ГААЛИЙН ЕРӨНХИЙ ГАЗРЫН ДАРГЫН ТУШААЛ

2025 оны 1 дүгээр сарын 22-ны өдөр

Дугаар А/17

Улаанбаатар хот

ЖУРАМД НЭМЭЛТ ОРУУЛАХ ТУХАЙ

Засгийн газрын агентлагийн эрх зүйн байдлын тухай хуулийн 8 дугаар зүйлийн 8.4 дэх хэсэг, Гаалийн тухай хуулийн 232 дугаар зүйлийн 232.2 дахь заалт, 271¹дүгээр зүйлийн 271¹.1.1.1, 271¹.1.2, 271¹.1.17 дахь заалт, Гаалийн ерөнхий газрын Мэргэжлийн зөвлөлийн 2024 оны 12 дугаар сарын 13-ны өдрийн хуралдааны 09/06 дугаартай шийдвэрийг тус тус үндэслэн ТУШААХ нь:

1.Гаалийн ерөнхий газрын даргын 2019 оны А/275 дугаар тушаалын хавсралтаар батлагдсан "Гаалийн хилээр нэвтрүүлэх бараа, тээврийн хэрэгсэлд гаалийн хяналт тавих нийтлэг журам"-д дор дурдсан заалтуудыг тус тус нэмсүгэй:

1.1."Тав. Гаалийн хилээр оруулах бараа, тээврийн хэрэгслийг мэдүүлэх, гаалийн хяналт тавих" гэсэн хэсгийн 5.7 дахь заалтын дараа "5.7¹. "Гаалийн тариф, гаалийн татварын тухай хуулийн 8.1-д заасны дагуу тус хуулийн 10 дугаар зүйлд заасан хэлцлийн үнийн аргын шаардлагыг хангаж байгаа эсэхийг CAIS-ийн Гаалийн бүрдүүлэлтийн програмд шалгаж, хэлцлийн үнийг баталгаажуулж болно. Энэ тохиолдолд гаалийн мэдүүлэг "бичиг баримтын шалгалт хийсэн" төлөвт автоматаар шилжинэ" гэж;

1.2."Арван гурав. Бусад" гэсэн хэсэгт "13.11. Энэ журмын 5.7¹-д заасны дагуу CAIS-ийн Гаалийн бүрдүүлэлтийн програмаас шалгаж, хэлцлийн үнийг баталгаажуулсан тохиолдолд мэдүүлгийн бичиг баримтын бүрдүүлэлт, татварын тооцооноос үүдэн гарах хариуцлагыг мэдүүлэгч хүлээнэ" гэж.

2.Тушаалын хэрэгжилтэд хяналт тавьж ажиллахыг Дэд дарга (Г.Энхтайван)-д даалгасугай.

ДАРГА Р.ОТГОНЖАРГАЛ