МОНГОЛ УЛСЫН ЗАСГИЙН ГАЗРЫН ТОГТООЛ

2023 оны 07 сарын 05 өдөр

Дугаар 256

Улаанбаатар хот

ЖУРАМД НЭМЭЛТ, ӨӨРЧЛӨЛТ ОРУУЛАХ ТУХАЙ

Монгол Улсын Засгийн газрын тухай хуулийн 29 дүгээр зүйлийн 3 дахь хэсэг, Хууль тогтоомжийн тухай хуулийн 38.1-д заасныг тус тус үндэслэн Монгол Улсын Засгийн газраас ТОГТООХ нь:

1."Журам шинэчлэн батлах тухай" Засгийн газрын 2021 оны 11 дүгээр сарын 17-ны өдрийн 351 дүгээр тогтоолын хавсралтаар баталсан "Монгол Улсын Засгийн газрын хуралдааны журам"-д доор дурдсан агуулгатай 2.11, 4.5, 4.6, 4.1.12, 6.2.4, 6.12-6.14, 9.14 дэх заалт, дэд заалт тус тус нэмсүгэй:

"2.11.Засгийн газрын гишүүн, дэд сайд хоёул эзгүй байх тохиолдолд яамны Төрийн нарийн бичгийн даргыг саналын эрхгүй оролцуулж болно.

4.5.Энэ журмын 4.2.5-д зааснаас бусад Засгийн газрын гишүүн гадаад улсад хийсэн айлчлал, арга хэмжээнийхээ үр дүнг айлчлалаас ирснээс хойш ажлын 7 өдөрт багтаан Хэрэг эрхлэх газарт илтгэх хуудсаар ирүүлж, илтгэх хуудасны хувийг гадаад харилцааны асуудал эрхэлсэн төрийн захиргааны төв байгууллагад хүргүүлнэ.

4.6.Хэрэг эрхлэх газар энэ журмын 4.5-д заасан илтгэх хуудсыг хүлээн авснаас хойш ажлын 5 өдрийн дотор хянах бөгөөд холбогдох хууль тогтоомж, Засгийн газрын бодлогын баримт бичиг, гадаад бодлогын нэгдмэл байдлыг хангах журмын хүрээнд анхаарах асуудал байвал Засгийн газрын гишүүнд албан бичгээр мэдэгдэнэ. Энэ тухай буюу илтгэх хуудсанд дурдсан онцлох асуудлыг Ерөнхий сайдад тухай бүр танилцуулах арга хэмжээ авна.

4.1.12.Ерөнхийлөгч, Улсын Их Хурлын дарга, Ерөнхий сайдын гадаад улсад хийх айлчлал, оролцох арга хэмжээ, тэдгээрийн үр дүн, илтгэх хуудас.

6.2.4.хөгжлийн бодлогын баримт бичгийн төсөлд эдийн засаг, хөгжлийн асуудал эрхэлсэн Засгийн газрын гишүүний.

6.12.Засгийн газраас санаачлах зарим хууль тогтоомжийн төслийг иргэд, эрх ашиг нь хөндөгдөх этгээдийн, хууль тогтоомжийг хэрэгжүүлэх төрийн болон төрийн бус байгууллага, мэргэжлийн холбоодын саналыг авах, хууль тогтоомж батлагдсанаар гарах эерэг үр нөлөө, ач холбогдлын талаар таниулах, сурталчлах олон нийтийн хэлэлцүүлгийг Ерөнхий сайдаас өгсөн чиглэл, хэлэлцүүлэг хийх хэрэгцээ, шаардлагыг харгалзан Хэрэг эрхлэх газраас тухайн салбарын яам, холбогдох төрийн бус байгууллага, мэргэжлийн холбоодтой хамтран зохион байгуулж болно.

6.13.Энэ журмын 6.12-т заасан олон нийтийн хэлэлцүүлгийг хууль тогтоомжийн төслийн батлагдсан үзэл баримтлалын хүрээнд Хууль тогтоомжийн тухай хуулийн 38.6.2-38.6.4-т заасан хэлбэрийн аль нэгээр зохион байгуулна.

6.14.Засгийн газрын бүрэн эрхэд хамаарах нийтийн эрх ашиг хөндөгдөж болзошгүй зарим асуудлаар шийдвэр гаргахдаа иргэд, олон нийтийн саналыг урьдчилан авах зайлшгүй шаардлагатай тохиолдолд олон нийтийн хэлэлцүүлгийг энэ журмын 6.12, 6.13-т заасны дагуу зохион байгуулж болно.

9.14.Энэ журмын 9.12-т заасан төлөвлөгөөг Ерөнхий сайдын захирамжаар батлах бөгөөд аюулгүй байдал, техник хэрэгслийн бэлэн байдлыг энэ журмын 8.9, 8.10, 9.9, 9.10-д заасны дагуу хангасан байна."

2.Мөн журмын 3.5 дахь заалтын "хуралдааны" гэсний өмнө "ээлжит" гэж, 3.6 дахь заалтын "даргын" гэсний өмнө "Тэргүүн дэд" гэж, 12.9 дэх заалтын "тэмдэглэлд" гэсний өмнө "хураангуй" гэж, 14.4 дэх заалтын "даргын" гэсний өмнө "Тэргүүн дэд" гэж тус тус нэмсүгэй.

3.Мөн журмын 3.2, 4.2.4, 4.2.5 дахь заалт, 8.4, 9.12, 12.5, 12.6 дахь заалтыг доор дурдсанаар өөрчлөн найруулсугай:

"3.2.Хуралдаанаар хэлэлцсэн асуудал, гарсан шийдвэрийн талаар хэвлэл мэдээллийн хэрэгслээр сурталчлах, мэдээлэл хийх тохиолдолд Засгийн газрын хэвлэл мэдээлэлтэй харилцах асуудал хариуцсан нэгжийн дарга, Монгол Улсын сайд, Засгийн газрын Хэрэг эрхлэх газрын даргын зөвлөх оролцоно.

4.2.4.Ерөнхий сайдын аймаг, орон нутаг дахь томилолтын дүн;

4.2.5.Засгийн газрын гишүүдийн гадаад улсад хийх айлчлал, арга хэмжээний удирдамж, гадаад харилцааны асуудал эрхэлсэн Засгийн газрын гишүүний гадаад улсад хийх айлчлал, арга хэмжээний үр дүн, илтгэх хуудас;

8.4.Хэрэг эрхлэх газар нь хуралдаанд оруулах материалыг хуанлийн 3-аас доошгүй хоногийн өмнө цахимаар Засгийн газрын гишүүдэд, цаасан суурь бүхий хувийг энэ журмын 3.1-д заасан албан тушаалтан болон Монгол Улсын Ерөнхийлөгч, Улсын Их Хурлын дарга, Монгол Улсын Ерөнхий сайд, Үндэсний аюулгүй байдлын зөвлөлд тус тус хүргүүлнэ.

9.12.Энэ журмын 10.3-т заасан нөхцөл байдал болон цаг үеийн зайлшгүй шаардлагыг харгалзан Ерөнхий сайдын зөвшөөрснөөр Засгийн газрын хуралдааныг тусгай төлөвлөгөөний дагуу өөр байршилд танхимаар, эсхүл Тагнуулын ерөнхий газраас урьдчилан хянаж баталгаажуулсан мэдээллийн технологийн системийг ашиглан цахимаар зохион байгуулж болно.

12.5.Хуралдааны хураангуй тэмдэглэлийг Хэрэг эрхлэх газрын хуулийн асуудал хариуцсан нэгжийн дарга хууль зүйн үндэслэл, томьёоллын хувьд хянах бөгөөд тухайн өдрийн хурлаар хэлэлцсэн бүх асуудлыг Тэргүүн дэд дарга эцэслэн хянаж, зөвшөөрөл өгснөөс хойш ажлын 2 хоногт багтаан албажуулна.

12.6.Хуралдааны дэлгэрэнгүй тэмдэглэлийг Хэрэг эрхлэх газрын хуралдаан зохион байгуулах болон хууль зүйн асуудал хариуцсан нэгжийн дарга нар хянах бөгөөд хянаж, зөвшөөрөл өгснөөс хойш ажлын 5 хоногт багтаан албажуулна."

4.Мөн журмын 2.2 дахь заалтын "08:00 цагаас эхэлнэ" гэснийг "08:00 цагаас эхэлж, 13:00 цаг хүртэл үргэлжилнэ. Тус хугацаанд багтан хэлэлцэгдээгүй асуудлыг дараагийн хуралдаанаар хэлэлцүүлнэ." гэж, 9.3 дахь заалтын "Засгийн газраас" гэснийг "Ерөнхий сайдын захирамжаар" гэж, 12.1 дэх заалтын "ажилтан үг нэг бүрчлэн цаасан суурьт буулгана." гэснийг "ажилтан сонсон үг нэг бүрчлэн бичиж, цаасан суурьт хэвлэнэ." гэж, 14.5 дахь заалтын "улирал" гэснийг "хагас жил" гэж тус тус өөрчилсүгэй.

5.Мөн журмын 3.1.4 дэх заалтын "удирдлага, зохицуулалтын" гэснийг хассугай.

6.Мөн журмын 6.3.1 дэх дэд заалтыг хүчингүй болсонд тооцсугай.

7.Энэ тогтоол гарсантай холбогдуулан "Хуваарь шинэчлэн батлах тухай" Засгийн газрын 2016 оны 7 дугаар сарын 27-ны өдрийн 5 дугаар тогтоол, "Тогтоолын хавсралтыг өөрчлөн батлах тухай" Засгийн газрын 2020 оны 7 дугаар сарын 22-ны өдрийн 18 дугаар тогтоолыг тус тус хүчингүй болсонд тооцсугай.

МОНГОЛ УЛСЫН ЕРӨНХИЙ САЙД Л.ОЮУН-ЭРДЭНЭ

МОНГОЛ УЛСЫН САЙД, ЗАСГИЙН ГАЗРЫН ХЭРЭГ ЭРХЛЭХ ГАЗРЫН ДАРГА Д.АМАРБАЯСГАЛАН