МОНГОЛ УЛСЫН ЗАСГИЙН ГАЗРЫН ТОГТООЛ

2021 оны 3 дугаар сарын 10-ны өдөр

Дугаар 59

Улаанбаатар хот

ТОГТООЛД ӨӨРЧЛӨЛТ ОРУУЛАХ ТУХАЙ

Монгол Улсын Засгийн газрын тухай хуулийн 8 дугаар зүйлийн 5 дахь хэсэг, Коронавируст халдвар /КОВИД-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийн 7.1.2, 7.1.5, 7.1.25 дахь заалтыг тус тус үндэслэн Монгол Улсын Засгийн газраас ТОГТООХ нь:

1. "Төлөвлөгөө батлах тухай" Монгол Улсын Засгийн газрын 2021 оны 42 дугаар тогтоолын 2 дахь заалтыг дор дурдсанаар өөрчлөн найруулсугай:

"2.Батлагдсан төлөвлөгөөний хүрээнд банк, санхүүгийн байгууллагуудтай хамтран хэрэгжүүлэх ажлын байрыг дэмжих зээлд хамрагдах аж ахуйн нэгжийн төлөх зээлийн нийт хүүгийн 6.0 нэгж хувийг, иргэдийн төлөх зээлийн нийт хүүгийн 7.0 нэгж хувийг, хөдөө аж ахуйг дэмжих зээлийн хүрээнд хаврын тариалалт, ноолуур бэлтгэлийн зээлд хамрагдах зээлдэгчийн төлөх зээлийн нийт хүүгийн 7.65 нэгж хувийг, малчдыг дэмжих зээлийн нийт хүүгийн 7.0 нэгж хувийг тус тус Засгийн газраас хариуцан төлөхөд 2021 онд шаардагдах зардлын эх үүсвэрийг Монгол Улсын 2021 оны батлагдсан төсөвт зохицуулалт хийх замаар, 2022-2024 онуудад шаардагдах зардлын эх үүсвэрийг тухайн жил бүрийн төсөвт тусган санхүүжүүлэх арга хэмжээ авахыг Сангийн сайд Б.Жавхлан, Хүнс, хөдөө аж ахуй, хөнгөн үйлдвэрийн сайд З.Мэндсайхан нарт тус тус даалгасугай."

2. Мөн тогтоолын хавсралтаар баталсан "Эрүүл мэндээ хамгаалж, эдийн засгаа сэргээх 10 (арван) их наядын цогц төлөвлөгөө"-ний 2.1-2.5 дахь заалтын "Хүрэх үр дүн, халдвар тархалтын шаталсан түвшинтэй нийцүүлэн хэрэгжүүлэх арга хэмжээ" баганын "Хэрэгжүүлэх арга хэмжээ: /Шаталсан түвшин хамаарахгүй/" хэсгийг дор дурдсанаар өөрчлөн найруулсугай:

Ажлын байрыг дэмжих зээл: Нэмэгдсэн өртгийн албан татвар суутган төлөгчөөр бүртгүүлсэн, эсвэл нэмэгдсэн өртгийн албан татвараас чөлөөлөгдсөн, банкнаас зээлийн үйл ажиллагааны журам, зааврын хүрээнд тавигдсан бусад шаардлагыг хангасан, үйлдвэрлэл, үйлчилгээ, худалдаа эрхлэгч аж ахуйн нэгж, байгууллага болон банкнаас зээлийн үйл ажиллагааны журам, зааврын хүрээнд тавигдсан шаардлагыг хангасан хувиараа үйлдвэр, үйлчилгээ, худалдаа эрхлэгч Монгол Улсын иргэнд нийт 2.0 их наяд хүртэл төгрөгийн зээлийг 3 жилийн хугацаатай, 3.0 хувийн хүүтэй, нэг жилийн хугацаанд үндсэн төлбөрөөс чөлөөлөгдөх нөхцөлтэй олгох бөгөөд нийт олгох зээлийн 30.0 хүртэл хувийг ижил зориулалттай олгогдсон зээлийн дахин санхүүжилтэд ашиглаж болно. Ажлын байрыг дэмжих хүрээнд аж ахуйн нэгж, байгууллагад олгох зээл 500.0 сая төгрөг хүртэл, иргэнд олгох зээл 50.0 сая төгрөг хүртэл хэмжээтэй байх ба Засгийн газраас аж ахуйн нэгжид олгосон зээлийн нийт хүүгийн 6.0 нэгж хувийг, иргэнд олгосон зээлийн нийт хүүгийн 7.0 нэгж хувийг хариуцан төлж дэмжлэг үзүүлнэ;

Ипотекийн зээл: Орон сууцны бүтээн байгуулалтыг давтан хэрэглэх нэг маягийн зураг, газар олголт, дэд бүтцийн бүтээн байгуулалт, ипотекийн хөнгөлөлттэй зээлийн эх үүсвэрээр болон төр, хувийн хэвшлийн зохистой түншлэлийн хүрээнд дэмжиж, иргэдийн төлбөрийн чадварт нийцсэн, инженерийн дэд бүтцэд холбогдсон орон сууцаар хангахад 3.0 их наяд хүртэлх төгрөгийн санхүүжилттэй төлөвлөгөөгөөр дэмжинэ. Орон сууцны хөнгөлөлттэй зээлийн эх үүсвэрийн дунд хугацааны эрэлтийг харгалзан, ипотекийн 6.0 хувийн хүүтэй зээлийн эх үүсвэрийг жилийн 1.0 их наяд төгрөгт хүргэж, 14,000 өрхийг зээлд хамруулах нөхцөлийг бүрдүүлнэ;

Репо санхүүжилтийн зээл: Үйлдвэрлэл, үйлчилгээ эрхлэгч, уул уурхайн бус экспортын бүтээгдэхүүн үйлдвэрлэлийг дэмжих хүрээнд банкуудад улирал бүрд олгож буй 250.0 тэрбум төгрөгийн репо санхүүжилтийн эх үүсвэрийг Мөнгөний бодлогын зорилттой уялдуулан 500.0 тэрбум төгрөгт хүргэж, нэг зээлдэгчид олгох хэмжээг нэмэгдүүлэх, хүүг бууруулах чиглэлээр Санхүүгийн тогтвортой байдлын зөвлөл, Монголбанктай хамтран ажиллана;

Хөдөө аж ахуйг дэмжих зээл: Хөдөө аж ахуйн салбарын хаврын тариалалтад 100.0 тэрбум төгрөг, ноолуур бэлтгэлийн үйл ажиллагаанд 200.0 тэрбум төгрөгийг 1 жилийн хугацаатай 3.0 хувийн хүүтэй олгох бөгөөд Засгийн газраас нийт зээлийн хүүгийн 7.65 нэгж хувийн хүүгийн дэмжлэг үзүүлнэ;

Малчдыг дэмжих зээл: Малчдыг дэмжсэн зээлд 200.0 тэрбум төгрөгийг 3 жилийн хугацаатай 3.0 хувийн хүүтэй банк, санхүүгийн байгууллагаар дамжуулан олгох бөгөөд Засгийн газраас нийт зээлийн хүүгийн 7.0 нэгж хувийг хариуцан төлж дэмжлэг үзүүлнэ.

Дээрх зээлүүдийн эх үүсвэр нь банкны өөрийн эх үүсвэр, Хөгжлийн банкны үнэт цаасыг хаалттай арилжаалсан эх үүсвэр, Монголбанкнаас банкуудад олгосон репо санхүүжилтийн эх үүсвэр, "Эрдэнэс Монгол" ХХК-ийн ашигт малтмалын нөөцийг эдийн засгийн эргэлтэд оруулах замаар бүрдүүлсэн эх үүсвэрүүд байна. Ажлын байрыг дэмжих зээлийн хүрээнд Зээлийн батлан даалтын сангийн өөрийн хөрөнгийг 50.0 тэрбум төгрөгөөр нэмэгдүүлж, Зээлийн батлан даалтын сангаас батлан даалт гаргах, батлан даалтын үүрэг гүйцэтгэх хугацааг богино болгоно.

Засгийн газраас зээлийн төрлөөс хамаарч зээлдэгчийн төлөх зээлийн нийт хүүгийн 6.0-7.65 нэгж хувийг хариуцан төлж дэмжлэг үзүүлнэ. Зээлийн нарийвчилсан нөхцөл, журам, зээлдэгчид тавих шалгуур, зээлийн зориулалтыг талуудын хооронд байгуулах гэрээгээр зохицуулна".

3. Мөн төлөвлөгөөний 2.5 дахь заалтын "Зорилт" баганын "...хөнгөлөлттэй зээлийн эх үүсвэрийг "Эрдэнэс Монгол" ХХК-ийн ашигт малтмалын нөөцийг эдийн засгийн эргэлтэд оруулах замаар бүрдүүлж санхүүжүүлэх" гэснийг "...хөнгөлөлттэй зээлийг Хөгжлийн банк, арилжааны банкуудын эх үүсвэрт тулгуурлан санхүүжүүлэх" гэж өөрчилсүгэй.

Монгол Улсын Ерөнхий сайд Л.ОЮУН-ЭРДЭНЭ

Сангийн сайд Б.ЖАВХЛАН

Хүнс, хөдөө аж ахуй, хөнгөн үйлдвэрийн сайд З.МЭНДСАЙХАН