МОНГОЛ УЛСЫН ЗАСГИЙН ГАЗРЫН ТОГТООЛ

2025 оны 05 сарын 12 өдөр

Дугаар 234

Улаанбаатар хот

ГОВИЙН БҮСИЙН ЭДИЙН ЗАСГИЙГ ТӨРӨЛЖҮҮЛЭН ХӨГЖҮҮЛЭХ ЧИГЛЭЛЭЭР АВАХ ЗАРИМ АРГА ХЭМЖЭЭНИЙ ТУХАЙ

Монгол Улсын Засгийн газрын тухай хуулийн 30 дугаар зүйлийн 1, Бүсчилсэн хөгжлийн удирдлага зохицуулалтын тухай хуулийн 12.1.1, 12.1.6, 12.1.8, 12.1.9-д заасныг тус тус үндэслэн Монгол Улсын бүсчилсэн хөгжлийн үзэл баримтлал, Монгол Улсын Засгийн газрын 2024-2028 оны үйл ажиллагааны хөтөлбөрт туссан Говийн бүсийн эдийн засгийн хөгжлийг дэмжих зорилтын хэрэгжилтийг хангах зорилгоор Монгол Улсын Засгийн газраас ТОГТООХ нь:

1.Говийн бүсийн эдийн засгийг төрөлжүүлэх, бүс дэх аймгуудын эдийн засгийн тогтвортой өсөлт, тэнцвэртэй хөгжлийг хангах чиглэлээр дараах арга хэмжээ авч хэрэгжүүлэхийг Засгийн газрын холбогдох гишүүд, албан тушаалтанд үүрэг болгосугай:

1.1.Говийн бүсийн тээвэр логистик, бүс дэх хилийн боомт, чөлөөт бүсийг хөгжүүлэх хүрээнд:

1.1.1.Говьсүмбэр аймгийн Сүмбэр сум (Чойр)-д тээвэр логистикийн төв, хуурай боомт байгуулах төслийн техник, эдийн засгийн үндэслэл, зураг төсөл боловсруулах ажлын санхүүжилтийн асуудлыг судалж, шийдвэрлэхийг Зам, тээврийн сайд Б.Дэлгэрсайхан, Монгол Улсын сайд, Боомтын сэргэлтийн Үндэсний хорооны дарга Б.Тулга, Монгол Улсын Тэргүүн Шадар сайд бөгөөд Эдийн засаг, хөгжлийн сайд Л.Гантөмөр, Сангийн сайд Б.Жавхлан, Говьсүмбэр аймгийн Засаг дарга Т.Бат-Эрдэнэ нарт;

1.1.2.Өмнөговь аймгийн Цогтцэций суманд эдийн засгийн чөлөөт бүс байгуулах асуудлыг судалж, танилцуулахыг Монгол Улсын Шадар сайд С.Амарсайхан, Өмнөговь аймгийн Засаг дарга Н.Энхбат нарт;

1.1.3."Монгол, Хятадын Замын-Үүд, Эрээний эдийн засгийн хамтын ажиллагааны бүс байгуулах тухай" Монгол Улсын Засгийн газар, Бүгд Найрамдах Хятад Ард Улсын Засгийн газар хоорондын хэлэлцээрийн хүрээнд "Замын-Үүд, Эрээний эдийн засгийн хамтын ажиллагааны бүсийг хамтран хөгжүүлэх ерөнхий төлөвлөгөө"-г уялдуулан боловсруулах болон бүсийг холбох чиглэлээр улсын хилийг огтлон гарах цэгийг харилцан баталгаажуулах чиглэлээр холбогдох арга хэмжээ авч, танилцуулахыг Монгол Улсын Шадар сайд С.Амарсайхан, Гадаад харилцааны сайд Б.Батцэцэг нарт;

1.1.4."Замын-Үүд" чөлөөт бүсэд барилгын материал, түүхий эдийн импортын хангамж, логистикийн төвийг байгуулах болон тус чөлөөт бүс чиглэлийн салбар төмөр замын төслийн техник, эдийн засгийн үндэслэл, зураг төсөл боловсруулах асуудлыг тус тус судалж, танилцуулахыг Монгол Улсын Шадар сайд С.Амарсайхан, Хот байгуулалт, барилга, орон сууцжуулалтын сайд Ж.Батсуурь, Зам, тээврийн сайд Б.Дэлгэрсайхан, Монгол Улсын Тэргүүн Шадар сайд бөгөөд Эдийн засаг, хөгжлийн сайд Л.Гантөмөр нарт;

1.1.5.Хилийн Шивээхүрэн, Ханги боомтын хэсэгчилсэн ерөнхий төлөвлөгөөний дагуу өргөтгөл, шинэчлэлийн ажлыг батлагдсан төсвийн хүрээнд эхлүүлж, хилийн боомтуудын нэвтрүүлэх хүчин чадлыг нэмэгдүүлэх ажлыг эрчимжүүлэхийг Монгол Улсын сайд, Боомтын сэргэлтийн Үндэсний хорооны дарга Б.Тулга, Сангийн сайд Б.Жавхлан, Говийн бүсийн зөвлөл (О.Батжаргал)-д;

1.1.6.Өмнөговь аймаг дахь хилийн боомтуудаар уул уурхайн бус бараа, бүтээгдэхүүн экспортлох, импортлох гарц бий болгох, олон улсын стандартын шаардлага хангасан лаборатори байгуулах асуудлыг судалж, танилцуулахыг Хүнс, хөдөө аж ахуй, хөнгөн үйлдвэрийн сайд Ж.Энхбаяр, Монгол Улсын Шадар сайд С.Амарсайхан, Монгол Улсын сайд, Боомтын сэргэлтийн Үндэсний хорооны дарга Б.Тулга, Гадаад харилцааны сайд Б.Батцэцэг, Говийн бүсийн зөвлөл (О.Батжаргал)-д;

1.1.7.Говийн бүс дэх хилийн боомтуудын цахилгаан эрчим хүчийг дотоодын эх үүсвэрээр хангах ажлыг зохион байгуулж, эрчимжүүлэхийг Эрчим хүчний сайд Б.Чойжилсүрэнд.

1.2.Говийн бүсийн үйлдвэрлэлийг эрчимжүүлэх хүрээнд:

1.2.1."Алтанширээт" үйлдвэрлэл, технологийн парк, "Гэрэлт говь" үйлдвэрлэл, технологийн паркийн үйлдвэрлэлд шаардагдах төмрийн хүдэр, коксжих нүүрс, жонш болон бусад уул уурхайн бүтээгдэхүүнийг дотоодын зах зээлээс нийлүүлэх боломжийн талаар судалж, танилцуулахыг Аж үйлдвэр, эрдэс баялгийн сайд Ц.Туваан, Монгол Улсын Тэргүүн Шадар сайд бөгөөд Эдийн засаг, хөгжлийн сайд Л.Гантөмөр, Сангийн сайд Б.Жавхлан нарт;

1.2.2.Говьсүмбэр аймгийн Баянтал суманд төр, хувийн хэвшлийн түншлэлийн хүрээнд хэрэгжүүлэх мал аж ахуйн үйлдвэрлэл, технологийн паркийн төслийн тээвэр логистик, дэд бүтцийн техник, эдийн засгийн үндэслэлийг боловсруулахад шаардагдах хөрөнгийн эх үүсвэрийн асуудлыг судалж, шийдвэрлэхийг Хүнс, хөдөө аж ахуй, хөнгөн үйлдвэрийн сайд Ж.Энхбаяр, Монгол Улсын Тэргүүн Шадар сайд бөгөөд Эдийн засаг, хөгжлийн сайд Л.Гантөмөр, Эрчим хүчний сайд Б.Чойжилсүрэн, Говьсүмбэр аймгийн Засаг дарга Т.Бат-Эрдэнэ нарт;

1.2.3.Дундговь аймгийн Сайнцагаан суманд хүнс, хөнгөн үйлдвэрийн үйлдвэрлэл, технологийн парк байгуулах техник, эдийн засгийн үндэслэлийг боловсруулахад шаардагдах хөрөнгийн эх үүсвэрийн асуудлыг судалж, шийдвэрлэхийг Хүнс, хөдөө аж ахуй, хөнгөн үйлдвэрийн сайд Ж.Энхбаяр, Монгол Улсын Тэргүүн Шадар сайд бөгөөд Эдийн засаг, хөгжлийн сайд Л.Гантөмөр, Сангийн сайд Б.Жавхлан нарт.

2.Энэ тогтоолын хэрэгжилтэд хяналт тавьж ажиллахыг Монгол Улсын Шадар сайд С.Амарсайхан, Монгол Улсын сайд, Хяналт, үнэлгээний Үндэсний хорооны дарга Э.Одбаяр нарт үүрэг болгосугай.

МОНГОЛ УЛСЫН ЕРӨНХИЙ САЙД Л.ОЮУН-ЭРДЭНЭ

МОНГОЛ УЛСЫН ШАДАР САЙД С.АМАРСАЙХАН

Хянасан:

МОНГОЛ УЛСЫН САЙД, ЗАСГИЙН ГАЗРЫН

ХЭРЭГ ЭРХЛЭХ ГАЗРЫН ДАРГА

Н.УЧРАЛ