ЗАСГИЙН ГАЗРЫН ТОГТООЛ (ЗАХИРАМЖ)

2001 оны 7 дугаар сарын 4-ний өдөр

Дугаар 149

Улаанбаатар хот

ГОЦ ХАЛДВАРТ ӨВЧНИЙ ЦАГИЙН БАЙДАЛТАЙ ХОЛБОГДУУЛАН АВАХ ЗАРИМ АРГА ХЭМЖЭЭНИЙ ТУХАЙ

Мал эмнэлэг, хүнсний аюулгүй байдал, хөдөө аж ахуйн улсын хяналтын байгууллагын мэргэжилтнүүдээс гаргасан санал, дүгнэлтийг үндэслэн Монгол Улсын Засгийн газраас ТОГТООХ нь:

1. Орхон, Сэлэнгэ аймгийн зарим сумын нутаг дэвсгэрт гарсан малын гоц халдварт өвчний цагийн байдалтай холбогдуулан дор дурдсан арга хэмжээг 2001 оны 7 дугаар сарын 5-ны өдрөөс эхлэн хэрэгжүүлэхээр тогтоосугай:

а/Сэлэнгэ аймгийн Шаамар,Ерөө, Жавхлант, Дархан-Уул аймгийн Орхон сумын нутгийн захиргааны болон хууль хяналтын бүх шатны байгууллага, аж ахуйн нэгж, иргэний хамгаалалтын албадад дагаж мөрдүүлж байгаа иргэний хамгаалалтын бүх нийтийн бэлэн байдлын зэргийг өндөржүүлсэн бэлэн байдлын зэрэг, хорио цээрийн онцгой дэглэмийг хорио цээрийн хязгаарлалтын дэглэм болгон тус тус өөрчлөх;

б/Орхон аймгийн Жаргалант, Булган аймгийн Хангал, Сэлэнгэ аймгийн Баруунбүрэн, Зүүнбүрэн, Сүхбаатар, Алтанбулаг, Дархан-Уул аймгийн Дархан сумын нутгийн захиргааны болон хууль хяналтын бүх шатны байгууллага, аж ахуйн нэгж, иргэний хамгаалалтын албадад дагаж мөрдүүлж байгаа иргэний хамгаалалтын өндөржүүлсэн бэлэн байдлын зэрэг, хорио цээрийн хязгаарлалтын дэглэмийг цуцлах.

2. Энэ тогтоолын 1 дүгээр зүйлийн "а"-д заасан сумдын нутгийн захиргааны болон хууль хяналтын байгууллага, иргэний хамгаалалтын албадын үйл ажиллагааг зохих журам, удирдамжийн дагуу иргэний хамгаалалтын өндөржүүлсэн бэлэн байдлын зэрэгт шилжүүлж, хүч хэрэгслийг зохион байгуулан хорио цээрийн хязгаарлалтын дэглэмийг сахиулах, ариутгах зэрэг арга хэмжээ авах, хүн, мал, тээврийн хэрэгсэл, зорчигчдын хөдөлгөөнийг Улсын байнгын онцгой комисстой зөвшилцөн зохицуулах, хэрэгжилтэд нь хяналт тавьж ажиллахыг Сэлэнгэ, Дархан-Уул аймгийн Засаг дарга Р.Нямсүрэн, Д.Хаянхярваа нарт үүрэг болгосугай.

3. Хорио цээрийн хязгаарлалтын дэглэмийг сахиулах, иргэний хамгаалалтын өндөржүүлсэн бэлэн байдалд ажиллах нутгийн захиргааны холбогдох байгууллага, албадыг мэргэжлийн удирдамж, зөвлөлгөөгөөр хангаж ажиллахыг Хүнс, хөдөө аж ахуйн сайд Д.Насанжаргал, Улсын иргэний хамгаалалтын газрын дарга О.Үржин нарт үүрэг болгосугай.

4. Авто тээврийн товчоодод ажиллуулах мал эмнэлэг, ариун цэврийн хяналтын ажилтны орон тоо, цалинг зохицуулан шийдвэрлэх замаар орон нутгаас нийслэлд оруулж байгаа мах, малын гаралтай түүхий эд, бүтээгдэхүүнд тавих хяналтыг чангатган малын гоц халдварт өвчнөөс урьдчилан сэргийлэх арга хэмжээ авахыг Нийслэлийн Засаг дарга бөгөөд Улаанбаатар хотын захирагч М.Энхболдод даалгасугай.

5. Малын гоц халдварт өвчинтэй тэмцэх, түүнээс урьдчилан сэргийлэх арга хэмжээнд зориулан Орхон, Сэлэнгэ аймагт зарцуулсан нийт зардлын 30 хувийг тухайн аймгийн төсвөөс гаргахаар тогтоож, үлдэх хэсгийг үндсэн материалыг нягтлан шалгаж хэмжээг нарийвчлан тогтоосны үндсэн дээр "Малын гоц халдварт өвчний цагийн байдалтай холбогдуулан авах зарим арга хэмжээний тухай" Засгийн газрын 2001 оны 5 дугаар сарын 2-ны өдрийн 101 дүгээр тогтоолоор зөвшөөрөгдсөн эх үүсвэрээс гаргаж, холбогдох аймагт нь нөхөн олгохыг Санхүү, эдийн засгийн сайд Ч.Улаан, Батлан хамгаалахын сайд, Улсын байнгын онцгой комиссын дарга Ж.Гүррагчаа нарт даалгасугай.

6. Энэ тогтоол гарсантай холбогдуулан "Иргэний хамгаалалтын бэлэн байдлын зэргүүдэд шилжүүлэх тухай" Засгийн газрын 2001 оны 6 дугаар сарын 1-ний өдрийн 118 дугаар тогтоолын 1-5 дугаар зүйл, 6 дугаар зүйлийн "а, б, в, г, д" заалт, 7, 9 дүгээр зүйл, "Бэлэн байдлын зэрэг, хорио цээрийн дэглэмийг өөрчлөх, цуцлах тухай" Засгийн газрын 2001 оны 6 дугаар сарын 20-ны өдрийн 129 дүгээр тогтоолын 1 дүгээр зүйлийн "б" заалтаас бусад зүйл, заалтыг тус тус хүчингүй болсонд тооцсугай.

/Засгийн газрын 2001 оны 7 дугаар сарын 4-ний өдрийн 169 дүгээр тогтоолынөөрчлөлтийг тусгав./

Монгол Улсын Ерөнхий сайд Н.ЭНХБАЯР

Батлан хамгаалахын сайд Ж.ГҮРРАГЧАА