МОНГОЛ УЛСЫН ЗАСГИЙН ГАЗРЫН ТОГТООЛ

2026 оны 03 сарын 25 өдөр

Дугаар 103

Улаанбаатар хот

ТӨСВИЙН ХӨРӨНГӨ ОРУУЛАЛТЫН ЦАХИМ ШИНЭЧЛЭЛТИЙН ТАЛААР АВЧ ХЭРЭГЖҮҮЛЭХ ЗАРИМ АРГА ХЭМЖЭЭНИЙ ТУХАЙ

Монгол Улсын Засгийн газрын тухай хуулийн 30 дугаар зүйлийн 1 дэх хэсэг, Төсвийн тухай хуулийн 11 дүгээр зүйлийн 11.1.4 дэх заалт, 29¹ дүгээр зүйлийн 29¹.4 дэх хэсэг, Монгол Улсын Их Хурлын 2025 оны 109 дүгээр тогтоолын 1 дүгээр хавсралтаар баталсан "Монгол Улсыг 2026-2030 онд хөгжүүлэх таван жилийн үндсэн чиглэл"-ийн 5.1 дэх хэсгийг тус тус үндэслэн Монгол Улсын Засгийн газраас ТОГТООХ нь:

1.Төсвийн хөрөнгө оруулалтын үр ашгийг нэмэгдүүлэх, мэдээллийн ил тод байдлыг сайжруулах, төсвийн эх үүсвэр бүхий хөрөнгө оруулалтын мэдээллийн нэгдсэн цахим санд шаардлагатай их өгөгдлийг бүрдүүлэх, төсвийн хөрөнгө оруулалтын удирдлагын цахим систем (цаашид "цахим систем" гэх)-ийн үйл ажиллагааг эрчимжүүлэх чиглэлээр дараах арга хэмжээг авч хэрэгжүүлэхийг доор дурдсан албан тушаалтанд тус тус даалгасугай:

1.1.Төсвийн хөрөнгө оруулалтаар хэрэгжүүлэх төсөл, арга хэмжээг төлөвлөх, эрэлт хэрэгцээг тодорхойлох их өгөгдөлд шаардлагатай төрийн болон орон нутгийн өмчийн бүртгэл, байршлын мэдээллийг нэгтгэн, 2026 оны 06 дугаар сарын 01-ний өдрийн дотор цахим системийн мэдээллийн санд бүрдүүлэхийг Төрийн өмчийн бодлого, зохицуулалтын газар (Б.Цэнгэл), Газар зохион байгуулалт, геодези, зураг зүйн ерөнхий газар (А.Энхманлай)-т;

1.2.Төсвийн хөрөнгө оруулалтын их өгөгдөлд шаардлагатай салбар тус бүрийн суурь мэдээлэл, өгөгдлийг цахим системд нэгтгэх зохион байгуулалтын арга хэмжээ авахыг Сангийн сайд Б.Жавхланд, холбогдох мэдээллээр тухай бүр хангаж ажиллахыг төсвийн ерөнхийлөн захирагч нарт;

1.3.Төсөл, арга хэмжээний техник, эдийн засгийн үндэслэл, зураг төсөвт холбогдох мэдээллийн үнэн зөв байдлыг хангаж тухай бүр цахим системд байршуулах, мэдээллийг шинэчилж, ажиллахыг Зам, тээврийн сайд Б.Дэлгэрсайхан, Хот байгуулалт, барилга, орон сууцжуулалтын сайд Э.Бат-Амгалан, Эрчим хүчний сайд Б.Чойжилсүрэн нарт;

1.4.Орон нутгийн төсвийн хөрөнгө оруулалтын үйл ажиллагаанд цахим системийг бүрэн нэвтрүүлж, удирдлага, арга зүйгээр хангаж ажиллахыг Сангийн сайд Б.Жавхланд, орон нутгийн төсвийн хөрөнгө оруулалтын төлөвлөлт, хэрэгжилт, санхүүжилт, хяналт, тайлагналтын үйл ажиллагааг цахим системд 2026 оны төсвийн жилд бүрэн шилжүүлэх зохион байгуулалтын арга хэмжээ авч ажиллахыг аймаг, нийслэлийн Засаг дарга нарт;

1.5.Төсвийн хөрөнгө оруулалтаар хэрэгжүүлж байгаа төслүүдийн норм, нормативын зардлыг төрийн сангийн нэгдсэн дансанд төвлөрүүлж, зарцуулалтыг холбогдох журмын дагуу тайлагнаж, ажиллахыг Зам, тээврийн сайд Б.Дэлгэрсайхан, Хот байгуулалт, барилга, орон сууцжуулалтын сайд Э.Бат-Амгалан, Эрчим хүчний сайд Б.Чойжилсүрэн нарт;

1.6.Төрийн өмчит хуулийн этгээдээс санхүүжүүлж байгаа төсвийн хөрөнгө оруулалтын шинжтэй төслийн мэдээллийг цахим системд бүртгэж, мэдээллийн санг бүрдүүлж ажиллахыг Төрийн өмчийн бодлого, зохицуулалтын газар (Б.Цэнгэл)-т;

1.7.Худалдан авах ажиллагааны цахим систем (www.tender.gov.mn)-ийг төсвийн хөрөнгө оруулалтын удирдлагын цахим систем (pimis.publicinvestment.gov.mn)-тэй бүрэн холбон, мэдээлэл солилцоог сайжруулах арга хэмжээг 2026 оны 06 дугаар сарын 01-ний өдрийн дотор авч хэрэгжүүлэхийг Төрийн худалдан авах ажиллагааны газар (Ц.Батзул)-т;

1.8.Төсвийн хөрөнгө оруулалтын удирдлагын цахим систем (pimis.publicinvestment.gov.mn)-д хөрөнгө оруулалтын төсөл, арга хэмжээг төлөвлөх, санхүүжүүлэх, хянах, тайлагнах, өмчийн удирдлага, ашиглалтын үр өгөөжийг тооцох зэрэг үйл ажиллагааг ил тод, нээлттэй хэрэгжүүлэх нөхцөл бүрэн бүрдсэн тул төсвийн үр ашиг, хэмнэлтийн хүрээнд энэ чиглэлийн ижил төрлийн цахим систем үүсгэхгүй байхыг төсвийн захирагч нарт.

МОНГОЛ УЛСЫН ЕРӨНХИЙ САЙД Г.ЗАНДАНШАТАР

САНГИЙН САЙД Б.ЖАВХЛАН