ЗАМ, ТЭЭВРИЙН САЙДЫН ТУШААЛ

2024 оны 12 дугаар сарын 16-ны өдөр

Дугаар А/272

Улаанбаатар хот

ШААРДЛАГА БАТЛАХ ТУХАЙ

Монгол Улсын Засгийн газрын тухай хуулийн 24 дүгээр зүйлийн 2 дахь хэсэг, Аж ахуйн нэгжийн орлогын албан татварын тухай хуулийн 22 дугаар зүйлийн 22.11 дэх хэсгийг тус тус үндэслэн ТУШААХ нь:

1.Аж ахуйн нэгжийн орлогын албан татварын тухай хуулийн 22 дугаар зүйлийн 22.9.4-д заасан "нийтийн эзэмшлийн зам, талбай, цэцэрлэгт хүрээлэн барьж байгуулах, ашиглах, хамгаалах, тохижуулах, цэцэрлэгжүүлэх, нийтийн тээврийн хөгжлийг дэмжих" хүрээнд албан татварын хөнгөлөлтөд хамрагдах бүтээн байгуулалт, төсөл, үйл ажиллагаанд тавигдах шаардлагыг нэгдүгээр, дагаж мөрдөх стандартын жагсаалтыг хоёрдугаар хавсралтаар тус тус баталсугай.

2.Тушаалын хэрэгжилтийг хангаж ажиллахыг Хяналт, шинжилгээ-үнэлгээ, дотоод аудитын газарт, татварын албатай тухай бүр мэдээлэл харилцан солилцож, хэрэгжилтэд хяналт тавьж ажиллахыг Санхүүгийн хэлтэст тус тус даалгасугай.

3.Тушаалын хавсралтаар баталсан албан татварын хөнгөлөлтөд хамрагдах бүтээн байгуулалт, төсөл үйл ажиллагаанд тавигдах шаардлага, стандартыг аж ахуйн нэгж, иргэдэд сурталчлан таниулж ажиллахыг Бодлого төлөвлөлтийн газарт үүрэг болгосугай.

4.Албан татварын хөнгөлөлтөд хамрагдсан аж ахуйн нэгж нь шаардлага, стандартыг хангаагүй нь тогтоогдсон тохиолдолд тухай бүр татварын албанд мэдэгдэж ажиллахыг Төрийн захиргааны удирдлагын газрын Санхүүгийн хэлтэст даалгасугай.

5.Албан татварын хөнгөлөлтөд хамрагдсан бүтээн байгуулалт, төсөл, үйл ажиллагааны статистик мэдээллийг нэгтгэн хагас жил тутам тайлагнаж ажиллахыг Бодлого төлөвлөлтийн газарт үүрэг болгосугай.

6.Энэ тушаалыг 2024 оны 12 дугаар сарын 20-ны өдрөөс 2035 оны 01 дүгээр сарын 01-ний өдрийг хүртэл дагаж мөрдсүгэй.

САЙД Б.ДЭЛГЭРСАЙХАН