Засгийн газрын 2003 оны 188 дугаар тогтоолын хавсралт

ОРОН НУТАГТ ҮЙЛДВЭРЛЭЛ ХӨГЖҮҮЛЭХ ЧИГЛЭЛ

 

Түүхий эдийн нөөц, боломжид тулгуурлан хүнсний болон өргөн хэрэглээний барааны үйлдвэрлэлийг орон нутагт хөгжүүлэх, экспортын баримжаатай болон импортыг орлох бүтээгдэхүүний үйлдвэрлэлийг хөгжүүлэх замаар хөдөөгийн хүн амын амьжиргааны түвшинг дээшлүүлэх, ажлын байр нэмэгдүүлэх зорилтыг хангахад "Орон нутагт үйлдвэрлэл хөгжүүлэх чиглэл"-ийн зорилго оршино.

Бүсчилсэн хөгжлийн үзэл баримтлал, тухайн орон нутгийн хэрэгцээ, шаардлагыг харгалзан орон нутагт үйлдвэрлэл хөгжүүлэхэд дараахь чиглэлийг баримтална:

1/Бүс нутгийн хөгжлийн үзэл баримтлалтай уялдуулан хөгжүүлэх үйлдвэрлэл

Бүсийн тулгуур төвүүдэд хөдөө аж ахуйн түүхий эд боловсруулах, экспортын баримжаатай үйлдвэрлэлийг байршуулах, импортыг орлох бүтээгдэхүүний үйлдвэрлэлийг бий болгох, зарим нутаг дэвсгэрт аж үйлдвэрийн парк байгуулах замаар үйлдвэрлэлийг хөгжүүлнэ. Бүсийн хөгжилд нөлөө бүхий, ажиллаж байсан болон ажиллаж байгаа үйлдвэрүүдийг сэргээх, хүч чадлыг нэмэгдүүлэх, өргөтгөх, шинээр байгуулахад дараахь чиглэлийг баримтална:

 

2/ Хүнсний үйлдвэрлэл

 

Орон нутгийн хүн амын хүнсний гол нэрийн бүтээгдэхүүний одоо ажиллаж байгаа үйлдвэрүүдийн жигд ажиллагааг хангахад дэмжлэг үзүүлж, доорхи төрлийн бүтээгдэхүүний хүнсний жижиг үйлдвэрүүдийг шинээр байгуулах чиглэл баримталж, импортыг орлох бүтээгдэхүүний үйлдвэрлэлийг нэмэгдүүлнэ:

 

 

·          Гурил үйлдвэрлэх, сүү, сүүн бүтээгдэхүүн боловсруулах, жимс жимсгэнэ, төмс, хүнсний ногоо боловсруулах, нөөшлөх, савлах, малын тэжээл, өвс, хадлан бэлтгэх, баглах үйлдвэрүүдэд түгээмэл хэрэглэгддэг технологи ашиглах зорилт тавина.

·          Хүн амын хүнсний аюулгүй байдлыг хангасан бүтээгдэхүүний үйлдвэрлэлийг дэмжиж, нэр төрлийг олшруулахад анхаарна.

3/ Өргөн хэрэглээний барааны үйлдвэрлэл

·          Мал аж ахуйн гаралтай түүхий эдийг орон нутагт нь боловсруулахад анхаарч, хүн амын өргөн хэрэглээний барааны үйлдвэрлэлийг аймаг, сумдын төв рүү чиглүүлнэ. Дараахь өргөн хэрэглээний барааны жижиг үйлдвэрүүдийг орон нутагт хөгжүүлэх чиглэл баримтална:

 

 

·          Эсгий, эсгий гутал, савхин гутал, оёмол, сүлжмэл бүтээгдэхүүн, гэрийн модон эдлэлийн үйлдвэрүүдэд түгээмэл хэрэглэгддэг технологи ашиглах зорилт тавина.

4/ Орон нутагт үйлдвэрлэл хөгжүүлэхдээ дараахь зарчмыг баримтална:

·          Зээлийн баталгаа гаргах, даатгалын гэрчилгээ үзүүлэх механизмыг бүрдүүлнэ.

·          Олон улсын байгууллага, гадаад орнуудын хөнгөлттэй зээлийн тодорхой хэсгийг орон нутгийн үйлдвэрүүдийг хөгжүүлэхэд чиглүүлнэ.

·          Импортыг орлох бүтээгдэхүүний үйлдвэрлэлийг нэмэгдүүлэхэд чиглэсэн татварын ялгавартай бодлого баримтална.

·          Орон нутаг дахь "Зөвлөлгөө өгөх алба"-ны үйл ажиллагааг дэмжиж, өргөжүүлнэ.

·          Бүтээгдэхүүний чанар сайжруулах, шинэ техник, технологи эзэмших, мэргэжлийн боловсон хүчний ур чадварыг дээшлүүлэх, орчин үеийн техник, технологид тулгуурласан мэдээллийн сүлжээ байгуулахад олон улсын байгууллага, гадаад орнуудтай хамтын ажиллагааг хөгжүүлнэ.

 

 

-------оОо-------