БАЙГУУЛЛАГА ХООРОНДЫН ГЭРЭЭ БАЙГУУЛАХ ЖУРАМ /ЗГ-ын 2017 оны 57-р тогтоолоор хүчингүй болсонд тооцсон/

Хүчингүй эрх зүйн акт

~~Засгийн газрын 1994 оны 201 дүгээр тогтоолын хавсралт~~

~~БАЙГУУЛЛАГА ХООРОНДЫН ГЭРЭЭ БАЙГУУЛАХ ЖУРАМ~~

/ЗГ-ын 2017 оны 57-р тогтоолоор хүчингүй болсонд тооцсон/

1. Энэхүү журмыг дараахь байгууллагууд өөрийн үйл ажиллагааны дүрэмд тодорхойлсон бүрэн эрхэд хамаарах асуудлаар бусад улсын ижил төрлийн байгууллага, хуулийн этгээд, хувь хүнтэй байгууллага хоорондын гэрээ /хэлэлцээр, протокол, тохиролцоо гэх мэт ямар ч нэртэй байж болно/ байгуулахад баримтална:

а/Монгол Улсын яам, Засгийн газрын үндсэн болон дэд бүтцэд ордог газар болон нутгийн захиргааны байгууллага /цаашид "төрийн захиргааны төв болон нутгийн захиргааны байгууллага" гэнэ/;

~~б/тэдгээрийн харьяа төсөвт байгууллага;~~

в/төрийн гүйцэтгэх тусгай чиг үүргийг эрхлэн хэрэгжүүлж, тэр тухайдаа улсын төсвөөс санхүүжиж байгаа Засгийн газрын бус байгууллагууд тэрхүү үүргийнхээ хүрээнд.

2. Төрийн захиргааны төв болон нутгийн захиргааны байгууллагын харьяа төрийн өмчийн аж ахуйн нэгжээс гадаад улсын аж ахуйн нэгж, хуулийн этгээд, хувь хүнтэй байгууллага хоорондын гэрээ, арилжааны хэлцэл байгуулах болон тэдгээрийг зохих хууль тогтоомжийн дагуу уг асуудлыг хариуцсан төрийн захиргааны төв байгууллагаар хянуулахад энэ журамд хамаарахгүй.

3. Энэ журмын 1-д дурдсан байгууллага нь өөрийн бүрэн эрхэд хамаарах асуудлаар гадаад улсын ижил төрлийн байгууллага, хуулийн этгээд, хувь хүнтэй байгууллага хооронд гэрээ байгуулахдаа Монгол Улсын хууль, хууль тогтоомжийн бусад акт, тухайн улстай байгуулсан Монгол Улсын олон улсын гэрээний заалтыг удирдлага болгоно.

4. Энэ журмын 1-д дурдсан байгууллагууд дор дурдсан чиглэлийн гэрээ байгуулахад Монгол Улсын Засгийн газраас зөвшөөрөл авна:

~~а/бусад байгууллагын эрх ашгийг хөндсөн буюу хамтарч үүрэг хүлээх гэрээ;~~

б/эрх бүхий дээд шатны байгууллагаас тогтоон баталсан төсвөөс гадуур нэмэлт хөрөнгө шаардах заалт бүхий гэрээ;

~~в/Монгол Улсын хууль, хууль тогтоомжийн бусад актад зааснаас өөр журам тогтоож буй гэрээ.~~

5. Энэ журмын 1-ийн "а"-д дурдсан байгууллагууд 4-т зааснаас бусад асуудлаар гадаад улсын ижил төрлийн байгууллага, хуулийн этгээд, хувь хүнтэй байгууллага хоорондын гэрээг өөрсдөө шийдвэрлэн байгуулах бөгөөд уг гэрээг бүртгүүлж хянуулахаар гадаад харилцааны асуудал эрхэлсэн төрийн захиргааны төв байгууллагад түүнийг байгуулснаас хойш нэг сарын дотор ирүүлнэ.

6. Энэ журмын 1-ийн "б","в"-д дурдсан байгууллагууд 4-т зааснаас бусад асуудлаар гадаад улсын ижил төрлийн байгууллага, хуулийн этгээд, хувь хүнтэй байгууллага хоорондын гэрээ байгуулахдаа гэрээний төслийг тухайн асуудлыг хариуцсан төрийн захиргааны төв байгууллага, нутгийн захиргааны байгууллагын аль нэгэнд харъяаллынхаа дагуу урьдчилан хянуулан бртгүүлж бичгээр зөвшөөрөл авна.

7. Гадаад харилцааны асуудал эрхэлсэн төрийн захиргааны төв байгууллага энэ журмын 5-д заасны дагуу ирүүлсэн гэрээг Олон улсын гэрээний тухай Монгол Улсын хууль болон Монгол Улсын гадаад бодлогын үзэл баримтлалд нийцэж буй эсэхийг хянан үзнэ. Хэрэв гадаад харилцааны асуудал эрхэлсэн төрийн захиргааны төв байгууллага уг гэрээг хянан үзсэний эцэст дээрх шаардлагад бүрэн нийцэж буй гэж үзсэн тохиолдолд түүнийг гэрээ, хэлэлцээрийн бүртгэлд авч 14 хоногийн дотор холбогдох байгууллагад бичгээр хариу мэдэгдэнэ.

8. Хэрэв гадаад харилцааны асуудал эрхэлсэн төрийн захиргааны төв байгууллага уг гэрээг бүхэлд нь, эсвэл түүний хэсгийг эс мөрдөх тухай дүгнэлт гаргасан бол холбогдох байгууллагад энэ тухай 14 хоногийн дотор бичгээр мэдэгдэнэ.

9. Энэ журмын 8-д заасны дагуу гадаад харилцааны асуудал эрхэлсэн төрийн захиргааны төв байгууллага гэрээг бүхэлд нь, эсвэл түүний зарим хэсгийг эс мөрдөх тухай дүгнэлт гаргасан бол тухайн гэрээг бүхэлд нь, эсвэл түүний тухайн холбогдох хэсгийг тухайн гэрээг байгуулсан байгууллага өөрөө, эсвэл Засгийн газар хүчингүй болгоно.

10. Энэ журмын 1-ийн "а"-д дурдсан байгууллагууд гадаад улсын ижил төрлийн байгууллага, хуулийн этгээд, хувь хүнтэй байгууллага хоорондын гэрээ байгуулахын өмнө тухайн гэрээний төслийн талаар гадаад харилцааны асуудал эрхэлсэн төрийн захиргааны төв байгууллагын санал, дүгнэлтийг авч болно. Энэ тохиолдолд гадаад харилцааны асуудал эрхэлсэн төрийн захиргааны төв байгууллагад дор дурдсан материалыг ирүүлнэ:

~~а/нөгөө талтай хэлэлцэн тохирсон гэрээний төсөл;~~

~~б/гэрээ байгуулах шаардлага, ач холбогдол, санхүү, эдийн засгийн тооцоог тусгасан танилцуулга.~~

11. Гадаад харилцааны асуудал эрхэлсэн төрийн захиргааны төв байгууллага санал дүгнэлтээ 7 хоногт багтаан бичгээр өгнө.

Ийнхүү урьдчилан дүгнэлт гаргуулсан хэдий ч тухайн байгууллага энэ журмын 7-д заасны дагуу гадаад харилцааны асуудал эрхэлсэн төрийн захиргааны төв байгууллагад уг гэрээг бүртгүүлнэ.

12. Энэ журмын 1-ийн "а"-д дурдсан байгууллагуудын албан тушаалтан байгууллага хоорондын гэрээ байгуулах тохиолдолд асуудлыг тухайн байгууллагын удирдлагын дэргэдэх зөвлөлөөр хэлэлцүүлж, сайд, дарга нар тушаал, аймаг, нийслэлийн Засаг дарга захирамж тус тус гаргаж хэрэгжүүлнэ.

13. Энэ журмын 1-ийн "б", "в"-д дурдсан байгууллагын албан тушаалтанд байгууллага хоорондын гэрээ байгуулах эрхийг энэ журмын 6-д заасны дагуу уг гэрээний төслийг урьдчилан хянасан төрийн захиргааны төв болон нутгийн захиргааны байгууллагын удирдлагын шийдвэр /сайд, тусгай газрын даргын тушаал, Засаг даргын захирамжаар/-ээр тус тус олгоно.

14. Энэ журмын 9-д заасан асуудлаар үүссэн аливаа маргааныг хууль зүйн асуудал эрхэлсэн төрийн захиргааны төв байгууллагын дүгнэлтийг үндэслэн Засгийн газар шийдвэрлэнэ.

15. Энэ журмын заалтыг зөрчин эрх мэдэл буюу бүрэн эрхээ хэтрүүлж байгууллага хоорондын гэрээ байгуулсан албан тушаалтан Монгол Улсын хууль тогтоомжийн дагуу хариуцлага хүлээнэ.

~~-------оОо-------~~

Шүүлтүүр

Сонсох:

Эрх зүйн актууд

Санал хүсэлт