Монгол Улсын Засгийн газрын 2008 оны 170

дугаар   тогтоолын хавсралт

 

 

УЛСЫН ХИЛЭЭР НЭВТРҮҮЛЭХ БАЙЛДААНЫ ЗОРИУЛАЛТТАЙ

ХЭРЭГСЭЛ, ТЕХНИКТ ЭКСПОРТ, ИМПОРТЫН ЛИЦЕНЗ

ОЛГОХ ЖУРАМ

 

Нэг. Нийтлэг үндэслэл

 

1.1. "Улсын хилээр нэвтрүүлэхийг хориглох, тарифын бус бусад хязгаарлалт тогтоох бүлэг барааны жагсаалтыг батлах тухай" Улсын Их Хурлын 1998 оны 5 дугаар тогтоолын 2 дугаар хавсралтад заасан " Зэвсэг, байлдааны хэрэгсэл, техник, тэдгээрийн эд анги, тоног хэрэглэл"-д (цаашид байлдааны хэрэгсэл гэх) экспорт, импортын лиценз (цаашид лиценз гэх) олгоход энэхүү журмыг мөрдөнө. 

 

1.2.  Байлдааны хэрэгсэл, техник, тоног хэрэглэл  гэдэгт гарал үүслийн хувьд цэргийн хэрэгцээнд зориулан үйлдвэрлэсэн, зэвсэгт хүчин, бусад цэрэг, цагдаа, тагнуул, шүүхийн шийдвэр гүйцэтгэх авлигатай тэмцэх, тахар, шүүхийн шинжилгээний байгууллага, Хууль сахиулахын их сургууль хуулиар олгогдсон чиг үүргээ хэрэгжүүлэх зорилгоор ашиглаж байгаа зэвсэг, техник, тэдгээрийн эд анги, сум галт хэрэглэл, тэсрэх бодис, тэсэлгээний хэрэгслийг ойлгоно. /Энэ заалтад ЗГ-ын 2016-1-11-ний өдрийн 33-р тогтоолоор нэмэлт орсон/

 

1.3. Улсын хилээр нэвтрүүлэх энэ журмын 1.6, 1.7-д зааснаас бусад байлдааны хэрэгсэлд экспорт, импортын лицензийг батлан хамгаалах асуудал хариуцсан төрийн захиргааны төв байгууллага Зэвсэгт хүчний Жанжин штаб, Тагнуулын ерөнхий газрын тодорхойлолтыг үндэслэн олгоно. /Энэ заалтад ЗГ-ын 2016-1-11-ний өдрийн 33-р тогтоолоор нэмэлт орсон/

 

1.4. Байлдааны зориулалттай хэрэгслийн экспорт, импортын үйл ажиллагаа нь төрийн нууцад хамаарч байгаа бол Төрийн нууцын тухай болон Төрийн нууцын жагсаалт батлах тухай хуулийн холбогдох заалтыг дагаж мөрдөн нууцыг хамгаалах арга хэмжээ авна.

 

1.5. Батлан хамгаалах болон хууль зүйн асуудал хариуцсан төрийн захиргааны төв байгууллага нь лиценз олгох эрх бүхий албан тушаалтны нэр, гарын үсгийн баталгааг Улсын гаалийн ерөнхий газарт хүргүүлнэ. /Энэ заалтад ЗГ-ын 2016-1-11-ний өдрийн 33-р тогтоолоор нэмэлт орсон/

 

1.6. Галт зэвсгийн тухай хуулийн 7.2-т заасны дагуу хууль сахиулах албаны зориулалттай галт зэвсэг, сум, галт зэвсэгтэй адилтгах хэрэгслийг улсын хилээр нэвтрүүлэх экспорт, импортын лицензийг хууль сахиулах байгууллагын саналыг үндэслэн хууль зүйн асуудал эрхэлсэн Засгийн газрын гишүүн олгоно. /Энэ заалтыг ЗГ-ын 2016-1-11-ний өдрийн 33-р тогтоолоор нэмсэн/

 

1.7. Галт зэвсгийн тухай хуулийн 8.2-т зааснаар бусад улсаас Монгол Улсад төрийн өндөр хэмжээний айлчлал хийхэд, эсхүл энхийг дэмжих ажиллагааны хээрийн сургууль, дадлагыг Монгол Улсад зохион байгуулахад олон улсын байгууллага, гадаад улсын өмчлөлийн галт зэвсэг, сумыг Монгол Улсын хилээр нэвтрүүлэх бол Тагнуулын ерөнхий газрын даргын болон батлан хамгаалахын асуудал эрхэлсэн Засгийн газрын гишүүний хүсэлтийг үндэслэн хууль зүйн асуудал эрхэлсэн Засгийн газрын гишүүн улсын хилээр нэвтрүүлэх зөвшөөрөл олгоно. /Энэ заалтыг ЗГ-ын 2016-1-11-ний өдрийн 33-р тогтоолоор нэмсэн/
 

 

Хоёр. Лиценз авах өргөдөл гаргах, хянан шийдвэрлэх журам

 

     2.1. Байлдааны хэрэгслийг экспортлох, импортлох лиценз хүссэн өргөдлийг лиценз хүсэгч Засгийн газрын 2002 оны 219 дүгээр тогтоолоор баталсан "Улсын хилээр төрийн хяналтын дор нэвтрүүлэх бараанд экспорт, импортын лиценз олгох  журам"-ын 1 дүгээр хавсралтад заасан "MNS5022:2001" стандартын "Е" маягтаар гаргана. Өргөдөлд дурдсан мэдээллийн үнэн зөвийн хариуцлагыг өргөдөл гаргагч хүлээнэ.

 

     2.2. Лиценз олгох өргөдөлд дор дурдсан баримт бичгийг хавсаргана:

 

     2.2.1. өргөдөл гаргагч нь хуулийн этгээд бол улсын бүртгэлийн гэрчилгээний хуулбар;

 

     2.2.2. байлдааны хэрэгслийг экспортлох, импортлохтой холбогдолтой гэрээ (контракт), төрийн байгууллагын шийдвэрийн хуулбар.

 

     2.3. Лиценз олгох гэж байгаа байлдааны хэрэгслийн онцлогоос шалтгаалан бусад шаардлагатай тодорхойлолт, дүгнэлтийг лиценз хүсэгчээс гаргуулж авна.

 

     2.4. Батлан хамгаалах болон хууль зүйн асуудал хариуцсан төрийн захиргааны төв байгууллага өргөдөл болон хавсаргасан баримт бичгийг хүлээн авснаас хойш ажлын 21 хоногийн дотор хянан шийдвэрлэнэ. /Энэ заалтад ЗГ-ын 2016-1-11-ний өдрийн 33-р тогтоолоор нэмэлт орсон/

 

     2.5. Батлан хамгаалах болон хууль зүйн асуудал хариуцсан төрийн захиргааны төв байгууллага шаардлагатай бол өргөдөл гаргагчийн баримт бичгийг холбогдох байгууллагаар шалгуулах, магадлан шинжилгээ хийлгүүлэх эрхтэй. Энэ тохиолдолд лиценз хүссэн өргөдлийг шийдвэрлэх хугацааг ажлын 30 хоногоор сунгаж болно. /Энэ заалтад ЗГ-ын 2016-1-11-ний өдрийн 33-р тогтоолоор нэмэлт орсон/

 

     2.6. Монгол Улсын олон улсын гэрээнд өөрөөр заагаагүй бол лицензийг Засгийн газрын 2002 оны 219 дүгээр тогтоолоор баталсан "Улсын хилээр төрийн хяналтын дор нэвтрүүлэх бараанд экспорт, импортын лиценз олгох журам"-ын 2 дугаар  хавсралтад заасан "MNS5022:2001" стандартын "D" маягтаар олгоно.

 

     2.7. Лицензийг 1 жил хүртэл хугацаагаар олгоно. Лицензийг нэг эх хувь, хоёр хуулбар хувь үйлдэнэ. Лицензид нэр заасан байлдааны хэрэгслийн хадгалалт, тээвэрлэлт, хамгаалалт, чанар стандартын шаардлага, нөхцөлийг хангасан байх үүргийг лиценз эзэмшигч өөрөө хариуцна.

 

     2.8. Лицензийг бусдад худалдах, бэлэглэх, барьцаалах зэргээр шилжүүлж болохгүй.

 

Гурав. Лицензийн хугацааг сунгах, лицензид нэмэлт, өөрчлөлт оруулах, лицензийг хүчингүй болгох

 

3.1. Экспорт, импортын гэрээний үүрэг биелүүлэх хугацаа, шаардлагатай уялдуулан лицензийг 1 жил хүртэл хугацаагаар нэг удаа сунгаж болно. Батлан хамгаалах болон хууль зүйн асуудал хариуцсан төрийн захиргааны төв байгууллага лиценз сунгах болон лицензид заасан байлдааны хэрэгслийн нэр төрөл, тоо хэмжээ, үнэ, нэвтрүүлэх боомтын нэрийг өөрчлөх, тодотгох өргөдлийг 3 хоногийн дотор хянан шийдвэрлэнэ. Лиценз сунгах, түүнд нэмэлт, өөрчлөлт оруулах өргөдлийг лиценз хүчинтэй байх хугацаанд гаргана. /Энэ заалтад ЗГ-ын 2016-1-11-ний өдрийн 33-р тогтоолоор нэмэлт орсон/

 

3.2. Батлан хамгаалах болон хууль зүйн асуудал хариуцсан төрийн захиргааны төв байгууллага дараахь тохиолдолд лицензийг бүхэлд нь  буюу хэсэгчлэн хүчингүй болгоно: /Энэ заалтад ЗГ-ын 2016-1-11-ний өдрийн 33-р тогтоолоор нэмэлт орсон/

 

3.2.1. лиценз эзэмшигч хүсэлт гаргасан;

3.2.2. лиценз эзэмшигч хуулийн этгээд татан буугдсан;

3.2.3. лиценз авахдаа хуурамч бичиг баримт бүрдүүлсэн;

3.2.4. олгосон лицензийг засварласан;

3.2.5. гаалийн бүрдүүлэлт хийхэд хуурамч мэдээлэл өгсөн.

 

3.3. Батлан хамгаалах болон хууль зүйн асуудал хариуцсан төрийн захиргааны төв байгууллага лицензийг хүчингүй болгосон тухайгаа шийдвэр гаргаснаас хойш 3 хоногийн дотор лиценз эзэмшигч болон гаалийн байгууллагад мэдэгдэнэ. /Энэ заалтад ЗГ-ын 2016-1-11-ний өдрийн 33-р тогтоолоор нэмэлт орсон/

 

Дөрөв. Тайлан, мэдээ гаргах

 

     4.1. Батлан хамгаалах асуудал хариуцсан төрийн захиргааны төв байгууллага олгосон лицензийн талаархи мэдээллийг Засгийн газрын 2002 оны 219 дүгээр тогтоолоор баталсан "Улсын хилээр төрийн хяналтын дор нэвтрүүлэх бараанд экспорт, импортын лиценз олгох журам"-ын 3, 4 дүгээр хавсралтад заасан маягтын дагуу гаргана. /Энэ заалтад ЗГ-ын 2016-1-11-ний өдрийн 33-р тогтоолоор нэмэлт орсон/ 

 

     4.2. Батлан хамгаалах асуудал хариуцсан төрийн захиргааны төв байгууллага лиценз олгох талаар дагаж мөрдөж байгаа Монгол Улсын хууль тогтоомж, түүнд орсон нэмэлт, өөрчлөлт, олгосон лицензийн тухай нэгдсэн судалгааг  гаргаж, холбогдох байгууллагад зохих журмын дагуу мэдээлж байна. /Энэ заалтад ЗГ-ын 2016-1-11-ний өдрийн 33-р тогтоолоор нэмэлт орсон/

 

 

 

---оОо---