Засгийн газрын 1999 оны 5 дугаар тогтоолын 2 дугаар хавсралт

 

ЭМ,БИОБЭЛДМЭЛ, ЭМЧИЛГЭЭНИЙ ЧАНАРЫН УЛСЫН ХЯНАЛТЫН ДҮРЭМ

 

/Засгийн газрын 2001 оны 38 дугаар тогтоолоор хүчингүй болсонд тооцсон

 

1. Эм, биобэлдмэл, эмчилгээний чанарын улсын хяналтын зорилго нь Эрүүл мэндийн тухай хууль, Эмийн тухай хууль болон хууль тогтоомжийн бусад акт, Засгийн газрын шийдвэр, эмийн болон эрүүл мэндийн талаар төрөөс баримтлах бодлогын хэрэгжилтийг хангуулах, хяналт тавих замаар хүн амыг өндөр идэвхтэй, чанарын баталгаатай, эмийн улсын бүртгэлд бүртгэгдсэн эм, эмнэлгийн хэрэгслэлээр үйлчлэх, эмнэлгийн баталгаатай тусламж авахад нь туслахад оршино.

2. Эм, биобэлдмэл, эмчилгээний чанарын улсын хяналтыг эм, биобэлдмэл, эмчилгээний чанарын хяналтын алба, аймаг, нийслэлийн эм, биобэлдмэлийн болон эмчилгээний чанарын хяналтын улсын байцаагч хэрэгжүүлнэ.

3. Эм, биобэлдмэл, эмчилгээний чанарын хяналтын албаны дарга нь эм, биобэлдмэл, эмчилгээний чанарын улсын хяналтын ерөнхий байцаагч байна.

4. Эм, биобэлдмэл, эмчилгээний чанарын хяналтын албанд ажиллах байцаагч нь улсын ахлах байцаагч байх бөгөөд түүнийг эм, биобэлдмэл, эмчилгээний чанарын хяналтын улсын ерөнхий байцаагчийн санал болгосноор эрүүл мэндийн асуудал хариуцсан Засгийн газрын гишүүн томилж, чөлөөлнө.

Аймаг, нийслэлийн эм, биобэлдмэл, эмчилгээний чанарын хяналтын улсын байцаагчийг эм, биобэлдмэл, эмчилгээний чанарын хяналтын улсын ерөнхий байцаагчтай зөвшилцөн аймаг, нийслэлийн Засаг дарга томилж, чөлөөлнө.

5. Эм, биобэлдмэлийн хяналтын улсын байцаагч нь эм, биобэлдмэлийн хяналтын асуудлаар, эмчилгээний чанарын хяналтын улсын байцаагч нь оношлох, эмчлэх асуудлаар тус тус мэргэшсэн байна.

 6. Эм, биобэлдмэл, эмчилгээний чанарын улсын хяналтын ерөнхий байцаагч, ахлах байцаагч, улсын байцаагч /цаашид энэ дүрэмд "байцаагч" гэнэ/ нь Засгийн газраас загварыг нь баталсан үнэмлэх, хувийн дугаар бүхий тэмдэг, албан шаардлага, дүгнэлт, акт, торгуулийн хуудас хэрэглэнэ.

7. Эм, биобэлдмэл, эмчилгээний чанарын хяналтын алба нь аймаг, нийслэлд ажиллаж байгаа байцаагчдыг мэргэжил, арга зүйн удирдлагаар хангаж, ажлыг нь шалган, тайлан авч дүгнэлт гаргана.

 

8. Эм, био бэлдмэлийн хяналтын байцаагч нь дор дурьдсан үүрэг хүлээнэ. Үүнд:

а/энэ дүрмийн дагуу эм, биобэлдмэлийн чанарын хяналтыг хэрэгжүүлэх;

б/Эм хангамжийн байгууллагын үйл ажиллагаа, эмийн хангалт, борлуулалт, сурталчилгаа, эмийн хугацаа, савлалт, хаяглалт, хадгалалт, тээвэрлэлтэд хяналт тавих;

в/эм, эмнэлгийн хэрэгслийг импортлодог, экспортлодог байгууллагын үйл ажиллагаа, зөвшөөрөл, чанарын баталгаажилтыг хянах;

г/хүмүүнлэгийн тусламжаар болон мэргэжлийн бус байгууллага, иргэдийн гадаадаас тусламж, хандиваар авч буй эм, биобэлдмэлд хяналт тогтоох;

д/эм, эмнэлгийн хэрэгслийн үйлдвэрлэл нь энэ төрлийн үйлдвэрлэл эрхлэх журам, батлагдсан стандарт, технологийн зааврын дагуу явагдаж буй эсэхэд хяналт тавих;

е/эмийн сангийн үйл ажиллагаа, эмийн санд бэлтгэж байгаа тарилгын шингэн, нэрмэл ус, нүдний дусаалга болон эмийн бүтээгдэхүүний  чанарт хяналт тавих;

ж/импортын болон эх орны эм, биобэлдмэл, эмийн түүхий эдийн чанарын баталгаажилтад хяналт тавих;

з/шинэ эм бүтээх, үйлдвэрлэлд нэвтрүүлж буй байдалд хяналт тавих;

и/мансууруулах ба сэтгэц нөлөөт болон хүчтэй үйлчилгээтэй эмийн зарцуулалт, хэрэглээ, эмийн жорын мөрдөлтөнд хяналт тавих.

9. Эмчилгээний чанарын байцаагч нь дор дурьдсан үүрэг хүлээнэ. Үүнд:

а/энэ дүрмийн дагуу эмчилгээний чанарын хяналтыг зохион байгуулж явуулах;

б/эмнэлгүүдийн чанарын менежерийг мэргэжлийн удирдлагаар хангаж зөвлөх;

в/эмчилгээ, үйлчилгээний талаар гарсан  стандартыг мөрдүүлэх, биелэлтийг хянах;

г/эмч, эмнэлгийн ажилтнуудын ёс зүйн хэм хэмжээнд хяналт тавих;

д/эмч, эмнэлгийн ажилтнуудын мэргэжлийн алдаа, түүнээс болж хүний амь нас, эрүүл мэнд хохирсонтой холбоотой гарсан гомдлыг хянан шийдвэрлэх;

е/хийсэн шалгалт, гаргасан дүгнэлт, бичсэн акт, танилцуулга, албан шаардлага, тоо баримтын үндэслэл, нотолгооны үнэн мөнийг бүрэн хариуцах;

ж/хяналт шалгалтын үр дүнгийн талаар холбогдох байгууллага, албан тушаалтан, иргэдэд мэдээлэх.

10. Эм, биобэлдмэлийн болон эмчилгээний чанарын  хяналтын байцаагчид нь дор дурдсан эрхтэй байна. Үүнд:

а/хяналт, шалгалтаар илэрсэн зөрчил дутагдлыг арилгах талаар зөвлөмж, хугацаатай үүрэг, албан шаардлага өгөх, биелэлтийг гаргуулж авах;

б/холбогдох байгууллагатай тохиролцсоны үндсэн дээр мэргэжлийн хүмүүсийг хяналт шалгалтын ажилд татан оролцуулах, шаардлагатай бол магадлан шинжээчийн хэсэг томилох, магадлах шинжилгээг мэргэжлийн байгууллагаар гүйцэтгүүлэх;

в/шинжилгээний зориулалтаар шинжлэх зүйлээс хүрэлцэхүйц хэмжээний дээжийг үнэ төлбөргүй авах;

г/хяналт шалгалтын ажилд шаардлагатай мэдээ, судалгаа, тайлбар, тодорхойлолт, бусад баримт бичгийг холбогдох байгууллага, аж ахуйн нэгж, албан тушаалтнаас гаргуулан авах;

д/шалгалтын үед илэрсэн эд мөрийн баримтыг устгах боломжийг хаах, хориглосон үйл ажиллагаа явуулахаас сэргийлэх зорилгоор нэгж, объект, агуулах, өрөө тасалгаа, шүүгээ савыг хууль хяналтын байгууллагын төлөөлөгч, гэрчийг байлцуулан түр хугацаанд лацдах;

е/хүний амь нас, эрүүл мэндэд хохирол учруулж байгаа болон учруулж болзошгүй нь зохих ёсоор нотлогдсон, эмнэлэг хамгаалал, ариун цэврийн дүрэм зөрчсөн эмнэлэг үйлчилгээний болон эм хангамжийн байгууллагын үйл ажиллагааг бүхэлд нь буюу хэсэгчлэн уг зөрчлийг арилгах хүртэл түр зогсоох, энэ тухай иргэдэд зарлан мэдээлэх. Энэ шийдвэрийг биелүүлээгүй тохиолдолд хуульд өөрөөр заагаагүй бол тухайн эмчилгээ үйлчилгээг бүр мөсөн зогсоох хүртэл арга хэмжээ авах;

ж/шалгалтаар илэрсэн хохирол, зөрчил нь нийгэмд хор аюултай гэж үзвэл шалгалтын акт материалыг хуулийн байгууллагад шилжүүлэх;

з/гэм буруутай этгээдэд Эрүүл мэндийн тухай, Эмийн тухай болон холбогдох бусад хууль тогтоомжид заасны дагуу хариуцлага хүлээлгэх.

 

11. Эм, биобэлдмэл, эмчилгээний чанарын хяналтын алба, байцаагчийн албан шаардлагыг байгууллага, аж ахуйн нэгж, албан тушаалтан, иргэн хугацаанд нь биелүүлж, хариуг албан ёсоор өгч байх үүрэгтэй.

12. Шалгуулсан байгууллага, аж ахуйн нэгжийн эрх баригч, албан тушаалтан хяналт шалгалтын явцад хууль тогтоомж зөрчигдсөн, гаргасан шийдвэр үндэслэлгүй гэж үзвэл гомдлоо хяналт шалгалт хийсэн байгууллагын эрх баригчид буюу дээд шатны байцаагчид гаргана. Гомдлыг хүлээн авсан албан тушаалтан, түүнийг хүлээн авснаас хойш 30 хоногийн дотор хянаж шийдвэрлэнэ. Энэхүү шийдвэрийг эс зөвшөөрвөл гомдлоо зохих журмын дагуу шүүхэд гаргаж болно. Гомдол гаргах нь ноцтой зөрчлийг арилгахгүй байх үндэслэл болохгүй.

13. Байцаагч үүрэгт ажлаа зохих ёсоор биелүүлээгүй, хууль тогтоомж зөрчсөн бол холбогдох хууль тогтоомжид заасны дагуу хариуцлага хүлээнэ.

 

 

------------оОо------------