Засгийн Газрын 2004 оны 13 дугаар тогтоолын 1 дүгээр хавсралт

ТӨРИЙН ӨМЧИЙГ 2004 ОНД ХУВЬЧЛАХ ХӨТӨЛБӨР

 

                            

Улсын Их хурлын 2001 оны 10 дугаар тогтоолоор баталсан "Төрийн өмчийг 2001-2004 онд хувьчлах үндсэн чиглэл"-д заасан зорилт, зарчмыг удирдлага болгон үнэ цэнэтэй аж ахуйн нэгж болон бусад аж ахуйн нэгж, үл хөдлөх эд хөрөнгийг хувьчилж, эдийн засаг дахь хувийн хэвшлийн үүрэг, оролцоог нэмэгдүүлэх, эдийн засгийн үр ашгийг дээшлүүлэх, өсөлтийг хангах нөхцөлийг бүрдүүлэхэд өмч хувьчлалын зорилго оршино.

 

"Төрийн өмчийг 2001-2004 онд хувьчлах үндсэн чиглэл"-д тусгагдсан зарчмыг баримтална.

 

Дор дурдсан жагсаалтын дагуу аж ахуйн нэгжүүдэд өөрчлөн байгуулалт хийж, хувьчлалын бэлтгэлийг ханган хувьчлах ажлыг зохион байгуулж хэрэгжүүлнэ:

1/2004 онд хувьчлах аж ахуйн нэгжийн жагсаалт /1 дүгээр хавсралт/;

2/2004 онд өөрчлөн байгуулалт хийх болон хувьчлалын бэлтгэлийг хангах аж ахуйн нэгжийн жагсаалт /2 дугаар хавсралт/.

 

Хөтөлбөр, хувьчлах аж ахуйн нэгж, өөрчлөн байгуулалт хийх болон хувьчлалын бэлтгэлийг хангах аж ахуйн нэгжийн жагсаалтад дор дурдсан нөхцөлд нэмэлт, өөрчлөлт оруулж болно:

4.1. Монгол Улсын иргэн, гадаадын иргэн болон дотоод, гадаадын аж ахуйн нэгжээс тодорхой аж ахуйн нэгжийг хувьчлан авах санал хүсэлт гаргасан тохиолдолд;

4.2. Хувьчлах шийдвэр гарсан боловч холбогдох хууль тогтоомжийн дагуу татан буулгах, өөрчлөн зохион байгуулах шаардлагатай болсон аж ахуйн нэгжийг жагсаалтаас хасна;

4.3. Тодорхой салбар, үйлдвэрлэлийн үйл ажиллагааны хүрээнд олон улсын банк, санхүүгийн байгууллага болон хандивлагчдын зүгээс томоохон хэмжээний төсөл, арга хэмжээ хэрэгжүүлэхтэй холбогдсон тусгай шаардлага гарсан;

4.4. Тухайн аж ахуйн нэгжийг энэхүү хөтөлбөр, жагсаалтад зааснаас өөр аргаар хувьчлах талаар үндэслэлтэй санал, дүгнэлт гарч, холбогдох яам дэмжсэн бол;

4.5. Хувьчлалын бэлтгэлийг хангах явцад зайлшгүй урьдчилан шийдвэрлэвэл зохих асуудал гарсан аж ахуйн нэгжийг жагсаалтаас хасна;

4.6. Жагсаалтад орсон аж ахуйн нэгж хуваагдах буюу тусгаарласны үндсэн дээр шинээр байгуулагдсан аж ахуйн нэгжийн компанийнхаа анхны нэрийг өвлөн аваагүй тохиолдолд жагсаалтад орсон аж ахуйн нэгжийн нэрийг жагсаалтаас хасч, шинээр бий болсон аж ахуйн нэгжийн нэрийг холбогдох жагсаалтад оруулах, тухайн аж ахуйн нэгжийг салган хувьчлуулах санал гарч, түүнийг холбогдох яам болон Төрийн өмчийн хороо албан ёсоор зөвшөөрсөн, тухайн аж ахуйн нэгж өр, зээлтэй бол томоохон зээлдүүлэгчийн зүгээс тодорхой санал гарсан тохиолдолд;

4.7. Компанийн хувь нийлүүлэгчдийн хурлын шийдвэрээр төрийн эзэмшлийн хувьцаанд өөрчлөлт орсныг Үнэт цаасны хорооноос зөвшөөрсөн тохиолдолд энэхүү шинэчлэн тогтоосон хувийг хувьчилна.

 

Энэхүү хөтөлбөрийн биелэлтийг 2005 оны 1 дүгээр сарын 25-ны дотор Төрийн өмчийн хороо холбогдох яам, газартай хамтран гаргаж Засгийн газарт тайлагнана.

 

 

 

 

----оОо----