АГААРЫН НАВИГАЦИЙН ҮЙЛЧИЛГЭЭНИЙ ЗАЙЧЛАЛЫН СТАНДАРТ

Хүчингүй эрх зүйн акт

ЗТХС-ын 2021 оны А/16 дугаар тушаалаар хүчингүй болсон.

Зам, тээвэр, барилга хот байгуулалтын Сайдын

2010 оны 04 дүгээр сарын 16 -ны өдрийн 111 дүгээр

тушаалын 9 дүгээр хавсралт

ИРГЭНИЙ НИСЭХИЙН ДҮРЭМ-75

АГААРЫН НАВИГАЦИЙН ҮЙЛЧИЛГЭЭНИЙ ЗАЙЧЛАЛЫН СТАНДАРТ

А БYЛЭГ. ЕРӨНХИЙ ЗYЙЛ

75.1. Зорилго

(а) Энэ дүрмийн зорилго нь Монгол улсын агаарын зайд нислэгийн хөдөлгөөний удирдлагаар хангагдан нислэг үйлдэж буй агаарын хөлгүүдийн хоорондын зайчлалын стандартуудыг тогтооход оршино.

75.3. Тодорхойлолт

Аэродромын удирдлагын цамхаг гэж тухайн аэродромын Цамхагийн нислэгийн хөдөлгөөний удирдлагын байрнаас аэродромын бүс дэх нислэгийн хөдөлгөөнийг удирдах нэгжийг;

Ажиглалтын систем гэж нислэгийн хөдөлгөөний удирдлага, үйлчилгээнд ашиглагддаг радар, ADS-B, мultilateration гэх мэт ажиглалтын тоног төхөөрөмжүүдийг;

Аэродромын удирдлагын бүс гэж газрын гадаргаас тодорхой өндөр хүртэл тогтоосон хяналттай агаарын зайг;

Босоо зайчлал гэж агаарын хөлгүүд хоорондын босоо тэнхлэгийн дагуу зайчлалыг;

Газрын навигацийн төхөөрөмж гэж навигацийн өөр системийг ашиглаагүй нөхцөлд NDB, VOR, DME, VOR болон DME хослол зэрэг газрын навигацийн тоног төхөөрөмжүүдийг;

Дунд агаарын хөлөг гэж хөөрөлтийн зөвшөөрөгдсөн дээд жин нь 7000 кг-аас их, 136 000 кг-аас бага жинтэй агаарын хөлгийг;

Зайчлал гэж агаарын хөлгүүд хооронд хугацаа болон зайн хэмжигдэхүүнээр илэрхийлэгдэх хэвтээ болон босоо, зөвшөөрөгдсөн хамгийн бага аюулгүй зайг;

Замын (чиглэлийн) дагуух цэг гэж бүсийн навигацийн чиглэл эсхүл бүсийн навигаци ашиглаж буй агаарын хөлгийн нислэгийн траекторийг тодорхойлоход ашиглагдаж байгаа цэгийг;

Ил харааны зайчлал гэж ил харааны нислэгийн цаг агаарын нөхцөлд нислэг үйлдэж буй агаарын хөлгүүдийг зайчлах зорилгоор хэрэглэгдэх аргачлалыг;

Ил харааны нислэгийн онцгой дүрмээр үйлдэх нислэг гэж нислэгийн хөдөлгөөний удирдлагатай бүсийн цаг агаарын байдал ил харааны нислэг үйлдэх нөхцөлөөс доогуур төвшинд орсон үед нислэгийн хөдөлгөөний удирдлагаас өгсөн зөвшөөрлийн дагуу нислэгийг онцгой дүрмээр үргэлжлүүлэхийг;

Ил харааны ойртолт гэж хэрэглэлийн нислэгийн дүрмээр нисэх нислэгийн төлөвлөгөөтэй боловч ил харааны нислэгийн цаг агаарын нөхцөлд нислэгийн хөдөлгөөний удирдлагаас өгсөн зөвшөөрлийн дагуу ил хараагаар ойртолт үйлдэх журмыг;

Илтгэх цэг гэж агаарын хөлөг байрлалаа илтгэх газар зүйн тогтоогдсон байршлыг;

Махын тоо гэж агаарын бодит хурдыг дууны хурдад харьцуулсан харьцааг;

Мах тооны аргачлал гэж агаарын хөлгүүдэд тогтоосон Мах тоог хадгалуулах аргаар чиг шулуун нислэг, өндөр авалт, өндөр алдалтын үед тууш зайчлалыг хангуулах аргачлалыг;

Нислэгийн хөдөлгөөний мэдээлэл гэж нислэгийн удирдагчаас нислэг үйлдэж байгаа агаарын хөлөгт түүний ойролцоо нислэг үйлдэж буй агаарын хөлгийн талаар өгөх мэдээллийг;

Нислэгийн цуваа гэж 1013.2 миллибар (760 мм.муб) стандарт даралтаар тооцсон нислэгийн цувааг;

Нислэгийн чиглэл гэж хойд туйлыг үндэс болгон жинхэнэ бөгөөд соронзон өнцгөөр илэрхийлэгдэх, агаарын хөлгийн нислэгийн чигийг газрын гадаргад тусган тооцсон чигийг;

Нэг цэг гэж хоёр болон түүнээс дээш тооны агаарын хөлөг нислэгийн нэг шугамд нэгдэх буюу салахдаа нисэн өнгөрөх навигацийн газрын төхөөрөмжөөр тодорхойлогдсон илтгэх цэгийг, эсхүл өргөрөг, уртрагийн солбилцлоор илэрхийлэгдсэн газарзүйн цэгийг;

Ойртолтын удирдлагын бүс гэж нислэгийн хөдөлгөөний үйлчилгээний маршрутууд огтлолцон нийлсэн, нэг буюу түүнээс дээш гол аэродромын агаарын зайд тогтоогдох удирдлагын бүс;

Дагалдах хуйлрал гэж агаарын хөлгийн далавчны төгсгөл (нисдэг тэрэгний хувьд сэнсний алга) агаартай харилцан үйлчилж зүсэх үед үүсэх болон хөдөлгүүрийн татах хүчний эсрэг үүсэх агаарын хуйлрах урсгалыг;

Тусгаарлагдсан бүс гэж хүлээх тойрог болон хэрэглэлийн нислэгийн дүрмээр ойртолт үйлдэхэд зориулан тусгайлан тогтоосон агаарын зайг;

Тууш зайчлал гэж агаарын хөлгүүд хоорондын хэвтээ тэнхлэгийн дагуу хугацаа болон зайн хэмжигдэхүүнээр илэрхийлэгдэх зайчлалыг;

Удирдлагын бүс гэж газрын гадаргуугаас дээш тогтоогдсон өндрөөс дээшхи нислэгийн хөдөлгөөний удирдлагаар хангагдах хяналттай агаарын зайг;

Хажуугийн зайчлал гэж агаарын хөлгүүд хоорондын хэвтээ тэнхлэгийн дагуу зайн хэмжигдэхүүнээр илэрхийлэгдэх зайчлалыг;

Харьцангуй өндөр гэж далайн төвшнөөс тухайн цэг, төвшин хүртэл тооцсон босоо зайг;

Хөнгөн агаарын хөлөг гэж хөөрөлтийн зөвшөөрөгдсөн дээд жин нь 7000 кг буюу түүнээс бага жинтэй агаарын хөлгийг;

Хүнд агаарын хөлөг гэж хөөрөлтийн зөвшөөрөгдсөн дээд жин 136 000 кг буюу түүнээс дээш жинтэй агаарын хөлгийг;

Хяналттай агаарын зай гэж агаарын зайн ангиллаас хамааран ил харааны болон хэрэглэлийн нислэгийн дүрмээр үйлдэгдэх нислэгүүдийг нислэгийн хөдөл- гөөний удирдлагын үйлчилгээгээр хангах, өндөр болон өргөнөөр хязгаарлагдсан агаарын зайг.

75.5. Товчлол

Ил харааны нислэгийн дүрэм /ИХНД /-(VFR-Visual Flight Rules);

Ил харааны нислэгийн онцгой дүрэм /ИХНОД /-(Special VFR);

Хөөрч буух зурвас /ХБЗ /-(RWY-Runway);

Хэрэглэийн нислэгийн дүрэм /ХНД /-(IFR-Instrument Flight Rules);

Аэродромын удирдлагын бүс-(CTR-Control Zone) ;

Зай хэмжих төхөөрөмж;

Явгалах зам /ЯЗ /-(TWY-Taxi way);

Чиглүүлэх радиостанц-(NDB-Non Direction Beacon);

Ойртолтын удирдлагын бүс-(TMA-Terminal Control Area);

ВОР станц-(VOR-VHF omnirange);

Дэлхийн навигацийн хиймэл дагуулын систем-(GNSS-Global navigation satellite system).

Багасгасан босоо зайчлал- RVSM (Reduced vertical separation minimum)/энэ хэсгийг 2011 оны 278 дугаар тушаалаар нэмсэн/

Б БYЛЭГ. ИЛ ХАРААНЫ ЗАЙЧЛАЛ

75.51. Дараалсан хөөрөлт

(а) Хөөрөлт буултын ижил зурвасаар дараалан хөөрөлт үйлдэх агаарын хөлгүүдийг ил хараагаар зайчлахад дараах ерөнхий шаардлага тавигдана:

1/ эхний агаарын хөлөг хөөрсний дараа эхний эргэлтийг гүйцэтгэж, дараах агаарын хөлгийнхөө хөөрөлт үйлдэх чиглэлийг чөлөөлсөн, эсхүл аюулгүйн зайчлалаар тогтоогдсон цэгт хүрч илтгэсэн байх;

2/ эхний агаарын хөлгийн эхний эргэлтийн дараа нисэн гарах чиглэлүүд нь хоорондоо 30 градусаас багагүй зөрүүтэй байх;

3/ удаах агаарын хөлөгт нислэгийн хөдөлгөөний мэдээллийг дамжуулсан байх, дагалдах хуйлралын зайчлал хангагдсан байх.

75.53. Нисэн ирэлт болон нисэн гаралт

(а) Нисэн ирж буй агаарын хөлгийг хөөрөлт буюу буулт үйлдсэн агаарын хөлгөөс зайчлах. Нисэн ирж буй агаарын хөлөг нь дараах нөхцөлд хөөрч буух зурвасны босгыг давна:

1/ түрүүлж буулт үйлдсэн агаарын хөлөг хөөрч буух зурвасыг бүрэн чөлөөлсөн; эсхүл

2/ ижил чиглэлд түрүүлж хөөрөлт үйлдсэн агаарын хөлөг нь:

2.1 түүний дараа буулт үйлдэх агаарын хөлөг буултын дараах гүйлтэд саад учруулахааргүй зайд байх;

2.2 буулт үйлдэх агаарын хөлөг хоёрдугаар тойрогт явах тохиолдолд эргэлт хийж хоёрдугаар тойргийн замыг чөлөөлсөн байх.

(б) Хөөрөлт буултын бүсэд эсрэг чиглэлд хөөрөлт болон буулт үйлдэж буй агаарын хөлгүүдийг ил хараагаар зайчлахыг хориглох бөгөөд энэ дүрмийн B бүлэгт заасан босоо зайчлалыг баримтална.

(в) Нисэн гарч буй агаарын хөлгийг түүний өмнө хөөрөлт болон буулт үйлдсэн агаарын хөлгөөс зайчлах. Хөөрөлт үйлдэх агаарын хөлгийг дараах нөхцөлд ижил хөөрч буух зурвасыг огтлох, эсхүл огтлохгүй боловч цаашдын нислэгийн чиг нь давхцах чигт түүний өмнө хөөрөлт болон буулт үйлдсэн агаарын хөлгөөс зайчлагдсанд тооцно:

1/ түрүүлж хөөрөлт үйлдсэн агаарын хөлөг хөөрч буух зурвасыг бүрэн чөлөөлж аюулгүй чиглэлд эхний эргэлтийг гүйцэтгэсэн;

2/ түрүүлж буулт үйлдсэн агаарын хөлөг хөөрч буух зурвасыг бүрэн чөлөөлж хөөрч буух зурвасуудын огтлолцлын цэгийг дайран өнгөрсөн.

(г) Явгалж буй агаарын хөлгийг хөөрч буух зурвас дээрх агаарын хөлгөөс зайчлах. Явгалж буй агаарын хөлөг нь хөөрөлт болон буулт үйлдэх агаарын хөлөг хөөрч буух зурвасыг чөлөөлөх хүртэл дараах байрлал болон зайд байна:

1/ тусгайлан тогтоосон хүлээх цэгт; эсхүл

2/ хүлээх цэгийг тусгайлан тогтоогоогүй тохиолдолд хөөрч буух зурвасны хажуу ирмэгээс 30 метрээс багагүй зайд; эсхүл

3/ энэ зүйлийн (г)-ийн 1/ болон 2/-т заагдсан нөхцөлийг хангах боломжгүй үед хөөрөлт болон буулт үйлдэж буй агаарын хөлгийн хөдөлгөөнд саад учруулахааргүй, хөөрч буух зурвасны хажуу ирмэгээс тооцсон аюулгүй зайд.

(д) Хөөрөлт, буулт болон явгалалт үйлдэж буй агаарын хөлгийг газрын тусгай үйлчилгээний тээврийн хэрэгсэл, хөдөлгөөнт тоног төхөөрөмжөөс зайчлах. Газрын тусгай үйлчилгээний тээврийн хэрэгсэл, хөдөлгөөнт тоног төхөөрөмж нь хөөрөлт, буулт, явгалалт үйлдэж буй агаарын хөлгөөс дараах байрлал болон зайд байна:

1/ тусгайлан тогтоосон хүлээх цэгт;

2/ хүлээх цэгийг тусгайлан тогтоогоогүй тохиолдолд хөөрч буух зурвас, явгалах замын хажуу ирмэгээс 30 метрээс багагүй зайд; эсхүл

3/ энэ зүйлийн (д)-ийн 1/ болон 2/-т заагдсан нөхцөлийг хангах боломжгүй үед хөөрөлт, буулт, явгалалт үйлдэж буй агаарын хөлгийн хөдөлгөөнд саад учруулахааргүй, хөөрч буух зурвас болон явгалах замын хажуу ирмэгээс тооцсон аюулгүй зайд.

В БYЛЭГ. БОСОО ЗАЙЧЛАЛ

75.101. Босоо зайчлал

(а) Монгол Улсын, 8900 метрээс 12500 метрийн өндрийн агаарын зайг эрх бүхий байгууллагаас RVSM агаарын зайгаар тогтоосон, эсвэл зарласан тохиолдолд нислэг үйлдэж буй агаарын хөлгүүдийн хооронд дараах босоо зайчлал тогтоогдоно:

1/ нислэгийн цуваа 8400 метрээс доош 300 метр;

2/ нислэгийн цуваа 8400 метрээс 8900 метрт 500 метр;

3/ нислэгийн цуваа 8900 метрээс 12500 метрт 300 метр;

4/ нислэгийн цуваа 12500 метрээс дээш 600 метр. /Энэ хэсгийг 2011 оны 278-р тушаалаар өөрчилсөн/

75.103. Босоо зайчлалыг хадгалахгүй байх нөхцөлүүд

(а) Агаарын хөлгүүдийн хооронд босоо зайчлалыг дараах нөхцөл хангагдсан үед хадгалахгүй байж болно:

1/ "А" ангиллын агаарын зайд 600 метрээс бага босоо зайчлалтай эсрэг чиглэлд нисэж буй агаарын хөлгүүд бие биенээ ил хараагаар нисэн өнгөрснөө хоёул илтгэсэн;

2/ нислэгийн цуваа 6000 метрээс дээш эсрэг чиглэлд нисэж буй агаарын хөлгүүд навигацийн газрын нэг төхөөрөмжийг өнгөрснөө илтгэсэн бөгөөд хоёул уг төхөөрөмжөөс 2 минутаас багагүй нислэгийн зайд алслагдсан;

3/ нислэгийн цуваа 6000 метр буюу түүнээс доош эсрэг чиглэлд нисэж буй агаарын хөлгүүд бие биенээ ил хараагаар нисэн өнгөрснөө илтгэсэн, эсхүл хоёул ил харааны нэг илтгэх цэгийг өнгөрснөө илтгэсэн.

Г БYЛЭГ. ПРОЦЕДУРЫН УДИРДЛАГЫН ЗАЙЧЛАЛ 75.151. Ерөнхий зүйл

(а) Ойртолтын удирдлагын бүсийн агаарын зайд газрын саадаас дээш 300 метрийн аюулгүй өндөр хадгалан нисэх захирамж авсан агаарын хөлөг бүсийн хилд орох болон гарах илтгэлийг заавал өгнө.

(б) Аюулгүй зайчлалыг тооцоолон аэродромын удирдлагын бүсийн хилийг тогтоосон тохиолдолд ойртолтын удирдлагын бүсийн агаарын зайгаас аэродромын удирдлагын бүсэд шилжсэн агаарын хөлгийг ойртолтын удирдлагын бүсийн агаарын зайд нислэг үйлдэж буй агаарын хөлгүүдээс зайчлагдсанд тооцно.

75.153 Хажуугийн зайчлал

(а) Агаарын хөлгүүдийг тусгайлан тогтоогдсон дараах агаарын зай, бүсүүдэд хажуугаар зайчлахыг хориглоно:

1/ хүлээх бүс;

2/ дээд агаарын зайн агаарын замын чиглэл өөрчлөгдөх болон түүнээс гарахад зориулан тусгайлан тогтоосон аюулгүйн бүс;

3/ доод агаарын зайн агаарын зам;

4/ ойртолтын эхэн, дунд, төгсгөлийн хэсэг, хоёрдугаар тойрогт явах болон аэродромын удирдлагын бүс.

(б) Газарзүйн байрлалуудыг ашиглах. Байрлал тогтоох илтгэлээр агаарын хөлгүүд навигацийн тоног төхөөрөмж эсхүл ил хараагаар тодорхойлсон ялгаатай газарзүйн байрлалуудыг өнгөрч байгаа нь тогтоогдсон үед хажуугийн зайчлалыг баримталж болно.

(Зураг 1)

Зураг 1

(в) Навигацийн газрын нэг төхөөрөмж ашиглан агаарын хөлгүүдэд хажуугийн зайчлалыг дараах байдлаар тогтооно:

1/ VOR:

1.1 төхөөрөмжөөс холдож буй нислэгүүдийн хувьд, агаарын нислэгийн салж буй радиал нь хоорондоо 15 градусаас багагүй байх бөгөөд эхний агаарын хөлөг нь төхөөрөмжөөс 30 километр (16 далайн бээр)-ээс багагүй зайд холдсон байх; (Зураг 2)

1.2 төхөөрөмжид ойртож буй нислэгүүдийн хувьд, агаарын хөлгүүдийн нислэгийн радиал нь хоорондоо 15 градусаас багагүй байх бөгөөд эхний агаарын хөлөг нь төхөөрөмжөөс 90 километр (48 далайн бээр)-ээс багагүй зайтай байх; (Зураг 3)

1.3 төхөөрөмжөөс холдож, төхөөрөмжид ойртож буй нислэгүүдийн хувьд агаарын хөлгүүдийн нислэгийн радиал нь хоорондоо 15 градусаас багагүй байх бөгөөд агаарын хөлгүүд хоёул төхөөрөмжөөс 90 километр (48 далайн бээр)-ээс багагүй зайтай байх. (Зураг 4)

2/ NDB: агаарын хөлгүүдийн нислэгийн салж буй чиглэл нь хоорондоо 30 градусаас багагүй байх бөгөөд эхний агаарын хөлөг нь төхөөрөмжөөс 30 километр (16 далайн бээр)-аас багагүй зайд холдсон байна. (Зураг 5)

3/ Dead Reckoning (DR): агаарын хөлгүүдийн нислэгийн салж буй чиглэл нь хоорондоо 45 градусаас багагүй байх бөгөөд эхний агаарын хөлөг нь огтлолцлын цэгээс 30 километр (16 далайн бээр)-ээс багагүй зайд холдсон байх болон тухайн цэг нь газарзүйн цэг, навигацийн газрын бусад төхөөрөмж болон ил хараагаар тодорхойлогдсон цэг байна. (Зураг 6)

Зураг 2.

Зураг 3.

Зураг 4.

Зураг 5

Зураг 6

(г) Тусгаарлагдсан агаарын зайгаас гарч буй агаарын хөлөг дараах радиалыг огтолсноо илтгэсэн тохиолдолд газарзүйн байршлаар хажуугаар зайчлагдсанд тооцно:

1/ нислэгийн чиглэл нь бүсийн хилээс 5-аас багагүй өнцгөөр даялан холдох;

2/ траверз өнгөрөх агаарын хөлгийн нислэгийн шугамыг 45 градусаас багагүй өнцгөөр даялан холдох.

75.155. Тууш зайчлал

(а) Тууш зайчлалыг ашиглах: тууш зайчлалыг ашиглахад ижил чиглэл, огтлолцох чиглэл, эсрэг чиглэл гэсэн ухагдахуунуудыг хэрэглэнэ:

1/ ижил чиглэл гэж тухайн агаарын хөлгүүдийн ижил болон огтлолцох чигийн өнцгийн ялгаа нь 45 градусаас бага эсхүл 315 градусаас их байх чиглэлийг; (Зураг 7)

2/ эсрэг чиглэл гэж тухайн агаарын хөлгүүдийн эсрэг болон огтлолцох чигийн өнцгийн ялгаа нь 135 градусаас их боловч 225 градусаас бага байх чиглэлийг; (Зураг 8)

3/ огтлолцох чиглэл гэж тухайн агаарын хөлгүүдийн огтлолцох чигийн өнцгийн ялгаа нь энэ зүйлийн 1/ болон 2/- т зааснаас өөр байх чиглэлийг. (Зураг 9)

Зураг 7

Зураг 8

Зураг 9

(б) Хугацаагаар зайчлах нь:

1/ ижил чиглэлд ижил өндөрт нисэж буй агаарын хөлгүүдийн хооронд дараах тууш зайчлал тогтоогдоно:

1.1 15 минут; (Зураг 10)

1.2 хурд болон байрлалаа тодорхойлох навигацийн тоног төхөөрөмжийн бүрхэлттэй бүсэд 10 минут; (Зураг 11)

1.3 дор дурдсан агаарын хөлгүүдийн хувьд түрүүлж яваа агаарын хөлөг нь дараах агаарын хөлгөөс 37 км/ц-аас илүү агаарын жинхэнэ хурдтай тохиолдолд 5 минут: (Зураг 12)

1.3.1 агаарын хөлгүүд нэг аэродромоос нисэн гарсан;

1.3.2 агаарын хөлгүүд агаарын замын нэг илтгэх цэгүүдийг илтгэсэн;

1.3.3 агаарын замаар нисэж яваа агаарын хөлөг болон нисэн гарсан агаарын хөлгүүдийн хувьд, нисэн гарсан агаарын хөлөг агаарын замд нэгдэх мөчид агаарын замд яваа агаарын хөлөгтэй 5 минутаар зайчлагдах бүрэн боломжтой.

1.4 энэ зүйлийн 1.3-ийн 1.3.1;1.3.2;1.3.3-т заасан нөхцөлийг хангаж байгаа болон түрүүлж яваа агаарын хөлөг нь дараах агаарын хөлгөөс 74 км/ц-аас илүү хурдтай тохиолдолд 3 минут.(Зураг 13)

Зураг 10.

Зураг 11.

Зураг 12.

Зураг 13.

2/ огтлолцох чиглэлд нисэж буй агаарын хөлгүүдийн хувьд дараах тууш зайчлал тогтоогдоно:

2.1 эхний агаарын хөлөг замын огтлолцлын цэг дээр ирэх мөчид дараах агаарын хөлөг нь огтлолцлын цэгээс 15 минутын нислэгийн зайд орших; (Зураг 14)

2.2 байрлал болон хурдаа тодорхойлох газрын навигацийн төхөөрөмжийн бүрхэлтээр бүрхэгдсэн бүсэд эхний агаарын хөлөг замын огтлолцлын цэг дээр ирэх мөчид дараах агаарын хөлөг нь огтлолцлын цэгээс 10 минутын нислэгийн зайд орших. (Зураг 15)

Зураг 14.

Зураг 15.

3/ агаарын хөлгүүд өндөр авах болон өндөр алдах үед:

3.1 өндөр авалт, өндөр алдалтын үеийн агаарын хөлөг хоорондын тууш зайчлалыг зөвхөн дараах тохиолдолд хэрэглэнэ:

3.1.1 удаах агаарын хөлөг нь түрүүлж яваа агаарын хөлгийн эзлэн яваа нислэгийн цуваа/өндрийг огтлон өндөр авах;

3.1.2 түрүүлж яваа агаарын хөлөг нь удаах агаарын хөлгийн эзлэн яваа нислэгийн цуваа/өндрийг огтлон өндөр алдах.

3.2 ижил чиглэлд өндөр авах болон алдаж буй агаарын хөлөг өөр агаарын хөлгийн нисэж яваа нислэгийн цуваа /өндрийг огтлох тохиолдолд дараах тууш зайчлалыг тогтооно:

3.2.1 нислэгийн цуваа / өндрийг огтлох мөчид 15 минут; (Зураг 16,17)

3.2.2 агаарын хөлөг байрлал болон хурдаа тодорхойлох газрын навигацийн төхөөрөмжийн бүрхэлтээр бүрэн бүрхэгдсэн бүсэд 10 минут; (Зураг 18,19)

3.2.3 тодорхой илтгэх цэгийг өнгөрснөө удаах агаарын хөлөг илтгэсэнээс хойш 10 минутын дотор өндөр авалт болон алдалтыг гүйцэтгэж байгаа тохиолдолд, нислэгийн цуваа / өндрийг огтлох мөчид 5 минут.(Зураг 20,21)

Зураг 16.

Зураг 17.

Зураг 18.

Зураг 19.

Зураг 20.

Зураг 21.

3.3 огтлолцох чиглэлд:

3.3.1 нислэгийн цуваа / өндрийг огтлох мөчид 15 минут; (Зураг 22,23)

3.3.2 агаарын хөлөг байрлал болон хурдаа тодорхойлох газрын навигацийн тоног төхөөрөмжийн бүрхэлтээр бүрэн бүрхэгдсэн бүсэд 10 минут. (Зураг 24,25)

Зураг 22.

Зураг 23.

Зураг 24.

Зураг 25.

4/ эсрэг чиглэлд нисэж буй агаарын хөлгүүдийн хооронд тэдгээрийн уулзах тооцоот цагаас 10 минутын өмнөөс 10 минут өнгөрөх хүртэлх хугацаанд босоо зайчлалыг хадгална.(Зураг 26)

Зураг 26.

(в) DME эсхүл GNSS ашиглан зайгаар зайчлах. Агаарын хөлгүүд зөвхөн газар-агаар хоёр талын радио-холбоотой нөхцөлд DME болон GNSS алслалтын илтгэлийг ашиглан дараах зайгаар тууш зайчлагдана:

1/ ижил чиглэлд:

1.1 дараах нөхцөлийг хангаж байгаа тохиолдолд 40 километр (22 далайн бээр):

1.1.1 агаарын хөлгүүд хоёулаа нислэгийн чиглэлийн дагуух нэг DME төхөөрөмжөөр алслалтаа тодорхойлж байгаа; эсхүл

1.1.2 эхний агаарын хөлөг нислэгийн чиглэлийн дагуух DME төхөөрөмжөөр, дараагийн агаарын хөлөг тухайн DME суурилагдсан цэгээс GNSS-ээр алслалтаа тодорхойлж байгаа; эсхүл

1.1.3 агаарын хөлгүүд хоёулаа нислэгийнхээ чиглэлийн дагуух нэг цэгээс GNSS-ээр алслалтаа тодорхойлж байгаа. (Зураг 27)

1.2 түрүүлж яваа агаарын хөлөг нь удаах агаарын хөлгөөс 37 км/ц-аас илүү хурдтай нисэх бөгөөд дараах нөхцөлийг хангаж байгаа тохиолдолд 30 километр (16 далайн бээр):

1.2.1 агаарын хөлгүүд нь нислэгийнхээ чиглэлийн дагуух ижил DME төхөөрөмжөөр алслалтаа тодорхойлж байгаа; эсхүл

1.2.2 эхний агаарын хөлөг нислэгийн чиглэлийн дагуух DME төхөөрөмжөөр, дараагийн агаарын хөлөг тухайн DME суурилагдсан газарзүйн цэгээс GNSS-ээр алслалтаа тодорхойлж байгаа; эсхүл

1.2.3 хоёулаа нислэгийнхээ чиглэлийн дагуух газарзүйн цэгээс GNSS-ээр алслалтаа тодорхойлж байгаа. (Зураг 28)

Зураг 27.

Зураг 28.

2 / огтлолцох чиглэлд:

2.1 DME болон тухайн DME суурилагдсан газарзүйн цэг дээр огтлолцож байгаа агаарын хөлгүүдийн нислэгийн чиглэлийн хоорондын өнцөг нь 90 градусаас бага байх бөгөөд дараах нөхцөлийг хангаж байгаа тохиолдолд 40 километр: (22 далайн бээр)

2.1.1 агаарын хөлгүүд нь нислэгийн чиглэлийн дагуух нэг DME төхөөрөмжөөр алслалтаа тодорхойлж байгаа; эсхүл

2.1.2 эхний агаарын хөлөг нислэгийн чиглэлийн дагуух DME төхөөрөмжөөр, дараагийн агаарын хөлөг тухайн DME суурилагдсан цэгээс GNSS-ээр алслалтаа тодорхойлж байгаа; эсхүл

2.1.3 хоёулаа нислэгийнхээ чиглэлийн дагуух нэг цэгээс GNSS-ээр алслалтаа тодорхойлж байгаа. (Зураг 29)

2.2 DME болон тухайн DME суурилагдсан газарзүйн цэг дээр огтлолцож байгаа агаарын хөлгүүдийн нислэгийн чиглэлийн хоорондын өнцөг нь 90 градусаас бага, түрүүлж яваа агаарын хөлөг нь удаах агаарын хөлгөөс 37 км/ц-аас илүү хурдтай байх бөгөөд дараах нөхцөлийг хангаж байгаа тохиолдолд 30 километр: (16 далайн бээр)

2.2.1 агаарын хөлгүүд хоёулаа нислэгийнхээ чиглэлийн дагуух нэг DME төхөөрөмжөөр алслалтаа тодорхойлж байгаа; эсхүл

2.2.2 эхний агаарын хөлөг нислэгийн чиглэлийн дагуух DME төхөөрөмжөөр, дараагийн агаарын хөлөг тухайн DME суурилагдсан газарзүйн цэгээс GNSS-ээр алслалтаа тодорхойлж байгаа; эсхүл

2.2.3 хоёулаа нислэгийнхээ чиглэлийн дагуух газарзүйн цэгээс GNSS- ээр алслалтаа тодорхойлж байгаа.(Зураг 30)

Зураг 29.

Зураг 30.

3/ өндөр алдалт, өндөр авалтад: дараах нөхцөлүүдийг хангаж байгаа тохиолдолд 40 километр (22 далайн бээр):

3.1 агаарын хөлгүүд хоёулаа нислэгийн чиглэлийн дагуух нэг DME төхөөрөмжөөр алслалтаа тодорхойлж байгаа; эсхүл

3.2 нэг дэх агаарын хөлөг нислэгийн чиглэлийн дагуух DME төхөөрөмжөөр, хоёр дахь агаарын хөлөг тухайн DME суурилагдсан цэгээс GNSS-ээр алслалтаа тодорхойлж байгаа; эсхүл

3.3 агаарын хөлгүүд хоёулаа нислэгийнхээ чиглэлийн дагуух нэг цэгээс GNSS-ээр алслалтаа тодорхойлж байгаа. (Зураг 31, Зураг 32)

Зураг 31.

Зураг 32.

4/ эсрэг чиглэлд: DME болон тухайн DME суурилагдсан чиглэлийн дагуух газарзүйн нэг цэг рүү буюу түүнээс холдон нисэж байгаа агаарын хөлгүүд зөрж өнгөрснийг DME эсхүл GNSS-ийн илтгэлээр тодорхойлсон бөгөөд хоорондоо 40 км нислэгийн зайд алслагдсан тохиолдолд босоо зайчлалыг хангахгүй байж болно.(Зураг 33)

Зураг 33.

(г) Мах тооны аргачлал ашиглан хугацаагаар зайчлах:

1/ дараах нөхцөлд агаарын хөлгүүдийн хооронд 10 минутын тууш зайчлалыг хадгална:

1.1 мах тооны аргачлалыг ашиглаж байгаа;

1.2 агаарын хөлгүүд чиг шулуун нислэгт өндөр авч, өндөр алдаж байгаа;

1.3 агаарын хөлгүүд ижил болон цааш салах чиглэлд нисч байгаа;

1.4 агаарын хөлгүүд ижил цэгүүдэд илтгэж байгаа.

2/ энэ зүйлийн 1/-д заасан тууш зайчлалыг агаарын хөлгүүдийн нислэгийн чиглэл салах хүртэл хадгалах бөгөөд салах цэгт агаарын хөлгүүдийн хооронд зохих хажуугийн зайчлал, эсхүл хажуугийн зайчлал хангагдах мөчид 5 минутаас багагүй тууш зайчлал хадгалагдана.

3/ түрүүлж яваа агаарын хөлөг нь удаах агаарын хөлгөөс хурд багатай тохиолдолд энэ зүйлийн 1/-д заагдсан тууш зайчлалыг дараах цэг хүртэл хадгална:

3.1 нислэгийн чиглэл салах цэг хүртэл болон салах цэгт агаарын хөлгүүдийнхооронд зохих хажуугийн зайчлал, эсхүл хажуугийн зайчлал хангагдах мөчид 5 минутаас багагүй тууш зайчлал хангагдах; эсхүл

3.2 энэ дүрэмд заагдсан бусад зайчлал хангагдах цэг.

4/ дараах нөхцөлд хүснэгт 1/-д заагдсан багасгасан тууш зайчлалыг бариулж болно:

4.1 түрүүлж яваа агаарын хөлөг нь удаах агаарын хөлгөөс илүү хурдтай;

4.2 ижил чиглэлд, ижил цэгүүдэд илтгэж байгаа.

Мах тооны зөрүү	Тууш зайчлал
0.02	9 минут
0.03	8 минут
0.04	7 минут
0.05	6 минут
0.06	5 минут

Хүснэгт 1

75.157. Аэродромын удирдлагын бүсэд баримтлах зайчлал (а) Дараалсан хөөрөлтийн хоорондын зайчлал:

1/ энэ дүрмийн 75.51, 75.53 -д заасны дагуу ил хараагаар зайчлахаас бусад тохиолдолд хөөрөлтийн дараа нисэн гарах эхний үе шатанд дараах босоо болон хэвтээ зайчлалыг бусад зайчлал хангагдах хүртэл ашиглаж болно:

1.1 агаарын хөлгүүд ижил хөөрч буух зурвасаас хөөрсөн тохиолдолд эхний агаарын хөлөг аль ч чигт хөөрсний дараа хөөрч буух зурвасны тууш тэнхлэгийн шугамнаас хоёр тийш 135 градусаас илүү өнцгөөр эргэлт хийхийг хориглох;

1.2 агаарын хөлгүүд ялгаатай хөөрч буух зурвас ашиглаж байгаа тохиолдолд эхний агаарын хөлөг хөөрсний дараа дараах чигт эргэлт үйлдэхийг хориглоно:

1.2.1 удаах агаарын хөлгийн хөөрөлт үйлдэх хөөрч буух зурвасны тэнхлэгийн шугамыг огтлох чигт;

1.2.2 эхний агаарын хөлөг нь эсрэг чиглэлд хөөрч, удаах агаарын хөлгийн хөөрөлт үйлдэх хөөрч буух зурвасны тэнхлэгийн үргэлжлэх шугамнаас 135 градусаас илүү өнцгөөр эргэх.

2/ хөөрөлт үйлдэх агаарын хөлгүүдийг дараах хугацаагаар зайчилна:

2.1 дараах нөхцөл хангагдсан үед 5 минут:

2.1.1 эхний агаарын хөлөг удаах агаарын хөлгөөс илүү хурдтай эсхүл ижил хурдтай;

2.1.2 удаах агаарын хөлөг нь эхний агаарын хөлгийн эзэлсэн өндрийг огтлох;

2.1.3 агаарын хөлгүүд босоо зайчлал хангагдах хүртэл ижил чиглэлд нисэх.(Зураг 34)

2.2 эхний агаарын хөлөг удаах агаарын хөлгөөс 74 км/ц-аас илүү хурдтай үед 3 минут; (Зураг 35)

2.3 агаарын хөлгүүдийн нислэгийн чиглэл нь хөөрсний дараа 45 градусаас багагүй өнцгөөр салах нөхцөлд 2 минут. (Зураг 36)

Зураг 34.

Зураг 35.

Зураг 36.

(б) Хөөрөлт, буултын хоорондын зайчлал. Өөр агаарын хөлөг хэрэглэлээр ойртолт үйлдэж байх үед нисэн гарах агаарын хөлөгт дараах нөхцөл хангагдсан үед хөөрөлт үйлдэх зөвшөөрөл олгож болно:

1/ нисэн гарч буй агаарын хөлөг, ойртолт үйлдэж буй агаарын хөлгийг буултын өмнөх шулууны эсрэг чиглэлийн нислэгийн хэсгийн төгсгөл бөгөөд эргэлт хийх цэгт хүрэхээс 3 минутаас багагүй хугацааны өмнө хөөрөх;

2/ хөөрөлтийн дараа хэвтээ аюулгүй зайчлал хангагдах хүртэл босоо зайчлалыг хадгалах.

(в) Дагалдах хуйлралын хугацаан зайчлал:

1/ хөөрөлт:

1.1 дараах нөхцөлд хүнд агаарын хөлөг болон түүний дараа хөөрөлт үйлдэж буй бусад бүх ангиллын агаарын хөлгүүдийн хооронд, эсхүл дунд агаарын хөлөг болон түүний дараа хөөрөлт үйлдэж буй хөнгөн агаарын хөлгийн хооронд 2 минутын зайчлал тогтоогдоно:

1.1.1 ижил хөөрч буух зурвасаар хөөрөлт үйлдэж байгаа; 1.1.2 тууш тэнхлэгийн шугамуудын хоорондын зай нь 760 метрээс бага, параллель хөөрч буух зурвасаар хөөрөлт үйлдэж байгаа. (Зураг 37)

1.2 дараах нөхцөлд хүнд агаарын хөлөг болон түүний дараа хөөрөлт үйлдэж буй бүх ангиллын агаарын хөлгүүдийн хооронд, эсхүл дунд агаарын хөлөг болон түүний дараа хөөрөлт үйлдэж буй хөнгөн агаарын хөлгүүдийн хооронд 3 минутын зайчлал тогтоогдоно:

1.2.1 удаах агаарын хөлөг нь ижил хөөрч буух зурвас, зурвасны дунд хэсгээс хөөрөлт үйлдэж байвал;

1.2.2 нислэгийн удирдагч шаардлагатай гэж үзвэл. (Зураг 38)

1.3 нэг хөөрч буух зурвас болон тууш тэнхлэгийн шугамууд хоорондын зай нь 760 метрээс бага, параллель хөөрч буух зурвас дээгүүр нисэн өнгөрсөн, хоёрдугаар тойрогт явсан хүнд агаарын хөлөг болон уг зурвасаар хөөрөлт үйлдэх бусад бүх ангиллын агаарын хөлгүүдийн хооронд 3 минутын зайчлал тогтоогдоно.

(Зураг 39)

Зураг 37.

Зураг 38.

Зураг 39.

2/ буулт:

2.1 хүнд агаарын хөлөг болон түүний дараа буулт үйлдэж буй дунд агаарын хөлгийн хооронд 2 минутын зайчлал тогтоогдоно;(Зураг 40)

2.2 хүнд буюу дунд агаарын хөлөг болон тэдгээрийн дараа буулт үйлдэж буй хөнгөн агаарын хөлгүүдийн хооронд 3 минутын зайчлал тогтоогдоно.(Зураг 41)

Зураг 40.

Зураг 41.

3/ эсрэг чиглэл: дараах нөхцөлд хөөрөлт үйлдсэн хүнд агаарын хөлөг болон түүний дараа эсрэг чиглэлээр нь буулт үйлдэх бусад бүх ангиллын агаарын хөлгүүдийн хооронд, эсхүл дунд болон хөнгөн агаарын хөлгүүдийн хооронд 2 минутын зайчлал тогтоогдоно:

3.1 ижил хөөрч буух зурвасаар буулт үйлдэж байгаа;(Зураг 42)

3.2 хөөрч буух зурвасуудын гол шугамын хоорондын зай нь 760 метрээс бага, параллель хөөрч буух зурвасаар буулт үйлдэж байгаа. (Зураг 43)

Зураг 42.

Зураг 43.

75.159. Хүлээх бүсийн зайчлал

(а) Хүлээх бүсэд нислэг үйлдэж буй агаарын хөлгүүдийн хооронд босоо зайчлал хангагдсан байна.

(б) Дараах нөхцөлд агаарын замаар нисэж байгаа агаарын хөлөг болон хүлээх бүсэд нислэг үйлдэж байгаа агаарын хөлгүүдийн хооронд босоо зайчлалыг хадгалахгүй байж болно:

1/ агаарын замаар нисэж буй агаарын хөлөг хөндлөн нэвтрэх агаарын зайн аюулгүй зайчлалыг хангахаар тооцоолон тогтоосон цэгт хүрч илтгэсэн;

2/ агаарын замаар нисэж буй агаарын хөлөг хүлээх бүсийн хилээс 5 минутаас багагүй хугацааны нислэгийн зайд байгаа. (Зураг 44)

Зураг 44.

Д БYЛЭГ. АЖИГЛАЛТЫН СИСТЕМИЙН УДИРДЛАГЫН ЗАЙЧЛАЛ

75.201. Хажуугийн зайчлал

(а) Ажиглалтын системийн тасралтгүй хяналттай агаарын зайд нислэг үйлдэж буй агаарын хөлгүүдийн хооронд дараах хажуугийн зайчлал тогтоогдоно:

1/ ижил чиглэлд: 10 километр;

2/ эсрэг чиглэлд: 10 километр /30 км тууш зайчлалыг давхар баримтална/.

(б) Ажиглалтын системийн тасралтгүй хяналттай бус агаарын зайд энэ зүйлийн (а)-д заагдсан хажуугийн зайчлалыг баримтлахыг хориглоно.

75.203. Тууш зайчлал

(а) Ажиглалтын системийн тасралтгүй хяналттай агаарын зайд ижил өндөрт нислэг үйлдэж буй агаарын хөлгүүдийн хооронд дараах тууш зайчлалыг баримтална:

1/ ижил чиглэлд:

1.1 30 километр;(16 далайн бээр) (Зураг 45)

1.2 ойртолтын удирдлагын бүсэд 20 километр;(11 далайн бээр) (Зураг46)

1.3 аэродромын удирдлагын бүсэд 10 километр.(5 далайн бээр) (Зураг7)

Зураг 45.

Зураг 46.

Зураг 47.

2/ огтлолцох чиглэлд:

2.1 эхний агаарын хөлөг замын огтлолцлын цэг дээр ирэх мөчид дараах агаарын хөлөг нь огтлолцлын цэгээс 40 км (22 далайн бээр) -ын нислэгийн зайд орших;(Зураг 48)

2.2 ойртолтын удирдлагын эхний агаарын хөлөг замын огтлолцлын цэг дээр ирэх мөчид дараах агаарын хөлөг нь огтлолцлын цэгээс 30 км (16 далайн бээр) -ын нислэгийн зайд орших. (Зураг 49)

Зураг 48.

Зураг 49.

3/ агаарын хөлгүүд өндөр авах болон өндөр алдах үед:

3.1 өндөр алдалт, өндөр авалтын үеийн агаарын хөлөг хоорондын тууш зайчлалыг зөвхөн дараах тохиолдолд хэрэглэнэ:

3.1.1 удаах агаарын хөлөг нь түрүүлж яваа агаарын хөлгийн эзлэн яваа нислэгийн цуваа / өндрийг огтлон өндөр авах;

3.1.2 түрүүлж яваа агаарын хөлөг нь удаах агаарын хөлгийн эзлэн яваа нислэгийн цуваа / өндрийг огтлон өндөр алдах.

3.2 ижил чиглэлд өндөр авах буюу алдаж буй агаарын хөлөг өөр агаарын хөлгийн нисэж яваа нислэгийн цуваа / өндрийг огтлох тохиолдолд 30 км (16 далайн бээр)-ын тууш зайчлалыг тогтоонo; (Зураг 50, Зураг 51)

3.3 эсрэг чиглэлд өндөр авах буюу алдаж буй агаарын хөлөг өөр агаарын хөлгийн нисэж яваа нислэгийн цуваа / өндрийг огтлох тохиолдолд 30 км (16 далайн бээр)-ын тууш зайчлал болон 10 км (5 далайн бээр)-ын хажуугийн зайчлалыг нэгэн зэрэг баримтална.

Зураг 50.

Зураг 51.

Е БYЛЭГ. БУСАД ЗАЙЧЛАЛ

75.251. Түлш юүлж буй агаарын хөлгөөс зайчлах

(а) Агаарын хөлөг нь газрын гадаргаас дээш 1800 метр(6000 фут)-ээс багагүй өндөрт, хот, суурингаас хол байхаар тогтоосон агаарын замд, үргэлжлэх хугацааг нислэгийн удирдагчтай зөвшилцсөний үндсэн дээр түлшээ юүлнэ.

(б) Агаарын хөлөг нь түлш юүлж буй агаарын хөлгөөс дараах байдлаар зайчлагдана:

1/ түлш юүлэх гэж буй агаарын хөлгийн хойно нисэж байгаагаас бусад тохиолдолд 20 км (11 далайн бээр) хэвтээ зайчлал;

2/ түлш юүлж буй агаарын хөлгийн хойноос нисэж буй тохиолдолд 15 минут, эсхүл 95 км (51 далайн бээр)-ын тууш зайчлал;

3/ хэрэв энэ зүйлийн (б)-гийн 2/-т заасан тууш зайчлалыг хангаагүй тохиолдолд, түлш юүлж буй агаарын хөлгөөс дээш 300 метр (1000 фут), эсхүл доош 900 метр (3000 фут)-ийн босоо зайчлал хангагдана.

75.253. "F" ангиллын агаарын зайгаас зайчлах

(а) Дор дурдсанаас бусад тохиолдолд агаарын хөлөг "F" ангиллын агаарын зайн хилээс зайчлагдах шаардлагатай:

1/ агаарын хөлөг "F" ангиллын агаарын зайд орох зөвшөөрөл авсан;

2/ агаарын хөлөг тогтоосон тусгай өндөрт нисэх зөвшөөрөл авсан;

3/ ил харааны ойртолт үйлдэх зөвшөөрөл авсан.

(б) Дагалдах хуйлралын зайчлал буюу 300 метрийн аюулгүй өндрийн зайчлал.

(в) Тогтоогдоогүй нөхцөлд агаарын хөлөг "F" ангиллын агаарын зайгаас 150 метр босоо зайгаар зайчлагдаж болно.

75.255 . Агаараас зураг авах болон эрэн хайх нислэгээс зайчлах

(а) Агаараас зураг авах болон эрэн хайх зорилгоор хэрэглэлийн нислэгийн дүрэм болон ил харааны нислэгийн онцгой дүрмээр гүйцэтгэгдэж буй нислэгийн хамгаалагдсан бүсийн хилийг бусад агаарын хөлгөөс зайчлах зорилгоор дараах байдлыг тогтооно:

1/ нислэгийн шугамаас хоёр тийш 8 километр (4 далайн бээр);

2/ нислэгийн цуваа 6000 метр буюу түүнээс доош, нислэгийн шугамын төгсгөл буюу буцах эргэлт хийх цэгээс 8 километр (4 далайн бээр);

3/ нислэгийн цуваа 6000 метрээс дээш, энэ дүрэмд заагдсан хэвтээ зайчлалыг хангахуйцаар байх.

75.257. Ил харааны ойртолт

(а) Дараах нөхцөлд агаарын хөлөгт ил хараагаар ойртолт үйлдэх зөвшөөрөл олгоно:

1/ нисэн очих аэродром дээрх үүлний доод суурийн өндөр хэрэглэлийн нислэгийн дүрмээр аюулгүйн доод өндрөөс дээш 150 метрээс багагүй, алсын барааны харагдац 8 километрээс багагүй байх;

2/ хэрэглэлийн нислэгийн дүрэм болон ил харааны нислэгийн онцгой дүрмээр нислэг үйлдэж буй бусад агаарын хөлгүүдтэй ил харааны зайчлалаас бусад зайчлал хангагдаж байх;

3/ ил харааны дараах илтгэлийг өгсөн байх:

3.1 хэрэглэлийн нислэгийн дүрэм болон ил харааны нислэгийн онцгой дүрмээр эхэлж буулт үйлдэх агаарын хөлөг байхгүй тохиолдолд буух аэродромоо харсан; эсхүл

3.2 түүний өмнө буулт үйлдэхээр урьдчилан мэдээлэгдсэн агаарын хөлгийг харсан.

(б) Ил хараагаар ойртолт үйлдэж байгаа агаарын хөлөг нь хэрэглэлийн нислэгийн дүрэм болон ил харааны нислэгийн онцгой дүрмээр агаарын хөлөгтэй аюулгүй зайг хангах нислэгийн шугамаар ниснэ.

Шүүлтүүр

Сонсох:

Legislation Acts

Санал хүсэлт