legalinfo.mn

+(976)-11-323317

info@legalinstitute.mn

A

A

A

en
Нууц үг сэргээх Шинээр бүртгүүлэх
  • Бүртгүүлэх
Шүүлтүүр
Бүлэг: 1979
Засгийн газрын 1993 оны 54 дүгээр тогтоолын хавсралт


ЦӨМИЙН ЭНЕРГИЙН КОМИССЫН ДҮРЭМ

(Засгийн газрын 1997 оны 180 дугаар тогтоолоор хүчингүй болсонд тооцсон)

 НЭГ.Нийтлэг үндэслэл

1.Цөмийн энергийн комисс нь /цаашид комисс гэнэ/ цөмийн энергийг ашиглах, цацрагаас хамгаалах бодлогыг холбогдох байгууллагуудтай хамтран боловсруулж хэрэгжүүлэх, хяналт тавих эрх бүхий Засгийн газрын байгууллага мөн.
2.Комиссын зорилт нь шинжлэх ухаан, үйлдвэрлэлд цөмийн энергийг ашиглах, цөмийн суурь болон хавсарга шинжилгээний ажлын чиглэл, хэтийн төлөв болон цацрагийн хамгаалалтын бүтэц, зохион байгуулалт, цацрагийн хяналтын нэгдсэн бодлогыг боловсруулах, уг асуудлаар Олон улсын байгууллага, гадаад орнуудтай Монгол Улсын аж ахуйн нэгж, байгууллагуудын хэрэгжүүлэх хамтын ажиллагааг зохицуулж хяналт тавихад оршино.
3.Комисс нь үйл ажиллагаандаа Монгол Улсын хууль тогтоомж, Засгийн газрын шийдвэр, энэхүү дүрмийг удирдлага болгоно.
 4.Комисс эрх хэмжээнийхээ хүрээнд Монгол Улсын хууль тогтоомж, Засгийн газрын шийдвэрт нийцүүлэн тодорхой асуудлаар тогтоол гаргаж биелэлтэд нь хяналт тавьж ажиллана.
5.Комиссын бүрэлдэхүүн, дүрмийг Монгол Улсын Засгийн газар батална.
6.Комисс нь тогтоосон журмаар хийсэн тамга, тэмдэг, албан бичгийн хэвлэмэл хуудас хэрэглэнэ.
7.Комисс нь улсын төсөв, бусад эх үүсвэрээс санхүүжинэ.

ХОЁР.Комиссын үүрэг, эрх

8.Комисс дор дурдсан үүрэг гүйцэтгэнэ:
     а/цөмийн энергийг ашиглах цөмийн шинжилгээний ажлыг хөгжүүлэхэд баримтлах зарчим, үндсэн чиглэл, хэтийн төлөвийг холбогдох байгууллагуудтай хамтран боловсруулах;
       б/цөмийн энергийг ашиглах, цацрагаас хамгаалахтай холбогдуулан улс орны хэмжээнд мөрдөх техникийн норм, норматив, дүрэм, журмыг холбогдох байгууллагуудтай хамтран боловсруулж Засгийн газарт оруулан шийдвэрлүүлж, биелэлтэд нь хяналт тавих;
       в/холбогдох байгууллагуудыг цөмийн болзошгүй ослын аюулаас урьдчилан сэргийлэх, энэ талаар зохих бэлтгэлтэй байлгах зорилгоор нэгдсэн мэдээллээр хангаж шаардлагатай арга хэмжээ авахуулах;
       г/цөмийн шинжилгээний ололтыг тус улсын шинжлэх ухаан, үйлдвэрлэлийн салбарт нэвтрүүлэх санал боловсруулах;
       д/тус улсын нутаг дэвсгэр дээрх аж ахуйн нэгжүүд, олон улсын байгууллага, гадаад улсын байгууллагаас цөмийн энергийг ашиглах талаар явуулж байгаа үйлдвэрлэл, эрдэм шинжилгээний ажлын явцад хяналт тавих;
       е/цөмийн энергийг ашиглах, хамтарсан судалгаа, шинжилгээний ажил гүйцэтгэхээр олон улсын байгууллага, гадаад орнуудын зохих байгууллагатай гэрээ хэлэлцээ хийх;
       ж/иончлогч цацрагийн үүсгүүрийг Олон улсын атомын энергийн агентлаг /МАГАТЭ/-аас гаргасан аюулгүй ажиллагааны зөвлөмжийн түвшинд зохистой ашиглах, зөв хадгалж хамгаалах, тээвэрлэх нөхцөлийг бүрдүүлэх сургалт, эрдэм шинжилгээ, хяналт зохицуулалтын ажлыг зохион байгуулах;
       з/цөмийн энергийн асуудлаар боловсон хүчин бэлтгэх, тэдний мэргэшлийг дээшлүүлэх ажлыг холбогдох байгууллагатай хамтран зохион байгуулах.
9.Комисс дор дурдсан эрх эдэлнэ:
       а/батлагдсан цалингийн сандаа багтаан ажлын аппаратынхаа орон тоог тогтоох;
       б/цөмийн энерги ашиглах асуудлаар мэдээ, материалыг холбогдох яам, тусгай газар, аймаг, нийслэлийн Засаг даргын Тамгын газар, хотын Ардын Хурлын гүйцэтгэх захиргаа, аж ахуйн нэгж, байгууллагаас гаргуулан авах, мэдээлэл хийх;
       в/иончлогч цацрагийн үүсгүүр, цацраг идэвхт бодис бүхий бараа, материалыг Монгол Улсын нутаг дэвсгэрт оруулах, гаргах, дамжуулан өнгөрүүлэх асуудлыг холбогдох байгууллагуудын санал, дүгнэлтийг үндэслэн эцэслэн шийдвэрлэх;
       г/цөмийн энергийг ашиглах асуудал боловсруулах хяналт шалгалтыг зохион байгуулахдаа холбогдох байгууллагын удирдлагатай тохиролцсоны үндсэн дээр мэргэжлийн хүмүүсийг оролцуулах, багаж төхөөрөмжийг нь ашиглах, шаардлагатай үед шинжээчдийн хэсэг томилон ажиллуулах;
       д/цацрагийн аюулгүйн шаардлага хангаагүй иночлогч цацрагийн үүсгүүр, тоног төхөөрөмжийг ашиглах явдлыг хэрэглэгчийн зүгээс зөрчлийг арилгах хүртэл нь түр зогсоох, шаардлагатай бол үүсгүүрийг хадгалалт, хамгаалалтын зохих нөхцөл хангасан байранд шилжүүлэх тухай шийдвэр гаргах, журам зөрчигчдөд Монгол Улсын хууль тогтоомжид заасан хариуцлага хүлээлгэх тухай асуудлыг эрх бүхий байгууллагад тавих;
       е/цөмийн болзошгүй ослоос урьдчилан сэргийлэх, энэ талаар зохих бэлтгэлтэй байлгах, хяналт тавих үйл ажиллагааны хүрээнд олон улсын байгууллага, гадаад орнуудтай хамтран ажиллах, тэдгээрээс тусламж авах, харилцан мэдээлэл солилцох;
       ж/цөмийн энергийн асуудлаар зохих журмын дагуу гэрээ, хэлэлцээр хийх, лаборатори байгуулах, судалгааны ажил явуулах, эрдэм шинжилгээний хурал, зөвлөлгөөн зохион байгуулах.
 
 
---оОо---
 

Текст томруулах

A

A

A