Засгийн Газрын 1998 оны 210 дугаар тогтоолын хавсралт

УС, ЦАГ УУР, ОРЧНЫ ХЯНАЛТ ШИНЖИЛГЭЭНИЙ УЛСЫН ХЯНАЛТЫН ДҮРЭМ

 

1.Ус, цаг уур, орчны хяналт шинжилгээний тухай хууль тогтоомж, түүнийг үндэслэн эрх бүхий байгууллагаас нийтээр дагаж мөрдөхөөр тогтоосон дүрэм, журам, зааврын биелэлтийг хангуулахад энэ дүрмийг дагаж мөрдөнө.

2.Ус, цаг уур, орчны шинжилгээний төрийн захиргааны байгууллагад  улсын ерөнхий байцаагч, улсын ахлах байцаагч, орон нутгийн байгууллагад улсын байцаагч /цаашид "улсын байцаагч" гэнэ/ ус, цаг уур, орчны шинжилгээний улсын хяналтыг хэрэгжүүлнэ.

3. Ус, цаг уур, орчны  хяналт шинжилгээний байгууллагад ажиллаж байгаа ус, цаг уурын мэргэжилтэй, ус, цаг уур орчны шинжилгээний ажлын технологи, хэмжих хэрэгслийн баталгаажуулалтын талаар дадлага туршлагатай ажилтанд улсын байцаагчийн эрх олгож болно.

4. Ус, цаг уур, орчны хяналт шинжилгээний Улсын ерөнхий байцаагчийн эрхийг Байгаль орчны сайдын санал болгосноор Засгийн газар, улсын ахлах байцаагчийн эрхийг ерөнхий байцаагчийн санал болгосноор Байгаль орчны сайд, улсын байцаагчийн эрхийг аймаг, нийслэлийн Засаг дарга тус тус олгоно.

5. Ус, цаг уур, орчны  хяналт шинжилгээний улсын байцаагч нь үйл ажиллагаандаа Монгол Улсын холбогдох хууль тогтоомж, Засгийн газрын шийдвэр, эрх бүхий байгууллагаас дагаж мөрдөхөөр тогтоосон дүрэм, журам, заавар болон энэхүү дүрмийг удирдлага болгоно.

6. Ус, цаг уур, орчны  хяналт шинжилгээний улсын байцаагч нь батлагдсан загвар бүхий үнэмлэх, хувийн дугаар бүхий тэмдэг болон албан шаардлага, актын хэвлэмэл хуудас хэрэглэнэ.

7. Ус, цаг уур, орчны хяналт шинжилгээний улсын байцаагчийг мэргэжил, арга зүйн удирдлагаар хангах, тэдний мэргэжлийг дээшлүүлэх, мэргэшүүлэх, түүнчлэн шалгалтын дүнг нэгтгэн, шаардлагатай асуудлаар шийдвэр гаргах ажлыг ус, цаг уур, орчны шинжилгээний төрийн захиргааны байгууллага хариуцан хэрэгжүүлнэ.

 

 

8. Ус, цаг уур, орчны  хяналт шинжилгээний хяналтыг улсын сүлжээний хэмжлийн нэгдмэл байдал, мэдээлэл дамжуулах болон хэрэглэгчдийг хангах, Засаг даргын эрх үүргийн хэрэгжилт гэсэн чиглэлээр гүйцэтгэнэ.

9. Ус, цаг уур, орчны  хяналт шинжилгээний улсын хяналтад дор дурдсан асуудал хамарна:

1/.ус, цаг уур, орчны сүлжээний нэгжийн шинжилгээ хийх, мэдээлэл цуглуулах, дамжуулах, боловсруулах, дүн шинжилгээ хийх, иргэн, аж ахуйн нэгж, байгууллагыг ус, цаг уур, орчны мэдээллээр үйлчлэх талаар батлан гаргасан аргачлал, хөтөлбөр, дүрэм, журмын мөрдөлт;

2/. Ус, цаг уур, орчны хяналт шинжилгээний улсын сүлжээний нэгжийг мэргэжлийн удирдлагаар хангах үүрэг бүхий байгууллагын үйл ажиллагаа, тэдгээрийн хэрэгжилт;

3/.улсын сүлжээний өртөө, харуулыг байгуулах, татан буулгах, нүүлгэн шилжүүлэх үйл ажиллагааны эрх зүйн талаархи баримт бичгийн мөрдөлт;

4/. Ус, цаг уур, орчны  хяналт шинжилгээний талбай, тоног төхөөрөмжийн ашиглалтын нөхцөл, арчилгаа, хамгаалалт;

5/.хэмжих хэрэгслийн үйлдвлэрлэл, засвараас гарсны дараа болон ашиглах, хадгалах явцад улсын баталгаажуулалтад хамруулсан байдал, аж ахуйн нэгж, байгууллага, иргэдийн үйлдвэрлэсэн буюу импортолсон хэмжих хэрэгсэл нь Монгол Улсын нутаг дэвсгэр дээр ус, цаг уур, орчны хяналт шинжилгээний ажил гүйцэтгэх техникийн нөхцөл, стандартын шаардлагыг хангаж чадахыг тогтоосон загварын туршилт болон анхдагч баталгаажуулалтад орсон эсэх;

7/.хэмжих хэрэгслийг баталгаажуулахад ашиглаж байгаа эталоны техникийн бэлэн байдал;

8/ ус, цаг, уур, орчны тусгай хэрэгцээний мэдээллээр иргэн, аж ахуйн нэгж, байгууллагыг хангах гэрээ, хэлцэл, ус, цаг уурын үзэгдэлтэй холбогдсон байгалийн гамшгаас сэргийлэх мэдээний хангалт, ашиглалтын талаар иргэн, аж ахуйн нэгж, байгууллагаас хууль тогтоомж, журмын дагуу хүлээсэн үүргийн мөрдөлт;

9/ ус, цаг уур, орчны хяналт шинжилгээний улсын сүлжээний ажиллах нөхцөл, үйл ажиллагааныдэг журам;

10/ иргэн, аж ахуйн нэгж, байгууллагыг ус, цаг уур, орчны мэдээллээр үйлчлэх, хэрэглэгчдийг хангах, ус, цаг уурын үзэгдэлтэй холбогдсон байгалийн болзошгүй гамшиг, орчны ноцтой бохирдлоос сэргийлэх ажлын зохион байгуулалт;

11/ нутаг дэвсгэртээ ус, цаг уурын үзэгдэлтэй холбогдсон байгалийн гамшгийн улмаас учирсан хохирлын тооцоог гаргаж төрийн захиргааны байгууллагад мэдээлж буй байдал.

 

 

10.Улсын байцаагч нь дор дурдсан үүрэг гүйцэтгэнэ:

1/ энэ дүрмийн 9 дүгээр зүйлд заасан чиглэлийн дагуу ус, цаг уур, орчны шинжилгээний хяналтыг зохион байгуулж хэрэгжүүлэх;

2/ хөндлөнгийн нөлөөнд үл автан албан үүргээ шударгаар гүйцэтгэх, аль нэг аж ахуйн нэгж, байгууллагын болон иргэний ашиг сонирхлыг төлөөлөн, тэдгээрт ашигтай, давуу тал бий болгосон шийдвэр гаргахыг цээрлэж хяналт шалгалтыг бүрэн гүйцэд хийх;

3/ хийсэн шалгалт, гаргасан дүгнэлт, тавьсан акт, албан шаардлагын үнэн зөвийг бүрэн хариуцах;

4/ хяналт, шалгалтын явцад илэрсэн зөрчлийг арилгуулах, таслан зогсоох, урьдчилан сэргийлэх арга хэмжээ авахуулах.

11.Улсын байцаагч  нь дор дурдсан эрх эдэлнэ:

1/хяналт, шалгалтаар илэрсэн зөрчил, дутагдлыг арилгах, таслан зогсоох талаар аж ахуйн нэгж, байгууллага, албан тушаалтан, холбогдох хүмүүст шаардлага тавьж хугацаатай үүрэг, даалгавар өгч биелэлтийг хангуулах

2/хяналт, шалгалтын үед шаардлагатай мэдээ, судалгаа, тайлбар, баримт материалыг үнэ төлбөргүйгээр тухайн аж ахуйн нэгж, байгууллага, албан тушаалтнаар гаргуулах, мэргэжлийн байгууллага, ажилтнуудыг шалгалтын ажилд татан оролцуулах;

3/улсын баталгаажуулалтад хамрагдаагүй, эсвэл загвар нь батлагдаагүй буюу баталсан загвартаа тохирохгүй байгаа хэмжих хэрэгсэл ашиглахыг түдгэлзүүлэх, зогсоох;

4/баталгаагүй хэмжих хэрэгслээр хийсэн ус, цаг уур, орчны хяналт шинжилгээний дүнг албан ёсны мэдээлэлд ашиглахыг зогсоох;

5/баталгаажуулалтын хугацаа дууссан буюу буруу заалттай хэмжих хэрэгслийн лац, тэмдгийг хүчингүй болгож хураах, дахин баталгаажуулалт хийлгэх.

12.Улсын байцаагч нь ус, цаг уур, орчны  хяналт шинжилгээний тухай хууль тогтоомж зөрчсөн этгээдэд "Ус, цаг уур, орчны хяналт шинжилгээний тухай" хуулийн 16 дугаар зүйлд заасан захиргааны хариуцлага хүлээлгэнэ.

 

13. Ус, цаг уур, орчны  хяналт шинжилгээний улсын байцаагчийн албан шаардлагыг иргэн, албан тушаалтан, аж ахуйн нэгж, байгууллага хугацаанд нь биелүүлж хариуг албан ёсоор өгч байх үүрэгтэй.

14.Иргэн, аж ахуйн нэгж, байгууллага нь улсын байцаагчийн гаргасан шийдвэрийг эс зөвшөөрвөл гомдлоо уг шийдвэр гарснаас хойш 10 хоногийн дотор ус, цаг уур, орчны хяналт шинжилгээний дээд шатны байцаагчид гаргаж болно.

Уг гомдлыг хүлээн авснаас хойш 30 хоногийн дотор хянаж шийдвэрлэнэ.Дээд шатны байцаагчийн шийдвэрийг эс зөвшөөрвөл маргааныг шүүх шийдвэрлэнэ.

Гомдол гаргах нь зөрчлийг хэрэгсэхгүй байх үндэслэл болохгүй.

15.Улсын байцаагч үүрэгт ажлаа зохих ёсоор биелүүлээгүй, хууль тогтомж зөрчсөн бол түүнд холбогдох хууль тогтоомжид заасны дагуу хариуцлага хүлээлгэнэ.