МОНГОЛ УЛСЫН ЗАСГИЙН ГАЗРЫН ТОГТООЛ

2025 оны 05 сарын 12 өдөр

Дугаар 233

Улаанбаатар хот

ГОВИЙН БҮСИЙН ХӨГЖЛИЙГ ЭРЧИМЖҮҮЛЭХ ЧИГЛЭЛЭЭР АВАХ ЗАРИМ АРГА ХЭМЖЭЭНИЙ ТУХАЙ

Монгол Улсын Засгийн газрын тухай хуулийн 30 дугаар зүйлийн 1, Авто замын тухай хуулийн 9.1.3, Бүсчилсэн хөгжлийн удирдлага зохицуулалтын тухай хуулийн 12.1.1, 12.1.6, 12.1.8, 12.1.9, Ус цаг уур, орчны хяналт шинжилгээний тухай хуулийн 4.1.2, Төр, хувийн хэвшлийн түншлэлийн тухай хуулийн 7.3-т заасныг тус тус үндэслэн, Монгол Улсын бүсчилсэн хөгжлийн үзэл баримтлал, Монгол Улсын Засгийн газрын 2024-2028 оны үйл ажиллагааны хөтөлбөрт туссан Говийн бүсийн хөгжлийг эрчимжүүлэх зорилтын хэрэгжилтийг хангах зорилгоор Монгол Улсын Засгийн газраас ТОГТООХ нь:

1.Говийн бүсийн зөвлөлийн 2025 оны 05 дугаар сарын 12-ны өдрийн өргөтгөсөн хуралдаанаас гарсан саналын хүрээнд бүсийн хөгжлийг эрчимжүүлэх чиглэлээр дараах арга хэмжээ авч хэрэгжүүлэхийг Засгийн газрын холбогдох гишүүд, албан тушаалтанд үүрэг болгосугай:

1.1.Говийн бүсийн зам, эрчим хүч, инженерийн дэд бүтцийг хөгжүүлэх хүрээнд:

1.1.1.Чойр-Мандалговь-Арвайхээр чиглэлийн хатуу хучилттай авто замын төслийн үлдэгдэл санхүүжилт болон Даланзадгад-Гурвантэс чиглэлийн авто замыг гүйцээн барьж дуусгахад шаардлагатай санхүүжилтийн асуудлыг судалж, танилцуулахыг Зам, тээврийн сайд Б.Дэлгэрсайхан, Сангийн сайд Б.Жавхлан нарт;

1.1.2.Замын-Үүд-Сайншанд-Олон-Овоо чиглэлийн тусгай зориулалтын авто зам, Олон-Овоо-Хөшигийн хөндий чиглэлийн хатуу хучилттай авто замын техник, эдийн засгийн үндэслэл, зураг төслийг боловсруулж, Замын-Үүд-Сайншанд-Олон-Овоо чиглэлийн тусгай зориулалтын авто замын төслийг хувийн хэвшлийн хөрөнгө оруулалтаар, Олон-Овоо-Хөшигийн хөндий чиглэлийн хатуу хучилттай авто замын төслийг олон улсын санхүүгийн байгууллагын хөрөнгө оруулалтаар хэрэгжүүлэх асуудлыг судалж, танилцуулахыг Зам, тээврийн сайд Б.Дэлгэрсайхан, Монгол Улсын Тэргүүн Шадар сайд бөгөөд Эдийн засаг, хөгжлийн сайд Л.Гантөмөр, Сангийн сайд Б.Жавхлан нарт;

1.1.3.Даланзадгад-Мандалговь-Хөшигийн хөндий чиглэлийн авто замын төслийн бүтээн байгуулалтын ажлын санхүүжилтийн асуудлыг судалж, танилцуулахыг Зам, тээврийн сайд Б.Дэлгэрсайхан, Монгол Улсын Тэргүүн Шадар сайд бөгөөд Эдийн засаг, хөгжлийн сайд Л.Гантөмөр, Сангийн сайд Б.Жавхлан нарт;

1.1.4.Ханбогд-Манлай-Өлзийт-Мандалговь чиглэлийн авто замын техник, эдийн засгийн үндэслэл, зураг төсөл боловсруулах ажлын санхүүжилтийн асуудлыг судалж, шийдвэрлэхийг Зам, тээврийн сайд Б.Дэлгэрсайхан, Монгол Улсын Тэргүүн Шадар сайд бөгөөд Эдийн засаг, хөгжлийн сайд Л.Гантөмөр, Сангийн сайд Б.Жавхлан нарт;

1.1.5.Цогтцэций-Даланзадгад чиглэлийн төмөр замын төслийн техник, эдийн засгийн үндэслэл боловсруулах ажлын санхүүжилтийн асуудлыг судалж, танилцуулахыг Зам, тээврийн сайд Б.Дэлгэрсайхан, Монгол Улсын Тэргүүн Шадар сайд бөгөөд Эдийн засаг, хөгжлийн сайд Л.Гантөмөр, Сангийн сайд Б.Жавхлан нарт;

1.1.6.Говьсүмбэр аймгийн Баянтал суманд байрлах нисэхийн аэродромыг олон улсын агаарын ачаа тээврийн боомт болгон хөгжүүлэх зорилгоор "Иргэний нисэхийн үндэсний төв" ТӨХХК-д шилжүүлэх асуудлыг судалж, шийдвэрлүүлэхийг Батлан хамгаалахын сайд С.Бямбацогт, Зам, тээврийн сайд Б.Дэлгэрсайхан, Төрийн өмчийн бодлого, зохицуулалтын газар (Б.Цэнгэл)-т;

1.1.7.Говьсүмбэр, Дундговь аймагт баригдаж байгаа дулааны станцын төслийн дагалдах дэд бүтцийн хөрөнгө оруулалтын асуудлыг судалж, шийдвэрлэхийг Эрчим хүчний сайд Б.Чойжилсүрэн, Сангийн сайд Б.Жавхлан нарт;

1.1.8.Сайншанд-Цагаансуварга, Мандалговь-Арвайхээр чиглэлийн цахилгаан дамжуулах агаарын шугам, дэд станцын төслийн бэлтгэл ажлыг хангаж, шаардлагатай санхүүжилтийн асуудлыг судалж, танилцуулахыг Эрчим хүчний сайд Б.Чойжилсүрэн, Монгол Улсын Тэргүүн Шадар сайд бөгөөд Эдийн засаг, хөгжлийн сайд Л.Гантөмөр, Сангийн сайд Б.Жавхлан нарт;

1.1.9.Дорноговь аймгийн Сайншанд суманд 70 МВт хүчин чадал бүхий дулааны цахилгаан станц, Мандах суманд 100 МВт-ын хүчин чадал бүхий цахилгаан станцын төслийг хувийн хэвшлийн хөрөнгө оруулалтаар хэрэгжүүлэхэд холбогдох хууль тогтоомжийн хүрээнд дэмжлэг үзүүлж ажиллахыг Эрчим хүчний сайд Б.Чойжилсүрэн, Монгол Улсын Тэргүүн Шадар сайд бөгөөд Эдийн засаг, хөгжлийн сайд Л.Гантөмөр, Дорноговь аймгийн Засаг дарга О.Батжаргал нарт;

1.1.10.Дундговь аймгийн Сайнцагаан суманд хэрэгжүүлэх 100МВт-ын хүчин чадал бүхий салхин цахилгаан станцын төслийг 2025 онд багтаан эхлүүлэхийг Эрчим хүчний сайд Б.Чойжилсүрэнд;

1.1.11.Өмнөговь аймгийн Даланзадгад суманд хэрэгжүүлэх 50 МВт-ын дулааны цахилгаан станцын төслийн санхүүжилтийн эх үүсвэрийг орон нутгийн бонд гаргах замаар шийдвэрлэх санал боловсруулж, танилцуулахыг Эрчим хүчний сайд Б.Чойжилсүрэн, Сангийн сайд Б.Жавхлан, Өмнөговь аймгийн Засаг дарга Н.Энхбат нарт;

1.1.12.хүрэн нүүрсний ордод түшиглэн Говьсүмбэр, Дундговь аймагт хувийн хэвшлийн хөрөнгө оруулалтаар хэрэгжих уул уурхай, цахилгаан станц, баяжуулах үйлдвэр барих төслийн үйл ажиллагаанд холбогдох хууль тогтоомжийн хүрээнд дэмжлэг үзүүлж ажиллахыг Аж үйлдвэр, эрдэс баялгийн сайд Ц.Туваан, Эрчим хүчний сайд Б.Чойжилсүрэн, Говийн бүсийн зөвлөл (О.Батжаргал)-д;

1.1.13.Дорноговь аймгийн Сайншанд сумын төвийн инженерийн шугам сүлжээний өргөтгөл, шинэчлэлийн ажлын зураг төсөл болон Дорноговь аймгийн Айраг, Дундговь аймгийн Говь-Угтаал сумын инженерийн дэд бүтцийг шинээр байгуулах ажлын санхүүжилтийн асуудлыг судалж, танилцуулахыг Хот байгуулалт, барилга, орон сууцжуулалтын сайд Ж.Батсуурь, Говийн бүсийн зөвлөл (О.Батжаргал)-д.

1.2.Говийн бүсийн ногоон хөгжлийг дэмжих хүрээнд:

1.2.1.Шар шороон шуурганы нүүдлийг зогсоох, цөлжилттэй тэмцэх ажлын хэрэгжилт, цаашид авах арга хэмжээний саналыг Засгийн газрын хуралдаанд танилцуулахыг Байгаль орчин, уур амьсгалын өөрчлөлтийн сайд С.Одонтуяад;

1.2.2.Говийн бүсийг усжуулах төслийн техник, эдийн засгийн үндэслэлийг боловсруулахад шаардагдах зардлыг "Эрдэнэс Монгол" нэгдлээс санхүүжүүлэх боломжийг судалж, шийдвэрлэхийг Байгаль орчин, уур амьсгалын өөрчлөлтийн сайд С.Одонтуяа, Монгол Улсын Тэргүүн Шадар сайд бөгөөд Эдийн засаг, хөгжлийн сайд Л.Гантөмөр, Сангийн сайд Б.Жавхлан, "Эрдэнэс Монгол" ХХК (С.Наранцогт)-д;

1.2.3.Цөлжилттэй тэмцэх, орчны бохирдлыг бууруулах, байгалийн нөөцийн ашиглалтыг сайжруулах үйл ажиллагаанд өндөр технологи нэвтрүүлэх, иргэдийн оролцоо, хяналтыг нэмэгдүүлэх чиглэлээр авч хэрэгжүүлэх арга хэмжээний талаар санал боловсруулж, танилцуулахыг Байгаль орчин, уур амьсгалын өөрчлөлтийн сайд С.Одонтуяа, Монгол Улсын Тэргүүн Шадар сайд бөгөөд Эдийн засаг, хөгжлийн сайд Л.Гантөмөр, Монгол Улсын Шадар сайд С.Амарсайхан нарт;

1.2.4.Бүсийн агаар, ус, хөрсөн дэх олон төрлийн хорт органик нэгдэл, хүнд металлыг тодорхойлох, орчны бохирдлоос урьдчилан сэргийлэх, бууруулах, хамгаалах тогтолцоог бэхжүүлэх зорилгоор Өмнөговь аймгийн Ус, цаг уур, орчны шинжилгээний төвийн Байгаль орчны шинжилгээний лабораторийг Говийн бүсийн байгаль орчны шинжилгээний төв лаборатори болгон өргөжүүлэх асуудлыг судалж, шийдвэрлэхийг Байгаль орчин, уур амьсгалын өөрчлөлтийн сайд С.Одонтуяад.

1.3.Говийн бүсийн боловсрол, соёл, спортын салбарын бүтээн байгуулалтыг эрчимжүүлэх хүрээнд:

1.3.1.Дорноговь аймгийн Сайншанд суманд 150 хүүхдийн цэцэрлэгийн барилга, 960 хүүхдийн сургуулийн шинэ барилга, Дундговь аймгийн Сайнцагаан сумын Хүүхэд, залуучуудыг соён гэгээрүүлэх, соёлын өвийг сурталчлах төвийн барилга, Эрдэнэдалай суманд 640 хүүхдийн сургуулийн барилга барихад шаардлагатай санхүүжилтийн асуудлыг судалж, шийдвэрлэхийг Боловсролын сайд П.Наранбаяр, Сангийн сайд Б.Жавхлан нарт;

1.3.2.Шинжлэх ухаан, технологийн их сургуулийн Өмнөговь аймаг дахь Технологийн дээд сургуулийг түшиглэн "Сургалт-эрдэм шинжилгээ-үйлдвэрлэлийн цогцолбор" байгуулах төслийн бүтээн байгуулалтад шаардагдах болон Дорноговь аймаг дахь Мэргэжлийн сургалт, үйлдвэрлэлийн төвийн цогцолбор барилгын зураг төслийг боловсруулах, мөн аймгийн Политехник коллежийг уул уурхай, аж үйлдвэр, ногоон эрчим хүчний чиглэлээр төрөлжүүлж, салбар дундын дадлага, үйлдвэрлэлийн бааз байгуулахад шаардагдах хөрөнгийн асуудлыг судалж, шийдвэрлэхийг Боловсролын сайд П.Наранбаяр, Сангийн сайд Б.Жавхлан, Говийн бүсийн зөвлөл (О.Батжаргал)-д;

1.3.3.Анагаахын шинжлэх ухааны үндэсний их сургуулийн Дорноговь аймаг дахь салбар сургуулийн цогцолборын барилга, Дорноговь аймгийн Замын-Үүд сумын 960 хүүхдийн сургуулийн барилга болон Говьсүмбэр аймгийн Сүмбэр сумын ерөнхий боловсролын 1 дүгээр сургууль, 5, 6 дугаар цэцэрлэгийн өргөтгөлийг ашиглалтад оруулахад шаардагдах нэмэлт хөрөнгийн асуудлыг судалж, шийдвэрлэхийг Боловсролын сайд П.Наранбаяр, Сангийн сайд Б.Жавхлан нарт;

1.3.4.Говьсүмбэр аймгийн Сүмбэр, Дундговь аймгийн Сайнцагаан суманд баригдаж байгаа усан бассейн бүхий спорт цогцолборын барилга угсралтын ажилд шаардагдах нэмэлт хөрөнгийн асуудлыг судалж, шийдвэрлүүлэх, төслийг хэвийн үргэлжлүүлэхэд шаардлагатай арга хэмжээг шуурхай авч хэрэгжүүлэхийг Соёл, спорт, аялал жуулчлал, залуучуудын сайд Ч.Номин, Сангийн сайд Б.Жавхлан нарт.

2.Энэ тогтоолын хэрэгжилтэд хяналт тавьж ажиллахыг Монгол Улсын Шадар сайд С.Амарсайхан, Монгол Улсын сайд, Хяналт, үнэлгээний Үндэсний хорооны дарга Э.Одбаяр нарт үүрэг болгосугай.

МОНГОЛ УЛСЫН ЕРӨНХИЙ САЙД Л.ОЮУН-ЭРДЭНЭ

МОНГОЛ УЛСЫН ШАДАР САЙД С.АМАРСАЙХАН