Засгийн газрын 2001 оны 150 дугаар тогтоолын 1 дүгээр хавсралт

УЛСЫН САЙН МАЛЧИН ШАЛГАРУУЛАХ ЖУРАМ

 

/Энэ журмын 2 дугаар заалтыг Засгийн газрын 2007 оны 26 дугаар тогтоолоор 2007 онд дагаж мөрдөхгүй байхаар тогтоосон/

 

            1. Малчдын идэвх санаачилгыг урамшуулах замаар малын үүлдэрлэг байдлыг сайжруулах, бүтээгдэхүүний үйлдвэрлэлийг нэмэгдүүлж, мал аж ахуйг эрчимжүүлэх, гахай, шувууны аж ахуйг дэмжин хөгжүүлэхэд шагналын зорилго оршино.

            2. Энэ журмын хоёрт заасан үзүүлэлтийг хангасан 44 хүртэлх малчдыг "Улсын сайн малчин"-аар жил бүр шалгаруулан шагнана   /Энэ заалтад Засгийн газрын 2005 оны 13 дугаар тогтоолоор өөрчлөлт оруулсан/.

(Энэ заалтад 2009 оны 2 дугаар сарын 4-ний өдрийн 33 дугаар тогтоолоор өөрчлөлт орсон)

            3. "Улсын сайн малчин"-аар шагнах асуудлыг хөдөө аж ахуйн асуудал эрхэлсэн сайдын саналыг үндэслэн Засгийн газар шийдвэрлэнэ.

 

 

            4. "Улсын сайн малчин"-аар тодорхойлох малчин дор дурдсан шалгуур, үзүүлэлтийг хангасан байна:

            4.1. Бодод шилжүүлснээр 150-иас доошгүй малтай, мал сүргээ сүүлийн 3 жил дараалан төлөөр нь өсгөсөн байх;

            Малын тоонд тавиул малыг оролцуулан тооцохгүй.

            4.2. Хээлтэгчийн тоо нь тогтвортой нэмэгдэн сүрэгт эзлэх хувийн жин бог малд 50, бодод 32-оос доошгүй хувьд хүрсэн, үржлийн албаар баталгаажсан жишигт тэнцсэн хээлтүүлэгчтэй болж, малын чанарыг сайжруулсан байх;

            4.3. Оны эхний 100 хээлтэгч мал тутмаас бойжуулсан төлийн тоо улсын дунджаас илүү, гурван жил дараалан өссөн байхаас гадна сүүлчийн жилд хээлтэгч бүрээс төл бойжуулсан байх;

            Жил тутам 100 ба түүнээс дээш хувиар төл бойжуулсан малчинд 100 хээлтэгчээс бойжуулсан төл жил дараалан өссөн байхыг шаардахгүй.

            4.4. Мал аж ахуйн үйлдвэрлэлд шинэ технологи нэвтрүүлэх, бусад үйлдвэрлэлтэй аж ахуйгаа хослуулан эрчимжүүлэхэд тодорхой хөрөнгө оруулалт хийж нэгжээс ашиглах бүтээгдэхүүний хэмжээг нэмэгдүүлсэн байх;

            4.5. Мал эмнэлэг, үржлийн ажил, үйлчилгээ эрхэлдэг нэгжтэй байнгын гэрээтэй ажиллаж, мал сүргээ урьдчилан сэргийлэх арга хэмжээнд бүрэн хамруулан, эрүүл сүрэгтэй болсон байх;

            4.6. Ажлын байр шинээр бий болгох, малаа борлуулах, үржилд худалдах зэргээр эргэлтэд оруулж, зах зээлийн нөхцөлд тохирсон бизнесийн үйл ажиллагаа явуулсан байх.

5. "Улсын сайн малчин-"аар шалгаруулахдаа дараахь нэмэлт үзүүлэлтүүдийг харгалзана:

            5.1. Тогтоосон бүс нутагт отор хийж, бүх малдаа дундаас дээш тарга хүч авахуулсан байх;

            5.2. Малаа гэрээ, түрээсээр маллуулах, хоршоо байгуулах, малгүй өрхийг малжуулахад туслах зэргээр хөдөөд ядуурлыг бууруулахад тодорхой хувь нэмэр оруулсан байх;

            5.3. Бэлчээрийг сайжруулж, өөрийн хүчээр болон бусад малчидтай хамтран бэлчээрт бага гүнтэй худаг шинээр гаргаж, ашиглалтгүй худгийг сэргээн засварласан байх;

            5.4. Үржлийн албаны буюу хэрэглэгчдийн захиалгаар үржлийн мал бойжуулан худалдсан байх;

            5.5. Нэг хонин толгойд ойт хээрт 30 кг, өндөр уул, тал хээрийн бүсэд 10 кг, говийн бүсэд 3 кг-аас доошгүй хадлан, гар тэжээл өөрийн хүчээр бэлтгэж, говиос бусад бүсэд өөрийн эзэмшлийн хадлангийн талбайтай болж, түүнийг хамгаалсан байх;

            5.6. Холбогдох хууль тогтоомжийн дагуу татвар, хураамжийг төлж, орон нутгийн хөгжилд дэмжлэг үзүүлж, малаа даатгалд хамруулж, мал хамгаалах санд жил бүр хувь нэмэр оруулах.

6. Сүүний аж ахуй (25–аас доошгүй саалийн үнээтэй) эрхэлдэг малчид дээр дурдсан шалгуур болон харгалзах үзүүлэлтийн 4.1, 4.2, 5.5 дугаар заалтаас бусад заалтад заасан нөхцөлийг биелүүлсэн байхаас гадна дунджаар нэг үнээнээс саасан сүү нь 3 жил дараалан өссөн, улсын хэмжээнд хамгийн өндөр үзүүлэлтэд хүрсэн байна. Үнээ, тугалдаа зориулж өвс, дарш бэлтгэсэн байна.

            7. Дараахь үзүүлэлтийг хангасан гахайчин, шувуучныг "Улсын сайн малчин"-аар тодорхойлж болно:

            7.1. Оны эхэнд 500-гаас доошгүй өндөглөгчтэй байж, нэг өндөглөгчөөс жилд 200-гаас доошгүй өндөг авсан, 50-иас доошгүй үржлийн шувуу бойжуулж борлуулсан шувууны аж ахуй эрхлэгчид;

            7.2. Оны эхэнд 20-иос доошгүй үндсэн мэгж тоолуулж мэгж бүрээс жилд 20-иос доошгүй торой бойжуулж, 1.5 тн. мах үйлдвэрлэн, шалгалтын 20-иос доошгүй мэгж бойжуулан үржилд борлуулсан гахайн аж ахуй эрхлэгчид.

 

 

 

            8. Баг, хорооны Засаг дарга "Улсын сайн малчин"-аар тодорхойлох үзүүлэлтийг хангасан гэж үзэж байгаа малчны тодорхойлолт, холбогдох материалыг бүрдүүлж, баг хорооны иргэдийн хурлаар хэлэлцүүлэн сум, дүүргийн Засаг даргын Тамгын газарт хүргүүлнэ.

9. Энэ журмын 6, 7 дугаар заалтад заасан үзүүлэлтийг сум, дүүргийн Засаг дарга газар дээр нь шалгаж, анхан шатны баримтууд, хийсэн гэрээ, түүний гүйцэтгэл, хэрэв аж ахуйн нэгжтэй бол тайлан тэнцлийг үндэслэн тодорхойлолт, баталгаа гаргана.

            10. Тодорхойлолтод энэхүү журмын 4, 5, 6, 7 дугаар заалтад заасан үзүүлэлтүүдийг хэрхэн биелүүлснийг тусгах бөгөөд үзүүлэлт бүрийг тодорхой баримтыг үндэслэн баталгаажуулсан байна:

            10.1. Баг, хорооны Засаг дарга 4.1, 4.3, 4.4, 5.3, 5.5 дугаар заалтад заасан үзүүлэлтийг холбогдох мэргэжлийн байгууллагын тодорхойлолт, мал тооллогын материалаар;

            10.2. Үржлийн улсын байцаагч 4.2, 5.1, 5.4 дүгээр заалтад заасан үзүүлэлтийг мал тооллогын материал, өгсөн захиалга, хуваарь, үржлийн бүртгэл, мал авсан этгээдийн гаргасан баримтаар;

            10.3. Засаг даргын орлогч 4.6, 5.2 дугаар заалтад заасан үзүүлэлтийг сум, дүүргийн Засаг даргын гаргасан шийдвэр, мал авсан этгээдийн болон бусад баримтаар;

 

            10.4. Мал эмнэлэг, үржлийн ажил, үйлчилгээ эрхэлдэг орон нутгийн нэгж 4.5 дугаар заалтад заасан үзүүлэлтийг байгуулсан гэрээ болон анхан шатны бүртгэлээр;

            10.5. Сум, дүүргийн татварын болон даатгалын байцаагч 5.6 дугаар заалтад заасан үзүүлэлтийг татвар хураалгасан баримт болон даатгалын гэрээг үндэслэн баталгаа гаргана.

11. Тодорхойлолт, ажлын үзүүлэлт, холбогдох материалыг сум, дүүргийн Засаг даргын Тамгын газар хянан үзэж, бүх баталгааг гаргуулан хамгийн өндөр амжилт гаргасан хоёр хүртэл малчныг шалгаруулан аймгийн Засаг даргын Тамгын газарт тодорхойлолт, бусад материалын хамт хүргүүлнэ.

            12. Аймаг, нийслэлийн Засаг даргын Тамгын газар тодорхойлолт, бусад материалыг хүлээн авмагц газар дээр нь шалгаж, дүгнэлт гаргана.

            13. Шалгаж баталгаажсан материалуудыг аймаг, нийслэлийн Иргэдийн Төлөөлөгчдийн Хурлын Тэргүүлэгчдийн хурлаар хэлэлцүүлэн хамгийн өндөр үзүүлэлттэй хоёр хүртэл малчныг "Улсын сайн малчин"-аар шалгаруулахаар материалыг нь        1 дүгээр сарын 10-ны дотор хөдөө аж ахуйн асуудал эрхэлсэн төрийн захиргааны төв байгууллагад хүргүүлнэ.

            14. Малчныг "Улсын сайн малчин"-аар шалгаруулахаар тодорхойлохдоо дор дурдсан материалыг бүрдүүлнэ.

            14.1. Малчны товч анкет (энэхүү журмын 1 дүгээр хавсралт);       

            14.2. Ажлын үзүүлэлт (энэхүү журмын 2, 3 дугаар хавсралт);

            14.3. Баг, хорооны Иргэдийн нийтийн хурлын тэмдэглэл;

            14.4. Сум, дүүрэг, аймаг, нийслэлийн Иргэдийн Төлөөлөгчдийн Хурлын Тэргүүлэгчдийн тогтоол;

            14.5. Холбогдох байгууллагуудаас гаргасан баталгаа, тодорхойлолт (энэхүү журмын 4 дүгээр хавсралт);

            14.6. Аймгийн Засаг даргын Тамгын газраас шалгаж гаргасан дүгнэлт.

15. Аймаг, нийслэлийн сайн малчин болсноос хойш хоёроос доошгүй жил тогтвортой амжилт гаргасан малчин, гахай, шувууны аж ахуй эрхлэгчдийг "Улсын сайн малчин"-аар шалгаруулахаар тодорхойлно.

            16. Аймаг, нийслэлийн Засаг даргын Тамгын газраас зохих хугацаанд ирүүлсэн тодорхойлолт, холбогдох материалыг хөдөө аж ахуйн асуудал эрхэлсэн төрийн захиргааны төв байгууллага хянан үзэж, энэхүү журмын дагуу шалгуур болон харгалзах үзүүлэлтийг бүрэн биелүүлсэн малчид, гахай, шувууны аж ахуй эрхлэгчдийг "Улсын сайн малчин"-аар шалгаруулах саналыг Засгийн газарт оруулна.

            17. "Улсын сайн малчин"-аар зөвхөн нэг удаа шагнах бөгөөд уг шагналыг улсын аварга малчинтай адилтган үзэх тул урьд нь ийм шагнал авсан малчныг дахин шалгаруулахгүй.

 

           

            18. Шалгарсан малчин, гахай, шувууны аж ахуй эрхлэгчдэд Улсын сайн малчны үнэмлэх, энгэрийн тэмдэг олгож, 500 мянган төгрөгийн үнэ бүхий дурсгалын зүйлээр шагнана.

            19. Улсын сайн малчны шагналыг билгийн тооллын хаврын тэргүүн сарын шинийн нэгнийг тохиолдуулан гардуулна.

 

 

 

 

 

----оОо----

 

 

 

 "Улсын сайн малчин шалгаруулах  журам"-ын 1 дүгээр хавсралт

 

 

он   сар   өдөр

 

 

 

 

 "Улсын сайн малчин шалгаруула журам"-ын 2 дугаар хавсралт

 

 

он    сар    өдөр

   

 

         Тайлбар: Дээрх үзүүлэлтүүдийг улсын тооллого,

  бусад холбогдох материалуудыг үндэслэн     

  баталгаажуулна.

 

 

------------аймаг /нийслэл/-ийн ------- сум /дүүрэг/-ын

-------------баг /хороо/-ийн Засаг дарга --------------

                             Мэргэжилтэн --------------

 

 

 "Улсын сайн малчин шалгаруулах журам"-ын 3 дугаар хавсралт

 

 

 

он    сар    өдөр

 

 

Тайлбар: Үзүүлэлтийг сум, дүүргийн Засаг даргын

          Тамгын газар шалгаж баталгаажуулна.

 

------------сум/дүүрэг/-ын

Засаг дарга---------------

Мэргэжилтэн---------------

 

"Улсын сайн малчин шалгаруулах журам"-ын 4 дүгээр хавсралт

 

 

он    сар    өдөр

 

 

 

Тайлбар: 1. Холбогдох баримтыг хавсаргаагүй баталгаа

            хүчингүйд тооцогдоно.

  2. Үзүүлэлт бүрээр тус, тусад нь баталгаа гаргана.

 

 

-----------сум/дүүрэг/-ын

Засаг дарга--------------