МОНГОЛ УЛСЫН ЗАСГИЙН ГАЗРЫН ТОГТООЛ

2025 оны 07 сарын 23 өдөр

Дугаар 29

Улаанбаатар хот

МАНСУУРУУЛАХ ЭМ, СЭТГЭЦЭД НӨЛӨӨТ БОДИСЫН ХУУЛЬ БУС ЭРГЭЛТТЭЙ ТЭМЦЭХ ТАЛААР АВАХ ЗАРИМ АРГА ХЭМЖЭЭНИЙ ТУХАЙ

Монгол Улсын Засгийн газрын тухай хуулийн 30 дугаар зүйлийн 1 дэх хэсэг, Үндэсний аюулгүй байдлын тухай хуулийн 3 дугаар зүйлийн 3.4.3, 3.4.8 дахь заалт, 8 дугаар зүйлийн 8.3 дахь хэсэг, 15 дугаар зүйлийн 15.4 дэх хэсэг, Гэмт хэрэг, зөрчлөөс урьдчилан сэргийлэх тухай хуулийн 25 дугаар зүйлийн 25.1.1, 25.1.8 дахь заалт, Мансууруулах эм, сэтгэцэд нөлөөт бодисын эргэлтэд хяналт тавих тухай хуулийн 10 дугаар зүйл, 11 дүгээр зүйлийн 11.1 дэх хэсэг, 15 дугаар зүйлийн 15.1, 15.2 дахь хэсгийг тус тус үндэслэн Монгол Улсын Засгийн газраас ТОГТООХ нь:

1.Нэгдсэн Үндэстний Байгууллагын Үндэстэн дамнасан зохион байгуулалттай гэмт хэргийн эсрэг конвенцод заасан нарийн зохион байгуулалттай, нууц, далд аргаар үйлдэгддэг мансууруулах эм, сэтгэцэд нөлөөт бодистой холбоотой гэмт хэрэг, зөрчлийн тоо сүүлийн жилүүдэд эрс өсөж, үндэсний аюулгүй байдалд аюул, занал учруулах болсонтой холбогдуулан дараах арга хэмжээг авч хэрэгжүүлэхийг доор дурдсан байгууллага, албан тушаалтнуудад даалгасугай:

1.1.хар тамхи, мансууруулах эм, сэтгэцэд нөлөөт бодисын хууль бус эргэлттэй тэмцэх төрийн байгууллагуудын үйл ажиллагааны уялдаа холбоо, нэгдмэл байдал хангах, мансууруулах эм, сэтгэцэд нөлөөт бодистой холбоотой гэмт хэрэг, зөрчлөөс урьдчилан сэргийлэх, гэмт хэргийн шалтгаан, нөхцөл, үйлдэгдсэн байдлыг судлан үзэж, гэмт этгээдэд хүлээлгэх хариуцлагыг мансууруулах эм, сэтгэцэд нөлөөт бодисын хэмжээ, үйлчлэл болон бусад объектив талыг харгалзан ялгамжтай тогтоож, ял шийтгэлийн бодлогыг чангаруулах, мансууруулах эм, сэтгэцэд нөлөөт бодисын хор хөнөөлийг таниулах эрх зүйн орчныг боловсронгуй болгох зорилгоор Мансууруулах эм, сэтгэцэд нөлөөт бодисын эргэлтэд хяналт тавих тухай хуулийн шинэчилсэн найруулгын төслийг эцэслэн боловсруулж, 2025 оны 08 дугаар сард багтаан Засгийн газарт танилцуулахыг Хууль зүй, дотоод хэргийн сайд Л.Мөнхбаатар, Монгол Улсын сайд, Засгийн газрын Хэрэг эрхлэх газрын дарга С.Бямбацогт нарт;

1.2.мансууруулах эм, сэтгэцэд нөлөөт бодис, тэдгээрийн түүхий эдийг хууль бусаар Монгол Улсын хилээр нэвтрүүлэх, дамжин өнгөрүүлэх асуудлыг таслан зогсоох зорилгоор гадаад улс, олон улсын байгууллагуудтай идэвхтэй хамтран ажиллахыг Гадаад харилцааны сайд Б.Батцэцэг, Хууль зүй, дотоод хэргийн сайд Л.Мөнхбаатар болон Цагдаагийн ерөнхий газар (Т.Сүхболд), Тагнуулын ерөнхий газар (П.Одонбаатар), Гаалийн ерөнхий газар (Р.Отгонжаргал), Хил хамгаалах ерөнхий газар (Ж.Бямбасүрэн)-т тус тус;

1.3.Цагдаагийн ерөнхий газрын Хар тамхитай тэмцэх газрыг бие даасан, хараат бус байгууллага болгон бэхжүүлэх асуудлыг судалж, саналаа 2025 оны 08 дугаар сард багтаан Засгийн газарт танилцуулахыг Хууль зүй, дотоод хэргийн сайд Л.Мөнхбаатар, Монгол Улсын сайд, Засгийн газрын Хэрэг эрхлэх газрын дарга С.Бямбацогт нарт;

1.4.мансуурах донтой иргэдийг эмчлэх, сэтгэл зүйн тусламж, үйлчилгээ үзүүлэх, нийгэмшүүлэх чиг үүрэгтэй олон улсын стандартад нийцсэн эрүүл мэндийн байгууллага байгуулах асуудлыг судалж, саналаа 2025 оны 08 дугаар сард багтаан Засгийн газарт танилцуулах, Монгол Улсад хориглосон, хязгаарласан, хяналтад байх шаардлагатай мансууруулах эм, сэтгэцэд нөлөөт эмийн жагсаалтыг шинэчлэн баталж, хяналт тавихыг Эрүүл мэндийн сайд Ж.Чинбүрэнд;

1.5.мансууруулах эм, сэтгэцэд нөлөөт бодисын хэрэглээний тархалтын тандалт, судалгааг хийж, бүх шатны боловсролын байгууллагын сургалтын хөтөлбөрт мансууруулах эм, сэтгэцэд нөлөөт бодисын хор хөнөөлөөс урьдчилан сэргийлэх арга хэмжээний талаар тусгахыг Боловсролын сайд П.Наранбаяр, Хууль зүй, дотоод хэргийн сайд Л.Мөнхбаатар, Эрүүл мэндийн сайд Ж.Чинбүрэн нарт;

1.6.хүүхэд, залуучуудын амралт, чөлөөт цагийг зөв боловсон өнгөрүүлэхэд чиглэсэн соёл, спорт, соён гэгээрүүлэх үйл ажиллагааг идэвхжүүлж, мансууруулах эм, сэтгэцэд нөлөөт бодисын хор уршгийг олон нийтэд тайлбарлан ойлгуулах ажлыг тогтмол зохион байгуулахыг Соёл, спорт, аялал жуулчлал, залуучуудын сайд Ч.Ундрам, аймаг, нийслэлийн Засаг дарга нарт;

1.7.Монгол Улсын нутаг дэвсгэрт ургаж байгаа мансууруулах үйлчилгээ бүхий ургамлын тархцыг хумих ажлыг эрчимжүүлж, бүрэн устгах арга хэмжээ авахыг Байгаль орчин, уур амьсгалын өөрчлөлтийн сайд Б.Батбаатар, Хууль зүй, дотоод хэргийн сайд Л.Мөнхбаатар, Цагдаагийн ерөнхий газар (Т.Сүхболд)-т тус тус;

1.8.мансууруулах эм, сэтгэцэд нөлөөт бодисын хууль бус эргэлттэй холбоотой гэмт хэрэг үндэстэн дамнасан, эрх бүхий албан тушаалтны оролцоотой, нарийн зохион байгуулалттай, нууц, далд аргаар үйлдэгдэж байгаатай холбогдуулан энэ төрлийн гэмт хэргийг шуурхай илрүүлж, таслан зогсоох арга хэмжээг хууль тогтоомжийн дагуу авч хэрэгжүүлэхийг Цагдаагийн ерөнхий газар (Т.Сүхболд), Тагнуулын ерөнхий газар (П.Одонбаатар)-т тус тус;

1.9.мансууруулах эм, сэтгэцэд нөлөөт бодис хэрэглэсэн этгээдийг илрүүлэх, шинжлэх багажийг нэмэгдүүлэх, энэ чиглэлээр албан хаагчдыг чадавхжуулах асуудлыг судалж, саналаа 2025 оны 08 дугаар сард багтаан Засгийн газарт танилцуулахыг Хууль зүй, дотоод хэргийн сайд Л.Мөнхбаатар, Эрүүл мэндийн сайд Ж.Чинбүрэн нарт.

2.Энэ тогтоолд заасан арга хэмжээг хэрэгжүүлэхэд шаардлагатай хөрөнгийг нарийвчлан тооцож, холбогдох санхүүжилтийг шийдвэрлэх саналаа 2025 оны 08 дугаар сард багтаан Засгийн газарт танилцуулахыг Сангийн сайд Б.Жавхланд үүрэг болгосугай.

3.Мансууруулах эм, сэтгэцэд нөлөөт бодисын хууль бус эргэлттэй тэмцэх арга хэмжээний хэрэгжилтийг хангах хүрээнд бүх талын дэмжлэг үзүүлж, хамтран ажиллахыг Засгийн газрын гишүүд, Засгийн газрын агентлагийн дарга, аймаг, нийслэлийн Засаг дарга нарт даалгасугай.

МОНГОЛ УЛСЫН ЕРӨНХИЙ САЙД Г.ЗАНДАНШАТАР

ХУУЛЬ ЗҮЙ, ДОТООД ХЭРГИЙН САЙД Л.МӨНХБААТАР