.1.6.энэ журмын 2.3.1.5-д заасан мэдээллийг холбогдох төсвийн ерөнхийлөн захирагчид сар бүр хүргүүлэх;

               2.3.1.7.төсвийн хөрөнгө оруулалтын чиглэлээр тухайн орон нутгийн судалгаа, дүн шинжилгээ хийх, танилцуулга, мэдээлэл бэлтгэх;

               2.3.1.8.төсвийн хөрөнгө оруулалтын төлөвлөлт, хэрэгжилт, санхүүжилт, тайлагналтыг цахим системээр дамжуулан гүйцэтгэх, хэрэгжүүлэх, мэдээллийн сан бүрдүүлэх, ил тод, нээлттэй байдлыг хангах;

               2.3.1.9.төсвийн ерөнхийлөн захирагчаас эрх шилжүүлсэн төсөл, арга хэмжээний гүйцэтгэлийн санхүүжилтийн хяналтыг хэрэгжүүлэх, хянан баталгаажуулах;

               2.3.1.10.төсвийн хөрөнгө оруулалтаар хэрэгжүүлж байгаа болон санхүүжүүлсэн төсөл, арга хэмжээний өмч бүртгэл, ашиглалтыг хариуцан хэрэгжүүлэх;

               2.3.1.11.төсвийн хөрөнгө оруулалтын тайлан, үр дүн, үр ашгийг тооцох, мэдээллийн сан бүрдүүлэх;

               2.3.1.12.төсвийн хөрөнгө оруулалтаар хэрэгжүүлж байгаа төсөл, арга хэмжээний гүйцэтгэлийн санхүүжилтийн баримт бичгийг хууль, журамд нийцүүлэн бүрэн, үнэн зөв бүрдүүлэх;

               2.3.1.13.төсвийн хөрөнгө оруулалтаар хэрэгжүүлж байгаа төсөл, арга хэмжээний гүйцэтгэлийн санхүүжилтийн талаарх танилцуулгыг санхүү, төсвийн асуудал эрхэлсэн төрийн захиргааны төв байгууллагад хүргүүлэх.

      2.3.2.Орон нутгийн төсвийн хөрөнгө оруулалтын талаар:

               2.3.2.1.орон нутгийн төсвийн хөрөнгө оруулалтаар хэрэгжүүлэх төсөл, арга хэмжээний төлөвлөгөөг улсын төсвийн хөрөнгө оруулалтаар хэрэгжүүлж буй төсөл, арга хэмжээний төлөвлөгөөний холбогдох маягт, ангилалтай ижил байдлаар хэрэгжүүлж, тайлагнах;

               2.3.2.2.орон нутгийн төсвийн хөрөнгө оруулалтаар хэрэгжүүлэх төсөл, арга хэмжээг төлөвлөх, иргэдийн Төлөөлөгчдийн Хурлаар хэлэлцүүлж, батлуулах ажлыг зохион байгуулах;

               2.3.2.3.тухайн жилд хэрэгжүүлэхээр батлагдсан төсөл, арга хэмжээний мэдээллийг цахим системд бүртгэх, хуваарилах, эрх шилжүүлэх, баталгаажуулах, мэдээллийн сан бүрдүүлэх ажлыг зохион байгуулах, хариуцах;

               2.3.2.4.төсөл, арга хэмжээний гэрээний удирдлагыг хэрэгжүүлэх, гүйцэтгэлийн санхүүжилтийг хянан баталгаажуулах, энэ журмын холбогдох хавсралтад заасан маягтын дагуу хяналтын хуудас хөтлөх;

               2.3.2.5.төсөл, арга хэмжээний санхүүжилтийн эрхийг нээж, энэ журмын холбогдох хавсралтад заасан маягтын дагуу харьяа төрийн сангийн нэгжид хүргүүлэх;

               2.3.2.6.төсөл, арга хэмжээний төлөвлөлт, хэрэгжилт, санхүүжилтийн материалын иж бүрэн байдлыг ханган ажиллаж, архивын нэгжид хүлээлгэн өгөх.

      2.3.3.Төсвийн ерөнхийлөн захирагчаас эрх шилжүүлсэн төсөл, арга хэмжээний задаргааг эрх шилжүүлсэн шийдвэр гарснаас хойш ажлын 5 хоногт багтаан цахим системд бүртгэж, баталгаажуулах;

      2.3.4.Төсвийн хөрөнгө оруулалтын үйл ажиллагааны төлөвлөлт, санхүүжилт, хяналт, тайлагналтын үе шатуудад холбогдох мэдээлэл, баримт бичгийн иж бүрдлийг цахим системд оруулж, албан бичгээр баталгаажуулан санхүү, төсвийн асуудал эрхэлсэн төрийн захиргааны төв байгууллагад хүргүүлэх бөгөөд тэдгээрийн иж бүрэн, үнэн зөв байдлыг бүрэн хариуцан ажиллах.

Гурав.Төсвийн хөрөнгө оруулалтаар хэрэгжүүлэх төсөл,

           арга хэмжээг төлөвлөх, тавигдах шаардлага

3.1.Төсөл, арга хэмжээний төлөвлөлт:

      3.1.1.Төсвийн хөрөнгө оруулалтын төлөвлөлтийг хөгжлийн бодлогын баримт бичгүүдтэй уялдуулах, хөгжлийн бодлого, зорилго болон зорилтыг хангах зорилгоор цахим системийн бодлогын дэд системд хөгжлийн бодлогын баримт бичгийг дараах байдлаар холбоно:

               3.1.1.1.Хөгжлийн бодлого, төлөвлөлт, түүний удирдлагын тухай хуулийн 4.1.4, 4.1.5, 4.1.6, 4.1.9 болон 4.1.13-т заасан баримт бичгийг цахим системийн "үндсэн админ" эрхтэй хэрэглэгч;

               3.1.1.2.Хөгжлийн бодлого, төлөвлөлт, түүний удирдлагын тухай хуулийн 4.1.7, 4.1.11, 4.1.14-т заасан баримт бичгийг цахим системийн "админ" эрхтэй аймаг, нийслэлийн хэрэглэгч.

      3.1.2.Төсвийн хөрөнгө оруулалтаар шинээр хэрэгжүүлэх төсөл, арга хэмжээний саналыг Төсвийн тухай хуулийн 291.1-д заасан аргачлалын дагуу цахим системээр төлөвлөнө;

      3.1.3.Төсвийн хөрөнгө оруулалтаар шинээр хэрэгжүүлэх их засвар, тоног төхөөрөмж, зөвлөх үйлчилгээний төсөл, арга хэмжээ нь төсвийн хөрөнгө оруулалтаар зайлшгүй санхүүжүүлэх шаардлагатай нь холбогдох нотлох баримтаар тогтоогдсон байх бөгөөд дараах цаглаврын дагуу төлөвлөнө:

               3.1.3.1.аймаг, нийслэлийн Засаг дарга болон төсвийн төвлөрүүлэн, төсвийн шууд захирагч нь жил бүрийн 05 дугаар сарын 01-ээс    06 дугаар сарын 25-ны өдрийн хооронд төсвийн ерөнхийлөн захирагчид цахим системээр хүргүүлэх; (Засгийн газрын 2025 оны 108 дугаар тогтоолоор өөрчлөлт орсон)

               3.1.3.2.төсвийн ерөнхийлөн захирагч жил бүрийн 07 дугаар сарын 25-ны өдрийн дотор санхүү, төсвийн асуудал эрхэлсэн төрийн захиргааны төв байгууллагад албан бичгээр болон цахим системээр хүргүүлэх. (Засгийн газрын 2025 оны 108 дугаар тогтоолоор өөрчлөлт орсон)

      3.1.4.Төсвийн ерөнхийлөн захирагч нь энэ журмын 3.1.2, 3.1.3-т заасан төсөл, арга хэмжээний саналыг ирүүлэхдээ дараах шалгуур үзүүлэлтийг хангаж буй эсэхийг судалж, холбогдох тайлан болон баримт бичгийг хавсаргасан байна:

               3.1.4.1.хөгжлийн бодлого, төлөвлөлтийн баримт бичигт тусгагдсан болон уялдсан байдал;

               3.1.4.2.хэрэгцээ шаардлага, үндэслэл;

               3.1.4.3.мэргэжлийн байгууллагын дүгнэлт;

               3.1.4.4.төслийн зардлыг бүрэн зөв тооцсон эсэх;

               3.1.4.5.холбогдох баримт материал, техникийн тодорхойлолт, ажлын даалгавар;

               3.1.4.6.санхүүжилтийн эх үүсвэрийн төрөл.

      3.1.5.Төсвийн ерөнхийлөн захирагч нь төсвийн хөрөнгө оруулалтаар хэрэгжүүлэх нийт төсөл, арга хэмжээний саналыг энэ журмын 1 дүгээр хавсралтад заасан маягтын дагуу цахим системээс боловсруулж санхүү, төсвийн суудал эрхэлсэн төрийн захиргааны төв байгууллагад албан бичгээр болон цахим системээр ирүүлнэ;

      3.1.6.Төсвийн ерөнхийлөн захирагч болон концесс, төр, хувийн хэвшлийн түншлэлийн асуудал хариуцсан төрийн захиргааны байгууллага нь төсвийн хөрөнгө оруулалтаар эргэн төлөлт хийгдэх концесс, төр, хувийн хэвшлийн түншлэлийн төслийн санал, тооцоог гаргаж, холбогдох бусад баримт бичгийн хамт хуульд заасан хугацаанд санхүү, төсвийн асуудал эрхэлсэн төрийн захиргааны төв байгууллагад албан бичгээр болон цахим системээр ирүүлнэ;

      3.1.7.Төсвийн хөрөнгө оруулалтын төлөвлөлтөд энэ журамд заасныг мөрдөөгүй, шаардлагатай баримт бичгийн иж бүрдэл, мэдээллийг албан бичгээр болон цахим системээр ирүүлээгүй тохиолдолд хөрөнгө оруулалтын төлөвлөлтөд тусгахгүй байх үндэслэл болно;

      3.1.8.Төсвийн хөрөнгө оруулалтын үйл ажиллагаанд олон нийтийн оролцоог хангах, хүртээмж, үр ашгийг нэмэгдүүлэх хүрээнд төсвийн хөрөнгө оруулалтаар хэрэгжүүлэх төсөл, арга хэмжээг төлөвлөхдөө иргэдийн санал авах, тусгах, уялдуулах арга хэмжээг зохион байгуулж болно.

3.2.Төсөл, арга хэмжээнд тавигдах шаардлага:

      3.2.1.Төсвийн хөрөнгө оруулалтаар шинээр хэрэгжүүлэх барилга байгууламжийн төсөл, арга хэмжээ нь Төсвийн тухай хууль, Төрийн хэмнэлтийн тухай хууль болон холбогдох бусад хууль тогтоомжид заасан шаардлагад нийцсэн, холбогдох аргачлалд заасны дагуу шалгуур үзүүлэлтээр үнэлэгдсэн, эдийн засгийн үр ашигтай, нийгмийн ач холбогдолтой, тэргүүлэх зэрэглэлийн төслүүд байна;

      3.2.2.Төсвийн хөрөнгө оруулалтаар хэрэгжүүлэх төсөл, арга хэмжээ нь дараах шаардлагыг хангасан байх бөгөөд уг шаардлагыг хангаагүй төсөл, арга хэмжээг төсвийн хөрөнгө оруулалтын төлөвлөгөөнд тусгахгүй:

               3.2.2.1.эрх бүхий байгууллагаас газрын болон бусад шаардлагатай зөвшөөрлийг авсан байх;

               3.2.2.2.барилга байгууламжийн хувьд сүүлийн 2 жилийн дотор хийгдсэн магадлалын ерөнхий дүгнэлтээр баталгаажсан зураг төсөл болон төсөвтэй байх;

               3.2.2.3.шаардлагатай тохиолдолд төсөл, арга хэмжээний техник, эдийн засгийн үндэслэл (цаашид "ТЭЗҮ" гэх), техник, эдийн засгийн урьдчилсан судалгаа (цаашид "ТЭЗУС" гэх) хийлгэсэн байх.

      3.2.3.Их засвар, тоног төхөөрөмж, зөвлөх үйлчилгээний төсөл, арга хэмжээнд дараах шаардлагыг тавина:

               3.2.3.1.шаардлагатай тохиолдолд урсгал зардлыг тооцсон байх;

               3.2.3.2.төсвийн хязгаарт багтсан, нэн тэргүүний ач холбогдолтой байх;

               3.2.3.3.холбогдох баримт бичиг, нотлох баримтаар баталгаажсан, төлөвлөлт, зорилтод нийцсэн, хэрэгцээ шаардлагад тулгуурласан байх;

               3.2.3.4.тухайн барилга байгууламжийн ашиглалт, норм, хугацаа, элэгдлийн байдал, мэргэжлийн байгууллагын гаргасан дүгнэлт, засварын хөрөнгийн төсөв, холбогдох баримт бичигт үндэслэсэн байх.

      3.2.4.ТЭЗУС, ТЭЗҮ боловсруулах төсөл, арга хэмжээ болон зөвлөх үйлчилгээний ажил нь холбогдох хууль тогтоомжид үндэслэсэн, тухайн байгууллага, эсхүл салбарын зорилт болон дунд хугацааны төлөвлөлтөд нийцсэн, эрэлт хэрэгцээ, бодит шаардлагад тулгуурласан байна.

3.3.Төсөл, арга хэмжээг төсвийн төсөлд тусгах:

      3.3.1.Санхүү, төсвийн асуудал эрхэлсэн төрийн захиргааны төв байгууллага, төсвийн ерөнхийлөн захирагч нь төсвийн төсөлд тусгах төсөл, арга хэмжээг сонгох болон төслийн санхүүжилтийг шийдвэрлэхдээ дараах эрэмбийг баримтална:

               3.3.1.1.шилжих буюу хэрэгжүүлж буй төсөл, арга хэмжээ;

               3.3.1.2.их засвар, арчлалтын төсөл, арга хэмжээ;

               3.3.1.3.шинээр хэрэгжүүлэх төсөл, арга хэмжээ.

      3.3.2.Санхүү төсвийн асуудал эрхэлсэн төрийн захиргааны төв байгууллага нь нийт төсөл, арга хэмжээний жагсаалтыг холбогдох журам, аргачлалыг үндэслэн боловсруулах бөгөөд тухайн жилийн төсвийн хязгаарыг үндэслэн эрэмбийн дагуу төсвийн төсөлд тусгана;

      3.3.3.Төсвийн хөрөнгө оруулалтаар хэрэгжүүлэх төсөл, арга хэмжээ нь дунд хугацааны төсвийн хүрээний мэдэгдэл, тухайн жилийн төсвийн хязгаар, Төсвийн тухай хууль болон холбогдох бусад хууль тогтоомжид заасан шаардлага, шалгуур үзүүлэлтэд нийцэж байгаа эсэхийг хянаж, судалсны дагуу төсвийн төсөлд тусгах шийдвэрийг гаргана;

      3.3.4.Санхүү, төсвийн асуудал эрхэлсэн төрийн захиргааны төв байгууллага нь төсвийн хөрөнгө оруулалтын төсөл, арга хэмжээг улсын төсвийн төсөлд тусгахдаа дараах журмыг баримтална:

               3.3.4.1.нэг жилийн дотор хэрэгжиж дуусах богино хугацааны хөрөнгийн урсгал засвар, хөрөнгийн шинэчлэл, тоног төхөөрөмж болон бусад хөрөнгийн төслийг хөтөлбөр болон төсвийн ерөнхийлөн захирагчаар тооцож тусгах;

               3.3.4.2.шинээр эхлэх барилга байгууламж, хөрөнгө оруулалтын төсөл, арга хэмжээний нийт төсөвт өртгөөс тухайн жилд ногдох хэсэг нь төсөл, арга хэмжээг хэрэгжүүлэх хугацаанд тэнцүү хуваарилсан хэмжээнээс багагүй байхаар тооцож тусгах.

Дөрөв.Төсвийн хөрөнгө оруулалтын төсөл, арга хэмжээг

        хэрэгжүүлэх, санхүүжүүлэх, хяналт тавих

4.1.Төсөл, арга хэмжээг хэрэгжүүлэх эрхийг шилжүүлэх:

      4.1.1.Төсвийн ерөнхийлөн захирагч нь төсвийн хөрөнгө оруулалтын төсөл, арга хэмжээг хэрэгжүүлэхтэй холбогдуулан тухайн жилийн 01 дүгээр сарын 20-ны өдрийн дотор багтаан дараах эрхээ доор дурдсаны дагуу шилжүүлж болох бөгөөд энэ талаар гаргасан шийдвэрээ ажлын 5 хоногт багтаан цахим системд оруулж, баталгаажуулна:

               4.1.1.1.Төсвийн тухай хуулийн 14.4-т заасныг үндэслэн төсвийн ерөнхийлөн захирагчаас төсвийн төвлөрүүлэн захирагч, эсхүл харьяалах төсвийн шууд захирагчид төсөл, арга хэмжээний худалдан авах ажиллагааг зохион байгуулах, хэрэгжүүлэх, санхүүжүүлэх, хяналт тавих эрхийг хэсэгчилж, эсхүл бүхэлд нь шилжүүлэх;

               4.1.1.2.Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 45.6-д заасны дагуу худалдан авах ажиллагааг зохион байгуулах эрхийг шилжүүлэх;

               4.1.1.3.төсвийн ерөнхийлөн захирагч нь өөрийн эрхлэх асуудлын хүрээнд төсвийн хөрөнгө оруулалтаар санхүүжүүлэх төсөл, арга хэмжээг хэрэгжүүлэх эрхийг Төсвийн тухай хуулийн 14, 61 дүгээр зүйлийг үндэслэн аймаг, нийслэлийн Засаг даргад шилжүүлэх.

      4.1.2.Эрх шилжүүлэн авсан этгээд нь тухайн төсөл, арга хэмжээг хэрэгжүүлэхэд холбогдох хууль болон энэ журмыг удирдлага болгон ажиллана;

      4.1.3.Эрх шилжүүлсэн этгээд нь тухайн төсөл, арга хэмжээний хэрэгжилтэд хяналт тавьж, тайлагналт, үр дүн, гүйцэтгэлд эрх бүхий этгээдийн хувиар хариуцлага хүлээнэ.

4.2.Захиалагчийн чиг үүрэг:

      4.2.1.Энэ журмын хүрээнд дараах этгээд захиалагч байна:

               4.2.1.1.төсөл, арга хэмжээг хэрэгжүүлэхээр гэрээ байгуулсан төсвийн захирагч;

               4.2.1.2.Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 45.2-т заасан этгээд.

      4.2.2.Захиалагч дараах чиг үүргийг хэрэгжүүлнэ:

               4.2.2.1.төсөл, арга хэмжээний гүйцэтгэлийг батлагдсан төсөвт өртөг, гэрээний нийт дүн, холбогдох норм, нормативын баримт бичиг, тухайн барилгын ажлын батлагдсан зураг төсөл болон төсөв, гүйцэтгэгчтэй байгуулсан гэрээнд тусгасан барилгын ажлын үе шатны хуваарь, санхүүжилтийн хуваарийн дагуу тулган шалгаж, хянан баталгаажуулах;

               4.2.2.2.гүйцэтгэлийн санхүүжилтийн баримт бичгийг төсвийн ерөнхийлөн захирагчийн эрх олгосон шийдвэрийн дагуу төсвийн шууд захирагчийн гарын үсгээр, аймаг, нийслэлийн хувьд Засаг даргын гарын үсгээр хянан баталгаажуулж, албан бичгээр болон цахим системээр санхүү, төсвийн асуудал эрхэлсэн төрийн захиргааны төв байгууллагад хүргүүлэх;

               4.2.2.3.барилга байгууламж, их засварын ажил, тоног төхөөрөмж, зөвлөх үйлчилгээ, концессын гэрээний эргэн төлөлт, төр, хувийн хэвшлийн түншлэлийн гэрээний төсвийн санхүүжилт зэрэг төсөл, арга хэмжээний гүйцэтгэлийг энэ журамд зааснаар үнэн зөв гаргаж, холбогдох маягтын дагуу ирүүлэх, цахим системд бүрэн оруулж илгээх;

               4.2.2.4.барилга байгууламж, өргөтгөл, их засварын ажлыг байнгын ашиглалтад оруулах улсын комиссын актаар ашиглалтад хүлээн авсны үндсэн дээр эцсийн буюу бүрэн санхүүжилтийн хүсэлт гаргах бөгөөд төрийн болон орон нутгийн өмчид бүртгэх, ашиглагч байгууллагад хүлээлгэн өгөх мэдээллийг цахим системд баталгаажуулсан байх;

               4.2.2.5.төсөл, арга хэмжээний техник, технологийн хяналтын зардал болох захиалагчийн хяналт, зохиогчийн хяналтын зардлыг захиалагчийн техник хяналтын дансанд, чанарын баталгаат хугацааны барьцаа буюу ашиглалтад тохируулах, зүгшрүүлэх хугацааны санхүүжилтийг барьцаа хөрөнгийн дансанд, зураг төслийн үнэ, нормчлолын сангийн зардлыг тус тусын дансанд холбогдох гэрээ, баримт бичиг, акт зэргийг үндэслэн шилжүүлэх;

               4.2.2.6.чанарын баталгаат хугацааны барьцаа буюу ашиглалтад тохируулах, зүгшрүүлэх хугацааны санхүүжилтийг гүйцэтгэл тус бүрээс, эсхүл эцсийн буюу бүрэн санхүүжилтээс Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 43.6-д заасны дагуу суутган барьцаа хөрөнгийн дансанд байршуулах асуудлыг тухайн төсөл, арга хэмжээний гэрээний тусгай нөхцөлд тусгасан байх;

               4.2.2.7.улсын төсвийн хөрөнгө оруулалтаар хэрэгжүүлэх төсөл, арга хэмжээний захиалагчийн техник, технологийн хяналт болон зохиогчийн хяналтыг хэрэгжүүлэх этгээд тус бүртэй уг чиг үүргийг хэрэгжүүлэх гэрээг байгуулах;

               4.2.2.8.зохиогчийн хяналтын гэрээнд тухайн төсөл, арга хэмжээний байршил, онцлогоос хамааран зохиогчийн хяналтыг гүйцэтгэх хэлбэр, хугацаа, зохиогчийн хяналтын зардал зэргийг нарийвчлан тусгах;

               4.2.2.9.төсөл, арга хэмжээний санхүүжилт хүссэн гүйцэтгэлийн баримт бичиг, иж бүрдэл, түүний үнэн зөв эсэхэд бүрэн хариуцаж ажиллах.

4.3.Гүйцэтгэлийн санхүүжилт, түүний ангилал, бүрдүүлэх материал:

      4.3.1.Төсвийн хөрөнгө оруулалтын төсөл, арга хэмжээний гүйцэтгэлийн санхүүжилтийг энэ журамд зааснаар олгох бөгөөд цахим системд ангиллаас хамаарч бүрдүүлэх материалыг удирдлага болгож, санхүүжилтийг дараах байдлаар ангилна:

               4.3.1.1.эхний санхүүжилт;

               4.3.1.2.дундын буюу явцын санхүүжилт;

               4.3.1.3.эцсийн буюу бүрэн санхүүжилт;

               4.3.1.4.барилга, байгууламж болон дэд бүтэц худалдан авах төслийн санхүүжилт.

      4.3.2.Төсвийн хөрөнгө оруулалтын төсөл, арга хэмжээний гүйцэтгэлийн санхүүжилтийн хүсэлтийг цахим системээр хэрэгжүүлэх асуудлыг энэ журамд заасан зохицуулалт болон цахим системийн гарын авлагад заасны дагуу холбогдох байгууллагууд хэрэгжүүлнэ;

      4.3.3.Төсвийн хөрөнгө оруулалтаар хэрэгжүүлж байгаа төсөл, арга хэмжээний санхүүжилт нь гэрээ, төслийн үе шатны хуваарь, санхүүжилтийн төлөвлөгөөтэй уялдаж, нийцсэн байна;

      4.3.4.Төсөл, арга хэмжээний эхний санхүүжилтийг олгоход дараах баримт бичгийг бүрдүүлж, эх хувь гэсэн баримт бичгийн хувьд цаасаар, бусад баримт бичгийг цахим системээр ирүүлнэ:

               4.3.4.1.санхүүжилт хүссэн албан бичгийн эх хувь;

               4.3.4.2.гүйцэтгэлийн санхүүжилтийн маягт эх хувь (энэ журмын хавсралт 7-13);

               4.3.4.3.төслийн гэрээний баталгаажсан хуулбарын эх хувь;

               4.3.4.4.гүйцэтгэлийн баталгаа;

               4.3.4.5.эрх шилжүүлсэн бол холбогдох шийдвэр;

               4.3.4.6.багц хуваарилсан бол холбогдох шийдвэр;

               4.3.4.7.үнэлгээний хороо байгуулсан шийдвэр;

               4.3.4.8.үнэлгээний хорооны хурлын тэмдэглэл;

               4.3.4.9.магадлалын ерөнхий дүгнэлт (цахим системийн магадлалын сангаас бүрдүүлнэ);

               4.3.4.10.тухайн төслийн зураг төсвийн зардлыг олгох тохиолдолд зураг төсвийн гэрээ, зураг төсөв хүлээлцсэн акт;

               4.3.4.11.захиалагчийн техник, технологийн хяналтын зардал олгох тохиолдолд захиалагчийн хяналтын гэрээ, захиалагчийн техник, технологийн хяналтын тэмдэглэл, дүгнэлт болон тайлан;

               4.3.4.12.зохиогчийн хяналтын зардал олгох тохиолдолд зохиогчийн хяналтын гэрээ, зохиогчийн хяналтын тэмдэглэл, дүгнэлт болон тайлан;

               4.3.4.13.захиалагчийн хянан баталгаажуулсан ил далд ажлын акт;

               4.3.4.14.барилга байгууламж, өргөтгөл, их засварын ажлын гүйцэтгэлийг нотолсон гэрэл зураг, тоног төхөөрөмжийн хувьд хүлээн авсан тоног төхөөрөмжийн зураг;

               4.3.4.15.төслийн гэрээнд нэмэлт, өөрчлөлт орсон бол хурлын тэмдэглэл, нэмэлт гэрээ байгуулах шийдвэр болон нэмэлт гэрээний баталгаажсан хуулбарын эх хувь;

               4.3.4.16.төсөл, арга хэмжээтэй холбоотой бусад шийдвэр, баримт бичиг.

      4.3.5.Төсөл, арга хэмжээний дундын буюу явцын санхүүжилтийг олгоход дараах баримт бичгийг бүрдүүлж, эх хувь гэсэн баримт бичгийн хувьд цаасаар, бусад баримт бичгийг цахим системээр ирүүлнэ:

               4.3.5.1.санхүүжилт хүссэн албан бичгийн эх хувь;

               4.3.5.2.гүйцэтгэлийн санхүүжилтийн маягт эх хувь (энэ журмын хавсралт 7-13);

               4.3.5.3.тухайн төслийн зураг төсвийн зардлыг олгох тохиолдолд зураг төсвийн гэрээ, зураг төсөв хүлээлцсэн акт;

               4.3.5.4.захиалагчийн техник, технологийн хяналтын зардал олгох тохиолдолд захиалагчийн хяналтын гэрээ, захиалагчийн техник, технологийн хяналтын тэмдэглэл, дүгнэлт болон тайлан;

               4.3.5.5.зохиогчийн хяналтын зардал олгох тохиолдолд зохиогчийн хяналтын гэрээ, зохиогчийн хяналтын тэмдэглэл, дүгнэлт болон тайлан;

               4.3.5.6.төслийн гэрээнд нэмэлт, өөрчлөлт орсон бол хурлын тэмдэглэл, нэмэлт гэрээ байгуулах шийдвэр болон нэмэлт гэрээний баталгаажсан хуулбарын эх хувь;

               4.3.5.7.захиалагчийн хянан баталгаажуулсан ил, далд ажлын акт;

               4.3.5.8.барилга байгууламж, өргөтгөл, их засварын ажлын гүйцэтгэлийг нотолсон гэрэл зураг, тоног төхөөрөмжийн хувьд хүлээн авсан тоног төхөөрөмжийн зураг;

               4.3.5.9.төсөл, арга хэмжээтэй холбоотой бусад шийдвэр, баримт бичиг.

      4.3.6.Төсөл, арга хэмжээний эцсийн буюу бүрэн санхүүжилт нь гэрээний нийт дүнгийн үлдэгдэл буюу хамгийн багадаа 10 хувиас багагүй байх ба эцсийн санхүүжилтийг байнгын ашиглалтад хүлээн авсан улсын комиссын дүгнэлт гарсны дараа олгох бөгөөд дараах баримт бичгийг бүрдүүлж, эх хувь гэсэн баримт бичгийн хувьд цаасаар, бусад баримт бичгийг цахим системээр ирүүлнэ: