Татварын ерөнхий газрын даргын

2021 оны 4 дүгээр сарын 15-ны өдрийн

А/39 дүгээр тушаалын 01 хавсралт

ТАТВАРЫН ХЯНАЛТ ШАЛГАЛТЫН ҮЙЛ АЖИЛЛАГААНЫ ЖУРАМ

Нэг.Нийтлэг үндэслэл

1.1.Татварын алба татвар төлөгчийн татварын хууль тогтоомжоор хүлээсэн үүргийн хэрэгжилтэд Татварын ерөнхий хуулийн 41 дүгээр зүйлд заасны дагуу хяналт шалгалт хийх үйл ажиллагааг зохион байгуулах, хууль тогтоомжийн биелэлтийг хангуулах, татвар төлөгчид хууль тогтоомжийг тайлбарлан таниулах, цаашид үүсэж болзошгүй эрсдэлийг бууруулахад энэ журмын зорилго оршино.

1.2.Татварын алба, татварын улсын байцаагч нь хяналт шалгалтын үйл ажиллагааг хэрэгжүүлэхдээ Татварын ерөнхий хуулийн 76.7-д заасан зарчмыг баримтална.

1.3.Татварын хяналт шалгалт гэдэгт /цаашид "хяналт шалгалт" гэх/ олон улсын гэрээ, татварын хууль тогтоомж, түүнд нийцүүлэн гаргасан нийтээр дагаж мөрдөх эрх зүйн баримт бичиг, татварын албаны баталсан дүрэм, журам, заавар, зөвлөмжийг мөрдлөг болгон "Татварын албаны эрсдэлийн удирдлагын үйл ажиллагаа, хорооны ажиллах журам"-ын дагуу эрсдэлийн үнэлгээ тооцож хийсэн хяналт шалгалтыг ойлгоно.

1.4.Татварын алба хяналт шалгалтын явцад Татварын ерөнхий хуулийн 19 дүгээр зүйлд заасны дагуу нийтлэг үйл ажиллагааг хэрэгжүүлнэ.

1.5.Хяналт шалгалт хийж байгаа татварын улсын байцаагч нь хяналт шалгалтын үе шат бүрт хэрэгжүүлсэн үйлдэл, үйл ажиллагааны мэдээ, мэдээлэл, баримт, тайлбар, үндэслэл, нотолгоо, дүгнэлт, шийдвэр зэрэг холбогдох баримт бичгийг татварын бүртгэл, мэдээллийн нэгдсэн санд тухай бүр бүртгэнэ.

1.6.Бүх нийтийг хамарсан гамшиг, байгалийн гамшиг, давагдашгүй хүчин зүйл бий болсон, Улсын онцгой комисс, эрх бүхий байгууллагаас зарласан бэлэн байдлын зэрэг тогтоосон, шаардлагатай бусад үед төрийн албаны тасралтгүй байх зарчмыг хангах үүднээс тухайн нөхцөл байдалд тохируулан цахим хэлбэрээр хяналт шалгалтыг хийж болно.

1.7."Татварын акт" гэж Татварын ерөнхий хуулийн 6 дугаар зүйлийн 6.1.26-д заасан "буцаан олголтын акт"-аас бусад актыг ойлгоно.

Хоёр.Татварын хяналт шалгалтын хэлбэр, ангилал, харьяалал

2.1.Татварын алба Татварын ерөнхий хуулийн 41.4-т заасны дагуу дараах үндэслэлээр татвар төлөгчийн хууль тогтоомжоор хүлээсэн үүргийн биелэлтийг хянан шалгана.

2.1.1.эрсдэлд суурилсан;

2.1.2.татвар төлөгчийн хүсэлтээр;

2.2."Татварын албаны эрсдэлийн удирдлагын үйл ажиллагаа, хорооны ажиллах журам"-д заасан үндэслэлээр энэ журмын 2.1.1-д заасан хяналт шалгалтыг хийнэ.

2.3.Татвар төлөх үүрэг дуусгавар болох, бусдад шилжих, алдагдал, татварын ногдуулалт, төлөлтийг баталгаажуулахтай холбоотойгоор татвар төлөгчөөс ирүүлсэн хүсэлтийн дагуу эрсдэлийн үнэлгээг тооцож энэ журмын 2.1.2-т заасан хяналт шалгалтыг хийнэ.

2.4.Татварын ерөнхий хуулийн 41.2-т заасны дагуу бүрэн хяналт шалгалтыг бүх төрлийн татварын ногдуулалт, төлөлтийн байдалд, хэсэгчилсэн хяналт шалгалтыг нэг буюу хэд хэдэн төрлийн татварын ногдуулалт, төлөлтийн байдалд хийнэ.

2.5.Хэсэгчилсэн хяналт шалгалтын үед илэрсэн зөрчил нь бусад татварын төрөлд нөлөөлж байвал тухайн татварын төрлийг хяналт шалгалтад хамруулах, эсхүл бүрэн хяналт шалгалтыг хийнэ.

2.6.Энэ журмын 2.1-д заасан хяналт шалгалтыг түүнийг гүйцэтгэх ажлын цар хүрээнээс хамаарч дараах хэлбэрээр хийнэ:

2.6.1.нарийн төвөгтэй хяналт шалгалт;

2.6.2.энгийн хяналт шалгалт;

2.6.3.хялбаршуулсан хяналт шалгалт;

2.7.Энэ журмын 2.6.1-д заасан хяналт шалгалтад бусад салбарын мэргэжилтэн, гадаад улсын эрх бүхий байгууллагатай хамтран ажиллах, үнэ шилжилт, татвараас зайлсхийхийн эсрэг ерөнхий дүрэм хэрэгжүүлэх зэрэг нарийн төвөгтэй ажиллагаа хийгдэх хяналт шалгалтыг хамааруулан ойлгоно.

2.8.Энгийн хяналт шалгалт нь энэ журмын 2.6.1, 2.6.3-д зааснаас бусад хяналт шалгалтыг хамааруулна.

2.9.Хялбаршуулсан хяналт шалгалтыг татварын бүртгэл, мэдээллийн нэгдсэн сангийн мэдээлэл болон холбогдох бусад мэдээлэлд үндэслэн цахим болон бусад хэлбэрээр хийнэ.

2.9.1.хялбаршуулсан хяналт шалгалтыг татварын асуудал хариуцсан төрийн захиргааны байгууллагын эрсдэлийн удирдлагын нэгжээс ирүүлсэн төлөвлөгөөт бус хяналт шалгалтад хамрагдах татвар төлөгчийн жагсаалтыг үндэслэн энэ журмын 3.5-д заасан томилолт олгогдсоноор хийнэ.

2.9.2.хялбаршуулсан хяналт шалгалт хийх явцад татварын хууль тогтоомжийг бусад хэлбэрээр зөрчсөн, эсхүл энэ журмын 4.4.2, 4.4.9, 4.4.10, 4.4.11, 4.4.12, 4.4.13, 4.4.14, 4.4.16 заасан үйл ажиллагааг хэрэгжүүлэн зөрчлийг тогтоох шаардлага үүссэн тохиолдолд хяналт шалгалтын асуудал хариуцсан нэгжийн даргад танилцуулна. Хяналт шалгалтын асуудал хариуцсан нэгжийн дарга томилолтод өөрчлөлт оруулах саналыг татварын асуудал хариуцсан төрийн захиргааны байгууллагын эрсдэлийн удирдлагын нэгжид хүргүүлэн шийдвэрлүүлнэ.

2.9.3.хялбаршуулсан болон хэсэгчилсэн хяналт шалгалт хийсэн нь тухайн хугацааны албан татварын ногдуулалт, төлөлтийн байдалд иж бүрэн хяналт шалгалт хийхгүй байх үндэслэл болохгүй.

2.10.Татварын албаны хяналт шалгалтын асуудал хариуцсан нэгж нь татвар төлөгчийг харьяаллын дагуу хянаж шалгана.

2.11.Энэ журмын 2.10-т заасныг үл харгалзан дараах тохиолдолд хяналт шалгалтын харьяаллыг өөрөөр тогтоож болно.

2.11.1.Татварын ерөнхий хуулийн 41.6-д заасан үндэслэлээр татварын асуудал хариуцсан төрийн захиргааны байгууллагын дарга хяналт шалгалтын харьяаллыг тогтоох;

2.11.2.татварын асуудал хариуцсан төрийн захиргааны байгууллагын хяналт шалгалтын нэгж нь Татварын ерөнхий хуулийн 41.2-т заасан ерөнхий болон тусгай удирдамжийн хүрээнд татвар төлөгчийн харьяалал харгалзахгүйгээр хяналт шалгалт хийх;

2.11.3.нийслэлийн татварын газрын хяналт шалгалтын асуудал хариуцсан нэгж нь дүүргийн татварын хэлтсийн харьяалах татвар төлөгчид Татварын ерөнхий хуулийн 41.2-т заасан ерөнхий болон тусгай удирдамжийн хүрээнд хяналт шалгалт хийх;

2.11.4.маргаан таслах зөвлөлөөс маргаан бүхий нөхөн ногдуулалтын актыг түдгэлзүүлж буцаасан тохиолдолд Татварын ерөнхий хуулийн 47.11-д зааснаар дээд шатны татварын алба хяналт шалгалт хийх;

Гурав. Хяналт шалгалтын удирдамж, томилолт, хугацаа

3.1.Татварын алба хяналт шалгалтыг Татварын ерөнхий хуулийн 41 дүгээр зүйлд заасны дагуу хийж гүйцэтгэх бөгөөд хяналт шалгалтын ерөнхий болон тусгай удирдамжийг Татварын асуудал хариуцсан төрийн захиргааны байгууллагын дарга батална.

3.2.Татварын асуудал хариуцсан төрийн захиргааны байгууллагын даргын зөвшөөрснөөр татварын асуудал хариуцсан төрийн захиргааны байгууллагын хяналт шалгалтын нэгжийн дарга энэ журмын 3.1-д заасан тусгай удирдамжийг баталж болно.

3.3.Энэ журмын 2.6-д заасан хяналт шалгалтыг ерөнхий удирдамжаар хийж гүйцэтгэнэ.

3.4.Энэ журмын 2.6-д заасан хяналт шалгалтыг шаардлагатай тохиолдолд тусгай удирдамжаар хийж гүйцэтгэнэ. Тусгай удирдамжид шалгалтын бүрэлдэхүүн түүнд тавигдах шаардлага, хамтарч гүйцэтгэх байгууллагын нэр, гүйцэтгэх хяналт шалгалтын цар хүрээ зэрэг бусад шаардлагатай мэдээллийг тусгана.

3.5.Татварын алба хяналт шалгалтыг зөвхөн томилолттойгоор гүйцэтгэх бөгөөд энгийн болон хялбаршуулсан хяналт шалгалт хийх томилолтыг татварын асуудал хариуцсан төрийн захиргааны байгууллагын эрсдэлийн удирдлагын нэгжийн төлөвлөгөөний мэдээлэлд үндэслэн тухайн албаны хяналт шалгалтын асуудал хариуцсан нэгжийн дарга олгоно.

3.6.Нарийн төвөгтэй хяналт шалгалт хийх татварын улсын байцаагчийн томилолтыг тухайн шалгалтыг удирдан зохион байгуулж байгаа татварын асуудал хариуцсан хяналт шалгалтын нэгжийн даргын санал болгосноор татварын асуудал хариуцсан төрийн захиргааны байгууллагын эрсдэлийн удирдлагын нэгжийн төлөвлөгөөт бус хяналт шалгалтад хамрагдах татвар төлөгчийн жагсаалтыг үндэслэн олгоно.

3.7.Энгийн болон хялбаршуулсан хяналт шалгалтын явцад дараах нөхцөл байдал үүссэн тохиолдолд хяналт шалгалтыг энэ журмын 2.6.1-д заасан хэлбэрээр өөрчлүүлэх саналыг татварын асуудал хариуцсан төрийн захиргааны байгууллагын хяналт шалгалтын нэгжид танилцуулгын хамт хүргүүлнэ.

3.7.1.харилцан хамаарал бүхий этгээд хооронд хийгдсэн ач холбогдол бүхий ажил гүйлгээний үнэ, нөхцөл нь ижил төрлийн бие даасан ажил гүйлгээний үнэ, нөхцөлөөс ялгаатай байгаагаас татварын суурь буурсан байж болзошгүй;

3.7.2.Татварын ерөнхий хуулийн 16 дугаар зүйлд заасан Татвараас зайлсхийхийн эсрэг ерөнхий дүрэм хэрэгжүүлэхтэй холбоотой нарийн, төвөгтэй нөхцөл байдал үүссэн;

3.8.Энэ журмын 3.7-д заасан нарийн төвөгтэй нөхцөл байдал үүссэн талаарх танилцуулгыг тухайн нөхцөл байдлыг тогтоосноос хойш ажлын 5 өдрийн дотор дараах агуулгын хүрээнд бичиж ирүүлнэ.

3.8.1.хяналт шалгалтад хамрагдсан хугацаа, үндэслэл;

3.8.2.харилцан хамаарлыг тогтоосон байдал;

3.8.3.татвар ногдох орлого, хөрөнгийн дүнг бууруулсан гэж үзсэн гол үндэслэл, тайлбар, тооцоолол;

3.8.4.татварын ерөнхий хуулийн 16.6-д заасан татварын ашиг хүртсэн эсэхийг тогтоосон үндэслэл;

3.8.5.тухайн нөхцөл байдлыг тодорхойлох анхан шатны баримт, гэрээ, холбогдох бусад баримт материал;

3.9.Энэ журмын 3.8-д заасан танилцуулгад үндэслэн татварын асуудал хариуцсан төрийн захиргааны байгууллагын хяналт шалгалтын нэгж нь бусад нэгжтэй хамтран хяналт шалгалт хийх, эсхүл мэргэжил, арга зүйн туслалцаа үзүүлж, хяналт шалгалтын явцад хяналт тавьж ажиллана.

3.10.Журмын 3.5-д заасан хяналт шалгалтыг хоёр ба түүнээс дээш татварын улсын байцаагчийн бүрэлдэхүүнтэйгээр, мөн журмын 3.6-д заасан хяналт шалгалтыг ажлын цар хүрээ, нарийн төвөгтэй ажиллагаа, шаардлагатай тусгай мэргэжил, техник хэрэгсэл, тусгай мэргэшлийн ур чадвар зэргээс хамаарч багийн бүрэлдэхүүнтэй хийж болно.

3.11.Татварын хяналт шалгалт хийх явцад татвараас зайлсхийхийн эсрэг ерөнхий дүрэм хэрэгжүүлэх, үнэ шилжилтийн болон бусад нарийн төвөгтэй хяналт шалгалт хийх хугацаа нь хяналт шалгалт хийх ерөнхий хугацаанаас хэтрэхээр бол хяналт шалгалтыг тусгаарлаж, тухайн татварын төрөл дээр хэсэгчилсэн хяналт шалгалт хийж болно.

3.12.Татварын асуудал хариуцсан төрийн захиргааны байгууллагын хяналт шалгалтын нэгж нь татвар төлөгчийн ангилал /сегмент/, үйл ажиллагааны цар хүрээнд үндэслэн татвар төлөгчийн нэг жилийн үйл ажиллагаанд хяналт шалгалт хийхэд зарцуулах хүн өдрийг жил бүрийн эхэнд хялбаршуулсан, энгийн, нарийн төвөгтэй хяналт шалгалт бүрээр тогтоож татварын асуудал хариуцсан төрийн захиргааны байгууллагын эрсдэлийн удирдлагын нэгжид хүргүүлнэ.

3.13.Татварын асуудал хариуцсан төрийн захиргааны байгууллагын эрсдэлийн удирдлагын нэгж нь энэ журмын 3.12-д заасан хүн өдрийг үндэслэн хяналт шалгалтыг хийх томилолтын хугацааг тодорхойлно.

3.14.Энэ журмын 2.6.1-д заасан хяналт шалгалтын томилолтын хугацааг тогтооход журмын 3.13-т заасныг баримтлахгүй байж болох бөгөөд тусгай удирдамж гарсан тохиолдолд түүнд заасан хугацаатай уялдуулна. Энэ журмын 2.6.2-д заасан хяналт шалгалтыг журмын 3.7, 3.9-д заасан үндэслэлээр өөрчилсөн тохиолдолд хяналт шалгалтын хугацааг дахин тодорхойлно.

3.15.Хяналт шалгалт хийх томилолтын хугацааг хяналт шалгалтын асуудал хариуцсан нэгжийн дарга дараах үндэслэлээр сунгаж, нотлох баримтыг хавсаргана.

3.15.1.ажлын цар хүрээ өөрчлөгдсөн;

3.15.2.удирдлагын шийдвэрээр татварын улсын байцаагч өөр ажилд томилогдсон;

3.15.3.хүндэтгэн үзэх шалтгаан үүссэн;

3.15.4.мэдээлэл харилцан солилцох хүсэлт гаргасан;

3.15.5.харилцан хамаарлыг тогтоолгохоор холбогдох нэгжид хүргүүлсэн;

3.15.6.бусад байгууллагаас мэдээлэл гаргуулахаар хүсэлт гаргасан;

3.16.Хяналт шалгалтын асуудал хариуцсан нэгжийн дарга дараах тохиолдолд томилолтыг өөрчилж болно.

3.16.1.энэ журмын 2.5-д заасан үндэслэлээр хяналт шалгалтын төрлийг өөрчилсөн;

3.16.2.татварын улсын байцаагч татварын алба, нэгж хооронд сэлгэн ажилласан, бусад байгууллагад шилжсэн, албан ажлаас түр болон бүрэн чөлөөлөгдсөн;

3.16.3.татвар төлөгчийг хамгийн сүүлд шалгасан татварын улсын байцаагчид дахин томилолт олгогдсон;

3.16.4.энэ журмын 2.6.1-д заасан нарийн төвөгтэй хяналт шалгалт хийх багийн бүрэлдэхүүнд журмын 3.16.3-д заасан заалт хамаарахгүй;

3.16.5.татварын улсын байцаагч Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн хүрээнд ашиг сонирхлын зөрчилтэй мэдүүлэг гаргасан;

3.16.6.хяналт шалгалтын хэлбэрийг өөрчлөх шийдвэр гарсан;

3.17.Хяналт шалгалтын асуудал хариуцсан нэгжийн дарга дараах тохиолдолд томилолтыг цуцалж болно.

3.17.1.татвар төлөгч хувь хүн нас барсан, нас барсанд тооцсон;

3.17.2.татвар төлөгчийг эрэн сурвалжлах шүүхийн тогтоолыг үндэслэн цагдаагийн байгууллагаас ажиллагаа явуулсан талаар тодорхойлолт гаргасан;

3.18.Журмын 3.17-д зааснаас бусад тохиолдолд томилолтыг цуцлахад татварын асуудал хариуцсан төрийн захиргааны байгууллагын хяналт шалгалтын нэгжээс зөвшөөрөл авна.

3.19.Хяналт шалгалтын томилолтыг цуцалсан нь татвар төлөгчийг дахин хяналт шалгалтад хамруулахгүй байх үндэслэл болохгүй.

Дөрөв. Татварын хяналт шалгалтын үйл ажиллагаа

4.1.Татварын хяналт шалгалтын ажлыг бэлтгэх, гүйцэтгэх, дуусгах гэсэн гурван үе шаттайгаар хийж гүйцэтгэнэ. Үе шат бүрт ажлын төлөвлөгөө гаргаж, төлөвлөгөөний дагуу хийгдсэн ажлын гүйцэтгэлийг татварын бүртгэл, мэдээллийн нэгдсэн санд тухай бүр бүртгэн, өдөр тутам хийсэн ажлын тэмдэглэл хөтөлнө.

4.2.Хяналт шалгалтын асуудал хариуцсан нэгжийн дарга нь татварын улсын байцаагчийн гаргасан ажлын төлөвлөгөө, төлөвлөгөөний дагуу хийгдсэн ажлын гүйцэтгэл, өдөр тутам хийсэн ажлын тэмдэглэлтэй тухай бүр танилцаж, баталгаажуулж, зөвлөмж, арга зүйгээр хангасан талаар татварын бүртгэл, мэдээллийн нэгдсэн санд тэмдэглэл үйлдэнэ.

4.3.Бэлтгэх үе шатанд татварын улсын байцаагч дараах үйл ажиллагааг хэрэгжүүлнэ:

4.3.1.татварын улсын байцаагч Татварын ерөнхий хуулийн 41.7-д зааснаас бусад тохиолдолд татвар төлөгчид хяналт шалгалт эхлэхээс ажлын 10-аас доошгүй өдрийн өмнө шалгалт хийх талаар мэдэгдэж, хяналт шалгалт хийх томилолтыг биечлэн болон татварын бүртгэл, мэдээллийн нэгдсэн сангийн татвар төлөгчийн бүртгэлтэй цахим хаягт шуудангаар, төрийн байгууллагын цахим шуудан болон татварын улсын байцаагч өөрийн албаны цахим хаягаас хүргүүлнэ.

4.3.2.татвар төлөгчийн хууль ёсны төлөөлөгч, татвар төлөгчид шалгалтын зорилго, үндэслэл, хэлбэр, хамрагдах хугацаа, татварын алба, татварын улсын байцаагч, татвар төлөгчийн эрх, үүргийг танилцуулж, тайлбар авч ярилцлагын тэмдэглэл хөтөлж гарын үсэг зуруулна.

4.3.3.хяналт шалгалтад шаардлагатай баримт бичиг, мэдээ, мэдээллийг ирүүлэх талаар "Баримт бичгийн хүсэлт"-ийг татвар төлөгчид биечлэн болон шуудангаар, төрийн байгууллагын цахим шуудан болон татварын улсын байцаагч өөрийн албаны цахим хаягаар хүргүүлж, хүргүүлсэн тухай тэмдэглэлийг татварын бүртгэл, мэдээллийн нэгдсэн санд бүртгэнэ.

4.3.4.татвар төлөгчийн энэ журмын 4.3.3-т заасан баримт бичиг, мэдээ, мэдээллийг "Хүлээн авсан баримт бичгийн бүртгэл"-ээр хүлээн авна. Шалгалтын явцад нэмж шаардсан баримт бичиг ирүүлсэн тохиолдолд тухай бүр нь бүртгэж хүлээн авна.

4.3.5."Баримт бичгийн хүсэлт"-ээр шаардсан баримт бичиг, мэдээ мэдээллийг татвар төлөгч тогтоосон хугацаанд ирүүлээгүй бол энэ талаар ярилцлагын тэмдэглэл хөтөлж, тайлбар гаргуулан авна.

4.3.6.татвар төлөгч энэ журмын 1.6-д заасан нөхцөл байдал үүссэн, татвар төлөгчтэй биечлэн уулзах боломжгүй болон бусад тохиолдолд татварын улсын байцаагчаас цахимаар ирүүлсэн хяналт шалгалт хийх томилолт, баримт бичгийн хүсэлт зэрэгтэй танилцан хяналт шалгалтын үйл ажиллагаанд аль болох хүндрэл учруулахгүйгээр үйл ажиллагааныхаа талаар ярилцлага өгөх, шаардсан баримт бичгийг цахим хэлбэрээр ирүүлж болно.

4.3.7.татвар төлөгчтэй биечлэн уулзах боломжгүй тохиолдолд ярилцлагын тэмдэглэлийг утсаар, цаасан болон цахим хэлбэрээр, тоон гарын үсгээр баталгаажуулж, татварын бүртгэл, мэдээллийн нэгдсэн санд бүртгэнэ.

4.3.8.татварын улсын байцаагч нь хяналт шалгалтыг цахим хэлбэрээр хийхдээ Татварын ерөнхий газрын Мэдээллийн технологийн асуудал хариуцсан нэгжээс гаргасан "Ажлын байрны гаднаас татварын албаны мэдээллийн системд ажиллах зөвлөмж"- ийг хэрэгжүүлэн ажиллана.

4.3.9.татвар төлөгчийн хувийн хэрэг, тайлан, тодруулга, мэдээлэл, судалгаа, үйл ажиллагааны талаарх холбогдох мэдээллүүдийг дотоод, гадаад эх үүсвэрээс цуглуулж дараах судалгаа шинжилгээг хийнэ.

4.3.9.1.татвар төлөгчийн эрхэлж буй өөрийн болон салбарын үйл ажиллагааны ерөнхий мэдээлэл, эдийн засаг, зах зээлийн төлөв байдлыг судлах;

4.3.9.2.татвар төлөгчийн татварын бүртгэл, мэдээллийн нэгдсэн сан дахь бүртгэл, ногдуулалт, төлөлт, хяналт шалгалтын мэдээлэл цуглуулах;

4.3.9.3.санхүү, татварын тайлан, хувьцаа, хөрөнгө оруулалтын мэдээлэлд шинжилгээ хийж, гол үзүүлэлтүүдийг салбарын үзүүлэлттэй харьцуулах;

4.3.9.4.татварын албаны хөндлөнгийн мэдээллийг татварын тайлангийн үзүүлэлттэй харьцуулах;

4.3.9.5.хяналт шалгалтад хамрагдсан байдал, илэрсэн зөрчлүүд, бүх шатны маргааны шийдвэрлэлтийн үр дүнд судалгаа хийх;

4.3.9.6.татварын албаны эрсдэлийн үнэлгээний үзүүлэлт болон татварын асуудал хариуцсан төрийн захиргааны байгууллагын эрсдэлийн удирдлагын нэгжээс ирүүлсэн бусад мэдээлэлд;

4.3.9.7.тухайн салбарын онцлог, хяналт шалгалтын цар хүрээнээс хамаарч мэргэжлийн шинжээчийн гаргасан зөвлөмж, дүгнэлтэд;

4.3.9.8.бусад шаардлагатай мэдээлэлд;

4.3.10.татварын улсын байцаагч энэ журмын 4.3.9-д заасан судалгаа, шинжилгээ, цуглуулсан мэдээлэлд үндэслэн хяналт шалгалтын үйл ажиллагааг ач холбогдлоор нь эрэмбэлэн, дарааллыг нарийвчлан тогтоож, гүйцэтгэх үе шатанд хэрэгжүүлэх "Татварын хяналт шалгалтын ажлын төлөвлөгөө /цаашид "ажлын төлөвлөгөө" гэх/ гаргана.

4.4.Гүйцэтгэх үе шатанд татварын улсын байцаагч дараах үйл ажиллагааг хэрэгжүүлнэ:

4.4.1.хяналт шалгалтыг энэ журмын 4.3.10-д заасан ажлын төлөвлөгөөний дагуу хийж гүйцэтгэх бөгөөд хяналт шалгалтын асуудал хариуцсан нэгжийн дарга шаардлагатай тохиолдолд ажлын төлөвлөгөөнд нэмэлт өөрчлөлт оруулах;

4.4.2.хяналт шалгалт хийхээр томилогдсон татварын улсын байцаагч хяналт шалгалтыг өөрийн ажлын байранд хийнэ. Хэрэв хяналт шалгалтыг татвар төлөгчийн хүсэлтээр түүний ажлын байранд хийхээр бол хяналт шалгалтын асуудал хариуцсан нэгжийн даргад танилцуулж, татвар төлөгчөөр ажлын түр байр гаргуулан хийж болно. Энэ журмын 1.6-д заасан нөхцөл байдал үүссэн үед журмын 4.3.8-д заасныг хэрэгжүүлж ажиллах;

4.4.3.хяналт шалгалтын явцад зөрчилтэй байж болзошгүй гэж үзсэн мэдээ, мэдээллийг татвар төлөгчөөс тодруулах, тооцоо нийлэх, баримтын тулгалт хийх, нэмэлт баримт бичиг, тооцоо судалгаа гаргуулах, шаардлагатай тохиолдолд гуравдагч этгээдээс баримт материал гаргуулан авч баримтжуулах, зөрчлийг нотлох, тогтоох ажиллагааг гүйцэтгэх;

4.4.4.хяналт шалгалтын явцад зөрчилтэй байж болзошгүй гэж үзсэн мэдээллийг нотлох зорилгоор гол харилцагч татвар төлөгчдийн талаар тайлбар, тодруулга, мэдээлэл, лавлагааг бусад татварын албанд хүсэлт хүргүүлэн авах;

4.4.5.хяналт шалгалтын явцад илрүүлсэн зөрчлийг баримтжуулах, тодруулах, хяналт шалгалтын хугацаанд шаардлагатай мэдээллийг олж авах, нэмэлт мэдээллийн эх сурвалжийг илрүүлэх, мэдээллийн сангийн мэдээллийн үнэн зөв эсэхийг нотлох зорилгоор татвар төлөгч болон холбогдох хүмүүстэй ярилцлага хийж, тухай бүр "Ярилцлагын тэмдэглэл" хөтлөх;

4.4.6.татварын улсын байцаагч татвар төлөгчтэй зөвхөн ажлын цагаар татварын албаны байр эсхүл татвар төлөгчийн ажлын байранд ярилцлага хийх;

4.4.7.хяналт шалгалттай холбоотой асуудлаар биечлэн уулзах хүсэлтэй иргэд, албан тушаалтныг ажлын цагаар хүлээн авч, мэдээлэл, санал, хүсэлтийн талаар "Ярилцлагын тэмдэглэл" хөтлөх;

4.4.8.хяналт шалгалтын явцад цуглуулсан холбогдох баримт бичигт үндэслэн хяналт шалгалтыг хийж, илэрсэн зөрчил бүрт дэлгэрэнгүй жагсаалт, тэмдэглэл хөтлөх, шаардлагатай баримт бичгийг хувилан авах, тайлбар тодруулга гаргуулах зэргээр зөрчлийг баримтжуулах;

4.4.9.хяналт шалгалтад хамрагдсан татварын төрөл тус бүрийн ногдуулалт, төсөвт төлсөн, суутган тооцсон татварын дүнг үндсэн баримтаар нь хянан шалгаж илүү, дутуу төлөлтийн тооцоог тулган баталгаажуулах;

4.4.10.шаардлагатай тохиолдолд Татварын ерөнхий хуулийн 34 дүгээр зүйлд заасны дагуу холбогдох мэргэжлийн байгууллагаас лавлагаа тодруулга гаргуулах, шинжилгээ хийлгэх, мэргэжлийн туслалцаа авах зэргээр хамтран ажиллах;

4.4.11.энэ журмын 4.4.4-д заасан мэдээллийг тодруулах шаардлага үүссэн тохиолдолд Татварын ерөнхий хуулийн 21.4-т заасан мэдээ, мэдээлэл, баримтыг гуравдагч этгээдээс гаргуулах, мөн хуулийн 41.10.1-д заасны дагуу харилцагч этгээдээс тайлбар авах;

4.4.12.хяналт шалгалт хийх явцад Татварын ерөнхий хуулийн 16 дугаар зүйлд заасан нөхцөлийг бүрдүүлж байгаа татвар төлөгчийн үйлдлийг тогтоосон тохиолдолд тухайн татварын албаны даргад танилцуулан Эрсдэлийн удирдлагын хороонд хүсэлт гаргах;

4.4.13.хяналт шалгалт хийх явцад Татварын ерөнхий хуулийн 37 дугаар зүйлд заасан нөхцөл үүсэж, татварын суурийг бууруулж, үнэ шилжилт хийсэн байж болзошгүй тохиолдолд хяналт шалгалтын асуудал хариуцсан нэгж нь харилцан хамааралтай этгээд хооронд хийгдсэн ажил гүйлгээний мэдээллийг татварын асуудал хариуцсан төрийн захиргааны байгууллагын хяналт шалгалтын нэгжид хүргүүлэх;

4.4.14.хяналт шалгалтын явцад зөрчилтэй байж болзошгүй гэж үзсэн мэдээ, мэдээллийг тодруулах, нэмэлт баримт бичиг, тооцоо судалгааг гадаад улсын эрх бүхий этгээдээс гаргуулахаар Татварын ерөнхий хуулийн 18 дугаар зүйлд заасны дагуу мэдээлэл авах хүсэлтийг татварын асуудал хариуцсан төрийн захиргааны байгууллагын хяналт шалгалтын нэгжид гаргах;

4.4.15.хяналт шалгалтын явцад татвар төлөгчийн гадаад улсад төлсөн албан татварыг баталгаажуулах тохиолдолд Татварын ерөнхий хуулийн 18 дугаар зүйлд заасны дагуу мэдээлэл авах хүсэлтийг татварын асуудал хариуцсан төрийн захиргааны байгууллагын хяналт шалгалтын нэгжид гаргах;

4.4.16.татварын асуудал хариуцсан төрийн захиргааны байгууллагын хяналт шалгалтын нэгж нь энэ журмын 4.4.13, 4.4.14-д заасан хүсэлтийг бүртгэн авч мэдээлэл харилцан солилцох асуудал хариуцсан нэгжид хүргүүлэх;

4.4.17.хяналт шалгалт хийх явцад олон улсын жишигт нийцсэн хяналт шалгалтын арга, техникийг ашиглан дараах тусгайлсан үйл ажиллагааг нарийвчлан хэрэгжүүлнэ:

4.4.17.1.татварын ногдлыг бууруулах, татварын суурь багасгах, эсхүл алдагдлыг нэмэгдүүлэх замаар татварын ашиг хүртсэн этгээдэд Эрсдэлийн удирдлагын хорооноос ирүүлсэн шийдвэрийг үндэслэн татварын ногдолд залруулга хийх;

4.4.17.2.харилцан хамааралтай этгээд хооронд хийсэн ажил гүйлгээний нөхцөл татварын зорилгоор түүнтэй харьцуулж болох бие даасан ажил гүйлгээний нөхцөлөөс ялгаатай тохиолдолд татварын суурь багассан этгээдэд Татварын ерөнхий хуулийн 39, 40.6-д заасны дагуу үнэ шилжилтийн үндсэн болон хоёрдогч тохируулгыг хийх;

4.4.17.3.татвар төлөгчид хяналт шалгалт хийхдээ гадаад улсад олсон тухайлсан орлоготой холбоотой гүйлгээг санхүүгийн холбогдох баримт болон гуравдагч этгээдийн мэдээллээр нотлох;

4.4.17.4.толгой компаниас төлөөний газарт хамаарах татвар ногдох орлого, хуваарилагдсан зардлыг тодорхойлохдоо хууль тогтоомж, "Орлого ба хөрөнгийн татварыг давхардуулж ногдуулахгүй байх, татвар төлөхөөс зайлсхийх явдлаас урьдчилан сэргийлэх тухай хэлэлцээр", түүний заавар, холбогдох журамд нийцсэн эсэхийг шалгах;

4.4.18.энэ журмын 4.4.1, 4.4.2, 4.4.3, 4.4.4, 4.4.5, 4.4.6, 4.4.7, 4.4.8, 4.4.9, 4.4.10, 4.4.11, 4.4.12, 4.4.13, 4.4.14, 4.4.15, 4.4.17-д заасан үйл ажиллагааг хэрэгжүүлсний үр дүнд нотлогдсон зөрчлийг бүртгэж, ногдуулах нөхөн татвар, торгууль, алданги, хүүг тооцох;

4.4.19.татвар төлөгчийн тайлагнасан, хяналт шалгалтаар тогтоосон татварын ногдуулалт төлөлтийн тооцоог шалгалтад хамрагдсан татварын төрөл, он тус бүрээр хийх;

4.4.20.энэ журмын 4.4.9-д заасан баталгаажуулалтаар хуулийн хугацаанд төлөөгүй татварт торгууль, алданги тооцох;

4.5.Дуусгах үе шатанд татварын улсын байцаагч дараах үйл ажиллагааг хэрэгжүүлнэ:

4.5.1.энэ журмын 4.4.18, 4.4.19, 4.4.20-д заасан зөрчил, түүний хууль эрх зүйн үндэслэл, тооцооллыг хяналт шалгалтын асуудал хариуцсан нэгжийн даргад танилцуулж, хянуулах;

4.5.2.шаардлагатай тохиолдолд энэ журмын 4.4.18, 4.4.19, 4.4.20-д заасан зөрчил, түүний хууль эрх зүйн үндэслэл, тооцоололд татварын асуудал хариуцсан төрийн захиргааны байгууллагын хяналт шалгалтын нэгж, хуулийн хэрэгжилтийг хангах нэгжээс мэргэжил арга зүйн чиглэл авах;

4.5.3.хяналт шалгалтын үр дүнг тодорхойлоход хангалттай мэдээлэл, нотлох баримт, тооцооллыг нягталж шийдвэр гаргахад бэлтгэх;

4.5.4.хяналт шалгалтын асуудал хариуцсан нэгжийн дарга татварын улсын байцаагчийн батлуулахаар хүргүүлсэн шийдвэрийг хянахдаа эрсдэл тооцсон дэлгэрэнгүй үнэлгээнээс хэт зөрүүтэй шийдвэр гарахаар ирүүлсэн бол эрсдэлийн шинжилгээнд үндэслэн хяналт шалгалт хийж буй татварын улсын байцаагчид буцаан нягтлуулах эсхүл хяналт шалгалтын багийн бүрэлдэхүүнийг өөрчлөх;

4.5.5.энэ журмын 4.5.4-д заасан эрсдэл тооцсон дэлгэрэнгүй үнэлгээний зөрүү нь нотлогдохгүй тохиолдолд Татварын улсын байцаагч холбогдох баримт материалыг татварын удирдлагын нэгдсэн системд бүртгэж, хяналт шалгалтын асуудал хариуцсан нэгжийн даргад танилцуулан, хяналт шалгалтын ажлыг дуусгах;

4.5.6.хяналт шалгалтын ажлын үр дүнгээр татварын акт, илтгэх хуудас үйлдэж, хяналт шалгалт хийсэн татварын улсын байцаагч гарын үсэг зурж, тэмдэг дарж, хяналт шалгалтын асуудал хариуцсан нэгжийн дарга хянан баталгаажуулж гарын үсэг зурж, тэмдэг дарснаар шийдвэр хүчин төгөлдөр болно;

4.5.7.хяналт шалгалтын ажлын явцад болон үр дүнгээр Зөрчлийн тухай хуульд заасан зөрчил илэрсэн тохиолдолд Зөрчил шалган шийдвэрлэх тухай хуулийн дагуу шийтгэлийн хуудас үйлдэнэ;

4.5.8.татварын алба, татварын улсын байцаагч эцэслэн баталгаажуулаагүй шийдвэрийг татвар төлөгчид урьдчилан танилцуулахгүй;

4.5.9.татварын акт, илтгэх хуудсыг хүчин төгөлдөр болсноос хойш ажлын 7 өдрийн дотор татвар төлөгч, түүний итгэмжлэгдсэн төлөөлөгчид гардуулж, гардуулсан тухай тэмдэглэл үйлдэх;

4.5.10.татварын акт, илтгэх хуудсыг энэ журмын 4.5.9-д заасан хугацаанд гардуулах боломжгүй, эсхүл гардан аваагүй бол уг хугацаа өнгөрснөөс хойш 7 хоногийн дотор татвар төлөгчийн татварын албанд бүртгэлтэй хаягаар шуудангаар илгээх;

4.5.11.энэ журмын 4.5.10-д заасан шуудангаар илгээсэн боловч хаяг байршилдаа байхгүй болон бусад шалтгаанаар буцаж ирсэн татварын акт, илтгэх хуудсыг Татварын ерөнхий хуулийн 42.8-д заасны дагуу татвар төлөгчид гардуулсанд тооцон, татварын улсын байцаагч тэмдэглэл үйлдэн, татварын бүртгэл, мэдээллийн нэгдсэн санд бүртгэж, хяналт шалгалтын баримтад шийдвэрийг хавсаргах;

4.5.12.энэ журмын 4.5.9-д заасан татварын акт, илтгэх хуудсыг гардуулахдаа хууль тогтоомжид заасны дагуу гомдол, хүсэлт гаргах эрхтэйг танилцуулж, гарын үсэг зуруулах;

4.5.13.хяналт шалгалтын ажил бүрэн дууссан тохиолдолд энэ журмын 4.3.4-т заасан баримт бичгийг татвар төлөгчид "Хүлээлгэн өгсөн баримт бичгийн бүртгэл"-ээр хүлээлгэн өгч, гарын үсэг зуруулах;

4.5.14.хяналт шалгалтын явцад бусад татвар төлөгчдийн татвар ногдуулалт, төлөлттэй холбоотой цаашид хөндлөнгийн мэдээллээр ашиглах гэрээ, төлбөр, тооцооны болон бусад баримтыг татварын бүртгэл, мэдээллийн санд бүртгэх;

4.6.Татварын ерөнхий хуулийн 44 дүгээр зүйлд заасны дагуу хяналт шалгалтыг хийх явцад Зөрчлийн тухай хуульд заасан зөрчил илэрсэн тохиолдолд Зөрчил шалган шийдвэрлэх тухай хуулийн дагуу шийдвэрлэнэ.

Тав.Татварын хяналт шалгалтын үйл ажиллагаанд татвар төлөгчийн оролцоо

5.1.Татвар төлөгч нь хяналт шалгалтын удирдамж, томилолттой танилцсанаар энэ журмын 4.3.3, 4.3.4-т заасан баримт бичгийг татварын албаны тогтоосон хугацаанд бэлтгэж хүргүүлнэ.

5.2.Энэ журмын 5.1-д заасан баримт, бичиг нь гадаад хэл дээр үйлдэгдсэн бол Татварын ерөнхий хуулийн 29.1.4-т заасны дагуу татвар төлөгч монгол хэл дээр орчуулж татварын албанд ирүүлнэ.

5.3.Татвар төлөгч нь хяналт шалгалт хийх талаар мэдэгдсэнээс хойш ажлын 10 хоногийн дотор татварын албанд дараах хүсэлтийг гаргаж болно:

5.3.1.Татварын ерөнхий хуулийн 6.1.41-д заасан хүндэтгэн үзэх шалтгаан үүссэн тохиолдолд хяналт шалгалтыг хойшлуулах;

5.3.2.хяналт шалгалт хийх татварын улсын байцаагчтай Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд заасан зөрчил үүссэн бол татварын улсын байцаагчийг өөрчлүүлэх;

5.4.Татвар төлөгч нь хяналт шалгалтыг томилолтын хугацаанд шуурхай хийх нөхцөл боломжоор хангана.

5.5.Татварын хяналт шалгалт хийхээр татвар төлөгчид мэдэгдсэнээс хойш Татварын ерөнхий хуулийн 31.4-д заасны дагуу хяналт шалгалтад хамрагдаж буй хугацаанд хамаарах татварын тайланг залруулах болон хугацааг сунгуулах хүсэлт хүлээн авахгүй.

5.6.Татвар төлөгч нь энэ журмын 4.3, 4.4-т заасан үйл ажиллагааг хэрэгжүүлэх явцад татварын улсын байцаагчид тайлбар, нотлох баримтыг шаардсан тухай бүр цахим болон цаасан хэлбэрээр гаргаж өгнө.

5.7.Татвар төлөгч нь татварын албанаас гаргасан шийдвэрийг эс зөвшөөрвөл гардан авснаас хойш 30 хоногийн дотор захиргааны болон шүүхийн журмаар гомдлоо гаргана.

5.8.Татвар төлөгчийн татвар ногдуулалт, төлөлттэй холбоотой шинээр үүссэн нөхцөл, хөндлөнгийн мэдээлэл нь хяналт шалгалтад дахин хамруулах үндэслэл болно.

Зургаа. Татварын хяналт шалгалтын акт, илтгэх хуудас үйлдэх, түүний биелэлтийг хангуулах

6.1."Татварын акт", "Илтгэх хуудас"-ын загвар маягтыг татварын асуудал хариуцсан төрийн захиргааны байгууллагын дарга батална.

6.2.Журмын 4.5.6-д заасан акт, илтгэх хуудас нь татварын бүртгэл, мэдээллийн нэгдсэн сангаас олгосон нэгдсэн дугаартай байх бөгөөд хавсралтын хамт хүчинтэй байна.

6.3.Татварын акт, илтгэх хуудсыг 3 хувь үйлдэж, архивд, татвар төлөгчид, татвар төлөгчийн хувийн хэрэг хариуцсан нэгжид тухай бүр шилжүүлнэ.

6.4.Харьяа нэгж нэмэгдсэн өртгийн албан татварын ногдуулалт, төлөлтийг хянан баталгаажуулсан саналыг том татвар төлөгчтэй харилцах нэгжид, том татвар төлөгчтэй харилцах нэгж нь "Нэмэгдсэн өртгийн албан татварын ногдуулалт, төлөлтийг хянан шалгаж баталгаажуулсан акт"-ыг 4 хувь үйлдэж, Санхүү төсвийн асуудал эрхэлсэн төрийн захиргааны төв байгууллагад, харьяа нэгжид, архивд, татвар төлөгчид тухай бүр хүргүүлнэ.

6.5.Нөхөн ногдуулалтын акт нь тэмдэглэх болон тогтоох, илтгэх хуудас нь тэмдэглэх хэсгээс бүрдэнэ.

6.5.1.тэмдэглэх хэсэгт: хяналт шалгалтад хамрагдаж байгаа татвар төлөгчийн мэдээлэл, хяналт шалгалт хийх үндэслэл, өмнөх хяналт шалгалтад хамрагдсан байдал шийдвэрлэлт, татвар төлөгчийн татварын ногдуулалт, төлөлтийн байдал /татварын төрөл, он тус бүрээр/, хөндлөнгийн мэдээллийн ашиглалт, хяналт шалгалтаар илэрсэн зөрчлийн утга, дүн, зөрчсөн хууль тогтоомж, эрх зүйн баримт бичиг, татварын акт үйлдэх үндэслэл;

6.5.2.тогтоох хэсэгт: Татварын хууль тогтоомж зөрчсөн татвар төлөгчид хариуцлага хүлээлгэсэн хуулийн зүйл, хэсэг, заалт, баталгаажуулсан үлдэгдлийн дүн, төлүүлэхээр шийдвэрлэсэн нөхөн татвар, алданги, торгуулийн дүн, төлбөрийг хүлээн авах Татварын алба, банкны нэр, дансны дугаар, төлбөр хийх хугацаа;

6.5.3.тогтоох хэсгийн төгсгөлд: нөхөн ногдуулалтын акт, илтгэх хуудас үйлдсэн татварын алба, татварын улсын байцаагчийн нэр, гарын үсэг, танилцсан татвар төлөгч, түүний итгэмжлэгдсэн төлөөлөгчийн нэр, гарын үсэг, хянан баталгаажуулсан хяналт шалгалтын асуудал хариуцсан нэгжийн даргын нэр, огноо, гарын үсэг, тэмдэг;

6.6.Татварын акт, илтгэх хуудсанд дараах баталгаажуулсан маягтыг хавсаргана:

6.6.1."Татварын хяналт шалгалт хийх томилолт" Маягт-ХШ01

6.6.2."Ярилцлагын тэмдэглэл" Маягт-ХШ03

6.6.3."Татварын хяналт шалгалтын ажлын карт" Маягт-ХШ06/01/

6.6.4."Татварын хяналт шалгалтаар илрүүлсэн зөрчил, ногдуулсан төлбөрийн тооцоо" Маягт-ХШ06/02/

6.6.5."Татвар /төлбөр/-ын ногдуулалт, төлөлтийн тооцоо" Маягт-ХШ07/01-12/

6.6.6."Хуулийн хугацаанд төлөөгүй татварт торгууль, алданги ногдуулсан тооцоо" Маягт-ХШ08

6.6.7."Нөхөн ногдуулалтын акт, /илтгэх хуудас/-ийг танилцуулсан тухай тэмдэглэл" Маягт-ХШ09 үйлдэнэ.

6.6.8. "Аж ахуйн нэгжийн тайлангаар гарсан алдагдлыг баталгаажуулсан тооцоо" Маягт-ХШ11.

6.7.Нарийн төвөгтэй хяналт шалгалт хийсэн тохиолдолд хяналт шалгалтын ажлын тайлан бичнэ. Тайлан нь дараах мэдээллийг багтаасан байна.

6.7.1.татварын хяналт шалгалтын зорилго, агуулга, үндэслэл;

6.7.2.татвар төлөгчийн үйл ажиллагааны талаар /бизнесийн үйл ажиллагаа, салбарын тойм, санхүүгийн үйл ажиллагаа/;

6.7.3.Татварын ерөнхий хуулийн 37 дугаар зүйлд заасан үнэ шилжилтийн ерөнхий зарчмын хэрэгжүүлэхтэй холбоотой татвар төлөгчийн харилцан хамаарал бүхий талтайгаа хийсэн ажил гүйлгээний харьцуулагдах байдлын шинжилгээ;

6.7.4.Татварын ерөнхий хуулийн 16 дугаар зүйлд заасан татвараас зайлсхийхийн эсрэг ерөнхий дүрмийг хэрэгжүүлж ажилласан талаарх дүгнэлт /схем, ашиг хүртсэн байдал, нөхцөл байдлыг тогтоох/;

6.7.5.хяналт шалгалтаар илэрсэн бусад зөрчлийн утга /хууль тогтоомжийг мөрдөж ажилласан байдал/;

6.7.6.татварын хууль тогтоомжийг зөрчсөн эсэх талаарх үндэслэл, дүгнэлт;

6.7.7.шинжилгээ, дүгнэлттэй холбоотой хавсралт материал;

6.8.Хяналт шалгалт хийсэн нэгж болон татварын улсын байцаагч нь хяналт шалгалтын шийдвэрийг татварын бүртгэл, мэдээллийн нэгдсэн санд үнэн зөв бүртгэгдсэн, ногдуулсан төлбөрийн өр бүрэн үүссэн эсэхэд хяналт тавьж, хариуцаж ажиллана.

6.9.Хяналт шалгалтаар баталгаажуулсан алдагдал, илүү төлөлтийн тооцооллыг татварын бүртгэл, мэдээллийн нэгдсэн сангийн тооцоололд бүртгэгдсэн эсэхэд хяналт тавих;

6.10.Маргаан бүхий актны шийдвэрлэлтийн явцад хяналт шалгалт хийсэн татварын улсын байцаагч биечлэн оролцож, хариуцаж ажиллана.

6.10.1.маргаан хянан шийдвэрлэх ажиллагааны явцыг татварын бүртгэл, мэдээллийн нэгдсэн санд Маргаан таслах зөвлөлийн магадлагч, хуулийн мэргэжилтэн бүртгэж, харьяалах татварын албаны хяналт шалгалтын асуудал хариуцсан нэгж хяналт тавьж ажиллана.

6.10.2.татвар төлөгч шилжсэн үед маргаан бүхий актын шийдвэрлэлтэд шилжүүлэн авсан татварын албаны хяналт шалгалтын асуудал хариуцсан нэгж хяналт тавина.