МОНГОЛ УЛСЫН ЗАСГИЙН ГАЗРЫН ТОГТООЛ

2019 оны 2 дугаар сарын 27-ны өдөр

Дугаар 87

Улаанбаатар хот

ЗАСГИЙН ГАЗРЫН ТУСГАЙ САНГУУДЫН ТАЛААР АВАХ АРГА ХЭМЖЭЭНИЙ ТУХАЙ

Монгол Улсын Засгийн газрын тухай хуулийн 30 дугаар зүйлийн 1 дэх хэсэг, Төсвийн тухай хуулийн 10.1.11, 11.1.4, Мэдээллийн ил тод байдал ба мэдээлэл авах эрхийн тухай хуулийн 7.1.3, 7.1.4, 7.1.9, Шилэн дансны тухай хуулийн 6.9, Засгийн газрын зарим тусгай сангуудын санхүүгийн үйл ажиллагаанд хийсэн шалгалтын дүнг тус тус үндэслэн Монгол Улсын Засгийн газраас ТОГТООХ нь:

1. Тариаланг дэмжих сан, Мал хамгаалах сан, Жижиг, дунд үйлдвэрийг хөгжүүлэх санг нэгтгэх, хуримтлагдсан эх үүсвэр, өглөг, авлагыг шилжүүлэх, сангийн ажлын албаны бүтэц, зохион байгуулалт, үйл ажиллагааны чиглэл, урамшуулал, дэмжлэгийн механизмыг боловсронгуй болгох, сангуудад бүртгэлтэй хөрөнгийн ашиглалтыг сайжруулах чиглэлээр холбогдох хуулийн болон бусад шийдвэрийн төслийг боловсруулж энэ оны 4 дүгээр сарын 1-ний дотор Засгийн газрын хуралдаанаар хэлэлцүүлэхийг Хүнс, хөдөө аж ахуй, хөнгөн үйлдвэрийн сайд Ч.Улаанд даалгасугай.

2. Тариаланг дэмжих сан, Мал хамгаалах сангаас олгож байгаа урамшууллыг жил бүрийн улсын төсөвт тусган, санхүүжүүлэх арга хэмжээг хууль тогтоомжид нийцүүлэн боловсронгуй болгож зохион байгуулахыг Хүнс, хөдөө аж ахуй, хөнгөн үйлдвэрийн сайд Ч.Улаан, Сангийн сайд Ч.Хүрэлбаатар нарт даалгасугай.

3. Үйл ажиллагаа явуулдаггүй болон зардлыг нь төсвийн ерөнхийлөн захирагчийн төсвийн багцад хөтөлбөр, арга хэмжээ хэлбэрээр тусгаж санхүүжүүлэх боломжтой Үйлдвэрлэлийг хөгжүүлэх сан, Олон улсын хамтын ажиллагааны сан, Монгол судлалыг дэмжих сан, Ирээдүйн тэтгэврийн нөөц сан, Эрсдэлийн сан, Засгийн газрын өрийн баталгааны сан, Агаарын бохирдлын эсрэг сангуудыг татан буулгах чиглэлээр Засгийн газрын тусгай сангийн тухай хууль болон холбогдох бусад хуульд нэмэлт, өөрчлөлт оруулах хуулийн төслийг боловсруулж, энэ оны 4 дүгээр сарын 1-ний дотор Засгийн газрын хуралдаанаар хэлэлцүүлэхийг Сангийн сайд Ч.Хүрэлбаатарт даалгасугай. 4. Хөдөлмөр эрхлэлтийг дэмжих сан, Боловсролын зээлийн сан, Улсын авто замын сангийн талаар дараахь арга хэмжээг авахыг Хөдөлмөр, нийгмийн хамгааллын сайд С.Чинзориг, Боловсрол, соёл, шинжлэх ухаан, спортын сайд Ё.Баатарбилэг, Зам, тээврийн хөгжлийн сайд Б.Энх-Амгалан нарт тус тус даалгасугай.

4.1. Хөдөлмөр эрхлэлтийг дэмжих сангаас жижиг зээл, санхүүгийн дэмжлэг олгох хэмжээ, хөтөлбөрийг Засгийн газраас тогтоодог байхаар холбогдох хууль, журамд өөрчлөлт оруулах санал боловсруулж танилцуулах;

4.2. Боловсролын зээлийн сангаас олгосон зээлийн эргэн төлөлтийг сайжруулах, цаашид хугацаа хэтэрсэн өр, авлага үүсгэхгүй байх чиглэлээр холбогдох журамд өөрчлөлт оруулах;

4.3. Улсын авто замын сангийн хөрөнгийн зарцуулалт, түүнд тавих хяналтыг сайжруулах, сангийн орлогын эх үүсвэрийг Төсвийн тухай хуульд нийцүүлэх арга хэмжээ авах.

5. Санхүүгийн дэмжлэг, хөнгөлөлттэй зээл олгох үйл ажиллагаа явуулдаг сан, тусгай сан, төсөл, хөтөлбөрүүдийг Жижиг, дунд үйлдвэрлэлийг хөгжүүлэх сангаар дамжуулж, нэгдсэн удирдлага, хяналтад оруулах арга хэмжээ авч, үр дүнг Засгийн газрын хуралдаанд танилцуулахыг Сангийн сайд Ч.Хүрэлбаатар, Хүнс, хөдөө аж ахуй, хөнгөн үйлдвэрийн сайд Ч.Улаан нарт даалгасугай.

6. Засгийн газрын тусгай сан, бусад төсвийн хөрөнгөөр санхүүждэг сан, төсөл хөтөлбөрүүдийн хөрөнгийн ашиглалтыг сайжруулах, ил тод байдлыг нэмэгдүүлэх, эрсдэлийг бууруулах, хяналт, үр нөлөөг дээшлүүлэх талаар дараахь арга хэмжээ авахыг холбогдох Засгийн газрын гишүүдэд даалгасугай:

6.1. Төсвийн хөрөнгөөс зээл, тусламж авсан, батлан даалт гаргуулсан, санхүүгийн дэмжлэг авсан хувь хүний овог нэр, хуулийн этгээдийн нэр, регистрийн дугаар, шалгарсан төслийн нэр, үйл ажиллагааны чиглэл, төсөл хэрэгжиж байгаа байршил, сонгон шалгаруулсан шийдвэр, зээлийн төлөв, зээлийн үлдэгдлийг Шилэн дансны тухай хууль, Мэдээллийн ил тод байдал ба мэдээлэл авах эрхийн тухай хууль, Улсын бүртгэлийн ерөнхий хуулийн дагуу байгууллагын шилэн данс, цахим хуудсаараа дамжуулан тогтмол мэдээлэх;

6.2. Хугацаа хэтэрсэн авлагыг барагдуулах шат дараалсан арга хэмжээ авч, гэрээний үүргээ биелүүлээгүй иргэн, аж ахуйн нэгжүүдийг хууль хяналтын байгууллагад шилжүүлэн шалгуулах, улсын төсвийг хохиролгүй болгох, мөн ажлын хариуцлага алдсан төрийн албан хаагчид холбогдох хуулийн дагуу хариуцлага хүлээлгэж байх;

6.3. Шинээр олгох зээлийн эх үүсвэрийн хэмжээ, сонгон шалгаруулалтын журам, тавигдах шаардлага, бүрдүүлэх баримт бичгийн жагсаалтыг цахим хуудсаараа дамжуулан мэдээлэх, мэдээллийг тогтмол шинэчлэх;

6.4. Хугацаа хэтэрсэн зээлийн үлдэгдэлтэй, зээлийн муу түүхтэй хуулийн этгээд, иргэдэд зээл олгохгүй байх зохицуулалтыг зээл, батлан даалт, санхүүгийн дэмжлэг олгох журам, дамжуулан зээлийн гэрээнд тусгаж мөрдүүлэх;

6.5. Зээл, батлан даалт, санхүүгийн дэмжлэгийн журам, дамжуулан зээл, дэд зээлийн гэрээний загваруудад зээл, батлан даалтыг банк, санхүүгийн байгууллагаар дамжуулан олгох эрсдэлийг тооцох зохицуулалтыг тусгаж мөрдүүлэх;

6.6. Зээл, батлан даалт, санхүүгийн дэмжлэгийг Монголбанкнаас хийсэн активын чанарын үнэлгээний үр дүнгээр өөрийн хөрөнгийг нэмэгдүүлэх шаардлагыг бүрэн хангасан, банкны зохистой харьцааны шалгуур үзүүлэлтийг тогтмол ханган ажиллаж байгаа, хөдөө орон нутагт салбартай банкуудаар дамжуулан олгох зохицуулалтыг холбогдох журамд тусгаж мөрдүүлэх;

6.7. Зээлийн санхүүжилтийг төслийн хэрэгжилттэй уялдуулан олгох буюу зээлдэгчийн худалдан авалт, төслийн гүйцэтгэлээр санхүүжилтийг олгодог байхаар холбогдох журам, гэрээнд тусгаж, зээлийг зориулалт бусаар ашиглах эрсдэлийг хаах;

6.8. Олгосон зээл, санхүүгийн дэмжлэгийг зориулалтын дагуу ашиглаж байгаа эсэхэд хяналт тавих үйл ажиллагаанд иргэдийн оролцоог хангах, зориулалт бусаар ашигласан зээлийн эх үүсвэрийг дамжуулан олгож байгаа банк, санхүүгийн байгууллагаар үл маргах журмаар эргүүлэн төлүүлэх, тухайн банк, санхүүгийн байгууллагад дахин эх үүсвэр олгохгүй байх зохицуулалтыг холбогдох гэрээнд тусгах;

6.9. Төсөл сонгон шалгаруулах хороо, төслийн удирдах хорооны бүрэлдэхүүнд төрийн бус байгууллага, мэргэжлийн холбоодыг оролцуулах замаар зээл олголт, зээлийн хяналт, мониторингийн үйл ажиллагаанд олон нийтийн оролцоог нэмэгдүүлэх;

6.10. Зээл авахаар хүсэлт ирүүлсэн иргэд, аж ахуйн нэгжийн бизнес төлөвлөгөөгөө танилцуулах, түүнийг сонгон шалгаруулах, үнэлэх үйл явцыг олон нийтийн хэвлэл мэдээллийн хэрэгслээр нээлттэй, ил тод, зохион байгуулах зохицуулалтыг холбогдох журамд тусгаж мөрдүүлэх;

6.11. Олгосон зээл, дэд зээлийн мэдээллийг Монголбанкны зээлийн мэдээллийн сан, Сангийн яамны өрийн удирдлагын мэдээллийн санд тогтмол бүртгүүлэх, зээл олгох шийдвэр гаргалтад зээлийн мэдээллийн сангийн мэдээллийг ашиглах нөхцөлийг бүрдүүлэх;

6.12. Төсөлд зээл, санхүүжилт олгох, батлан даалт гаргах шийдвэрийг гаргах болон гаргахад оролцох эрх бүхий этгээд нь ашиг сонирхлын зөрчлөөс ангид байж, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд заасан мэдэгдэл, тайлбарыг тухай бүр гаргаж байх;

6.13. Төсөл сонгон шалгаруулах, зээл олгох, эргэн төлүүлэх үйл ажиллагааг цахимжуулах, мэдээллийн нэгдсэн систем нэвтрүүлэх замаар төрөөс иргэд, аж ахуйн нэгжүүдэд олгох хөнгөлөлттэй зээл, санхүүгийн дэмжлэгийг түргэн шуурхай, ил тод, хүртээмжтэй болгох арга хэмжээ авах;

6.14. Дээр дурдсан үйл ажиллагааг хэрэгжүүлэх зорилгоор зээл, батлан даалт, санхүүгийн дэмжлэгийг олгох тогтолцоог шинэчлэн сайжруулах чиглэлээр шаардлагатай хууль тогтоомж болон гэрээний загварыг боловсруулж батлуулах.

7. Энэ тогтоолыг хэрэгжүүлэх хүрээнд боловсруулсан хууль, Улсын Их Хурлын бусад шийдвэрийн төслийг Улсын Их Хурлын 2019 оны хаврын чуулганаар хэлэлцүүлэн шийдвэрлүүлэх арга хэмжээг авахыг холбогдох Засгийн газрын гишүүдэд, хэрэгжилтэд хяналт тавьж ажиллахыг Монгол Улсын сайд, Засгийн газрын Хэрэг эрхлэх газрын дарга Л.Оюун-Эрдэнэд даалгасугай.

Монгол Улсын Ерөнхий сайд У.ХҮРЭЛСҮХ

Сангийн сайд Ч.ХҮРЭЛБААТАР