МОНГОЛ УЛСЫН ЗАСГИЙН ГАЗРЫН ТОГТООЛ

2015 оны 6 дугаар сарын 8-ны өдөр

Дугаар 235

Улаанбаатар хот

ЖУРАМД НЭМЭЛТ, ӨӨРЧЛӨЛТ ОРУУЛАХ ТУХАЙ

Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийг дагаж мөрдөх журмын тухай хуулийн 3 дугаар зүйлийг үндэслэн Монгол Улсын Засгийн газраас ТОГТООХ нь:

1. Засгийн газрын 2015 оны 120 дугаар тогтоолоор баталсан "Гол, мөрний урсац бүрэлдэх эхийн бүсэд олгосон тусгай зөвшөөрлийг цуцлах, усны сан бүхий газрын энгийн хамгаалалтын бүсэд олборлолт явуулж эхэлсэн, тусгай зөвшөөрөл бүхий талбайд холбогдох арга хэмжээ авах, нөхөн сэргээлт хийлгэх журам"-д дараах заалт нэмсүгэй:

а) хоёр дахь хэсгийн 2.4 дэх заалт:

"2.4. Байгаль орчны асуудал эрхэлсэн төрийн захиргааны төв байгууллагын хориглосон талбайн хилийн зааг тогтоосон тодорхойлолтыг үндэслэн сумын Засаг дарга Усны тухай хуулийн 13.1.6-д заасны дагуу хилийн заагийг тэмдэгжүүлнэ."

б) дөрөв дэх хэсгийн 4.11 дэх заалт:

"4.11. Улсын Их Хурал, Засгийн газрын шийдвэрийн дагуу гадаад, дотоодын хөрөнгө оруулалтаар 6 дугаар эрэмбээс дээших эрэмбийн гол, мөрний голдрилд явуулж байгаа олборлолтын үйл ажиллагаанд энэ журмын 2.2-2.9 дэх заалт хамаарахгүй."

2. Мөн журмын дараах заалтыг дор дурдсанаар өөрчлөн найруулсугай:

а) хоёр дахь хэсгийн 2.3 дахь заалт:

"2.3. Байгаль орчны асуудал эрхэлсэн төрийн захиргааны төв байгууллага нь усны сан бүхий газрын онцгой болон энгийн хамгаалалтын бүсийн хилийн заагийг тогтоох ажлыг зохион байгуулж, уг асуудлаар комисс байгуулан ажиллуулна. Тусгай зөвшөөрөл эзэмшигч тогтоосон хилийн заагийг хүлээн зөвшөөрөөгүй тохиолдолд энэхүү комисст хандан хүсэлт гаргаж шийдвэрлүүлнэ."

б) хоёр дахь хэсгийн 2.6 – 2.8 дахь заалт:

"2.6. Тусгай зөвшөөрөл эзэмшигч нь Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хууль хэрэгжиж эхлэхээс өмнө хориглосон талбайд үйл ажиллагаа явуулж байсан эсэхийг байгаль орчны асуудал эрхэлсэн төрийн захиргааны төв байгууллага, геологи, уул уурхайн асуудал эрхэлсэн төрийн захиргааны байгууллага хамтран өөрсдийн мэдээллийн санд тулгуурлан тогтооно.

2.7. Хориглосон талбайд өмнө нь үйл ажиллагаа явуулж байгаагүй бол геологи, уул уурхайн асуудал эрхэлсэн төрийн захиргааны байгууллага давхцалтай хэсгийг хасч, тусгай зөвшөөрлийн солбицолд өөрчлөлт оруулна.

2.8. Хориглосон талбайд өмнө нь үйл ажиллагаа явуулж байсан тусгай зөвшөөрөл эзэмшигч нь тухайн талбайд үйл ажиллагаагаа үргэлжлүүлэх хүсэлтэй бол Усны тухай хуулийн 22 дугаар зүйлд заасан онцгой хамгаалалтын бүстэй давхцалтай хэсгийг тусгай зөвшөөрлийн талбайгаас хасуулж, солбицолд өөрчлөлт оруулна."

в) гурав дахь хэсгийн 3.3, 3.4 дэх заалт:

"3.3. Тусгай зөвшөөрөл эзэмшигч нь энэ журмын хүрээнд талбайгаа бүхэлд нь болон хэсэгчлэн буцаан өгсөн, эсхүл давхцал бүхий тусгай зөвшөөрөлтэй талбайд гэрээ байгуулсан этгээд талбайг бусдад хэсэгчлэн болон бүхэлд нь шилжүүлсэн тохиолдолд байгаль орчныг хамгаалах, нөхөн сэргээх үүргээс чөлөөлөгдөхгүй бөгөөд шилжүүлэн авсан этгээдтэй гэрээг шинэчлэн байгуулна.

3.4. Далд уурхайгаар олборлох нөөц нь ойн сан бүхий газрын доор, газрын доорх усны нөөц бүхий давхаргаас дээр орших, байгаль орчинд сөрөг нөлөөгүй болох нь байгаль орчинд нөлөөлөх байдлын нарийвчилсан үнэлгээ, усны нөөцийн дүгнэлтээр баталгаажсан бол тухайн хэсэгт олборлолт явуулж болно."

г) дөрөв дэх хэсгийн 4.2, 4.3, 4.10 дахь заалт:

"4.2. Гэрээ байгуулсан тусгай зөвшөөрөл эзэмшигчийн техник, эдийн засгийн үндэслэлд олборлохоор тусгагдсан нөөцөд өөрчлөлт орохооргүй тохиолдолд уулын ажлын төлөвлөгөө болон байгаль орчны менежментийн төлөвлөгөөг холбогдох хууль тогтоомжийн дагуу батлуулснаар үйл ажиллагаагаа эхлүүлэх эрх нээгдэнэ.

4.3. Тусгай зөвшөөрөл эзэмшигч нь үйл ажиллагаагаа эхлүүлэхдээ Ашигт малтмалын тухай хуулийн 35.4-т заасны дагуу уурхайг хүлээн авах Улсын комиссыг ажиллуулна. 4.10. Энэхүү журмын 2.2, 2.4, 4.3, 4.4-т заасан ажлыг гүйцэтгүүлэхтэй холбогдон гарсан зардлыг хүсэлт гаргасан тусгай зөвшөөрөл эзэмшигч хариуцна."

д) тав дахь хэсгийн 5.1 дэх заалт:

"5.1. Энэ журмын 2.2, 2.6-д заасныг буруу тогтоосон, энэхүү журмын 2.2-т заасан хилийн заагийг тогтоосноос хойш 2.4-т заасан хилийг тэмдэгжүүлээгүй болон 2.7, 2.8-д заасан өөрчлөлтийг нэг сарын дотор хийгээгүй албан тушаалтанд Төрийн албаны тухай хуулийн 25, 26 дугаар зүйлд заасны дагуу хариуцлага ногдуулна."

3. Мөн журмын 2.3 дахь дугаарын заалтыг "2.2" гэж, 2.4 дэх заалтын дугаарыг "2.3" гэж тус тус өөрчилсүгэй.

4. Журмын 2.2 дахь заалтыг хүчингүй болсонд тооцсугай.

Монгол Улсын Ерөнхий сайд Ч.САЙХАНБИЛЭГ

Уул уурхайн сайд Р.ЖИГЖИД