ЭРҮҮЛ МЭНДИЙН ДААТГАЛЫН ҮНДЭСНИЙ ЗӨВЛӨЛИЙН ТОГТООЛ

2025 оны 3 дугаар сарын 17-ны өдөр

Дугаар 10

Улаанбаатар хот

ЖУРАМ, ТӨЛБӨРИЙН ХЭМЖЭЭ БАТЛАХ ТУХАЙ

Эрүүл мэндийн даатгалын тухай хуулийн 9 дүгээр зүйлийн 9.1.13 дахь заалт, 9 дүгээр зүйлийн 9.4 дэх хэсэг, 11 дүгээр зүйлийн 11.2 дахь хэсэг, 14 дүгээр зүйлийн 14.8.6, 14.9.8, 14.9.12 дахь заалт, Эрүүл мэндийн тухай хуулийн 35¹ зүйлийн 35¹.1, 35¹.3 дахь хэсгийг тус тус үндэслэн ТОГТООХ нь:

"Хорт хавдраас урьдчилан сэргийлэх, эрт илрүүлэх үзлэг, шинжилгээ, оношилгоонд зорилтот бүлгийн даатгуулагчийг хамруулах, төлбөрийг нь санхүүжүүлэх журам"-ыг нэгдүгээр, "Хорт хавдраас урьдчилан сэргийлэх, эрт илрүүлэх үзлэг, шинжилгээ, оношилгоонд зорилтот бүлгийн даатгуулагчийг хамруулах товлол, давтамж болон зардлын төлбөрийн хэмжээ"-г хоёрдугаар хавсралтаар тус тус баталсугай. Энэхүү тогтоол батлагдсантай холбогдуулан Эрүүл мэндийн яамны Төрийн нарийн бичгийн дарга (Д.Очирбат)-д ДААЛГАХ нь:

2.1. Даатгуулагчийг хорт хавдраас урьдчилан сэргийлэх, эрт илрүүлэх үзлэг, шинжилгээ, оношилгоонд хамруулах үйл ажиллагаанд оролцогч байгууллагууд болон тусламж, үйлчилгээ үзүүлэгч эрүүл мэндийн байгууллагуудад тогтоолыг танилцуулах, сурталчлах, нэгдсэн удирдлага, бодлогын зохицуулалтаар хангах, хяналт тавих, хамралтыг эрчимжүүлэх, хүртээмжийг сайжруулах ажлыг зохион байгуулах;

2.2. Даатгуулагчийг хорт хавдраас урьдчилан сэргийлэх, эрт илрүүлэх үзлэг, шинжилгээ, оношилгоонд хамруулахтай холбоотой нөөцийн бэлэн байдлыг хангах, эрүүл мэндийн байгууллагуудыг удирдлага, арга зүйгээр хангах;

2.3. Ходоод, улаан хоолой, бүдүүн, шулуун гэдэсний дурангийн оношилгоо, эмчилгээний тусламж, үйлчилгээ үзүүлэх эрүүл мэндийн байгууллагуудын дурангийн ариутгал, халдваргүйжүүлэлт болон бусад урьдчилан сэргийлэх, эрт илрүүлгийн тусламж, үйлчилгээнд хамаарах халдварын сэргийлэлтийн байдалд хяналт тавьж, дүгнэлт гаргах;

2.4. Даатгуулагчид хорт хавдраас урьдчилан сэргийлэх, эрт илрүүлэх үзлэг, шинжилгээ, оношилгоог үзүүлэх эрүүл мэндийн байгууллагуудын цахим бүртгэлийн системийг хөгжүүлж, холбогдох нэмэлт, өөрчлөлтийг оруулах, эрүүл мэндийн даатгалын цахим системд бодит цагийн горимоор холбох арга хэмжээг авч ажиллах;

2.5. Хорт хавдраас урьдчилан сэргийлэх, эрт илрүүлэх үзлэг, шинжилгээ, оношилгоонд хамрагдах зорилтот хүн амыг эрүүл мэндийн даатгалд хамруулах үйл ажиллагааг холбогдох төрийн захиргааны төв байгууллагууд болон нутгийн захиргааны байгууллагатай хамтран шийдвэрлэх;

2.6. Эрүүл мэндийн байгууллагуудын хорт хавдраас урьдчилан сэргийлэх, эрт илрүүлэх үзлэг, шинжилгээ, оношилгоонд шаардагдах чанартай, хямд үнэтэй эм, эмнэлгийн хэрэгслийг нэгдсэн худалдан авалтаар хангах үйл ажиллагааг үе шаттайгаар шийдвэрлэх;

2.7. Хорт хавдраас урьдчилан сэргийлэх, эрт илрүүлэх үзлэг, шинжилгээ, оношилгоонд ашиглагдах урвалж, оношлуурын өвөрмөц, мэдрэг чанарт үнэлгээ хийж, Эрүүл мэндийн даатгалын Үндэсний зөвлөлд танилцуулах.

Энэхүү тогтоол батлагдсантай холбогдуулан Эрүүл мэндийн даатгалын ерөнхий газар (С.Энхболд)-т ДААЛГАХ нь:

3.1. Даатгуулагчид хорт хавдраас урьдчилан сэргийлэх, эрт илрүүлэх үзлэг, шинжилгээ, оношилгооны тусламж, үйлчилгээ үзүүлэх чадамж бүхий эрүүл мэндийн байгууллагыг сонгох, гэрээ байгуулах, хэрэгжилтэд хяналт тавих;

3.2. Хорт хавдраас урьдчилан сэргийлэх, эрт илрүүлэх үзлэг, шинжилгээ, оношилгоонд хамрагдвал зохих зорилтот хүн амын дэлгэрэнгүй мэдээллийг өрх, сум, тосгоны эрүүл мэндийн төвүүдэд хүргүүлэх, даатгуулагчдад цахим урилга илгээх;

3.3. Эрүүл мэндийн даатгалын цахим программ хангамжид холбогдох нэмэлт өөрчлөлтийг оруулах;

3.4. Эрүүл мэндийн байгууллагуудаас үзүүлж буй хорт хавдраас урьдчилан сэргийлэх, эрт илрүүлэх үзлэг, шинжилгээ, оношилгоог холбогдох эрх зүйн хүрээнд худалдан авах, нэхэмжлэлийг бодит цагийн горимоор хүлээн авч, чанарын болон төлбөрийн хяналтыг үндэслэн санхүүжилтийг олгох;

3.5. Даатгуулагчид хорт хавдраас урьдчилан сэргийлэх, эрт илрүүлэх үзлэг, шинжилгээ, оношилгооны хэрэгжилт, төлбөрийн хэмжээ, үр ашгийн байдалд хагас, бүтэн жилээр үнэлгээ хийж, үр дүнг Эрүүл мэндийн даатгалын Үндэсний зөвлөлд танилцуулах;

4.Эрүүл мэндийн тусламж, үйлчилгээний хяналт, санхүүжилт, төлбөр тооцооны программ, цахим системд шаардлагатай нэмэлт хөгжүүлэлтийг хийж, бодит цагийн горимд бүрэн шилжүүлэх, иргэнд чанартай, хүртээмжтэй эрүүл мэндийн тусламж, үйлчилгээ үзүүлэхийг даатгалын байгууллагатай гэрээ бүхий эрүүл мэндийн байгууллагын дарга, захирал нарт үүрэг болгосугай.

5.Энэ тогтоол батлагдсантай холбогдуулан Эрүүл мэндийн даатгалын үндэсний зөвлөлийн 2025 оны 01 дүгээр сарын 23-ны өдрийн 05 дугаар тогтоолыг хүчингүй болсонд тооцсугай.

6.Энэхүү тогтоолын хэрэгжилтэд хяналт, шинжилгээ, үнэлгээ хийж ажиллахыг ажлын албаны дарга /Ц.Сарантуяа/-д даалгасугай.

ДАРГА Т.МӨНХСАЙХАН