МОНГОЛ УЛСЫН ЕРӨНХИЙ САЙДЫН ЗАХИРАМЖ

2011 оны 11 дүгээр сарын 9-ний өдөр

Дугаар 81

Улаанбаатар хот

БҮТЦИЙН ӨӨРЧЛӨЛТИЙН ХӨТӨЛБӨРТ НЭМЭЛТ, ӨӨРЧЛӨЛТ ОРУУЛАХ ТУХАЙ (Захирамж)

1. "Мэдээлэл, шуудан, харилцаа холбоо, технологийн газрын үйл ажиллагааны стратеги, бүтцийн өөрчлөлтийн хөтөлбөрийг зөвшөөрөх, зохион байгуулалтын бүтцийг батлах тухай" Ерөнхий сайдын 2009 оны 1 дүгээр сарын 19-ний өдрийн 5 дугаар захирамжийн 2 дугаар зүйлд "г/ Сансрын технологийн хэлтэс" гэсэн заалт нэмж, мөн захирамжийн 3 дугаар зүйлийн "39 (гучин ес)" гэж заасныг "44 (дөчин дөрөв)" гэж өөрчилсүгэй.

2. Ерөнхий сайдын 2009 оны 5 дугаар захирамжаар баталсан "Мэдээлэл, шуудан, харилцаа холбоо, технологийн газрын үйл ажиллагааны стратеги, бүтцийн өөрчлөлтийн хөтөлбөр"-ийн 2, 3 дугаар зүйлд дор дурдсан агуулгатай 2.2.6, 2.4.5, 2.5.5, 2.5.5.1, 2.5.5.2, 2.5.5.3, 2.5.5.4, 3.3.5 дахь заалтыг нэмсүгэй:

1/ "2.2.6. үндэсний хиймэл дагуулын техник, технологи нутагшуулах, түүнийг нийгэм, эдийн засгийн салбарт үр өгөөжтэй ашиглах, хэрэглэх талаархи бодлого, хөтөлбөр, төсөл боловсруулах, хэрэгжүүлэх, энэ чиглэлээр гадаад хамтын ажиллагааг хөгжүүлэх."

2/ "2.4.5. сансрын холбооны болон тандан судалгааны үндэсний хиймэл дагуул ашиглах, түүнд дэвшилтэт технологи болон хэрэглээг нутагшуулах, газар зүйн мэдээллийн системийг хөгжүүлэх хөтөлбөр, төсөл боловсруулах, хэрэгжүүлэх ажлыг зохион байгуулах, зохицуулах."

3/ "2.5.5. үйл ажиллагааны стратегийн 5 дугаар зорилтын хүрээнд:

4/ "3.3.5. сансрын технологи хариуцсан зохион байгуулалтын бүтцийн нэгжийн үндсэн үүрэг, чиг үүрэг.

2.5.5.1. үндэсний хиймэл дагуул ашиглах чиглэлээр хууль тогтоомж, шийдвэрийн төсөл боловсруулах;

2.5.5.2. нийгэм, эдийн засгийн салбаруудад ашиглах мэдээ, мэдээлэл дамжуулах техник, технологийг үндэсний хиймэл дагуулд суурилуулах, нутагшуулах талаар судлах, холбогдох төсөл, техник-эдийн засгийн үндэслэл боловсруулж хэрэгжүүлэхэд зөвлөгөө, дэмжлэг үзүүлэх;

2.5.5.3. сансрын холбооны болон тандан судалгааны дэвшилтэт технологи нутагшуулах, газар зүйн мэдээллийн системийг бий болгох чиглэлээр хамтын ажиллагааг төлөвлөх, хэрэгжүүлэхэд бүх талын дэмжлэг үзүүлэх;

2.5.5.4. газар-сансар хосолсон өндөр хурдны, өргөн зурвасын сүлжээ бий болгох төсөл, техник-эдийн засгийн баримт бичиг боловсруулах, хэрэгжүүлэхэд бүх талын дэмжлэг үзүүлэх."

Энэ нэгж нь үйл ажиллагааны стратегийн 5 дугаар зорилтын хүрээнд сансрын холбооны болон тандан судалгааны үндэсний хиймэл дагуул ашиглах, дэвшилтэт технологи болон хэрэглээг нутагшуулах, газар зүйн мэдээллийн системийг хөгжүүлэх хөтөлбөр, төсөл боловсруулах, хэрэгжүүлэх ажлыг зохион байгуулах, зохицуулах үндсэн үүрэг хүлээж, үндэсний хиймэл дагуул ашиглах чиглэлээр хууль тогтоомж, шийдвэрийн төсөл боловсруулах, нийгэм, эдийн засгийн салбаруудад ашиглах мэдээ, мэдээлэл дамжуулах, техник, технологийг үндэсний хиймэл дагуулд суурилуулах, нутагшуулах талаар судлах, холбогдох төсөл, техник-эдийн засгийн үндэслэл боловсруулах, хэрэгжүүлэх, сансрын холбооны болон тандан судалгааны дэвшилтэт технологи нутагшуулах, газар зүйн мэдээллийн системийг бий болгох чиглэлээр хамтын ажиллагааг төлөвлөх, хэрэгжүүлэх, газар-сансар хосолсон өндөр хурдны, өргөн зурвасын сүлжээ бий болгох төсөл, техник-эдийн засгийн баримт бичиг боловсруулах, хэрэгжүүлэхэд бүх талын дэмжлэг үзүүлэх чиг үүрэг хэрэгжүүлнэ.

Нэгжийн үйл ажиллагаа нь сансрын холбооны болон тандан судалгааны техник, технологийг хөгжүүлэх, газар зүйн мэдээллийн систем, газар-сансар хосолсон өндөр хурдны, өргөн зурвасын сүлжээний талаархи техник, технологи судлах, энэ талаар төсөл, баримт бичиг боловсруулах, удирдлагыг үнэн зөв мэдээллээр хангахад шууд чиглэнэ.

Энэ нэгжээс үзүүлэх үйлчилгээний үндсэн хэрэглэгч нь газрын дарга, зохион байгуулалтын бүтцийн нэгж, ажилтнууд байх бөгөөд шууд бус хэрэглэгч нь мэдээлэл, шуудан, харилцаа холбоо, технологийн салбарын байгууллагууд, аж ахуйн нэгж, иргэд байна."

3. Ерөнхий сайдын 2009 оны 5 дугаар захирамжаар баталсан хөтөлбөрийн 2.7-д заасан "Мэдээлэл, шуудан, харилцаа холбоо, технологийн газрын үйл ажиллагааны стратегийн загвар"-т энэхүү захирамжийн 2.4.5, 2.5.5, 2.5.5.1, 2.5.5.2, 2.5.5.3, 2.5.5.4-т заасан зорилтуудыг тус тусын оноосон мөрөнд нэмсүгэй.

4. Мөн хөтөлбөрийн 3.2-т заасан "Мэдээлэл, шуудан, харилцаа холбоо, технологийн газрын үйл ажиллагааны бүтцийн ерөнхий тогтолцооны загвар"-ын "Бодлого төлөвлөлтийн асуудал хариуцсан нэгж" гэсний дараа "Сансрын технологийн нэгж" гэж нэмсүгэй.

5. Мэдээлэл, шуудан, харилцаа холбоо, технологийн газрын бүтэц, орон тооны хязгаар нэмэгдсэнтэй холбогдуулан нэмж шаардагдах хөрөнгийг тус газрын төсөвт тусган санхүүжүүлэхийг Сангийн сайд С.Баярцогтод даалгасугай.

Монгол Улсын Ерөнхий сайд С.БАТБОЛД