ЗАСГИЙН ГАЗРЫН ТОГТООЛ

2004 оны 5 дугаар сарын 26-ны өдөр

Дугаар 143

Улаанбаатар хот

БИЗНЕСИЙН ТААТАЙ ОРЧИН БҮРДҮҮЛЭХ ЧИГЛЭЛЭЭР АВАХ ЗАРИМ АРГА ХЭМЖЭЭНИЙ ТУХАЙ /Бизнесийн таатай орчин бүрдүүлэх талаархи арга хэмжээний төлөвлөгөө/

Бизнесийг дэмжих, бизнес эрхлэхэд тулгарч байгаа хүнд суртлыг багасгах талаар Засгийн газрын үйл ажиллагааны хөтөлбөрт заасан зорилтыг хэрэгжүүлэх, Засгийн газар, хувийн хэвшлийн хамтын ажиллагааг улам өргөжүүлэх зорилгоор Монгол Улсын Засгийн газраас ТОГТООХ нь :

1. Монголын бизнес эрхлэгчдийн их чуулганы зөвлөмж, бизнес эрхлэгчдээс гаргасан саналыг харгалзан Засгийн газраас хэрэгжүүлэх "Бизнесийн таатай орчин бүрдүүлэх талаархи арга хэмжээний төлөвлөгөө"-г хавсралт ёсоор баталсугай

2. Уг төлөвлөгөөний хэрэгжилтийн явц, дүнг Засгийн газар болон хувийн хэвшлийн хамтарсан Зөвлөлдөх хороогоор хэлэлцүүлэн гарсан санал, дүгнэлтийг Засгийн газарт танилцуулж байхыг Санхүү, эдийн засгийн сайд Ч.Улаан, арга хэмжээний төлөвлөгөөний хэрэгжилтийн явцад хяналт тавьж ажиллахыг Монгол Улсын сайд, Засгийн газрын Хэрэг эрхлэх газрын дарга Ө.Энхтүвшин нарт тус тус даалгаж, төлөвлөгөөнд тусгагдсан арга хэмжээний чиглэл бүрээр хамтран ажиллаж, гарсан шийдвэр, санал, дүгнэлтийг бизнес эрхлэгчдэд сурталчлах арга хэмжээ авахыг Монголын үндэсний худалдаа, аж үйлдвэрийн танхим /С.ДЭМБЭРЭЛ/-д зөвлөмж болгосугай.

3. Төлөвлөгөөнд тусгасан арга хэмжээг хэрэгжүүлэх ажлын хүрээнд холбогдох хууль тогтоомжид нэмэлт, өөрчлөлт оруулах санал болон цаашид бизнес эрхлэхтэй холбоотой асуудлаар шинээр боловсруулах хууль тогтоомж, тушаал, шийдвэрийн төслийг Засгийн газар болон хувийн хэвшлийн хамтарсан Зөвлөлдөх хороотой зөвшилцсөний үндсэн дээр боловсруулан Засгийн газарт оруулах, баталж мөрдүүлж байхыг холбогдох сайд, агентлагийн дарга нарт үүрэг болгосугай.

4. Бизнесийн таатай орчинг бүрдүүлэх, бизнес эрхлэгчдэд үйлчлэх шат дамжлагын тоог цөөрүүлж хүнд суртлыг багасгах, бизнес эрхлэхтэй холбогдсон тусгай зөвшөөрлийг цөөрүүлэх чиглэлээр холбогдох хууль тогтоомжид нэмэлт, өөрчлөлт оруулах, хууль тогтоомжид нийцээгүй тусгай зөвшөөрөл, лиценз, төлбөр, хураамжийг хүчингүй болгох арга хэмжээ авч дүнг Засгийн газарт танилцуулж, Монголын үндэсний худалдаа, аж үйлдвэрийн танхимд мэдээлэхийг холбогдох сайд, агентлагийн дарга, аймаг, нийслэлийн Засаг дарга нарт тус тус даалгасугай.

5. Бизнес эрхлэгчдэд үзүүлэх үйлчилгээг 2004 оны 9 дүгээр сарын 1-ний дотор "Нэг цэгийн үйлчилгээ"-ний зарчимд шилжүүлэхийг яамдын Төрийн нарийн бичгийн дарга, агентлагийн дарга, бүх шатны Засаг дарга нарт даалгаж, хэрэгжилтэд нь хяналт тавьж ажиллахыг Монгол Улсын сайд, Засгийн газрын Хэрэг эрхлэх газрын дарга Ө.Энхтүвшинд үүрэг болгосугай.

6. Бизнес эрхлэгчдийн саналыг төрийн бодлогод тусгуулах, төр, засгийн бодлого, үйл ажиллагаатай уялдуулах зорилгоор аймаг, нийслэлийн Засаг даргын Тамгын газар тухайн нутаг дэвсгэрийнхээ Худалдаа, аж үйлдвэрийн танхимын салбартай хамтран ажиллах механизмыг 2004 оны 9 дүгээр сарын 1-ний дотор бий болгон ажиллуулахыг Засаг дарга нарт даалгаж, түүний хэрэгжилтэд хяналт тавьж ажиллахыг Монгол Улсын сайд, Засгийн газрын Хэрэг эрхлэх газрын дарга Ө.Энхтүвшинд үүрэг болгосугай.

7. Монгол Улс "Олон улсын бараа, бүтээгдэхүүнийг кодлох Европын байгууллага"-д элссэнтэй холбогдуулан бараа, бүтээгдэхүүний "Зураасан код" хэрэглэх үйл ажиллагааг дэмжиж ажиллахыг холбогдох сайд нарт даалгасугай.

8. Засгийн газар, хувийн хэвшлийн хамтын ажиллагааг сайжруулах, харилцан ойлголцох механизмыг төгөлдөржүүлэх, жижиг, дунд бизнесийг дэмжих зорилгоор дараахь арга хэмжээг судлан 2004-2005 онд хэрэгжүүлэх арга хэмжээ авахыг Засгийн газар болон хувийн хэвшлийн хамтарсан Зөвлөлдөх хорооны Засгийн газрын хэсгийн дарга, Санхүү эдийн засгийн сайд Ч.Улаанд даалгасугай:

а/орон нутагт эдийн засаг, бизнесийн таатай орчин бүрдүүлэх, хөдөөгийн бизнес эрхлэгчдийн үйл ажиллагааг дэмжих, өргөжүүлэн хөгжүүлэх талаар авах цогц арга хэмжээний талаархи тодорхой саналыг Монголын үндэсний худалдаа, аж үйлдвэрийн танхимтай хамтран боловсруулж Засгийн газар болон хувийн хэвшлийн хамтарсан Зөвлөлдөх хороогоор хэлэлцүүлэх;

б/Монголын үндэсний худалдаа, аж үйлдвэрийн танхимаас зах зээлийн шинэ үйлчилгээг нэвтрүүлэх, монголын аж ахуйн нэгжүүдийн олон улсын зах зээлд өрсөлдөх чадварыг сайжруулах, андеррайтерийн үйл ажиллагаа явуулах талаар гаргаж байгаа санаачилгыг дэмжих, хамтран ажиллах чиглэлээр тодорхой арга хэмжээ авах;

в/бизнесийн үйл ажиллагаатай холбоотой асуудлаар шинээр хууль тогтоомж гаргахын өмнө Засгийн газар болон хувийн хэвшлийн хамтарсан Зөвлөлдөх хороогоор хэлэлцдэг байх, гарсан шийдвэрийг хэрэгжүүлэх талаар хамтран ажилладаг байх журам тогтоох;

г/худалдаа, бизнесийг дэмжих, бизнесийн үйл явц, худалдаа эрхлэхэд учирдаг төрөл бүрийн хориг саадыг хөнгөвчлөх, электрон худалдааг хөгжүүлэх зорилгоор Засгийн газар болон хувийн хэвшлийн хамтарсан Зөвлөлдөх хорооны дэргэд Худалдаа, бизнесийг хөнгөвчлөх зөвлөлийг байгуулж ажиллуулах.

Монгол Улсын Ерөнхий сайд Н.ЭНХБАЯР

Санхүү, эдийн засгийн сайд Ч.УЛААН