МОНГОЛ УЛСЫН ЗАСГИЙН ГАЗРЫН ТОГТООЛ

2022 оны 12 дугаар сарын 7-ны өдөр

Дугаар 443

Улаанбаатар хот

ТОГТООЛЫН ХАВСРАЛТАД НЭМЭЛТ, ӨӨРЧЛӨЛТ ОРУУЛАХ ТУХАЙ

Монгол Улсын Засгийн газрын тухай хуулийн 30 дугаар зүйлийн 1 дэх хэсэг, Аялал жуулчлалын тухай хуулийн 15.3-т заасныг тус тус үндэслэн Монгол Улсын Засгийн газраас ТОГТООХ нь:

1. "Засгийн газрын үндэсний хороо, комисс, үндэсний зөвлөлийн бүрэлдэхүүнийг шинэчлэн батлах тухай" Засгийн газрын 2022 оны 9 дүгээр сарын 22-ны өдрийн 350 дугаар тогтоолын 27 дугаар хавсралтаар баталсан "Аялал жуулчлалыг хөгжүүлэх үндэсний хорооны бүрэлдэхүүн"-ий "Гишүүд:" хэсэгт "Монгол Улсын сайд, Засгийн газрын Хэрэг эрхлэх газрын дарга;" гэсний өмнө "Монгол Улсын Шадар сайд;" гэж, "Зам, тээврийн хөгжлийн сайд;" гэсний дараа "Соёлын сайд;", "Хүнс, хөдөө аж ахуй, хөнгөн үйлдвэрийн сайд;" гэж, мөн "Нарийн бичгийн дарга:" хэсэгт "Байгаль орчин, аялал жуулчлалын яамны Төрийн нарийн бичгийн дарга." гэж тус тус нэмсүгэй.

2. Мөн хавсралтын "Нарийн бичгийн дарга:" хэсэгт "Соёлын сайд;" гэснийг "Соёлын яамны Төрийн нарийн бичгийн дарга;" гэж, "Гадаад харилцааны яамны Гадаад сурталчилгаа, соёлын харилцааны газрын захирал." гэснийг "Гадаад харилцааны яамны Төрийн нарийн бичгийн дарга." гэж тус тус өөрчилсүгэй.

Монгол Улсын Ерөнхий сайд Л.ОЮУН-ЭРДЭНЭ

Байгаль орчин, аялал жуулчлалын сайд Б.БАТ-ЭРДЭНЭ