САНХҮҮГИЙН ЗОХИЦУУЛАХ ХОРООНЫ ТОГТООЛ

2022 оны 5 дугаар сарын 25-ны өдөр

Дугаар 276

Улаанбаатар хот

"ХӨРӨНГӨ ОРУУЛАЛТЫН МЕНЕЖМЕНТИЙН ҮЙЛ АЖИЛЛАГАА ЭРХЛЭХ ТУСГАЙ ЗӨВШӨӨРЛИЙН ЖУРАМ" БАТЛАХ ТУХАЙ

Санхүүгийн зохицуулах хорооны эрх зүйн байдлын тухай хуулийн 6 дугаар зүйлийн 6.1.2, 6.2.2, Үнэт цаасны зах зээлийн тухай хуулийн 38 дугаар зүйлийн 38.9, 62 дугаар зүйлийн 62.2, 63 дугаар зүйлийн 63.1.2, Хөрөнгө оруулалтын сангийн тухай хуулийн 55 дугаар зүйлийн 55.1.2 дахь заалтыг тус тус үндэслэн ТОГТООХ нь:

1."Хөрөнгө оруулалтын менежментийн үйл ажиллагаа эрхлэх тусгай зөвшөөрлийн журам"-ыг хавсралтаар баталсугай.

2.Энэ тогтоолын 1-д заасан журмыг баталсантай холбогдуулан өөрийн байгууллагын холбогдох дүрэм, журамд зохих өөрчлөлтийг оруулж, 2022 оны 10 дугаар сарын 25-ны өдрийн дотор Санхүүгийн зохицуулах хороогоор батламжлуулахыг "Монголын хөрөнгийн бирж" ХК /Х.Алтай/, "Улаанбаатар үнэт цаасны бирж" ХК /Ж.Золзаяа/, "Үнэт цаасны төвлөрсөн хадгаламжийн төв" ХХК /Ш.Лхагва/, "Монголын үнэт цаасны клирингийн төв" ХХК /О.Эрдэнэгэрэл/, журмын хэрэгжилтийг хангаж, мөрдөн ажиллахыг нийт зохицуулалттай этгээдэд тус тус үүрэг болгосугай.

3.Тогтоолын 1-д заасан журмыг 2022 оны 10 дугаар сарын 25-ны өдрөөс эхлэн дагаж мөрдсүгэй.

4.Тогтоолын 1-д заасан журмын 2.1.1 дэх заалтыг 2023 оны 2 дугаар сарын 01-ний өдрөөс эхлэн дагаж мөрдсүгэй.

5.Тогтоолын 1-д заасан журам хүчин төгөлдөр мөрдөгдөж эхэлсэн өдрөөс Санхүүгийн зохицуулах хорооны 2014 оны 8, 2016 оны 199 дүгээр тогтоолыг тус тус хүчингүй болсонд тооцсугай.

6.Тогтоолын хэрэгжилтэд хяналт тавьж, олон нийтэд мэдээлэхийг Ажлын алба /Т.Жамбаажамц/-нд даалгасугай.

ДАРГА Д.БАЯРСАЙХАН