МОНГОЛ УЛСЫН ЗАСГИЙН ГАЗРЫН ТОГТООЛ

2025 оны 03 сарын 19 өдөр

Дугаар 133

Улаанбаатар хот

АГААРЫН БОХИРДЛЫГ БУУРУУЛАХ ТАЛААР АВАХ ЗАРИМ АРГА ХЭМЖЭЭНИЙ ТУХАЙ

Монгол Улсын Засгийн газрын тухай хуулийн 20 дугаар зүйлийн 5 дахь хэсэг, 30 дугаар зүйлийн 1 дэх хэсэг, Агаарын тухай хуулийн 6.1.7, 6.1.10, 13.2.3-т заасныг тус тус үндэслэн Монгол Улсын Засгийн газраас ТОГТООХ нь:

1.Нийслэлийн агаарын чанарыг сайжруулах бүсийн айл өрхүүдийн халаалтыг цахилгаан болон бүх төрлийн хийн түлшинд шилжүүлэх зорилтын хүрээнд ногоон бүсийн айл өрхүүдийн гэр, амины орон сууцны дулаалга, хатуу түлшний хэрэглээнд хяналт тавих Засгийн газрын гишүүдийн хуваарийг хавсралт ёсоор баталсугай.

2.Энэ тогтоолын хавсралтад заасан байршилд хэрэгжүүлэх ажлын төлөвлөгөөг баталж, хэрэгжилтэд хяналт тавьж ажиллахыг Байгаль орчин, уур амьсгалын өөрчлөлтийн сайд бөгөөд Агаарын бохирдлыг бууруулах үндэсний хорооны дарга С.Одонтуяа, Хот байгуулалт, барилга, орон сууцжуулалтын сайд Ж.Батсуурь нарт, төлөвлөгөөний биелэлтийг 2025 оны III улиралд багтаан хангахыг Засгийн газрын гишүүд, Нийслэлийн Засаг дарга бөгөөд Улаанбаатар хотын Захирагч Х.Нямбаатар нарт тус тус үүрэг болгосугай.

3.Нийслэлийн агаарын чанарыг сайжруулах бүсийн айл өрхүүдийн халаалтыг цахилгаан болон бүх төрлийн хийн түлшинд шилжүүлэхтэй холбоотой дараах арга хэмжээ авч хэрэгжүүлэхийг Засгийн газрын холбогдох гишүүд, албан тушаалтанд даалгасугай:

3.1.нийслэл Улаанбаатар хотын агаарын бохирдлыг бууруулах хүрээнд гэр, амины орон сууц дулаалах, цахилгаан, хийн халаагуур болон бусад дэвшилтэт технологийн шийдлээр гэр, амины орон сууцаа халаах айл өрхүүдэд, жилийн 4 улиралд жуулчин хүлээн авах үйл ажиллагаа явуулж байгаа аж ахуйн нэгжүүдэд хөнгөлөлттэй нөхцөлөөр ногоон зээл олгох хүртээмжийг нэмэгдүүлэх асуудлыг банк, санхүүгийн байгууллагатай хамтран шийдвэрлэх арга хэмжээ авахыг Байгаль орчин, уур амьсгалын өөрчлөлтийн сайд С.Одонтуяа, Сангийн сайд Б.Жавхлан, Соёл, спорт, аялал жуулчлал, залуучуудын сайд Номин нарт;

3.2.эрчим хүчний хэмнэлттэй ногоон орон сууц, барилгын дулааныг эргүүлэн ашиглах пассив стандартыг нэвтрүүлж мөрдөх зорилтын хүрээнд 2026 оны төсвийн төлөвлөлтөд холбогдох шаардлагыг тусгахыг Сангийн сайд Б.Жавхлан, Хот байгуулалт, барилга, орон сууцжуулалтын сайд Ж.Батсуурь, Боловсролын сайд П.Наранбаяр, Байгаль орчин, уур амьсгалын өөрчлөлтийн сайд С.Одонтуяад нарт;

3.3.иргэдийн эзэмшил, өмчлөлд байгаа газрыг барьцаалах журмаар гэр, амины орон сууц дулаалахад зориулсан зээл олгох нөхцөл, боломжийг судалж хэрэгжүүлэхийг Сангийн сайд Б.Жавхлан, Байгаль орчин, уур амьсгалын өөрчлөлтийн сайд С.Одонтуяа, Гэр бүл, хөдөлмөр, нийгмийн хамгааллын сайд Л.Энх-Амгалан нарт;

3.4. Нийслэл Улаанбаатар хотын хүн амын төвлөрлийг сааруулах, хөдөө орон нутагт шилжин суурьших үйл явцыг дэмжих арга хэмжээний саналыг агаарын бохирдлыг бууруулах асуудалтай уялдуулан боловсруулах, энэ хүрээнд хөдөө орон нутагт ерөнхий боловсролын сургуулийн хүртээмж, чанарыг сайжруулахад шаардлагатай арга хэмжээг судалж танилцуулахыг Хүнс, хөдөө аж ахуй, хөнгөн үйлдвэрийн сайд Ж.Энхбаяр, Боловсролын сайд П.Наранбаяр нарт;

3.5.хийн түлшний болон цахилгаан халаагуур, бусад дэвшилтэт технологийн шийдэл нэвтрүүлсэн айл өрхийн гишүүдийг хувь хүний орлогын албан татвараас чөлөөлөх, хууль тогтоомжийн хүрээнд бусад дэмжлэгт хамруулах асуудлыг судалж танилцуулахыг Сангийн сайд Б.Жавхлан, Гэр бүл, хөдөлмөр, нийгмийн хамгааллын сайд Л.Энх-Амгалан нарт;

3.6.олон нийтэд ойлгомжтой, хүртээмжтэй байдлаар цахилгаан, хийн халаагуурыг ашиглах аюулгүй байдлын зааварчилгааг сурталчлан таниулах ажлыг зохион байгуулж, тээвэрлэлт, хадгалалтын аюулгүй ажиллагааны горим, стандартыг мөрдүүлэх арга хэмжээ авч ажиллахыг Монгол Улсын Шадар сайд С.Амарсайхан, Аж үйлдвэр, эрдэс баялгийн сайд Ц.Туваан, Зам, тээврийн сайд Б.Дэлгэрсайхан, Байгаль орчин, уур амьсгалын өөрчлөлтийн сайд С.Одонтуяа, Батлан хамгаалахын сайд С.Бямбацогт, Эрчим хүчний сайд Б.Чойжилсүрэн, Нийслэлийн Засаг дарга бөгөөд Улаанбаатар хотын Захирагч Х.Нямбаатар нарт;

3.7.эрчим хүчний хэмнэлттэй ногоон орон сууцны пассив стандарт, хийн түлшний болон цахилгаан халаагуур, бусад дэвшилтэт технологийн шийдлийг хэрэглэх талаар олон нийтэд мэдээлэл хүргэх, сурталчлан таниулах арга хэмжээ зохион байгуулж, үр дүн тооцож ажиллахыг Монгол Улсын сайд, Засгийн газрын Хэрэг эрхлэх газрын дарга Н.Учрал, Цахим хөгжил, инновац, харилцаа холбооны сайд Ц.Баатархүү, Байгаль орчин, уур амьсгалын өөрчлөлтийн сайд С.Одонтуяа, Хот байгуулалт, барилга, орон сууцжуулалтын сайд Ж.Батсуурь, Эрчим хүчний сайд Б.Чойжилсүрэн нарт;

3.8.бүх төрлийн шатдаг хийн байгууламж, шугам хоолой, тоног төхөөрөмжийг угсрах, холбох, суурилуулах, тэдгээрийн засвар үйлчилгээний чиглэлээр мэргэжлийн ажилтан бэлтгэх ажлыг зохион байгуулж, ажил, мэргэжлийн үндэсний ангилал, тодорхойлолтод холбогдох мэргэжлийг тусгаж, мөрдүүлэх талаар шуурхай арга хэмжээ авч ажиллахыг Гэр бүл, хөдөлмөр, нийгмийн хамгааллын сайд Л.Энх-Амгалан, Боловсролын сайд П.Наранбаяр нарт;

3.9.хийн түлшний болон цахилгаан халаагуурт 2025 оноос эхлэн шилжиж байгаатай холбогдуулан стандарт, норм дүрмийг шинээр баталж, мөрдүүлэх, дэвшилтэт технологи нэвтрүүлэх яаралтай хэрэгцээ, шаардлагыг үндэслэн худалдан авалтыг холбогдох хууль тогтоомжийн хүрээнд шуурхай зохион байгуулж ажиллахыг Хот байгуулалт, барилга, орон сууцжуулалтын сайд Ж.Батсуурь, Байгаль орчин, уур амьсгалын өөрчлөлтийн сайд С.Одонтуяа, Нийслэлийн Засаг дарга бөгөөд Улаанбаатар хотын Захирагч Х.Нямбаатар нарт;

3.10.энэ тогтоолын 1-д заасан үйл ажиллагааны хүрээнд Засгийн газрын гишүүдэд дэмжлэг үзүүлэх зорилгоор нутгийн захиргааны болон холбогдох мэргэжлийн байгууллагын үүргийг хуваарилан, удирдлагаар хангаж ажиллахыг Нийслэлийн Засаг дарга бөгөөд Улаанбаатар хотын Захирагч Х.Нямбаатарт.

4.Агаарын бохирдлыг бууруулах хүрээнд зохиомлоор салхи үүсгэх техник, технологийн шийдэл ашиглах боломжийг судалж, хэрэгжүүлэх арга хэмжээ авахыг Монгол Улсын Шадар сайд С.Амарсайхан, Батлан хамгаалахын сайд С.Бямбацогт, Байгаль орчин, уур амьсгалын өөрчлөлтийн сайд С.Одонтуяа, Онцгой байдлын ерөнхий газар (Г.Ариунбуян), Нийслэлийн Засаг дарга бөгөөд Улаанбаатар хотын Захирагч Х.Нямбаатар нарт даалгасугай.

5.Аж ахуйн нэгжийн орлогын албан татварын тухай хуулийн 22.9-д заасан татварын хөнгөлөлтөд агаарын бохирдлыг бууруулах зорилгоор гэр, амины орон сууцыг дулаалах, хийн түлшний болон цахилгаан халаагуур, бусад дэвшилтэт технологийн шийдлийг нэвтрүүлэх үйл ажиллагааг дэмжих зорилгоор олгосон санхүүгийн дэмжлэг, хандивыг хамааруулах талаар дотоод, гадаадын аж ахуйн нэгж, байгууллагад сурталчлан таниулах, уриалах арга хэмжээг төлөвлөн, зохион байгуулж ажиллахыг Байгаль орчин, уур амьсгалын өөрчлөлтийн сайд С.Одонтуяа, Сангийн сайд Б.Жавхлан, Гадаад харилцааны сайд Б.Батцэцэг, Нийслэлийн Засаг дарга бөгөөд Улаанбаатар хотын Захирагч Х.Нямбаатар нарт даалгасугай.

6.Энэ тогтоолд заасан агаарын бохирдлыг бууруулах арга хэмжээний хэрэгжилт, үр дүнг үнэлж, урамшуулах арга хэмжээ авч, үр дүнг танилцуулж ажиллахыг Монгол Улсын сайд, Засгийн газрын Хэрэг эрхлэх газрын дарга Н.Учрал, Монгол Улсын сайд, Хяналт, үнэлгээний Үндэсний хорооны дарга Э.Одбаяр, Нийслэлийн Засаг дарга бөгөөд Улаанбаатар хотын Захирагч Х.Нямбаатар нарт үүрэг болгосугай.

7.Тогтоолын хэрэгжилтэд хяналт тавьж ажиллахыг Монгол Улсын сайд, Засгийн газрын Хэрэг эрхлэх газрын дарга Н.Учрал, Монгол Улсын сайд, Хяналт, үнэлгээний Үндэсний хорооны дарга Э.Одбаяр нарт даалгасугай.

МОНГОЛ УЛСЫН ЕРӨНХИЙ САЙД Л.ОЮУН-ЭРДЭНЭ

МОНГОЛ УЛСЫН САЙД, ЗАСГИЙН ГАЗРЫН ХЭРЭГ ЭРХЛЭХ ГАЗРЫН ДАРГА Н.УЧРАЛ