ЗАСГИЙН ГАЗРЫН ТОГТООЛ (ЗАХИРАМЖ)

БАРИЛГЫН ТАЛААР АВАХ ЗАРИМ АРГА ХЭМЖЭЭНИЙ ТУХАЙ

1995 оны 3 дугаар сарын 1-ний өдөр

Улаанбаатар хот

Дугаар 35

Монгол Улсын Засгийн газраас ТОГТООХ нь:

1.Дэд бүтцийн хөгжлийн яам /Р.САНДАЛХАН/,Үндэсний хөгжлийн газар /Ч.УЛААН/-т даалгах нь:

а)"Барилгын материалын үйлдвэрлэлийг хөгжүүлэх чиг хандлага", "Барилга, авто замын техникийн шинэчлэл" төслийг хэрэгжүүлэхтэй холбогдсон тодорхой арга хэмжээ, түүнд шаардагдах хөрөнгийн асуудлыг жил бүрийн эдийн засаг, нийгмийн хөгжлийн Үндсэн чиглэлийн төсөлд ээлж дараатайгаар тусган шийдвэрлэж, хэрэгжүүлсүгэй;

б)олон улсын санхүүгийн байгууллага, хандивлагч орнуудаас үзүүлэх техникийн тусламжийг ашиглах боломжийг авч үзэхийн хамт холбогдох эрдэм шинжилгээ, зураг төслийн байгууллагыг оролцуулах үндсэн дээр "Барилгын салбарыг хөгжүүлэх мастер төлөвлөгөө"-г 1996 онд багтаан боловсруулах арга хэмжээ авсугай;

в)төсвийн хөрөнгө оруулалт болон банкны зээл, гадаадын зээл, тусламж, өөрийн хөрөнгөөр санхүүжигдэн баригдах томоохон барилга байгууламжийн техник-эдийн засгийн үндэслэл, зураг төсөл боловсруулах, барьж байгуулах гүйцэтгэгчийг тендер зарласны үндсэн дээр сонгон шалгаруулж байхын хамт энэ тухай журмыг 1995 оны 1 дүгээр улиралд багтаан боловсруулж мөрдүүлсүгэй.

2.Өмчийн бүх хэлбэрийн аж ахуйн нэгж,байгууллагад барилга-угсралтын ажил эрхлэх зөвшөөрөл олгох журмыг энэ оны 4 дүгээр сард багтаан баталж мөрдүүлэхийг Дэд бүтцийн хөгжлийн сайд Р.Сандалханд даалгасугай.

З.Аж ахуйн нэгж, байгууллагуудаас хөрөнгийнхөө эх үүсвэрийг төвлөрүүлж ашиглах замаар шинээр орон сууц барих, дуусаагүй барилгыг тодорхой хугацаанд барьж дуусгасны үндсэн дээр "түлхүүр" хүлээлгэн өгөх хэлбэрээр худалдаж байгаа ажлын арга хэлбэрийг дэмжиж, цаашид энэ чиглэлээр ажиллахад нь өмчийн бүх төрлийн аж ахуйн нэгж, байгууллагад дэмжлэг туслалцаа үзүүлж байхыг Засгийн газрын Өмч хувьчлалын комисс /Л.ЭНЭБИШ/, Үндэсний хөгжлийн газар /Ч.УЛААН/, Дэд бүтцийн хөгжлийн яам /Р.САНДАЛХАН/, аймаг, нийслэлийн Засаг дарга нарт даалгасугай.

4.Барилгачдыг гэрээгээр гадаадад түр хугацаагаар ажиллуулж барилга-угсралтын хийгээд засал

чимэглэлийн ажлын шинэ арга, туршлага эзэмших явдлыг дэмжиж зохион байгуулахын зэрэгцээ шинээр ажлын байр бий болгох, ялангуяа импортыг багасгаж, экспортыг нэмэгдүүлэх боломжтой жижиг, дунд үйлдвэрийг барьж байгуулах төслийг тэргүүн ээлжинд хэрэгжүүлэхэд шаардлагатай мэдээллээр хангах, санхүүжилтийн асуудлыг нь оновчтой шийдвэрлэх арга хэмжээ авч ажиллахыг Хүн амын бодлого, хөдөлмөрийн яам /Э.ГОМБОЖАВ/, Худалдаа, үйлдвэрийн яам /Ц.ЦОГТ/, Дэд бүтцийн хөгжлийн яам /Р.САНДАЛХАН/-д даалгасугай.

5.Барилгын үйлдвэрлэлийг хөгжүүлэх чиг хандлага, энэ талаар төрөөс явуулж байгаа бодлоготой уялдуулан орон нутгийн нөөц бололцоог бүрэн дүүрэн ашиглах замаар бүс нутгийн хэмжээнд барилгын үйлдвэрлэлийг сэргээн хөгжүүлэх чиглэлийг тодорхойлж, тодорхой үе шат, дэс дараатайгаар хэрэгжүүлж ажиллахыг аймаг, нийслэлийн Засаг дарга нарт даалгасугай.

6.Энэ тогтоол гарсантай холбогдуулан "Барилга, барилгын материалын үйлдвэрлэлийн талаар авах зарим арга хэмжээний тухай" Засгийн газрын 1992 оны 2 дугаар сарын 22-ны өдрийн 28 дугаар тогтоолын 4,5,7,8,9 дүгээр зүйлийг хүчингүй болсонд тооцож, 12 дугаар зүйлийн "Барилгын материал концернд" гэснийг "Дэд бүтцийн хөгжлийн яаманд" гэж өөрчилсүгэй.

Монгол Улсын Ерөнхий сайд П.ЖАСРАЙ

Дэд бүтцийн хөгжлийн сайд Р.САНДАЛХАН