legalinfo.mn

+(976)-11-323317

info@legalinstitute.mn

A

A

A

en
Нууц үг сэргээх Шинээр бүртгүүлэх
  • Бүртгүүлэх
Шүүлтүүр
Бүлэг: 1979
Засгийн газрын 1995 оны 166 дугаар тогтоолын 2 дугаар хавсралт


ТӨРИЙН ТУСГАЙ ШУУДАН ХАРИЛЦААНЫ ЖУРАМ
 

(Засгийн газрын 2008 оны 2008 оны 40 дүгээр тогтоолоор хүчингүй болсонд тооцсон)

Нэг.Нийтлэг үндэслэл

1.Монгол  Улсын Ерөнхийлөгч,Улсын Их Хурал, Засгийн газар, тэдгээрийн ажлын албадын бүх төрлийн мэдээ, баримт бичиг,биет зүйлийг төрийн нууцад хамаарах эсэхийг үл харгалзан хүлээн авч шуудан холбооны буюу тухайн байгууллагад зохих хаягаар тогтоосон  журмын дагуу хүргэж үйлчлэх,төрийн захиргааны төв байгууллагуудын  төрийн нууцад хамаарах мэдээ, баримт бичиг, биет зүйлийг  ердийн  болон нууцлалтай шуудангаар дамжуулж хүргэх ажлыг Төрийн  холбооны   газрын тусгай шуудан харилцааны алба /цаашид "Шуудан харилцааны  алба" гэнэ/ хариуцна.
2.Шуудан  харилцааны алба нь Төрийн холбооны газрын даргын шууд удирдлагад ажиллана.
3.Монгол  Улсын шуудан харилцааг хөгжүүлэх бодлого  боловсруулж хэрэгжүүлэхдээ төрийн тусгай шуудангийн үйлчилгээг  сайжруулах, боловсронгуй болгох арга хэмжээг тусгаж байна.
4.Төрийн холбооны газар нь тусгай шууданг орон нутагт хүргэж тээвэрлэх ажлыг тээврийн байгууллагуудаар аж ахуйн гэрээний   үндсэн дээр гүйцэтгүүлж болох бөгөөд түүний биелэлтэд тухайн  байгууллагын удирдлагууд хяналт тавина.
5.Төрийн  холбооны  газрын  дарга нь төрийн тусгай шууданг тээврийн хэрэгсэл,  техник төхөөрөмж, эд хогшил, сэлбэг  материалаар хангах асуудлыг хариуцна.
6.Төрийн  тусгай шуудан, төрийн нууцад хамаарах мэдээ,  баримт  бичиг, биет зүйл алдагдах тохиолдолд энэ тухай асуудлыг "Төрийн  нууцын  тухай" хуулийн  дагуу  эрх бүхий байгууллага шалгаж шийдвэрлэнэ.
7.Төрийн  тусгай шууданд техник технологийн шинэчлэлт хийх асуудлыг Төрийн холбооны газар хариуцаж шийдвэрлэнэ.
8.Төрийн тусгай шууданг хадгалах өрөө тасалгаа, ажлын байр нь хамгаалалтад байна.
9.Шуудан  харилцааны  алба  нь удирдлагын хүрээнд мэдээлэл дамжуулах зорилгоор бие даасан тоон мэдээллийн сүлжээг зохион байгуулахаас гадна нийтийн болон бусад сүлжээг түрээслэн ашиглаж  болно.

 Хоёр.Төрийн тусгай шуудан харилцааны албаны үүрэг, эрх

10.Төрийн  тусгай  шуудан  харилцааны  алба нь дор дурдсан үүрэг хүлээнэ:
       а/Монгол  Улсын  Төрийн  нууцын тухай хууль, бусад хууль тогтоомж, энэхүү  журмын  дагуу төрийн нууцад хамаарах мэдээ, баримт  бичиг, биет зүйлийг хаягийн дагуу хүргэх /Монгол Улсын Ерөнхийлөгч,  Улсын  Их Хурал, Засгийн газар, тэдгээрийн ажлын албадын  мэдээ,  баримт  бичиг,  биет зүйлийг  төрийн  нууцад хамаарах эсэхийг үл харгалзан хүргэнэ/;
        б/"Төрийн  холбоо,  тоон мэдээллийн харилцааны дүрэм"-д заасны дагуу ажил, үйлчилгээ явуулах;
        в/мэдээлэл  солилцож  буй электрон шуудангийн сүлжээний хэвийн найдвартай ажиллагааг хангах техник,зохион байгуулалтын арга хэмжээ авах;
        г/ердийн болон электрон шуудангаар дамжуулж буй мэдээллийн    нууц задрахаас  урьдчилан  сэргийлэх,  техник,  зохион байгуулалтын арга хэмжээг авах;
        д/электрон  шуудан,  телекс,  телефаксаар дамжих мэдээ, баримт бичгийг  тодорхой хаягтай битүүмжилсэн байдлаар хүлээн авч дамжуулах, хүлээн аваад цагт нь битүүмжлэн хаяглаж хүргэх;
        е/тусгай  шуудангаар  хот  хооронд  болон  хотын  дотор хүргэж тээвэрлэх  баримт  бичиг, бусад зүйл, илгээмжийг ажлын тогтоосон цагт хүлээн авч үйлчлэх;
        ж/төрийн  холбоо, тоон мэдээллийн сүлжээгээр дамжуулсан мэдээ, баримт  бичиг, биет зүйлийг солилцох, шуудангийн хайрцаг,   албан  бичиг, захидал  хүлээн  авах,  хүлээлгэн өгөхдөө түүний  лац,  ломбо, цоож, хайрцаг, богцны бүрэн бүтэн байдал, тэдгээрийн хаяг, нууцын зэрэглэл, хувийн дугаар, мэдээлэл  дамжуулалтын  болон  нууцлалтын  протоколыг  нэг бүрчлэн үзэж  хүлээлцсэн  он, сар, өдөр, цаг, хүлээлгэн өгсөн болон хүлээн авсан  хүний  албан  тушаал, овог, нэрийг тодорхой бичүүлж гарын үсгийг зуруулах;
        з/тээвэрлэгч  байгууллагууд  нь аж ахуйн гэрээний дагуу төрийн тусгай  шууданг  хүлээн  авснаас эхлээд хүлээлгэн өгөх хүртэлх  хугацааны дотор  түүнийг алдах, үрэгдүүлэх, гэмтээх, лац,  ломбо  хөдөлгөх,  цоож эвдэх зэргээс урьдчилан сэргийлж, аюулгүй байдлыг бүрэн хариуцах.
11.Төрийн  тусгай  шуудан  харилцааны  алба нь дор дурдсан эрх эдэлнэ:
        а/төрийн   тусгай   шуудан  харилцааны  алба  нь үйл ажиллагаагаа явуулахдаа  улсын  болон  хувийн  тээвэр,холбоо, шуудангийн байгууллагуудтай зөвшилцөн аж  ахуйн гэрээ байгуулах;
        б/төрийн  тусгай шуудангийн тоон мэдээлэл дамжуулах  зорилгоор улсын холбооны нийтийн сүлжээг ашиглах;
        в/онц байдал, дайны болон дайн бүхий байдлын үед төрийн шуудангийн үйлчилгээг  тусгайлан хүч нэмэгдүүлсэн хамгаалалттайгаар  гүйцэтгэх;
        г/төрийн тусгай шуудангийн хэвийн үйл ажиллагааг хангаж ажиллах зорилгоор холбогдох байгууллагуудаас хөрөнгө, тээврийн хэрэгсэл, зориулалтын техник төхөөрөмж, эд материалыг тогтоосон  журмын дагуу авч ашиглах;
        д/төрийн  тусгай  шуудан  хүргэх үүрэг бүхий ажилтан нь албан үүргээ  гүйцэтгэж  явах  үедээ байгууллага, үйлдвэр, аж ахуй  нэгжид нэвтрэх,  зэвсэг, тусгай хэрэгслийг зохих журмын дагуу ашиглах;
        е/төрийн тусгай шуудангаар үйлчлүүлэгч байгууллагуудаас төрийн шуудангийн журмыг сахиж биелүүлэхийг шаардах.

 Гурав.Бусад байгууллагуудтай харилцах

12.Төрийн  тусгай шуудангаар төрийн нууцад хамаарах баримт бичиг,  биет  зүйл солилцох албан байгууллагууд нь төрийн холбооны  газартай аж ахуйн гэрээ байгуулж, энэхүү журмыг удирдлага болгон  ажиллана.
 13.Төрийн тусгай шуудангаар явуулж буй мэдээ,баримт бичиг, биет зүйл очих, буцах хаягийг тодорхой, гаргацтай бичсэн, нууц баримт  бичиг,  бусад зүйл, материалыг гэрэл үл нэвтрэх цаас, даавуу,  уут  буюу  боодлыг ашиглан, тогтоосон овор хэмжээгээр битүүмжилж,  уулзвар хэсэгт нь хуурай лацаар лацдан тод тэмдэг дарж хүлээлгэн өгнө.
14.Зэвсэгт  хүчин, бусад цэрэг, цагдаа, хорих ангиуд болон байгууллагуудын  дотоодын  шуудан харилцааны үйлчилгээг төрийн тусгай шуудан харилцааны алба хариуцахгүй.
15.Төрийн тусгай шуудан харилцаанд тоон мэдээлэл дамжуулах сүлжээний технологи  ашиглах  тохиолдолд ийм сүлжээний техник ашиглалтын  дүрэм, зааврыг  Төрийн холбооны газар батлан мөрдүүлнэ.

 Дөрөв.Төрийн тусгай шуудан харилцаанд хориглох зүйл

 16.Төрийн   тусгай   шуудан  харилцаанд  дараахь   зүйлийг хориглоно:
        а/нууцлагч техник хэрэгсэл ашиглахгүйгээр төрийн нууцад хамаарах мэдээ, баримт бичгийг холбооны болон тоон мэдээллийн сүлжээгээр дамжуулах;
        б/төрийн  тусгай  шууданг хот хооронд болон хотын дотор явганаар буюу ердийн хөсгөөр хүргэж тээвэрлэх;
        в/төрийн  тусгай шуудангийн автомашинаас хууль тогтоомжид   зааснаас  бусад  тохиолдолд талбайн хураамж авах, түүнийг зориулалтын  бус  ажилд ашиглах, дайчлах, үзлэг нэгжлэг хийх;
        г/төрийн тусгай шуудангаар мөнгөн тэмдэгт, зэвсэг, галт хэрэгсэл, шатамхай,  тэсэрч  дэлбэрэх ба шингэн бодис, төрийн нууцад  үл хамаарах ном, сэтгүүл, маягт, 2 кг-аас дээш хүндийн жинтэй  техник  төхөөрөмж,  овор ихтэй эрүүгийн хэргийн нотлох баримтын  шинжтэй  битүүмжлэгдээгүй  зүйл, ил, задгай илгээмж, буцах  хаяг нь тодорхойгүй албан бичиг, захидал, өргөдөл болон бусдын анхаарлыг татах зүйлийг хүлээн авч дамжуулах.
 
------OOO------
 

Текст томруулах

A

A

A