МОНГОЛ УЛСЫН ХУУЛЬ

1996 оны 7 дугаар сарын 29 өдөр

Улаанбаатар хот

МОНГОЛ УЛСЫН ЗАСГИЙН ГАЗРЫН ТУХАЙ ХУУЛЬД НЭМЭЛТ, ӨӨРЧЛӨЛТ ОРУУЛАХ ТУХАЙ

            "4.Монгол Улсын сайд Засгийн газрын гишүүний хувьд дор дурдсан хүрээний стратегийн төлөвлөлт, бодлогын удирдамжаар хангах, хөтөлбөр зохиох, зохицуулалт, хяналт-шинжилгээ /мониторинг/ хийх, үнэлж дүгнэх ажлыг эрхэлнэ:

                        1/Монгол Улсын Сангийн сайд:

            -Монгол орны хөгжлийн хэтийн бодлого; эдийн засаг, нийгмийн хөгжлийн үндсэн чиглэл, эдийн засгийн аюулгүй байдал, эдийн засгийн шинэчлэл, зохицуулалт; санхүү, зээл, төсөв, татвар, гааль, улсын болон нийгмийн даатгал, төрийн өмч, өмч хувьчлалын бодлого; бүртгэл, санхүүгийн хяналт; хөрөнгө оруулалт, салбар, салбар хоорондын болон бүс нутгийн хөгжлийн бодлого; улсын гадаад төлбөрийн тэнцэл, гадаад орны болон олон улсын санхүүгийн байгууллагатай харилцах асуудал, хөдөлмөр /хөдөлмөрийн нөөц, цалин хөлс/, улсын статистик, стандартчилал, хэмжил зүйн асуудал.

                        2/ Монгол Улсын гадаад харилцааны сайд:

            -төрийн гадаад бодлого; гадаад улс, олон улсын байгууллагатай улс төр, эдийн засаг, худалдаа, соёл, шинжлэх ухаан, техник, хүмүүнлэгийн талаар харилцах хамтын ажиллагааны зохицуулалт; гадаадын тусламж; төрийн ёслол, гэрээ эрх зүйн асуудал.

                        3/Монгол Улсын Хууль зүйн сайд:

            -эрх зүйн бодлого, шинэчлэл, хууль тогтоомжийн төсөл боловсруулалтын арга зүй, хууль тогтоомжийн системчлэл, мэдээлэл, эрх зүйн сургалт, сурталчилгаа; хууль зүйн туслалцаа; цагдаа, мөрдөн байцаах, улсын архив, патент, зохиогчийн эрх, шүүхийн шийдвэр биелүүлэх байгууллагын болон гэмт хэрэгтэй тэмцэх бодлого, зохицуулалт; төрийн захиргааны байгууллагын шийдвэрийн хууль зүйн үндэслэлд тавих хяналт; хэвлэл, мэдээллийн хэрэгслэл, олон нийтийн байгууллага, үл хөдлөх хөрөнгийн бүртгэл; иргэний болон иргэний гэр бүлийн бүртгэл, мэдээллийн асуудал, иргэний харьяалал, цагаачлал; шүүхийн байгууллагын зохион байгуулалт, санхүү, материал-техникийн хангамж, үйлчилгээ; Засгийн газраас шүүх, прокурорын байгууллага, нотариат, өмгөөлөгчдийн олон нийтийн байгууллага болон төрөөс сүм хийдтэй харилцах асуудал.

                        4/Монгол Улсын Байгаль орчны сайд:

            -Байгаль, орчныг хамгаалах, зохистой ашиглах, нөхөн сэргээх болон экологийн бодлого; газар, түүний хэвлийн баялаг, ой, ус, ан амьтан, ургамлын нөөцийн мэдээллийн сан; байгаль орчны хяналт-шинжилгээ /мониторинг/; газар зохион байгуулалтын удирдлага; ус цаг уур болон байгалийн болзошгүй гамшгаас урьдчилан сэргийлэх, экологийн аюулгүй байдлыг хангах асуудал.

                        5/Монгол Улсын Батлан хамгаалахын сайд:

            -улсыг батлан хамгаалах, цэргийн бодлого; зэвсэгт хүчин, улсын хилийн болон иргэний хамгаалалтын удирдлага, зохицуулалтын асуудал.

                        6/ Монгол Улсын Гэгээрлийн сайд:

            -боловсрол, шинжлэх ухаан, технологийг хөгжүүлэх бодлого зохицуулалт; түх, соёлын өвийг хамгаалах, сэргээх, соёл, урлагийг хөгжүүлэх бодлого зохицуулалт; шинжлэх ухаан, технологийн мэдээлэл; хэвлэлийн үйлдвэрлэлийн асуудал.

                        7/ Монгол Улсын Дэд бүтцийн хөгжлийн сайд:

            -түлш, эрчим хүч, зам, тээвэр, харилцаа холбоог хөгжүүлэх болон мэдээллийн бодлого, зохицуулалт; барилга, хот байгуулалт; усан хангамжийн нэгдсэн бодлого; орон сууц, нийтийн аж ахуйн үйлчилгээний бодлого, зохицуулалт; геодези, зураг зүйн бодлого; барилга, техникийн улсын хяналт, аялал жуулчлалын бодлого, зохицуулалтын асуудал.

                        8/ Монгол Улсын Хөдөө аж ахуй, үйлдвэрийн сайд:

            -хөдөө аж ахуй, худалдаа, үйлдвэрлэл болон хүнсний бодлого; геологи, уул уурхай, металлург, машины үйлдвэрийг хөгжүүлэх бодлого; үйлдвэрлэлийн технологийн бодлого: үйлдвэрлэл, үйлчилгээний тэнцвэрт байдал, зохицуулалт, хяналт; материал баялгийн улсын нөөц; ургамлын хорио цээр, мал эмнэлэг, малын үржил, үрийн албадын зохицуулалт: геологийн судалгаа, ашигт малтмалын эрэл, хайгуул, эрдсийн баялгийн олборлолт, түүний хамгаалалт: хөдөө аж ахуйн эдэлбэр газрын ашиглалт, усжуулалтын асуудал.

                        9/ Монгол Улсын Эрүүл мэнд, нийгмийн хамгааллын сайд:

            -хүн ам зүй, нийгмийн халамж, асрамж, ядууралтай тэмцэх талаар төрөөс явуулах бодлого; нийгмийн эрүүл мэндийг хамгаалах, нөхөн сэргээх бодлого; биеийн тамир, спортыг хөгжүүлэх бодлого; хүн амын эрүүл мэндийг хамгаалах нийгмийн болон мэргэжлийн арга хэмжээ: эм, эмнэлгийн хэрэгсэл, техникийн үйлдвэрлэл, хангамж; эрүүл ахуй, халдвар судлал; эмнэлгийн үйлчилгээний улсын хяналт: хөдөлмөр хамгаалал, техникийн аюулгүй ажуиллагаа, хэрэглэгчдийн эрх ашгийг хамгаалах, хөдөлмөрийн хууль тогтоомжийн улсын хяналт; хөдөлмөрийн харилцаанд эзэд, үйлдвэрчний эвлэлийн байгууллага хоорондын харилцаа, хамтын маргааны зохицуулалтын асуудал."

МОНГОЛ УЛСЫН ИХ ХУРЛЫН ДАРГА Р.ГОНЧИГДОРЖ