Засгийн газрын 2002 оны 31 дүгээр тогтоолын хавсралт

НИЙТИЙГ ХАМАРСАН АЖИЛ ЗОХИОН БАЙГУУЛАХ ЖУРАМ

 

1. Нийтийг хамарсан ажлыг зохион байгуулах, түүнд иргэдийг оролцуулахад энэхүү журмыг баримтална.

2. Нийтийг хамарсан ажил нь хөдөлмөр эрхлэлтийг дэмжих арга хэмжээний хэлбэр бөгөөд хөдөлмөр зарцуулалт ихтэй, мэргэжил шаардахгүй ажилд хөдөлмөр эрхлээгүй иргэдийг зохион байгуулж оролцуулах замаар хэрэгжүүлнэ.

3. Нийтийг хамарсан ажил нь дараахь зорилтыг хангахад чиглэнэ:

-түр хугацааны болон улирлын чанартай ажил гүйцэтгүүлж улс, орон нутгийн болон тухайн байгууллагын хэрэгцээг хангах, нийгэм-эдийн засгийн хөгжлийн бүсийн болон зорилтот хөтөлбөрийг хэрэгжүүлэх;

-хөдөлмөрийн хөлс (орлого)-ний хэлбэрээр иргэдэд дэмжлэг үзүүлэх;

-удаан хугацаагаар ажилгүй байгаа болон мэргэжилгүй, эсхүл ажлын дадлага, туршлага багатай иргэдийн хөдөлмөр эрхлэлтийг дэмжих, тэдний хөдөлмөрлөх идэвхийг өрнүүлэх.

4. Нийтийг хамарсан ажлыг дараахь чиглэлээр зохион байгуулна:

-мод суулгах, зүлэгжүүлэх, байгаль орчныг хамгаалах, нөхөн сэргээх болон усжуулалтын ажил, байгалийн гамшиг, цөлжилттэй тэмцэх;

-малын тэжээл, хадлан бэлтгэх, төл хүлээн авах, хашаа, хороо барих, хаврын тариалалт, ургац хураах;

-хөдөө аж ахуйн бүтээгдэхүүн бэлтгэх, дахин боловсруулах;

-зам, гүүр барих, засварлах, ус дамжуулах, холбооны болон бусад шугам сүлжээ тавих бэлтгэл хангах;

-хот, төв суурин газрын нийтийн эзэмшлийн гудамж, талбайг засч тохижуулах, хог, хаягдал цаас арилгах, зайлуулах, үерийн далан цэвэрлэх;

-байгалийн өгөөж, хоёрдогч түүхий эд, хаягдал цуглуулах, дахин боловсруулах;

-энгийн аргаар буюу ой цэвэрлэн түлш бэлтгэх;

-амралт, жуулчлал, соёлын зориулалттай барилга байгууламжийг тохижуулах;

-хөдөлмөрийн бусад боломжтой хэлбэрүүд.

 

5. Нийтийг хамарсан ажил нь дараахь шаардлагыг хангасан байна:

-их хэмжээний хөрөнгө оруулалт шаардахгүй (үндсэн хөрөнгө, тоног төхөөрөмжид хөрөнгө зарцуулахгүй);

-хөрөнгийн 50-иас доошгүй хувийг хөдөлмөрийн хөлсөнд зарцуулах.

6. Орон нутгийн Засаг даргын Тамгын газар нь шаардлагатай тохиолдолд хөдөлмөр эрхлэлтийн албатай тохиролцон нийтийг хамарсан ажилд нэмэлт шаардлага тавьж болно. Эдгээр нэмэлт шаардлагад тухайн ажлын онцлогоос шалтгаалан ажлын тусгай хувцас, хамгаалах хэрэгсэл, ажлын багаж, шагнал урамшуулал, унаа, хоол, байрны зардал, эмнэлгийн үйлчилгээ зэрэг асуудлууд багтана.

 

7. Нийтийг хамарсан ажлыг дараахь эх үүсвэрээс санхүүжүүлнэ:

-хөдөлмөр эрхлэлтийг дэмжих сангаас нийтийг хамарсан ажилд хуваарилсан хөрөнгө;

-тусгай хөтөлбөрүүдийг хэрэгжүүлэхэд зориулсан дотоод, гадаадын хөрөнгийн эх үүсвэр, хандив тусламж;

-төвлөрсөн болон орон нутгийн төсөв;

-тусгай зориулалтын сангуудын хөрөнгө;

-аж ахуйн нэгж, байгууллагаас нийтийг хамарсан ажилд зарцуулсан хөрөнгө;

-бусад.

8. Орон нутгийн Засаг даргын Тамгын газар нийтийг хамарсан ажлыг хөдөлмөр эрхлэлтийн алба, аж ахуйн нэгж, байгууллагын оролцоотойгоор тодорхой төсөл, гэрээний үндсэн дээр зохион байгуулна.

9. Тухайн жил хөдөлмөр эрхлэлтийг дэмжих сангаас санхүүжүүлэх нийтийг хамарсан ажлын төслүүдийг орон нутгийн хөдөлмөр эрхлэлтийн алба боловсруулан тогтоосон хугацаанд хөдөлмөр эрхлэлтийн төв байгууллагад ирүүлсний үндсэн дээр шаардагдах хөрөнгийг Хөдөлмөр эрхлэлтийг дэмжих төв сангийн төсөвт тусгуулна.

10. Бүх шатны Иргэдийн Төлөөлөгчдийн болон нийтийн хурал нь орон нутгийн хэрэгцээ, шаардлага, цаг үеийн онцлог, хөдөлмөр эрхлээгүй хүн амын тоо, бүтцийг харгалзан тухайн жил зохион байгуулах нийтийг хамарсан ажлын төсвийг жил бүр батална. Засаг дарга үүнийг үндэслэн нийтийг хамарсан ажил зохион байгуулах тухай шийдвэр гаргана.

11. Шаардлагатай тохиолдолд тухайн нутаг дэвсгэрийн аж ахуйн нэгж, байгууллага хөдөлмөр эрхлэлтийн албатай гэрээ байгуулсны үндсэн дээр нийтийг хамарсан ажлыг  зохион байгуулж болно. Гэрээний загварыг хөдөлмөр эрхлэлтийн төв байгууллага батална.

12. Хөдөлмөр эрхлэлтийн алба болон нийтийг хамарсан ажлыг зохион байгуулах аж ахуйн нэгж, байгууллагын хооронд байгуулах гэрээнд нийтийг хамарсан ажил явуулах нөхцөл, шинээр бий болгох ажлын байр буюу ажиллуулах нийт хүний тоо, гүйцэтгэх ажлын шинж чанар, уг ажлыг явуулах газар, ажил эхлэх, дуусах хугацаа, ажилтны хөдөлмөрийн хөлсний хэлбэр, хэмжээ, түүнийг олгох хугацаа, нийтийг хамарсан ажилд шаардагдах зардал, тэдгээрийг санхүүжүүлэх журам, хөдөлмөрийн аюулгүй ажиллагаа, эрүүл ахуйн нөхцөл зэргийг тодорхой тусгана.

13. Нийтийг хамарсан ажил зохион байгуулж байгаа аж ахуйн нэгж, байгууллага уг ажилд оролцох иргэнтэй хөдөлмөрийн гэрээ байгуулна.

 

14. Нийтийг хамарсан ажилд оролцох хүсэлтэй иргэдийг хөдөлмөр эрхлэлтийн алба бүртгэж, зохион байгуулалттайгаар оролцуулна.

15. Ажилгүйдлийн тэтгэмж авдаггүй, 6 сараас дээш хугацаагаар хөдөлмөр эрхлэлтийн албанд бүртгэлтэй байгаа  хөдөлмөр эрхлээгүй иргэнийг нийтийг хамарсан ажилд эхний ээлжинд оролцуулна.

16. Нийтийг хамарсан ажилд оролцсон иргэнд ажлын гүйцэтгэлээр нь хөдөлмөрийн хөлс олгоно. Хөдөлмөрийн хөлс нь Засгийн газраас тогтоосон хөдөлмөрийн хөлсний доод хэмжээнээс багагүй байна.

Нийтийг хамарсан ажилд оролцсон иргэнд хөдөлмөрийн хөлсийг өдөрт нь тооцон олгож болно.

17. Нийтийг хамарсан ажилд оролцож байгаа иргэн болон зохион байгуулагч аж ахуйн нэгж, байгууллага Нийгмийн даатгалын тухай хуулийн дагуу нийгмийн даатгалын шимтгэл төлнө. Шимтгэл төлсөн тухай баримтыг үндэслэн  орон нутгийн нийгмийн даатгалын байгууллага нийтийг хамарсан ажилд оролцсон иргэний нийгмийн даатгалын дэвтэрт бичилт хийж байна.

18. Нийтийг хамарсан ажилд оролцсон иргэний хөдөлмөрийн аюулгүй ажиллагаатай холбоотой асуудлыг уг ажлыг зохион байгуулж байгаа байгууллага бүрэн хариуцаж хөдөлмөр эрхлэлтийн албатай хамтран нийтийг хамарсан ажилд оролцох иргэнд хөдөлмөр зохион байгуулалт, аюулгүй ажиллагааны талаархи зааврыг зохих журмын дагуу өгнө.

19. Ажилгүйдлийн тэтгэмж авч байгаа ажилгүй иргэн нийтийг хамарсан ажилд оролцох тохиолдолд түүний авч байсан тэтгэмжийг түр зогсоон, нийтийг хамарсан ажил дууссаны дараа ажилгүйдлийн тэтгэмжийг өмнө тогтоосон хэмжээгээр тэтгэмж авбал зохих үлдсэн хугацаанд үргэлжлүүлэн олгоно.

20. Нийтийг хамарсан ажлыг зохион байгуулагчаас иргэнийг ажилд авсан тухай хөдөлмөр эрхлэлтийн албанд бичгээр өгсөн мэдэгдэл нь түүний ажилгүйдлийн тэтгэмжийг түр зогсоох үндэслэл болно.

 

21. Хөдөлмөр эрхлэлтийн алба нийтийг хамарсан ажилд оролцсон иргэний бүртгэлийг хөтөлж, нийтийг хамарсан ажлын мэдээ, тайланг "Хөдөлмөр эрхлэлтийг дэмжих сангийн бүртгэл, тайлангийн маягт"-ын дагуу тогтоосон хугацаанд гаргана.

22. Нийтийг хамарсан ажлыг зохион байгуулж байгаа байдал, гүйцэтгэсэн ажлын үр дүн, мөн түүнчлэн төвлөрсөн болон орон нутгийн төсөв, гадаад, дотоодын хандив тусламж, сангуудын хөрөнгөөр зохион байгуулсан нийтийг хамарсан ажилд зарцуулсан хөрөнгө, түүний зориулалтад орон нутгийн хөдөлмөр эрхлэлтийн алба холбогдох мэргэжлийн хяналтын албадтай хамтран хяналт тавина.

----оОо----