ОЗОН ЗАДАЛДАГ БОДИСЫГ ИМПОРТЛОХ, АШИГЛАХ ЗӨВШӨӨРӨЛ ОЛГОХ ЖУРАМ (Засгийн газрын 2018 оны 277 дугаар тогтоолоор хүчингүй болсонд тооцсон бөгөөд үүнийг 2019-1-1-ний өдрөөс эхлэн дагаж мөрдөнө)

Эрх зүйн акт

~~Засгийн газрын 1999 оны 104 дүгээр тогтоолын 1 дүгээр хавсралт~~

~~ОЗОН ЗАДАЛДАГ БОДИСЫГ ИМПОРТЛОХ, АШИГЛАХ ЗӨВШӨӨРӨЛ ОЛГОХ ЖУРАМ~~

(Засгийн газрын 2018 оны 277 дугаар тогтоолоор хүчингүй болсонд тооцсон
бөгөөд үүнийг 2019-1-1-ний өдрөөс эхлэн дагаж мөрдөнө)

~~Нэг.Нийтлэг үндэслэл~~

1.Иргэн, аж ахуйн нэгж, байгууллагад озон задалдаг бодис, түүнийг агуулсан бүтээгдэхүүнийг импортлох, худалдах, ашиглах зөвшөөрөл олгох /цаашид "зөвшөөрөл олгох" гэнэ/-д болон тэдгээрт хяналт тавих, үйл ажиллагааг нь зохицуулахад энэ журмыг дагаж мөрдөнө.

2.Зөвшөөрөл олгогч, авагч талууд Монгол Улсын нэгдэн орсон "Озоны үе давхаргыг хамгаалах тухай Венийн конвенци, "Озоны үе давхаргыг задалдаг бодисын тухай Монреалын Протокол" болон холбогдох бусад гэрээ, хэлэлцээрийг чанд биелүүлэх үүрэгтэй.

~~Хоёр.Озон задалдаг бодисыг импортлох, худалдах, ашиглахад тавих хяналт~~

3.Тухайн жилд импортлох озон задалдаг бодис, түүнийг агуулсан бүтээгдэхүүний дээд хязгаарыг жил бүрийн 1 дүгээр сард багтаан Байгаль орчны яам тогтооно. Энэхүү дээд хязгаар нь Монгол Улсын нэгдэн орсон олон улсын гэрээгээр хүлээсэн үүргийг биелүүлэх, озон задалдаг бодисыг бууруулах дэлхий нийтийн стратегийн бодлого, чиг хандлагатай нийцсэн байвал зохино.

4.Озон задалдаг бодис, түүнийг агуулсан бүтээгдэхүүнийг импортлох, худалдах, ашиглах зөвшөөрлийг иргэн, аж ахуйн нэгж, байгууллагад тэдгээрийн тавьсан хүсэлт болон эрүүл ахуй, халдвар судлалын хяналтын байгууллагын санал, дүгнэлтийг үндэслэн Байгаль орчны яам олгоно.

5.Зөвшөөрөл олгохыг хүссэн иргэн, аж ахуйн нэгж, байгууллага дараахь үзүүлэлт, материалыг хүсэлтдээ тусгах буюу хавсаргана:

а/озон задалдаг бодисын нэршил /олон улсын нийтлэг нэр, химийн томъёо/, олон улсын бүртгэлийн дугаар, барааг тодорхойлох, кодлох уялдуулсан системийн дагуу ангилсан код;

б/тухайн бодисыг хэрэглэх зориулалт, физик, химийн өвөрмөц шинж чанар, үйлдвэрлэсэн болон нийлүүлсэн улс болон пүүсийн нэр, тээвэрлэх, хадгалах, худалдаалах тухай мэдээлэл;

~~в/нийлүүлэгч талтай хийсэн гэрээ, хэлэлцээрийн нотариатаар батлуулсан хувь;~~

~~г/эрүүл ахуй, халдвар судлалын хяналтын байгууллагын санал, дүгнэлт.~~

6.Тухайн бодис, бүтээгдэхүүнээс гарч болох осол, эндэгдлийн тухай мэдээллийг хэрэглэгчдэд хүргэх, ослоос урьдчилан сэргийлэх арга хэмжээний зардлыг импортлогч иргэн, аж ахуйн нэгж, байгууллага хариуцна.

7.Байгаль орчны яам иргэн, аж ахуйн нэгж, байгууллагаас ирүүлсэн хүсэлт, материал, дүгнэлт, саналыг хянан үзэж, 7 хоногт багтаан зохих шийдвэрээ гаргах буюу хариу өгнө.

8.Озон задалдаг бодис, түүнийг агуулсан бүтээгдэхүүнийг улсын хилээр нэвтрүүлэхэд тавих хяналтыг гаалийн байгууллага хэрэгжүүлэх бөгөөд тухайн жилд импортлосон озон задалдаг бодис, түүнийг агуулсан бүтээгдэхүүний тухай мэдээллийг дэлгэрэнгүй нэр төрлөөр нь гарган жил бүрийн 12 дугаар сард багтаан Байгаль орчны яаманд өгнө.

9.Озон задалдаг бодис, түүнийг агуулсан бүтээгдэхүүнийг хадгалах, ашиглах, худалдах үйл ажиллагаанд тавих орон нутгийн хяналтыг тухайн шатны Засаг дарга, байгаль орчны хяналтын байцаагч хэрэгжүүлнэ.

~~Гурав.Зөвшөөрөл олгоход тавих шаардлага, хориглох үйл ажиллагаа~~

10.Үйлдвэрлэгчийн чанарын баталгаажуулалт бүхий озон задалдаг бодис, түүнийг агуулсан бүтээгдэхүүнийг улсын хилээр нэвтрүүлнэ.

11.Озон задалдаг бодис, түүнийг агуулсан бүтээгдэхүүнийг импортлох зөвшөөрлийг олгохдоо дараахь шаардлагыг харгалзан үзнэ:

~~а/бүрдүүлсэн бичиг баримт нь элдэв засваргүй эх хувь байх;~~

~~б/зөвшөөрөлд заагдсан нэр төрөл, тоо хэмжээг чанд баримталж чадах эсэх;~~

в/Монреалын Протоколын хавсралтын А-ийн I, П бүлэг, хавсралт В-ийн П, Ш бүлэг, хавсралт Е-ийн I бүлэгт орсон бөгөөд импортлож болох озон задалдаг бодис, түүнийг агуулсан бүтээгдэхүүн нь зөвхөн өөрийн орны болон тухайн иргэн, аж ахуйн нэгж, байгууллагын хэрэгцээг хангахад зориулсан байгаа эсэх.

12.Озон задалдаг бодис, түүнийг агуулсан бүтээгдэхүүнийг импортлох зөвшөөрөл авсан иргэн, аж ахуйн нэгж, байгууллага уг бодисыг ашиглах буюу дотоодын хэрэглэгчдэд худалдаж болно.

13.Озон задалдаг бодис, түүнийг агуулсан бүтээгдэхүүнийг импортлогч, ашиглагч нь Монреалын Протоколын жагсаалтад орсон бодисыг үйл ажиллагааныхаа явцад ууршуулах, агаарт алдахаас сэргийлэх, хамгаалах баталгаагаар хангагдсан байна.

14.Озон задалдаг бодис, түүнийг агуулсан бүтээгдэхүүн импортлогч, ашиглагч иргэн, аж ахуйн нэгж, байгууллага дараахь үйл ажиллагаа явуулахыг хориглоно:

~~а/зохих журмын дагуу авсан зөвшөөрөлгүйгээр уг бодис, бүтээгдэхүүнийг улсын хилээр нэвтрүүлэх;~~

б/Монреалын Протоколд нэгдэж ороогүй оронд озон задалдаг бодис, түүнийг агуулсан бүтээгдэхүүнийг реэкспортлох;

в/энэ журамд өөрөөр заагаагүй бол Монреалын Протоколын хавсралт А-ийн I, П бүлэг, хавсралт В-ийн I, П, Ш бүлэг, хавсралт С-ийн П бүлэгт орсон бодисыг агуулсан шинэ болон дахин ашиглагдсан бүтээгдэхүүнийг бөөнөөр, эсвэл жижиглэнгээр худалдах зорилгоор импортлох.

~~Дөрөв.Хүлээх хариуцлага, нөхөн төлбөр, маргаан шийдвэрлэх~~

15.Озон задалдаг бодис, түүнийг агуулсан бүтээгдэхүүнийг импортлох, ашиглахад тавих шаардлага, журам, технологийн горимыг зөрчиж, хууль бус үйл ажиллагаа явуулсны улмаас байгаль орчинд хохирол учруулсан иргэн, аж ахуйн нэгж, байгууллагад хууль тогтоомжид заасны дагуу хариуцлага хүлээлгэж, нөхөн төлбөр ногдуулна.

16.Иргэн, аж ахуйн нэгж, байгууллага нь тухайн бодис, бүтээгдэхүүнийг импортлох, ашиглахтай холбогдон гарсан маргааныг хууль тогтоомжид заасны дагуу шийдвэрлүүлнэ.

~~---оОо---~~

Шүүлтүүр

Сонсох:

Эрх зүйн актууд

Санал хүсэлт