МОНГОЛ УЛСЫН ЗАСГИЙН ГАЗРЫН ТОГТООЛ

2026 оны 03 сарын 04 өдөр

Дугаар 63

Улаанбаатар хот

ЖУРАМ, ЖИШИГ БАРИМТ БИЧИГ ШИНЭЧЛЭН БАТЛАХ, ТОГТООЛЫН ХАВСРАЛТАД НЭМЭЛТ, ӨӨРЧЛӨЛТ ОРУУЛАХ ТУХАЙ

Төр, хувийн хэвшлийн түншлэлийн тухай хуулийн 7 дугаар зүйлийн 7.2 дахь хэсэг, 7.2.1, 7.2.2, 7.2.3 дахь заалтыг тус тус үндэслэн Монгол Улсын Засгийн газраас ТОГТООХ нь:

1."Хувийн хэвшлийн түншлэгчийг болон зөвлөх үйлчилгээг сонгон шалгаруулах журам, жишиг баримт бичиг"-ийг хавсралт ёсоор шинэчлэн баталсугай.

2."Журам, жишиг баримт бичиг, гэрээний загвар, аргачлал батлах тухай" Засгийн газрын 2023 оны 11 дүгээр сарын 15-ны өдрийн 404 дүгээр тогтоолын 1 дүгээр хавсралтаар баталсан "Түншлэлээр хэрэгжүүлэх төслийн бүрэн шинжилгээ хийх журам"-д доор дурдсан агуулга бүхий 5.1¹ дэх хэсэг нэмсүгэй:

"5.1¹.Төрийн үйлчилгээ үзүүлэх төслөөс хамааран техник, эдийн засгийн үндэслэл шаардахгүй бөгөөд мөнгөний үнэ цэнийн шинжилгээ, төсөвт үзүүлэх нөлөөллийн шинжилгээ, эрсдэлийн шинжилгээ, хууль зүйн дүн шинжилгээ болон нийгмийн нөлөөллийн шинжилгээг хийж болно."

3.Мөн журмын 9.2 дахь хэсгийн "2 дугаар бүлэгт заасан урьдчилсан үнэлгээг хийж," гэсний дараа "түншлэлийн эх үүсвэрээр хэрэгжүүлэхэд тохиромжтой гэсэн дүгнэлт гарсан тохиолдолд" гэж нэмсүгэй.

4.Мөн журмын 2.1, 2.2, 2.5, 5.2 дахь хэсгийг доор дурдсанаар өөрчлөн найруулсугай:

"2.1.Салбарын асуудал эрхэлсэн төрийн захиргааны төв байгууллага, аймаг, нийслэл, хувийн хэвшил түншлэлээр хэрэгжүүлэх төслийн саналыг Түншлэлийн төвд гаргана.

2.2.Аймаг, нийслэлийн хэмжээнд түншлэлээр хэрэгжүүлэх Төр, хувийн хэвшлийн түншлэлийн тухай хуулийн 11.2.2-т заасан төслийн саналыг Түншлэлийн төвд гаргана.

2.5.Түншлэлийн төв энэ журмын 2.3 дахь хэсэгт заасан мэдээллийг тусгасан түншлэлээр хэрэгжүүлэх төслийн саналыг хүлээн авна.

5.2.Төслийн техник, эдийн засгийн үндэслэлийг төсвийн болон хувийн хэвшлийн санхүүжилтээр боловсруулж болох бөгөөд тухайн техник, эдийн засгийн үндэслэлийг бүрэн шинжилгээ хийх шийдвэр гарахаас өмнө гурван жилийн дотор тухайн салбарын шинжлэх ухаан, технологийн, эсхүл мэргэжлийн зөвлөлөөр хэлэлцүүлж тодотгосон байна."

5.Мөн журмын 2.6 дахь хэсгийн "түншлэлийн асуудал эрхэлсэн төрийн захиргааны төв байгууллага" гэснийг "Түншлэлийн төв" гэж, 2.7 дахь хэсгийн "төрийн захиргааны байгууллага" гэснийг "төрийн захиргааны төв байгууллага, аймаг, нийслэл, хувийн хэвшил" гэж, 2.8.2 дахь заалтын "төрийн захиргааны төв байгууллагаас" гэснийг "төрийн захиргааны төв байгууллага, аймаг, нийслэл, хувийн хэвшлээс" гэж, 2.15 дахь хэсгийн "төрийн захиргааны төв байгууллагад" гэснийг "төрийн захиргааны төв байгууллага, аймаг, нийслэл, хувийн хэвшилд" гэж тус тус өөрчилсүгэй.

6.Мөн журмын 2.14 дэх хэсгийн "Энэ журмын 2.12-т заасан төслийн хувьд мөн журмын 2.13-т заасан саналыг харгалзан үзнэ." гэснийг, 4.1.2 дахь заалт болон 5.3, 5.4 дэх хэсгийн "урьдчилсан болон нарийвчилсан" гэснийг тус тус хассугай.

7."Журам, жишиг баримт бичиг, гэрээний загвар, аргачлал батлах тухай" Засгийн газрын 2023 оны 11 дүгээр сарын 15-ны өдрийн 404 дүгээр тогтоолын 3 дугаар хавсралтаар баталсан "Төр, хувийн хэвшлийн түншлэлийн гэрээ байгуулах журам"-ын 1.7, 3.3, 4.7 дахь хэсгийг доор дурдсанаар өөрчлөн найруулсугай:

"1.7.Түншлэлийн төсөл нь Төр, хувийн хэвшлийн түншлэлийн тухай хуулийн 18.1, 18.2-т заасан шаардлагыг хангасан байх бөгөөд төрийн үйлчилгээ үзүүлэх төсөлд мөн хуулийн 18.4-т заасан зохицуулалтыг баримтална.

3.3.Санхүү, төсвийн асуудал эрхэлсэн төрийн захиргааны төв байгууллага нь сонгон шалгаруулалт, түншлэгчтэй хийсэн хэлэлцээрийн дүн, ажлын хэсгийн дүгнэлтийг төсөвт үзүүлэх нөлөөлөл, эрсдэлийн талаас нь хянаж, Төр, хувийн хэвшлийн түншлэлийн тухай хуулийн 9.1.8-д заасан журмыг баримтлан түншлэлийн гэрээ байгуулах эсэх санал, дүгнэлтийг ажлын 10 өдөрт багтаан түншлэлийн асуудал эрхэлсэн төрийн захиргааны төв байгууллагад хүргүүлнэ.

4.7.Түншлэлийн асуудал эрхэлсэн төрийн захиргааны төв байгууллага түншлэлийн гэрээ байгуулах тухай санал, дүгнэлтийг Санхүү, төсвийн асуудал эрхэлсэн төрийн захиргааны төв байгууллагаас ирүүлсэн санал, дүгнэлтийн хамт Засгийн газарт танилцуулж, түншлэлийн гэрээ байгуулах эсэх шийдвэрийг гаргуулна."

8.Мөн журмын 2.4.4 дэх заалтын "түншлэлийн мэдээллийн нэгдсэн санд" гэснийг "цахим системд" гэж, 3.2, 4.5, 6.6 дахь хэсгийн "зөвшөөрөл" гэснийг "санал, дүгнэлт" гэж, 6.1 дэх хэсгийн "зөвшөөрлийг" гэснийг "санал, дүгнэлтийг" гэж, 4.6 дахь хэсгийн "зөвшөөрөл олгохдоо" гэснийг "санал, дүгнэлт ирүүлэхдээ" гэж, 6.2 дахь хэсгийн "зөвшөөрөл олгоно." гэснийг "санал, дүгнэлт ирүүлнэ." гэж, 6.5 дахь хэсгийн "зөвшөөрөлд" гэснийг "санал, дүгнэлтэд" гэж, 8.2 дахь хэсгийн "3.5-д заасан зөвшөөрлийг" гэснийг "4.7-д заасан санал, дүгнэлтийг" гэж тус тус өөрчилсүгэй.

9."Журам, жишиг баримт бичиг, гэрээний загвар, аргачлал батлах тухай" Засгийн газрын 2023 оны 11 дүгээр сарын 15-ны өдрийн 404 дүгээр тогтоолын 1 дүгээр хавсралтаар баталсан "Түншлэлээр хэрэгжүүлэх төслийн бүрэн шинжилгээ хийж журам"-ын 2.12, 2.13, 5.5, мөн тогтоолын 2 дугаар хавсралтаар баталсан "Хувийн хэвшлийн түншлэгчийг болон зөвлөх үйлчилгээг сонгон шалгаруулах журам, жишиг баримт бичиг", мөн тогтоолын 3 дугаар хавсралтаар баталсан "Төр, хувийн хэвшлийн түншлэлийн гэрээ байгуулах журам"-ын 3.4, 3.5 дахь хэсгийг тус тус хүчингүй болсонд тооцсугай.

МОНГОЛ УЛСЫН ЕРӨНХИЙ САЙД Г.ЗАНДАНШАТАР

МОНГОЛ УЛСЫН ТЭРГҮҮН ШАДАР САЙД БӨГӨӨД ЭДИЙН ЗАСАГ, ХӨГЖЛИЙН САЙД Ж.ЭНХБАЯР