ГЭР БҮЛ, ХӨДӨЛМӨР, НИЙГМИЙН ХАМГААЛЛЫН САЙДЫН ТУШААЛ

2024 оны 12 дугаар сарын 12-ны өдөр

Дугаар А/67

Улаанбаатар хот

ШААРДЛАГА БАТЛАХ ТУХАЙ

Монгол Улсын Засгийн газрын тухай хуулийн 24 дүгээр зүйлийн 2 дахь хэсэг, Аж ахуйн нэгжийн орлогын албан татварын тухай хуулийн 22 дугаар зүйлийн 22.9.2 дахь заалт, мөн зүйлийн 22.11 дэх хэсгийг тус тус үндэслэн ТУШААХ нь:

1.Аж ахуйн нэгжийн орлогын албан татварын тухай хуулийн 22 дугаар зүйлийн 22.9.2-д заасан "ахмад настан, хөгжлийн бэрхшээлтэй иргэн, хүүхдийн асрамжийн үйлчилгээ, тэдгээрийн эрхийг хангах, хамгаалах, хөгжлийн бэрхшээлтэй иргэдэд зориулсан тохируулгат орчин бүрдүүлэх, хүүхдийн тоглоомын талбай, зуслан, цэцэрлэгт хүрээлэн барьж байгуулах, ашиглах" хүрээнд албан татварын хөнгөлөлтөд хамрагдах бүтээн байгуулалт, төсөл, үйл ажиллагаанд тавигдах шаардлагыг хавсралтаар баталсугай.

2.Татварын албатай тухай бүр мэдээлэл харилцан солилцож, гүйцэтгэл, үр дүнг хариуцан ажиллахыг Эдийн засаг, санхүү, төсөв, хөрөнгө оруулалтын газар (Ж.Энхтөр)-т даалгасугай.

3.Тушаалын хавсралтаар баталсан албан татварын хөнгөлөлтөд хамрагдах бүтээн байгуулалт, төсөл, үйл ажиллагаанд тавигдах шаардлага, стандартыг олон нийтэд сурталчлан таниулж ажиллахыг Төрийн захиргааны удирдлагын газар (В.Түвшинжаргал)-т үүрэг болгосугай.

4.Албан татварын хөнгөлөлтөд хамрагдсан аж ахуйн нэгж нь шаардлага, стандартыг хангаагүй нь тогтоогдсон тохиолдолд энэ талаар тухай бүр татварын албанд мэдэгдэж ажиллахыг Гэр бүлийн бодлогын газар (М.Цогтбаатар) болон харьяа газар, байгууллагын дарга нарт тус тус үүрэг болгосугай.

5.Албан татварын хөнгөлөлтөд хамрагдсан бүтээн байгуулалт, төсөл, үйл ажиллагааны статистик мэдээллийг нэгтгэн хагас жил тутам тайлагнаж ажиллахыг Цахимжилт, их өгөгдлийн бодлогын газар (Н.Мөнхсанчир)-т үүрэг болгосугай.

6.Тушаалын хэрэгжилтэд хяналт тавьж, нэгдсэн удирдлага, зохион байгуулалтаар хангаж ажиллахыг Төрийн нарийн бичгийн дарга (Л.Мөнхзул)-д даалгасугай.

7.Энэ тушаалыг захиргааны хэм хэмжээний актын улсын нэгдсэн бүртгэлд бүртгүүлэн, "Захиргааны хэм хэмжээний актын эмхэтгэл"-д нийтэлсэн өдрөөс 2035 оны 01 дүгээр сарын 01-ний өдрийг хүртэл дагаж мөрдсүгэй.

САЙД Л.ЭНХ-АМГАЛАН