legalinfo.mn

+(976)-11-323317

info@legalinstitute.mn

A

A

A

en
Нууц үг сэргээх Шинээр бүртгүүлэх
  • Бүртгүүлэх
  • Нүүр
  • Засгийн газрын тогтоол
  • ЗАХИРГААНЫ ЖУРМААР ЭД ЗҮЙЛИЙГ ХУРААХ, УЛСЫН ОРЛОГО БОЛГОХ, УСТГАХ НИЙТЛЭГ ЖУРАМ /ЗГ-ын 2017 оны 195-р тогтоолоор хүчингүй болсонд тооцсон//
Шүүлтүүр
Бүлэг: 1979
Засгийн газрын 1995 оны 1З1 дүгээр тогтоолын хавсралт


ЗАХИРГААНЫ ЖУРМААР ЭД ЗҮЙЛИЙГ ХУРААХ, УЛСЫН
ОРЛОГО БОЛГОХ, УСТГАХ  НИЙТЛЭГ ЖУРАМ
/ЗГ-ын 2017 оны 195-р тогтоолоор хүчингүй болсонд тооцсон/
 

Нэг.Нийтлэг үндэслэл

 1.1.Захиргааны журмаар эд зүйлийг хураах эрх бүхий байгууллага, албан тушаалтан захиргааны зөрчлийг хянан шийдвэрлэж эд зүйлийг хураах, улсын орлого болгох, устгахад энэхүү журмыг мөрдлөг болгоно.
1.2.Олон улсын гэрээнд өөрөөр заагаагүй бол Монгол Улсын нутаг дэвсгэр дээр үйл ажиллагаа явуулж буй гадаадын хөрөнгө оруулалттай  аж ахуйн нэгж, олон улсын болон гадаадын үйлдвэрийн   газар, байгууллага, Монгол Улсын нутаг дэвсгэрээр дамжин өнгөрөх,  түр  буюу  урт  хугацаагаар оршин сууж буй гадаадын иргэн, харъяалалгүй хүмүүс энэхүү журмыг нэгэн адил мөрдөнө.

Хоёр.Захиргааны журмаар эд зүйлийг хураах

2.1.Захиргааны зөрчил үйлдэхэд ашигласан буюу зөрчлийг нотлох  эд зүйл, баримт бичиг, зөрчил үйлдэж олсон хууль бус орлогыг (цаашид хууль бус орлого гэх) холбогдох хуулийн дагуу эрх бүхий байгууллага, албан тушаалтан хураана.
2.2.Эд  зүйл,  баримт  бичиг хураахад хураан авсныг нотлох тусгай тооцооны хуудас олгох бөгөөд хууль бус орлого хураахад акт  тавих  буюу түүнтэй адилтгах албан баримт үйлдэж тэдгээрийн нэг хувийг зөрчил гаргасан этгээдэд өгч, үлдэхийг зөрчлийн хэрэгт  хавсарган байгууллагын бүртгэлд авна.  
Эд зүйл, баримт бичиг хураан авахад олгох тооцооны хуудасны загварыг Сангийн яам батлах бөгөөд тооцооны хуудас хэрэглэх эрх бүхий байгууллага, албан тушаалтан түүнийг үнэт цаасны нэгэн адил
бүртгэл тооцоотой зарцуулна.
2.З.Тооцооны хуудасгүй буюу хууль бус орлогыг хураах акт, түүнтэй адилтгах албан баримт бүрдүүлэлгүйгээр эд зүйл, баримт бичиг, хууль бус орлого хураахыг хориглоно.
2.4.Хүний амь нас, эрүүл мэнд, байгаль орчинд шууд хор нөлөө учруулах, түүнчлэн түргэн муудаж чанар байдлаа алддаг эд зүйлээс бусад хураагдсан эд зүйлийг тухайн шатны Засаг даргын дэргэдэх  захиргааны Зөвлөлөөс (цаашид "Зөвлөл" гэх) эцэслэн шийдвэрлэх хүртэлх хугацаанд эд зүйл хураан авсан байгууллага, албан  тушаалтан  тэдгээрийн бүрэн бүтэн байдлыг хариуцан  хадгална.
Хураан  авсан  баримт  бичиг  хуурамч болох нь нотлогдвол зөрчлийг шалгасан албан тушаалтан  түүнийг  зөрчлийн хэрэгт хавсаргах буюу холбогдох эзэн, байгууллагад шилжүүлнэ.
2.5.Засаг даргын дэргэдэх захиргааны Зөвлөлийн бүрэлдэхүүнд тухайн нутаг дэвсгэрт үйл ажиллагаа явуулж буй хяналтын байгууллагын төлөөлөгчид болон холбогдох мэргэжлийн хүмүүсийг оруулна.
2.6.Зөвлөл нь орон тооны бус байх бөгөөд тухайн нутаг дэвсгэрт үйл ажиллагаа явуулж буй эрх бүхий байгууллага, албан тушаалтан энэхүү нийтлэг журмыг хэрхэн мөрдөж байгаад болон захиргааны  журмаар  хураасан эд зүйлийг зориулалтаар нь буюу зориулалтыг нь өөрчлөн үнэлэн борлуулж улсын орлого болгох, хэрэгцээгүй зарим эд зүйлийг устгах талаар зөвлөлдөн шийдвэрлэж хэрэгжилтэд хяналт  тавих, улсын орлого болгосон буюу устгасан эд зүйлийн бүртгэл, тайлан мэдээг нэгтгэн орон нутгийн холбогдох санхүүгийн байгууллагад сар тутам мэдээлж байх үүрэгтэй ажиллана.
                2.7.Хураагдсан эд зүйлийг Зөвлөлийн шийдвэргүйгээр борлуулах, бусдад шилжүүлэх, хүний амь  нас, эрүүл мэнд, байгаль орчинд шууд хор нөлөө учруулах, түүнчлэн түргэн муудаж чанар байдлаа   алддаг, зориулалтыг нь өөрчлөн ашиглах боломжгүй эд зүйлээс бусад эд зүйлийг устгахыг хориглоно.

Гурав.Захиргааны  журмаар  хураагдсан эд зүйл, хууль бус орлогыг улсын орлого болгох

З.1.Захиргааны зөрчлийн улмаас хураагдсан эд зүйлийг борлуулсны орлого, хууль бус орлогыг тухайн орон нутгийн буюу төвлөрсөн төсвийн тусгай дансанд (цаашид тусгай данс гэх) оруулна. Уг дансыг  Сангийн яамнаас баталсан журмын дагуу нээж ашиглана.
З.2.Зөвлөл захиргааны журмаар хураагдсан эд зүйлийг зах зээлийн тухайн үеийн ханшаар үнэлэн хэрэгцээт гадаад, дотоодын байгууллага, аж ахуйн нэгжид болон дуудлагын худалдаагаар борлуулах   асуудлыг  шийдвэрлэн хэрэгжилтэд хяналт тавьж, орлогыг тусгай  дансанд оруулна.
                З.З.Эрх бүхий байгууллага, албан тушаалтан зөрчил үйлдсэн этгээдээс хураасан хууль бус орлогыг тусгай дансанд оруулж энэ тухай Зөвлөлд мэдэгдэнэ.
З.4.Хураагдсан эд зүйлийг борлуулсны орлого, хууль бус орлогыг тусгай данснаас өөр дансанд оруулахыг хориглоно.

 Дөрөв.Захиргааны журмаар хураагдсан эд зүйлийг устгах

4.1.Өргөн хэрэглээнд буюу үйлдвэрлэл, үйлчилгээнд ашиглах боломжгүй эд зүйлийг Зөвлөл тусгай комисс томилон ашиглах боломжгүй тухай акт тогтоолгосны үндсэн дээр шаардлага хангасан газар,  байранд устгуулна. Комисс нь эд зүйл устгасан тухай акт үйлдэж Зөвлөлд хүргүүлнэ.
4.2.Хүний амь нас, эрүүл мэнд, байгаль орчинд шууд хор нөлөө учруулах,  түүнчлэн түргэн муудаж чанар байдлаа алддаг, зориулалтыг нь өөрчлөн ашиглах боломжгүй эд зүйлийг хураасан эрх бүхий байгууллага, албан тушаалтан зөрчил гаргасан этгээдийг өөрийг нь, хэрэв боломжгүй бол хөндлөнгийн хоёр гэрчийг байлцуулан шаардлага хангасан газар, байранд устгаж, акт үйлдэн зөрчлийн хэрэгт хавсаргаж, Зөвлөлд мэдэгдэнэ.
4.З.Эд  зүйлийг  устгахтай  холбогдон гарах зардлыг зөрчил үйлдсэн этгээдээр  гаргуулах  бөгөөд  түүний  үнэлгээ тарифыг Зөвлөл  болон эрх бүхий байгууллага өөрийн ажлын онцлог, газар нутгийн  байршилтай  уялдуулан тогтоож холбогдох Засаг даргаар батлуулан мөрдөнө.
 4.4.Шаардлага хангаагүй газар, байранд эд зүйлийг устгахыг хориглоно.

 Тав.Бусад зүйл

 5.1.Захиргааны журмаар эд зүйл хураах эрх бүхий байгууллага өөрийн ажлын онцлог байдлыг тусгаж энэхүү нийтлэг журамд нийцүүлэн дотооддоо журам гарган мөрдөж болно.
5.2.Энэхүү журмыг зөрчиж эд зүйл, баримт бичиг, хууль бус орлогыг хураасан, устгасан, хураагдсан эд зүйлийг борлуулсан, бусдад үндэслэлгүй шилжүүлсэн болон орлогыг тусгай данснаас өөр  дансанд  оруулсан  болон зарцуулсан этгээдэд холбогдох хууль тогтоомжийн дагуу хариуцлага хүлээлгэнэ.
 
--------OOO--------
 

Текст томруулах

A

A

A