Нүүр
Хүчингүй эрх зүйн акт 
Сонсох / Сонгосон утга сонсох
Pdf
Word
Хэвлэх
МОНГОЛ УЛСЫН ЗАСГИЙН ГАЗРЫН ТОГТООЛ
2019 оны 12 дугаар сарын 18-ны өдөр
Дугаар 450
Улаанбаатар хот
ХООЛНЫ ЗАРДЛЫН НОРМАТИВ ТОГТООХ ТУХАЙ
Монгол Улсын Засгийн газрын тухай хуулийн 30 дугаар зүйлийн 1 дэх хэсэг, Боловсролын тухай хуулийн 40.2, Сургуулийн өмнөх боловсролын тухай хуулийн 15.1, 15.5-д заасныг тус тус үндэслэн Монгол Улсын Засгийн газраас ТОГТООХ нь:
(Энэ заалтыг Засгийн газрын 2024 оны 237 дугаар тогтоолоор хүчингүй болсонд тооцсон бөгөөд үүнийг 2024-09-01-ний өдрөөс эхлэн дагаж мөрдөнө)
(Энэ заалтыг Засгийн газрын 2022 оны 498 дугаар тогтоолоор хүчингүй болсонд тооцсон бөгөөд үүнийг 2023-1-1-ний өдрөөс эхлэн дагаж мөрдөнө)
3. Ерөнхий боловсролын сургуулийн 1-5 дугаар ангийн нэг хүүхдийн үдийн цайны өдрийн зардлыг 900 (есөн зуун) төгрөгөөр, ерөнхий боловсролын тусгай сургуулийн нэг хүүхдийн үдийн хоолны зардлыг 2400 (хоёр мянга дөрвөн зуун) төгрөгөөр тус тус тогтоосугай.
/ Энэ заалтын зарим хэсгийг Засгийн газрын 2021 оны 237 дугаар тогтоолоор хассан /
4. Нэг хүүхдэд ногдох хоолны зардлын гүйцэтгэлийг хүүхэд-өдрөөр хянаж, зөрүүг нь тооцож байхыг Боловсрол, соёл, шинжлэх ухаан, спортын сайд Ё.Баатарбилэг, Сангийн сайд Ч.Хүрэлбаатар болон аймаг, нийслэлийн Засаг дарга нарт тус тус даалгасугай.
5. Хүүхдийн өсөлт хөгжлийг дэмжих, зайлшгүй шаардлагатай илчлэг, шим тэжээлийн шаардлагыг хангасан, эрүүл мэндэд сөрөг нөлөөлөлгүй хүнсний бүтээгдэхүүн бэлдэж байгаа эсэхэд тогтмол хяналт тавьж, ажиллахыг Мэргэжлийн хяналтын ерөнхий газар (Н.Цагаанхүү)-т үүрэг болгосугай.
6. Энэ тогтоолыг 2020 оны 1 дүгээр сарын 1-ний өдрөөс эхлэн мөрдсүгэй.
7. Энэ тогтоол гарсантай холбогдуулан "Хоолны зардлын дундаж норматив батлах тухай" Засгийн газрын 2012 оны 10 дугаар сарын 27-ны өдрийн 106 дугаар тогтоолын 1, 2, 4 дэх заалт, 3 дахь заалтын "Ерөнхий боловсролын сургууль..." гэснийг, "Тогтоолд нэмэлт оруулах тухай" 2017 оны 6 дугаар сарын 7-ны өдрийн 162 дугаар тогтоолыг тус тус хүчингүй болсонд тооцсугай.
Монгол Улсын Ерөнхий сайд У.ХҮРЭЛСҮХ
Боловсрол, соёл, шинжлэх ухаан, спортын сайд Ё.БААТАРБИЛЭГ
МОНГОЛ УЛСЫН ЗАСГИЙН ГАЗРЫН ТОГТООЛ
2024 оны 12 сарын 30 өдөр
Дугаар 254
Улаанбаатар хот
ХҮҮХДИЙН ХООЛНЫ ТҮҮХИЙ ЭДИЙН ЗАРДЛЫН ХЭМЖЭЭГ ШИНЭЧЛЭН ТОГТООХ ТУХАЙ
Боловсролын ерөнхий хуулийн 24.1.7, 38.6, Ерөнхий боловсролын сургуулийн хоол үйлдвэрлэл, үйлчилгээний тухай хуулийн 10.1.1-д заасныг тус тус үндэслэн Монгол Улсын Засгийн газраас ТОГТООХ нь:
1.Ерөнхий боловсролын сургуулийн 1-5 дугаар ангийн хүүхдийн нэг өдрийн үдийн хоолны түүхий эдийн зардлыг 2500 (хоёр мянга таван зуу) төгрөгөөр, 1-12 дугаар ангийн хөгжлийн бэрхшээлтэй хүүхдийн нэг өдрийн үдийн хоолны түүхий эдийн зардлыг 3400 (гурван мянга дөрвөн зуу) төгрөгөөр тус тус тогтоосугай.
2.Ерөнхий боловсролын сургуулийн дотуур байранд амьдрах дунд болон ахлах ангийн хүүхдийн нэг өдрийн хоолны түүхий эдийн зардлыг 6300 (зургаан мянга гурван зуу) төгрөгөөр, бага ангийн хүүхдийн нэг өдрийн хоолны түүхий эдийн зардлыг 6000 (зургаан мянга) төгрөгөөр тус тус тогтоосугай.
3.Ерөнхий боловсрол эзэмшиж байгаа мэргэжлийн болон техникийн боловсролын сургалтын байгууллагын дотуур байранд амьдрах хүүхдийн нэг өдрийн хоолны түүхий эдийн зардлыг 6300 (зургаан мянга гурван зуу) төгрөгөөр тогтоосугай.
4.Хүүхдийн хоолны түүхий эдийн зардлын гүйцэтгэлийг хүүхэд-өдрөөр тооцон, гүйцэтгэлээр санхүүжүүлж, хэрэгжилтэд хяналт тавьж ажиллахыг Боловсролын сайд П.Наранбаярт даалгасугай.
5.Хүүхдийн хоол үйлдвэрлэл, үйлчилгээнд зохих стандартыг мөрдүүлж, хоолны цэсэд сүү, сүүн бүтээгдэхүүний хэмжээг нэмэгдүүлэх, хүнсний түүхий эд, бүтээгдэхүүн ханган нийлүүлэлтийг хувийн хэвшилтэй хамтран хэрэгжүүлэх арга хэмжээний санал боловсруулан Засгийн газрын хуралдаанд танилцуулахыг Хүнс, хөдөө аж ахуй, хөнгөн үйлдвэрийн сайд Ж.Энхбаяр, Боловсролын сайд П.Наранбаяр, Эрүүл мэндийн сайд Т.Мөнхсайхан нарт тус тус даалгасугай.
6.Төрийн албаны албан тушаалын цалингийн зэрэглэл, хэмжээтэй уялдуулан сургууль, цэцэрлэгийн хоол зүйч, мэргэжлийн тогооч, туслах тогооч, бэлтгэгч, угаагч нарын ажлын онцлог, хөдөлмөрийн нөхцөл, ачааллыг харгалзан цалингийн доод хэмжээг нэмэгдүүлэх асуудлыг судалж танилцуулахыг Гэр бүл, хөдөлмөр, нийгмийн хамгааллын сайд Л.Энх-Амгалан, Боловсролын сайд П.Наранбаяр нарт, гал тогооны байр ашиглалттай холбоотой зардлыг эрх бүхий байгууллагын тогтоосон тарифын дагуу тооцож, холбогдох санхүүжилтийг боловсролын сургалтын байгууллагад олгож байхыг аймаг, нийслэлийн Засаг дарга нарт тус тус даалгасугай.
7.Энэ тогтоол гарсантай холбогдуулан "Хоолны зардлын норматив тогтоох тухай" Засгийн газрын 2019 оны 12 дугаар сарын 18-ны өдрийн 450 дугаар тогтоол, "Хоолны зардлын норматив тогтоох тухай" Засгийн газрын 2022 оны 12 дугаар сарын 28-ны өдрийн 498 дугаар тогтоол, "Үдийн хоолны норматив тогтоох тухай" Засгийн газрын 2021 оны 8 дугаар сарын 11-ний өдрийн 237 дугаар тогтоолын 1 дэх заалтыг тус тус хүчингүй болсонд тооцсугай.
8.Энэ тогтоолыг 2025 оны 01 дүгээр сарын 01-ний өдрөөс эхлэн дагаж мөрдсүгэй.
МОНГОЛ УЛСЫН ЕРӨНХИЙ САЙД Л.ОЮУН-ЭРДЭНЭ
БОЛОВСРОЛЫН САЙД П.НАРАНБАЯР
