3. Тамирчин дэлхийн цомын төлөөх шигшээ тэмцээнд тив, бүс нутаг төлөөлөн болон нэр заагдан оролцвол оролцогч орны тоог харгалзахгүйгээр шагналын 30 хувийг олгоно.

4. Өсвөр үеийнхний Олимпийн наадамд амжилттай оролцож медаль хүртсэн тамирчинд оролцсон орны тоог харгалзахгүйгээр Олимпийн наадмын шагналын 30 хувьтай тэнцэх хэмжээний мөнгөн шагналыг олгоно.

5. Хөгжлийн бэрхшээлтэй иргэдийн спортын тэмцээнд амжилттай оролцож медаль хүртсэн тамирчинд энэхүү журмын 2, 3, 4 дэх заалтад заасан тэмцээний ангилалд ногдох мөнгөн шагналыг олгоно.

6. Дэлхийн цомын төлөөх цувралаар явагддаг тэмцээнд тамирчны үзүүлсэн хамгийн өндөр амжилтад тохирох мөнгөн шагналыг тухайн жилд нэг удаа олгоно.

7. Багийн спортын төрлөөр медаль хүртсэн багийн тамирчин тус бүрт оролцсон орны тоог харгалзахгүйгээр медальд ногдох мөнгөн шагналын 30 хувьтай тэнцэх шагналыг олгоно.

8. Тамирчны хувийн болон багийн нэг удаагийн амжилтаар тооцон медаль олгодог спортын төрөлд мөнгөн шагналыг давхардуулахгүйгээр тухайн тамирчны үзүүлсэн хамгийн өндөр амжилтаар тооцон олгоно.

9. Тухайн тэмцээнд тамирчныг бэлтгэж оролцуулсан дасгалжуулагчид тамирчинд олгогдох шагналын 50 хувьтай тэнцэх хэмжээний мөнгөн шагнал тусад нь олгоно.

10. Мөнгөн шагнал авах болзол хангасан тамирчинтай 1-ээс дээш дасгалжуулагч ажилласан тохиолдолд дасгалжуулагчдад олгох мөнгөн шагналыг биеийн тамир, спортын асуудал хариуцсан төрийн захиргааны төв байгууллагаас спортын төрөл тус бүрийн онцлогийг харгалзан баталсан журмын дагуу олгоно.

11. Шатрын, зуун буудалт даамын төрлөөр олон улсын их мастер (Гроссмейстер)-ын цол хүртсэн тамирчинд тивийн наадмын алтан медальд ногдох мөнгөн шагнал олгоно.

12. Мөнгөн шагнал авах болзол хангасан тамирчин, дасгалжуулагчийн хамаарах спортын холбоо нь биеийн тамир, спортын асуудал хариуцсан төрийн захиргааны байгууллагад дараахь материалыг тэмцээн дууссанаас хойш 21 хоногийн дотор ирүүлнэ:

12.1. тухайн тэмцээний албан ёсны урилга, уг тэмцээний заавар, оролцох журам;

12.2. тэмцээнд оролцох бүрэлдэхүүнийг баталсан биеийн тамир, спортын асуудал хариуцсан төрийн захиргааны байгууллагын шийдвэрийн хуулбар;

12.3. тэмцээнд медаль авсныг нотолсон баримт, диплом, гэрчилгээ, хуулбарын хамт;

12.4. тухайн тэмцээний протоколыг байрлуулсан интернэтийн вэб сайтын танилцуулга;

12.5. тамирчныг мөнгөн шагналаар шагнуулах хүсэлт;

12.6. залуучууд, өсвөр үеийнхний тэмцээнд оролцсон тамирчдын төрсний гэрчилгээ болон иргэний үнэмлэхийн хуулбар.

13. Универсиад, залуучууд, өсвөр үеийн тэмцээнд нас дарж орсон тохиолдолд мөнгөн шагналыг олгохгүй.

14. Биеийн тамир, спортын асуудал хариуцсан төрийн захиргааны байгууллага энэхүү журмын 12 дахь заалтад заасан материалыг хянаж, мөнгөн шагнал олгуулах тухай саналаа биеийн тамир, спортын асуудал эрхэлсэн Засгийн газрын гишүүнд хүргүүлнэ.

15. Мөнгөн шагнал олгуулах асуудлыг биеийн тамир, спортын асуудал эрхэлсэн Засгийн газрын гишүүн Засгийн газарт оруулж шийдвэрлүүлнэ.

16. Тамирчин, түүний дасгалжуулагчид мөнгөн шагнал олгох Засгийн газрын шийдвэрийг үндэслэн биеийн тамир, спортын асуудал хариуцсан төрийн захиргааны байгууллага мөнгөн шагналыг олгож, бүрдүүлсэн материалыг хадгална. 


                                                                             ---оОо---