МОНГОЛ УЛСЫН ЗАСГИЙН ГАЗРЫН ТОГТООЛ

2023 оны 08 сарын 16 өдөр

Дугаар 300

Улаанбаатар хот

ТӨРИЙН ӨМЧИЙН ОРОЛЦООТОЙ ХУУЛИЙН ЭТГЭЭД БАЙГУУЛАХ ТУХАЙ

Төрийн болон орон нутгийн өмчийн тухай хуулийн 9 дүгээр зүйлийн 5, 6 дахь заалт, Төмөр замын тээврийн тухай хуулийн 6.2, Концессын тухай хуулийн 6.1.2, 6.2.12, 17.1.1-д заасныг тус тус үндэслэн Монгол Улсын Засгийн газраас ТОГТООХ нь:

1."Монголын төмөр зам" ТӨХК-ийн оролцоотой, Сайншанд-Баруун-Урт-Хөөт чиглэлийн төмөр замын төслийг хэрэгжүүлэх тусгай зориулалтын "Сайншанд-Баруун-Урт-Хөөт төмөр зам" ХХК-ийг байгуулсугай.

2.Энэ тогтоолын 1-д заасан компанийн дүрмийг баталж, мөрдүүлэхийг "Монголын төмөр зам" ТӨХК (Б.Отгонсүх)-д даалгасугай.

3."Сайншанд-Баруун-Урт-Хөөт төмөр зам" ХХК-д хөрөнгө оруулж, хамтран ажиллах сонирхол бүхий гадаад, дотоодын хуулийн этгээдийг сонгох ажлыг зохион байгуулахыг Зам, тээврийн хөгжлийн сайд С.Бямбацогт, "Монголын төмөр зам" ТӨХК (Б.Отгонсүх)-д даалгасугай.

4.Энэ тогтоолын 1-д заасан компанитай холбогдох хууль тогтоомжид заасны дагуу шууд гэрээ байгуулах арга хэмжээ авахыг Зам, тээврийн хөгжлийн сайд С.Бямбацогт, Төрийн худалдан авах ажиллагааны газар (Ц.Батзул)-т даалгасугай.

5.Сайншанд-Баруун-Урт-Хөөт чиглэлийн төмөр замын төслийн хэрэгжилтийг зохион байгуулж, явц байдлыг Засгийн газрын хуралдаанд улирал тутам танилцуулж ажиллахыг Зам, тээврийн хөгжлийн сайд С.Бямбацогтод үүрэг болгосугай.

МОНГОЛ УЛСЫН ЕРӨНХИЙ САЙД Л.ОЮУН-ЭРДЭНЭ

ЗАМ, ТЭЭВРИЙН ХӨГЖЛИЙН САЙД С.БЯМБАЦОГТ