МОНГОЛ УЛСЫН ЗАСГИЙН ГАЗРЫН ТОГТООЛ

2022 оны 11 дүгээр сарын 30-ны өдөр

Дугаар 427

Улаанбаатар хот

ДҮРЭМД НЭМЭЛТ, ӨӨРЧЛӨЛТ ОРУУЛАХ ТУХАЙ

Монгол Улсын Засгийн газрын тухай хуулийн 30 дугаар зүйлийн 1 дэх хэсэг, Төрийн болон орон нутгийн өмчийн тухай хуулийн 9 дүгээр зүйлийн 2, 5 дахь хэсэгт заасныг тус тус үндэслэн Монгол Улсын Засгийн газраас ТОГТООХ нь:

1.Засгийн газрын 2019 оны 3 дугаар сарын 21-ний өдрийн 102 дугаар тогтоолоор баталсан "Эрдэнэт үйлдвэр" төрийн өмчит үйлдвэрийн газрын дүрэм (цаашид "дүрэм" гэх)-д дор дурдсан агуулгатай 4.3, 4,4, 4.5, 4.6 дахь заалтыг тус тус нэмсүгэй:

"4.3.Үйлдвэрийн газар нь "Эрдэнэс Монгол" ХХК-ийн нэгдлийн харьяанд байна.

4.4.Төрийн өмчийн бодлого, зохицуулалтын асуудал эрхэлсэн төрийн захиргааны байгууллага нь Төрийн болон орон нутгийн өмчийн тухай хууль, бусад хууль, энэ дүрэмд заасны дагуу үйлдвэрийн газрын талаар шийдвэр гаргахдаа "Эрдэнэс Монгол" ХХК-ийн саналыг авч тусгасан байна.

4.5."Эрдэнэс Монгол" ХХК дараахь эрх хэмжээг хэрэгжүүлнэ:

4.5.1.үйлдвэрийн газрын стратеги болон үйл ажиллагааны бизнес төлөвлөгөө, хөгжлийн бодлого, төлөвлөлтийг нэгдлийн нэгдсэн бодлого, төлөвлөлттэй уялдуулан батлах;

4.5.2.үйлдвэрийн газрын зохион байгуулалтын бүтцийг төрийн өмчийн бодлого, зохицуулалтын асуудал эрхэлсэн төрийн захиргааны байгууллагын баталсан жагсаалт, орон тооны нормативд нийцүүлэн батлах;

4.5.3.тухайн жилийн бизнес төлөвлөгөө, эдийн засгийн үндсэн үзүүлэлт, зорилтот түвшин, хөрөнгө оруулалтын төлөвлөгөө, төсвийг батлах;

4.5.4.үйлдвэрийн газрын үйл ажиллагааг нэгдлийн охин, хараат компани болон харьяа хуулийн этгээд, төслийн нэгжийн үйл ажиллагаатай уялдуулах замаар зардал хэмнэж, өрсөлдөх чадвар, ашигт ажиллагааг нэмэгдүүлэх;

4.5.5.үйлдвэрийн газрын үйл ажиллагааг нэгдлийн хөгжлийн нэгдсэн бодлого, стратегид нийцүүлэн уялдаа зохицуулалтаар хангах, шаардлагатай тохиолдолд хяналт шалгалт хийж холбогдох арга хэмжээг авч хэрэгжүүлэх, үр дүнг Засгийн газарт хүргүүлж, тайлагнах.

4.6."Эрдэнэс Монгол" ХХК нь үйлдвэрийн газартай менежментийн гэрээ байгуулж, дүгнэнэ. Менежментийн гэрээний төлбөрийн хэмжээг "Эрдэнэс Монгол" ХХК-ийн дүрэмд заасны дагуу тогтооно."

2.Дүрмийн 10.2 дахь заалтын "Төрийн болон орон нутгийн өмчийн тухай хууль," гэсний дараа "Эрдэнэс Монгол" ХХК-ийн дүрэм болон" гэж нэмсүгэй.

3.Дүрмийн 6.2, 6.6 дахь заалтыг дор дурдсанаар өөрчлөн найруулсугай:

"6.2.Төрийн өмчийн бодлого, зохицуулалтын асуудал эрхэлсэн төрийн захиргааны байгууллага үйлдвэрийн газрын Ерөнхий захирлыг нээлттэй сонгон шалгаруулалт зарлаж, хамгийн өндөр оноо авсан нэр дэвшигчийг "Эрдэнэс Монгол" ХХК-ийн саналыг авч Засгийн газрын хуралдаанд танилцуулж, зөвшөөрөл авсны үндсэн дээр томилж, чөлөөлнө.

6.6."Эрдэнэс Монгол" ХХК нь төрийн өмчийн бодлого, зохицуулалтын асуудал эрхэлсэн төрийн захиргааны байгууллагаас томилсон Ерөнхий захиралтай Хөдөлмөрийн тухай хуульд заасан онцгой нөхцөл бүхий хөдөлмөрийн гэрээ байгуулан ажиллах бөгөөд гэрээ дүгнэх, урамшуулал олгох асуудлыг төрийн өмчийн бодлого, зохицуулалтын асуудал эрхэлсэн төрийн захиргааны байгууллагаас баталсан "Төрийн өмчит үйлдвэрийн газар, төрийн өмчит компанийн захиралтай контракт байгуулах, дүгнэх" журмаар зохицуулна."

4.Дүрмийн Дөрөв дэх хэсгийн гарчгийг "Дөрөв. Үйлдвэрийн газрын удирдлага, эд хөрөнгийн эрх, үүрэг" гэж, 4.2 дахь заалтын "хөрөнгө оруулалт хийх эрхтэй" гэснийг "хөрөнгө оруулалт хийх саналаа "Эрдэнэс Монгол" ХХК-д танилцуулж шийдвэрлүүлнэ." гэж, Зургаа дахь хэсгийн гарчгийн "удирдлага" гэснийг "үйл ажиллагаа" гэж, 6.10.4 дэх дэд заалтын "төрийн өмчийн бодлого, зохицуулалтын асуудал эрхэлсэн төрийн захиргааны байгууллагаар" гэснийг ""Эрдэнэс Монгол" ХХК-аар" гэж, 6.11.4, 6.12 дахь дэд заалтын "төрийн өмчийн бодлого, зохицуулалтын асуудал эрхэлсэн төрийн захиргааны байгууллагаас" гэснийг ""Эрдэнэс Монгол" ХХК-аас" гэж, 7.4 дэх заалтын "төрийн өмчийн бодлого, зохицуулалтын асуудал эрхэлсэн төрийн захиргааны байгууллагад" гэснийг "төрийн өмчийн бодлого, зохицуулалтын асуудал эрхэлсэн төрийн захиргааны байгууллага болон "Эрдэнэс Монгол" ХХК-д" гэж тус тус өөрчилсүгэй.                           

5.Дүрмийн 5 дахь заалтыг хүчингүй болсонд тооцсугай.

6."Эрдэнэт үйлдвэр" төрийн өмчит үйлдвэрийн газрын дүрэмд оруулсан нэмэлт, өөрчлөлтийг улсын бүртгэлд бүртгүүлэхийг Төрийн өмчийн бодлого, зохицуулалтын газар (Б.Цэнгэл), "Эрдэнэс Монгол" ХХК-ийн Төлөөлөн удирдах зөвлөл (Ш.Мөнхцэрэн)-д тус тус даалгасугай.

Монгол Улсын Ерөнхий сайд Л.ОЮУН-ЭРДЭНЭ

Монгол Улсын сайд, Засгийн газрын Хэрэг эрхлэх газрын дарга Д.АМАРБАЯСГАЛАН