МОНГОЛ УЛСЫН ЗАСГИЙН ГАЗРЫН ТОГТООЛ

2025 оны 07 сарын 30 өдөр

Дугаар 30

Улаанбаатар хот

ЭРЧИМ ХҮЧНИЙ САЛБАРЫН ТӨРИЙН ӨМЧИТ ЗАРИМ КОМПАНИЙН ТАЛААР АВАХ АРГА ХЭМЖЭЭНИЙ ТУХАЙ

Монгол Улсын Засгийн газрын тухай хуулийн 8 дугаар зүйлийн 7 дахь хэсэг, 30 дугаар зүйлийн 1 дэх хэсэг, Төрийн болон орон нутгийн өмчийн тухай хуулийн 9 дүгээр зүйлийн 5 дахь хэсэг, 21 дүгээр зүйлийн 2 дахь хэсгийн 3 дахь заалт, Компанийн тухай хуулийн 18 дугаар зүйлийн 18.1, 18.4 дэх хэсэг, 62 дугаар зүйлийн 62.1.2 дахь заалтыг тус тус үндэслэн Монгол Улсын Засгийн газраас ТОГТООХ нь:

1.Баруун бүсийн цахилгаан эрчим хүчний хангамжийн найдвартай байдлыг хангах зорилгоор "Баруун бүсийн эрчим хүчний систем" ХК, "Алтай-Улиастайн эрчим хүчний систем" ХК-ийг тус тус "Цахилгаан дамжуулах үндэсний сүлжээ" ХК-д нэгтгэсүгэй.

2.Увс аймгийн "Цахилгаан түгээх сүлжээ" ХХК, "Ховд цахилгаан түгээх сүлжээ" ХХК, "Дөргөний усан цахилгаан станц" ХХК-ийг нийлүүлэн "Баруун бүсийн цахилгаан түгээх сүлжээ" ХК-ийг, "Тайшир-Гуулингийн усан цахилгаан станц" ХХК, "Богдын голын усан цахилгаан станц" ХХК, "Тосонцэнгэлийн усан цахилгаан станц" ХХК-ийг нийлүүлэн "Тайшир ногоон эрчим" ХК-ийг, Говь-Алтай аймгийн цахилгаан түгээх сүлжээ, Завхан аймгийн цахилгаан түгээх салбарын үйл ажиллагаа, дизель станцуудыг хариуцсан "Алтай-Улиастайн цахилгаан түгээх сүлжээ" ХК-ийг тус тус байгуулсугай.

3.Ховд аймгийн Мянгад суман дахь нарны цахилгаан станцын үйл ажиллагааг "Баруун бүсийн цахилгаан түгээх сүлжээ" ХК-д, "Сэрвэн" нарны цахилгаан станц, "Хөвсгөл" нарны цахилгаан станцын үйл ажиллагааг "Тайшир ногоон эрчим" ХК-д тус тус хариуцуулсугай.

4."Баруун бүсийн цахилгаан түгээх сүлжээ" ХК, "Алтай-Улиастайн цахилгаан түгээх сүлжээ" ХК болон "Тайшир ногоон эрчим" ХК-ийн нийт хувьцааны 66 хувийн төлөөллийг эрчим хүчний асуудал эрхэлсэн төрийн захиргааны төв байгууллага, 34 хувийн төлөөллийг "Эрчист Монгол" ХХК тус тус хэрэгжүүлэхээр тогтоосугай.

5.Энэ тогтоолын 1, 2 дугаар зүйлд заасан компаниудтай холбогдуулан дараах арга хэмжээг авч хэрэгжүүлэхийг доор дурдсан байгууллага, албан тушаалтанд даалгасугай:

5.1.шинээр болон өөрчлөн байгуулагдсан компаниудын дүрмийг баталж, бүтэц, зохион байгуулалтыг оновчтой тогтоон, хэвийн ажиллах нөхцөл, бололцоог бүрдүүлэхийг Эрчим хүчний сайд Б.Чойжилсүрэн, "Эрчист Монгол" ХХК (Г.Амартүвшин)-д;

5.2.эд хөрөнгө, өр төлбөр, авлага, архив, албан хэргийг шинээр болон өөрчлөн байгуулагдсан компаниудад шилжүүлэх ажлыг зохион байгуулж, компани татан буулгахтай холбогдон үүссэн бусад асуудлыг холбогдох хууль, журмын дагуу шийдвэрлэхийг Эрчим хүчний сайд Б.Чойжилсүрэн, Төрийн өмчийн бодлого, зохицуулалтын газaр (Б.Цэнгэл)-т;

5.3.өөрчлөн байгуулалтад хамрагдсан цахилгаан дамжуулах, түгээх сүлжээний албан хаагчдыг орон тоо, цалингийн сан, эд хөрөнгийн хамт чиг үүрэг нь шилжиж байгаа компанид шилжүүлэх зохион байгуулалтын арга хэмжээ авахыг Эрчим хүчний сайд Б.Чойжилсүрэнд;

5.4.цахилгаан түгээх сүлжээний арилжааны үйл ажиллагааг нэг худалдан авагчтай загварт хамруулахыг Эрчим хүчний сайд Б.Чойжилсүрэнд;

5.5.компаниудын урт хугацаат зээлийн үндсэн болон хүүгийн төлбөрийг тухайн эрчим хүчний эх үүсвэр, дамжуулах, түгээх, хангах сүлжээнд оруулсан хөрөнгө оруулалтад тооцуулах асуудлыг судалж, саналаа 2025 оны 09 дүгээр сард багтаан Засгийн газарт танилцуулахыг Сангийн сайд С.Жавхлан, Эрчим хүчний сайд Б.Чойжилсүрэн нарт.

6.Энэ тогтоолын хэрэгжилтэд хяналт тавьж ажиллахыг Монгол Улсын сайд, Засгийн газрын Хэрэг эрхлэх газрын дарга С.Бямбацогтод үүрэг болгосугай.

МОНГОЛ УЛСЫН ЕРӨНХИЙ САЙД Г.ЗАНДАНШАТАР

МОНГОЛ УЛСЫН САЙД, ЗАСГИЙН ГАЗРЫН ХЭРЭГ ЭРХЛЭХ ГАЗРЫН ДАРГА С.БЯМБАЦОГТ