МОНГОЛ УЛСЫН ЗАСГИЙН ГАЗРЫН ТОГТООЛ

2026 оны 04 сарын 29 өдөр

Дугаар 160

Улаанбаатар хот

ТҮЛШ, ЭРЧИМ ХҮЧНИЙ ХАРААТ БАЙДЛЫГ БУУРУУЛАХ ТУХАЙ

Монгол Улсын Засгийн газрын тухай хуулийн 30 дугаар зүйлийн 1 дэх хэсгийг үндэслэн "Засгийн газарт чиглэл өгөх тухай" Улсын Их Хурлын 2025 оны 119 дүгээр тогтоолыг хэрэгжүүлэх зорилгоор Монгол Улсын Засгийн газраас ТОГТООХ нь:

1.Эдийн засгийн тогтвортой өсөлтийг хангах, түлш, эрчим хүчний аюулгүй байдлыг бэхжүүлэх, иргэдийн эрүүл, аюулгүй орчинд амьдрах эрхийг баталгаажуулах, хүлэмжийн хийн ялгарлыг бууруулах, хүнд ээлтэй хөгжлийн шинэ загварыг бүрдүүлэх санаачилгыг хэрэгжүүлж, ногоон хөгжлийн бодлогыг эрчимжүүлэх зорилгоор дараах арга хэмжээг авч хэрэгжүүлэхийг доор дурдсан байгууллага, албан тушаалтанд даалгасугай:

1.1.төр, хувийн хэвшлийн түншлэл, хувийн хөрөнгө оруулалтад тулгуурласан, олон улсын туршлагад нийцсэн сэргээгдэх эрчим хүчний тархмал эх үүсвэр бүхий цахилгаан тээврийн хэрэгслийн цэнэглэх дэд бүтцийн төслийн санхүүжилтийн шийдлийг боловсруулж, хэрэгжилтийг зохион байгуулж ажиллахыг Монгол Улсын Тэргүүн шадар сайд бөгөөд Эдийн засаг, хөгжлийн сайд Ж.Энхбаяр, Сангийн сайд З.Мэндсайхан, Эрчим хүчний сайд Б.Найдалаа нарт;

1.2.ногоон эрчим хүчийг хөгжүүлэх, эрчим хүчний эх үүсвэрийн дутагдлыг бууруулах, төвлөрсөн шугам сүлжээний ачаалал, алдагдлыг багасгах, хэрэглэгчдийн цахилгаан хангамжийн найдвартай байдлыг сайжруулах зорилгоор холбогдох тооцоо, судалгаанд үндэслэн Булган аймгийн Орхон сум, Говьсүмбэр аймгийн Сүмбэр сум, Дундговь аймгийн Сайнцагаан сум, Өвөрхангай аймгийн Хархорин суманд тус бүр 50 МВт-ын нарны цахилгаан станц бүхий 30 МВт-ын хүчин чадалтай, 100 МВт.ц багтаамжтай батарей хуримтлуурын төсөл, Хэнтий аймгийн Хэрлэн суманд 20 МВт-ын нарны цахилгаан станц бүхий 15 МВт-ын хүчин чадалтай, 40 МВт.ц багтаамжтай батарей хуримтлуурын төслийг тус тус хувийн хэвшлийн хөрөнгө оруулалтаар хэрэгжүүлэх сонгон шалгаруулалтыг зохион байгуулж, шалгарсан төслийн хэрэгжүүлэгчтэй холбогдох хууль тогтоомжийн дагуу гэрээ байгуулж, нийт 220 МВт хүчин чадалтай нарны цахилгаан станц бүхий 135 МВт хүчин чадалтай, 440 МВт.ц багтаамжтай батарей хуримтлуурын станцыг 2026-2027 оны өвлийн их ачаалал эхлэхээс өмнө буюу 12 дугаар сарын 01-ний өдрийн дотор ашиглалтад оруулахыг Эрчим хүчний сайд Б.Найдалаад;

1.3.өрхийн хэрэглээний сэргээгдэх эрчим хүчний эх үүсгүүрийн холболт, угсралт хийх аж ахуйн нэгжийн жагсаалтыг гаргаж, холбогдох тусгай зөвшөөрлийг хуульд заасан журмын дагуу олгох, чанар, стандартын шаардлага хангасан тоног төхөөрөмжийг санхүүгийн түрээсээр айл өрхөд нийлүүлэх ажлыг зохион байгуулж, үр дүнг 2026 оны 06 дугаар сарын 15-ны өдрийн дотор Засгийн газрын хуралдаанд танилцуулахыг Эрчим хүчний сайд Б.Найдалаад;

1.4.энэ тогтоолын 1.2 дахь заалтад заасан тархмал эх үүсвэрийн төсөл болон сэргээгдэх эрчим хүчний тархмал эх үүсвэр бүхий цахилгаан тээврийн хэрэгслийн цэнэглэх дэд бүтцийн төсөл хэрэгжүүлэх байршилд холбогдох хууль тогтоомжид нийцүүлэн газар ашиглах эрх олгож, төслийг саадгүй хэрэгжүүлэхэд дэмжлэг үзүүлж ажиллахыг тухайн аймаг, сумын Засаг дарга, Газар, зохион байгуулалт, геодези, зураг зүйн ерөнхий газар (А.Энхманлай)-т;

1.5.сэргээгдэх эрчим хүчний тархмал эх үүсвэр бүхий цахилгаан тээврийн хэрэгслийн цэнэглэх дэд бүтцийн төслийн техникийн нөхцөл, цахилгаан нийлүүлэх гэрээ, сүлжээнд холбох зөвшөөрлийг хуульд заасан журмын дагуу шуурхай шийдвэрлэж ажиллахыг Эрчим хүчний сайд Б.Найдалаад;

1.6.орон нутагт сэргээгдэх эрчим хүчний тархмал эх үүсвэр бүхий цахилгаан тээврийн хэрэгслийн цэнэглэх дэд бүтцийг байгуулах байршлыг тогтоож, сонирхлоо илэрхийлсэн хөрөнгө оруулагчдын дунд сонгон шалгаруулалт зохион байгуулж, шалгарсан төслийн хэрэгжүүлэгчтэй холбогдох хууль тогтоомжийн дагуу гэрээ байгуулан ажиллахыг Аж үйлдвэр, эрдэс баялгийн сайд Г.Дамдиннямд;

1.7.бүрэн цахилгаан хөдөлгүүрт тээврийн хэрэгсэл болон туулах зай уртасгагчтай цахилгаан хөдөлгүүрт тээврийн хэрэгслийг байгаль орчинд ээлтэй тээврийн хэрэгслийн ангилалд оруулж, замын хөдөлгөөний дугаарын хязгаарлалтад хамруулахгүй байх зохицуулалтыг нэвтрүүлж, хэрэгжүүлэхийг Зам, тээврийн сайд Б.Дэлгэрсайхан, Нийслэлийн Засаг дарга бөгөөд Улаанбаатар хотын Захирагч Х.Нямбаатар нарт;

1.8.уул уурхайн үйл ажиллагаа явуулж байгаа аж ахуйн нэгж тухайн ордыг ашиглах хугацаанд эдэлбэр газартаа дотоодын хэрэгцээнд зориулсан сэргээгдэх эрчим хүчний эх үүсвэрийг байгуулж ашиглахад хуульд заасан дэмжлэг үзүүлж ажиллахыг тухайн шатны Засаг дарга нарт;

1.9.нийтийн зорчигч тээврийн үйлчилгээ болон төрийн байгууллагын парк шинэчлэлийн хүрээнд цахилгаан тээврийн хэрэгсэл худалдан авах зохицуулалтыг хийж, дэд бүтцийн хүртээмжтэй уялдуулан цахилгаан тээврийн хэрэгсэлд үе шаттайгаар шилжих бодлогыг хэрэгжүүлэхийг төсвийн ерөнхийлөн захирагч нарт.

2.Сэргээгдэх эрчим хүчний эх үүсвэрээр цахилгаан, дулааны хангамжийг нэмэгдүүлэх, гэр болон амины орон сууцны эрчим хүчний хэмнэлтийг дээшлүүлэх, байгаль орчинд ээлтэй тээврийн хэрэгслийн хэрэглээг нэмэгдүүлэх чиглэлээр бодлогын дэмжлэг үзүүлэхийг Монголбанкны Ерөнхийлөгч С.Наранцогтод зөвлөсүгэй.

3.Энэ тогтоолын хэрэгжилтийг хангаж ажиллахыг Аж үйлдвэр, эрдэс баялгийн сайд Г.Дамдинням, Эрчим хүчний сайд Б.Найдалаа нарт, хэрэгжилтийн явц, үр дүнд хяналт тавьж ажиллахыг Монгол Улсын сайд, Засгийн газрын Хэрэг эрхлэх газрын дарга Б.Энхбаярт тус тус үүрэг болгосугай.

МОНГОЛ УЛСЫН ЕРӨНХИЙ САЙД Н.УЧРАЛ

АЖ ҮЙЛДВЭР, ЭРДЭС БАЯЛГИЙН САЙД Г.ДАМДИННЯМ