ДААТГУУЛАГЧИЙН НИЙМГИЙН ДААТГАЛЫН ШИМТГЭЛ ТӨЛӨХ, ТЭТГЭВЭР, ТЭТГЭМЖ ТОГТООЛГОХ ХӨДӨЛМӨРИЙН ХӨЛС, ТҮҮНТЭЙ АДИЛТГАХ ОРЛОГЫН БҮРЭЛДЭХҮҮН, ДУНДЖИЙГ ТОДОРХОЙЛОХ ЖУРАМ (Засгийн газрын 2020 оны 148 дугаар тогтоолоор хүчингүй болсонд тооцсон)

Эрх зүйн акт

~~Засгийн газрын 1994 оны 212 дугаар тогтоолын 1 дүгээр хавсралт~~

ДААТГУУЛАГЧИЙН НИЙМГИЙН ДААТГАЛЫН ШИМТГЭЛ ТӨЛӨХ, ТЭТГЭВЭР, ТЭТГЭМЖ ТОГТООЛГОХ
ХӨДӨЛМӨРИЙН ХӨЛС, ТҮҮНТЭЙ АДИЛТГАХ ОРЛОГЫН БҮРЭЛДЭХҮҮН, ДУНДЖИЙГ ТОДОРХОЙЛОХ ЖУРАМ

(Засгийн газрын 2020 оны 148 дугаар тогтоолоор хүчингүй болсонд тооцсон)

1. Даатгуулагчийн нийгмийн даатгалын шимтгэл төлөх, тэтгэвэр, тэтгэмж тогтоолгох хөдөлмөрийн хөлс, түүнтэй адилтгах орлогын бүрэлдэхүүн, дунджийг тодорхойлоход энэүү журмыг баримтална.

2. Нийгмийн даатгалын шимтгэл ногдуулах хөдөлмөрийн хөлсний бүрэлдэхүүнд дараахь үндсэн болон нэмэгдэл хөлс, шагналыг оруулж тооцно:

~~а/эрх бүхий байгууллагаас тогтоосон хөдөлмөрийн хөлс /цалин/;~~

~~б/хөдөлмөрийн гэрээнд тохиролцсоны дагуу тухайн ажилтны авч байгаа хөдөлмөрийн үндсэн болон нэмэгдэл хөлс;~~

в/ажил мэргэжил, цол, хөдөлмөрийн хүнд, хортой болон халуун, газрын доорхи нөхцөл, бүс нутаг зэргийг харгалзан хууль тогтоомжийн дагуу олгож байгаа бүх төрлийн нэмэгдэл хөлс;

г/хөдөлмөрийн хөлсний болон шагналын сангаас үйлдвэрлэл, үйлчилгээ, ажлын үр дүнг харгалзан сар, улирлаар олгосон шагнал;

~~д/иргэд хоорондын гэрээгээр тохиролцсон хөдөлмөрийн үндсэн болон нэмэгдэл хөлс, шагнал;~~

е/тус улсын нутаг дэвсгэрт үйл ажиллагаагаа явуулж байгаа гадаадын байгууллага, аж ахуйн нэгжид ажилладаг Монгол Улсын иргэний валютаар болон төгрөгөөр авсан хөдөлмөрийн үндсэн болон нэмэгдэл хөлс, шагнал;

ж/Монгол Улстай нийгэм хангамжийн салбарт хамтран ажиллах гэрээ бүхий гадаад оронд хувийн журмаар ажиллаж байгаа иргэний валютаар авсан хөдөлмөрийн үндсэн болон нэмэгдэл хөлс.

3.Нийгмийн даатгалын шимтгэл ногдуулах хөдөлмөрийн хөлстэй адилтгах орлого, түүний бүрэлдэхүүнд дараахь орлогыг оруулан тооцно:

~~а/хувиараа хөдөлмөр эрхлэгчид, чөлөөт уран бүтээлчдийн олсон нийт орлогын хөдөлмөрийн хөлсөнд ногдох хэсэг;~~

~~б/хувийн аж ахуйгаас бусдад борлуулсан бүтээгдэхүүний орлогын хөдөлмөрийн хөлсөнд ногдох хэсэг;~~

~~в/үндсэн ажил, үүргээс гадуур байгууллага иргэдтэй гэрээгээр гүйцэтгэсэн ажил, үйлчилгээний хөлс, орлого;~~

~~г/зохиол, уран бүтээлийн тоглолтын орлогоос уран бүтээлчдэд олгосон шагнал;~~

~~д/ээлжийн амралтын цалин хөлс, жирэмсний, амаржсаны болон хөдөлмөрийн чадвар түр алдсан тэтгэмж;~~

е/аж ахуйн нэгж, байгууллагаас ажиллагчдынхаа байр, орон сууц, унаа, хоол, түлээ, нүүрсний үнийн талаар үзүүлж буй хөнгөлөлт зэрэг хөдөлмөрийн хөлстэй адилтгах бусад орлого.

Энэ журмын 2 дугаар зүйлийн "е", "ж"-д заасны дагуу гадаад орны валютаар авсан хөдөлмөрийн хөлсийг Монгол банкнаас тухайн үед тогтоосон ханшаар төгрөгт шилжүүлэн тооцож шимтгэл ногдуулна.

~~(Засгийн газрын 1996 оны 128 дугаар тогтоолоор өөрчлөлт орсон)~~

4. Улсын төсвөөс зардлыг нь санхүүжүүлэн гадаад оронд ажиллуулж байгаа Монгол Улсын байгууллагад түүнчлэн олон улсын байгууллагад ажилладаг иргэдийн хувьд хөдөлмөрийн хөлсийг нь Монгол Улсын адилтгах албан тушаалын үндсэн ба нэмэгдэл хөлс, шагналын хэмжээгээр авч үзэж тооцно.

~~(Засгийн газрын 1996 оны 128 дугаар тогтоолоор өөрчлөлт орсон)~~

5. Аж ахуйн нэгж, байгууллага ажиллагчдадаа биет бүтээгдэхүүнээр тооцож хөдөлмөрийн хөлсийг нь олгосон тохиолдолд биет зүйлийг тухайн орон нутгийн ханшийн үнээр төгрөгт шилжүүлж шимтгэл ногдуулах хөдөлмөрийн хөлсийг тооцно.

~~(Засгийн газрын 1996 оны 128 дугаар тогтоолоор өөрчлөлт орсон))~~

6. Энэ журмын 3 дугаар зүйлийн "а", "б", "в" хэсэгт заасан орлогын хөдөлмөрийн хөлсөнд ногдох хэсгийг тодорхойлохдоо нийт орлогоос нь бүх төрлийн материалын зардал /түүхий эд, үндсэн болон туслах материал, хагас боловсруулсан зүйл, уур, ус, эрчим хүч, түлш, шатахуун, сэлбэг хэрэгсэл, сав, баглаа боодол/, татвар, шимтгэл, хураамж, төлбөр, бусдаар гүйцэтгүүлсэн ажил, үйлчилгээний хөлсийг хасаж тооцно.

7. Энэ журмын 5 дугаар зүйлд заасны дагуу тооцсон хөдөлмөрийн хөлсөнд ногдох орлогын хэсэг нь Засгийн газраас тогтоон тухайн үед мөрдүүлж буй хөдөлмөрийн хөлсний доод хэмжээнээс бага буюу түүнийг тооцох боломжгүй нөхцөлд хөдөлмөрийн хөлсний доод хэмжээнээс тооцож шимтгэл ногдуулахаар гэрээгээр тохиролцож болно.

8. Тэтгэвэр бодох хөдөлмөрийн хөлс, түүнтэй адилтгах орлогын дунджийг тодорхойлохдоо Нийгмийн даатгалын сангаас олгох тэтгэвэр, тэтгэмжийн тухай хуулийн 22 дугаар зүйлийн 1, 2 дахь хэсэгт заасан журмаар тооцно.

9. Хөдөлмөрийн чадвар түр алдсаны тэтгэмж бодож олгох сарын дундаж хөдөлмөрийн хөлсний бүрэлдэхүүнд энэ журамд заасан хөдөлмөрийн үндсэн хөлс, нэмэгдэл хөлс, нэмэгдэл, тэдгээртэй адилтгах орлогыг оруулан тооцно.

~~(Засгийн газрын 1996 оны 128 дугаар тогтоолоор өөрчлөлт орсон)~~

10. Засгийн газраас тухайн үед тогтоон мөрдүүлж байгаа даатгуулагчийн нийгмийн даатгалын шимтгэл төлөх сарын хөдөлмөрийн хөлс, түүнтэй адилтгах орлогын дээд хэмжээнээс илүү гарсан хөдөлмөрийн хөлс, орлогод нийгмийн даатгалын шимтгэл ногдуулахгүй.

~~(Засгийн газрын 1996 оны 128 дугаар тогтоолоор өөрчлөлт орсон)~~

~~--------оОо-------~~

Шүүлтүүр

Сонсох:

Эрх зүйн актууд

Санал хүсэлт