ХӨВСГӨЛ АЙМГИЙН ТӨМӨРБУЛАГ СУМЫН ИРГЭДИЙН ТӨЛӨӨЛӨГЧДИЙН ХУРЛЫН ХУРАЛДААНЫ ТОГТООЛ

2023 оны 01 дүгээр сарын 25-ны өдөр

Дугаар 05

Төмөрбулаг сум

ТАТВАРЫН ХУВЬ ХЭМЖЭЭГ ШИНЭЧЛЭН ТОГТООХ ТУХАЙ

Монгол Улсын Засаг захиргаа нутаг дэвсгэрийн нэгж түүний удирдлагын тухай хуулийн 35 дугаар зүйлийн 35.1.10, 48 дугаар зүйлийн 48.1, 48.2, Малын тоо толгойн албан татварын тухай хуулийн 6 дугаар зүйлийн 6.2, Захиргааны ерөнхий хуулийн 49 дүгээр зүйлийн 49.5, 68 дугаар зүйлийн 68.1 дэх хэсгийг тус тус үндэслэн сумын иргэдийн Төлөөлөгчдийн Хурлын ээлжит бус XII хуралдаанаас ТОГТООХ нь:

1.Тус сумын малчин, мал бүхий этгээдийн малын тоо, толгойд ногдуулах албан татварын хувь хэмжээг 2023 оны 01 дүгээр сарын 01-ний өдрөөс эхлэн шинэчлэн тогтоож, ногдуулах албан татварын хувь хэмжээг хавсралт ёсоор баталсугай.

2.Малын тоо толгойн албан татвараас сумын төсөвт төвлөрүүлэх орлогыг Төсвийн тухай хуулийн 60 дугаар зүйлийн 60.2.8 дахь заалтад заасан арга хэмжээний зардалд хуваарилан санхүүжүүлэхийг сумын Төсвийн ерөнхийлөн захирагч бөгөөд сумын Засаг дарга, Санхүүгийн албаны дарга нарт үүрэг болгосугай.

3.Малын тоо толгойн татварын орлогыг хууль тогтоомжид заасны дагуу сумын орлогод төвлөрүүлэхийг Татварын улсын байцаагчид үүрэг болгосугай.

4.Энэхүү шийдвэр нь иргэд, аж ахуйн нэгж, байгууллага, олон нийтийн эрх ашиг сонирхлыг зөрчсөн гэж үзвэл баталсан өдрөөс 14 хоногийн хугацаанд зохих байгууллагад нь санал, гомдол гаргахыг иргэд, ААН, байгууллагад мэдэгдсүгэй.

5.Шийдвэрийг хууль зүйн асуудал эрхэлсэн төрийн захиргааны төв байгууллагад холбогдох хууль, журмаар тогтоосон хугацаанд хүргүүлэн хянуулж, захиргааны хэм хэмжээний актын улсын нэгдсэн бүртгэлд бүртгүүлэхийг иргэдийн Төлөөлөгчдийн Хурлын нарийн бичгийн дарга (Ц.Бямбадорж)-д даалгасугай.

6.Малын тоо толгойн албан татварын ногдуулалтын хувь хэмжээг шинэчлэн баталсан энэхүү тогтоолыг захиргааны хэм хэмжээний актын улсын нэгдсэн бүртгэлд бүртгэгдэж, "Захиргааны хэм хэмжээний актын эмхэтгэл"-д нийтэлсний дараа дагаж мөрдсүгэй.

7.Тогтоолын хэрэгжилт үр дүнг тооцож, биелэлтийг сумын иргэдийн Төлөөлөгчдийн Хуралд танилцуулж байхыг Засаг даргын Тамгын газрын дарга (Г.Нямханд)-д, хэрэгжилтэд хяналт тавьж ажиллахыг иргэдийн Төлөөлөгчдийн Хурлын нарийн бичгийн дарга (Ц.Бямбадорж)-д үүрэг даалгасугай.

8.Энэхүү тогтоолыг батлагдсантай холбогдуулан сумын иргэдийн Төлөөлөгчдийн Хурлын 2022 оны 03 дугаар сарын 31-ний өдрийн ээлжит 07 дугаар хуралдааны "Татварын хувь хэмжээг шинэчлэн тогтоох тухай" 06 дугаар тогтоолыг хүчингүйд тооцсоныг бүртгэн, захиргааны хэм хэмжээний актын улсын нэгдсэн бүртгэлд хөдөлгөөн хийж, "Захиргааны хэм хэмжээний актын эмхэтгэл-д нийтлэхийг Хууль зүйн асуудал эрхэлсэн төрийн захиргааны төв байгууллагад хүсэлт болгосугай.

ДАРГА Т.ЭРДЭНЭБАТ