Монгол Улсын Засгийн газрын 2010 оны 11 дүгээр
                                                                                                  тогтоолын хавсралт


                                                     ЯАМ БОЛОН АЙМАГ, НИЙСЛЭЛИЙН ЗАСАГ ДАРГА, ЗАСАГ
                                                      ДАРГЫН ТАМГЫН ГАЗРЫН ҮЙЛ АЖИЛЛАГААНД ХЯНАЛТ-
                                                             ШИНЖИЛГЭЭ ХИЙХ, ҮР ДҮНГ ҮНЭЛЭХ ЖУРАМ

                                                            1. Хяналт-шинжилгээ, үнэлгээний зорилго

Хяналт-шинжилгээ, үнэлгээний зорилго нь яам, аймаг, нийслэлийн Засаг дарга, Засаг даргын Тамгын газрын үйл ажиллагааны үр дүнг үнэлэх, Монгол Улсын хууль тогтоомж, Засгийн газрын үйл ажиллагааны хөтөлбөр, Монгол Улсын эдийн засаг, нийгмийг хөгжүүлэх Үндсэн чиглэл, Монгол Улсын Мянганы хөгжлийн зорилтод суурилсан Үндэсний хөгжлийн цогц бодлого болон аймаг, нийслэлийн Засаг даргаас Монгол Улсын Ерөнхий сайдтай байгуулсан батламжийн биелэлтийг дүгнэхэд оршино.

                                                            2. Хяналт-шинжилгээ, үнэлгээний зорилт

2.1. Бодлогын зорилтууд, Засгийн газрын үйл ажиллагааны хөтөлбөр, үндэсний хөтөлбөр, Засгийн газрын шийдвэр нь төлөвлөсөн үр дүнд хүрсэн эсэхийг нягтлан тогтоох.

2.2. Яам, аймаг, нийслэлийн Засаг дарга, түүний Тамгын газрын үйл ажиллагааны үр дүнг үнэлэх.

2.3. Бодлогын зорилт төлөвлөсөн үр дүнд хүрч хэрэгжээгүй бол түүнийг засаж, залруулах чиглэл, арга хэмжээг тодорхойлох, шаардлагатай тохиолдолд бодлогын шинэ зорилтыг дэвшүүлж, Ерөнхий сайд, Засгийн газрын Танхимд танилцуулах.

2.4. Шийдвэр гаргах үйл ажиллагааг бодлогын хувилбар, санал, дүгнэлт, зөвлөмжөөр дэмжихэд чиглэгдэнэ.

                                                        3. Хяналт-шинжилгээ, үнэлгээний хамрах хүрээ

3.1. Хяналт-шинжилгээ, үнэлгээнд төрийн захиргааны болон нутгийн захиргааны бүх шатны байгууллага хамрагдана.

3.2. Хяналт-шинжилгээ, үнэлгээг яам, аймаг, нийслэлийн Засаг дарга, Засаг даргын Тамгын газрын тухайн жилийн үйл ажиллагаанд, эсхүл бодлогын тодорхой чиглэлээр хийнэ. Хамрах хүрээ, хугацааг удирдамжаар тодорхойлно.

3.3. Засгийн газрын агентлаг, аймаг, нийслэлийн Засаг даргын дэргэдэх агентлаг, түүнчлэн сум, дүүргийн үйл ажиллагаанд хяналт-шинжилгээ хийх, үр дүнг үнэлэх журмыг Засгийн газрын гишүүд, аймаг, нийслэлийн Засаг дарга батална.

3.4. Засгийн газрын Хэрэг эрхлэх газар, холбогдох яамдын төлөөлөл оролцсон баг жилд нийслэл болон 5-аас доошгүй аймгийн Засаг дарга, түүний Тамгын газар, 2-оос доошгүй яамны үйл ажиллагаанд энэхүү журмын 3.2-т заасны дагуу хяналт-шинжилгээ, үнэлгээ хийж дүнг Засгийн газарт танилцуулна.

                                                                 4. Хяналт-шинжилгээ, үнэлгээний арга зүй

4.1. Яам, аймаг, нийслэлийн Засаг дарга, түүний Тамгын газрын үйл ажиллагаанд хяналт-шинжилгээ, үнэлгээ хийх ажлыг Засгийн газрын Хэрэг эрхлэх газар нэгтгэн зохион байгуулж, арга зүйгээр хангана. Хяналт-шинжилгээ, үнэлгээг хийхдээ холбогдох мэргэжлийн байгууллагуудтай хамтарсан баг байгуулж болно.

4.2. Хяналт-шинжилгээ, үнэлгээ хийхдээ холбогдох хууль тогтоомж, Засгийн газрын шийдвэр, энэхүү журмыг үндэс болгоно.

4.3. Яам, аймаг, нийслэлийн Засаг дарга, Засаг даргын Тамгын газар тухайн жилийн үйл ажиллагаандаа хяналт-шинжилгээ, үнэлгээ хийж, үнэлгээний тайланг дараа оны 4 дүгээр сарын 1-ний дотор Засгийн газрын Хэрэг эрхлэх газарт ирүүлнэ.

4.4. Хяналт-шинжилгээ, үнэлгээний тайлан нь дараахь бүтэцтэй байна:

4.4.1. бодлогын зорилтын хэрэгжилтийн үр дүнгийн үнэлгээ;

4.4.2. бодлогын зорилтын хэрэгжилтийн зохицуулалтын үнэлгээ;

4.4.3. байгууллагын үйл ажиллагааны үр дүнгийн үнэлгээ;

4.4.4. байгууллагын үйл ажиллагааны ил тод байдлын үнэлгээ;

4.4.5. үйл ажиллагааны үр дагаврын үнэлгээ.

4.5. Яамны үйл ажиллагааны үнэлгээний дүнг энэхүү журмын 1 дүгээр хавсралт, яамдын үйл ажиллагааг үнэлэх эдийн засаг, нийгмийн хөгжлийн үзүүлэлтийн биелэлтийг 2 дугаар хавсралт, аймаг, нийслэлийн Засаг дарга, Засаг даргын Тамгын газрын үйл ажиллагааны үнэлгээний дүнг 3 дугаар хавсралт, аймаг, нийслэлийн эдийн засаг, нийгмийн хөгжлийн үзүүлэлтийн биелэлтийг 4 дүгээр хавсралт ёсоор тус тус гаргаж тайлангийн хамт ирүүлнэ.

4.6. Монгол Улсын Мянганы хөгжлийн зорилтод суурилсан Үндэсний хөгжлийн цогц бодлогын хэрэгжилт, Засгийн газрын үйл ажиллагааны хөтөлбөр, түүнийг хэрэгжүүлэх арга хэмжээний төлөвлөгөөний биелэлт, Монгол Улсын эдийн засаг, нийгмийг хөгжүүлэх Үндсэн чиглэлийн биелэлт, Засаг даргын үйл ажиллагааны хөтөлбөр, яам, аймаг, нийслэлд хэрэгжүүлж байгаа үндэсний хөтөлбөр, төслийн хэрэгжилтэд хийсэн хяналт-шинжилгээ, үнэлгээний тайланг мөн тайлангийн хамт ирүүлнэ.

4.7. Засгийн газрын Хэрэг эрхлэх газар хяналт- шинжилгээ, үнэлгээний тайланг хүлээн авч, бодлогын зорилтын хэрэгжилт, гарсан үр дүнгийн талаар шинжилгээ, судалгаа хийж, шаардлагатай бол газар дээр нь очиж ажиллана.

4.8. Хяналт-шинжилгээ, үнэлгээний тайланд тусгасан тоон болон тоогоор илэрхийлж болох зарим үзүүлэлтийг статистикийн болон тухайн үйл ажиллагааны хүрээний асуудлыг хариуцсан бусад байгууллагын судалгааны үзүүлэлт, тухайн жилд Засгийн газрын Хэрэг эрхлэх газраас яам, аймаг, нийслэлийн Засаг даргын Тамгын газрын үйл ажиллагаанд газар дээр нь очиж хийсэн хяналт-шинжилгээ, үнэлгээний дүн зэрэгтэй харьцуулан нягталж үзнэ.

4.9. Тайлан, судалгааны материалд хяналт-шинжилгээ хийхдээ баримт бичиг судлах, холбогдох мэргэжилтнүүдтэй ярилцах, санал асуулга явуулах, ажлын бодит гүйцэтгэлийг газар дээр нь очиж шалгах зэрэг дүн шинжилгээний түгээмэл аргуудыг хэрэглэнэ.

                                                                           5. Үр дүнг үнэлэх аргачлал

5.1. Яам, аймаг, нийслэлийн Засаг даргын үйл ажиллагааны үр дүнгийн ерөнхий үнэлгээ нь үзүүлэлт бүрийн онооны нийлбэрийг нийт үзүүлэлтийн тоонд хувааж гаргасан дундаж оноогоор илэрхийлэгдэнэ. Үнэлгээний хувь болон оноог энэхүү журмын 5.10-т заасны дагуу тодорхойлно.

5.2. Үндэсний хөгжлийн цогц бодлого, Засгийн газрын үйл ажиллагааны хөтөлбөр, түүнийг хэрэгжүүлэх арга хэмжээний төлөвлөгөө, үндэсний хөтөлбөр, эдийн засаг, нийгмийг хөгжүүлэх үндсэн чиглэлийн биелэлтийг тухайн яам дангаар, эсхүл толгойлон хэрэгжүүлбэл зохих арга хэмжээний гүйцэтгэл, үр дүнгээр үнэлнэ. Аймаг, нийслэлд мөн энэхүү зарчмын дагуу үнэлнэ.

5.3. Төсвийн ерөнхийлөн захирагч (сайд)-ийн эрхлэх асуудлын хүрээнд аймаг, нийслэлийн Засаг дарга хэрхэн ажилласан талаархи үнэлгээг тухайн сайд өгнө. Үнэлгээ нь сайдаас аймаг, нийслэлийн Засаг даргатай тухайн онд байгуулсан гэрээний биелэлтийг дүгнэсэн хувиар тодорхойлогдоно.

5.4. Төсвийн ерөнхийлөн захирагч сайд болон аймаг, нийслэлийн Засаг даргаас Ерөнхий менежертэй байгуулсан үр дүнгийн гэрээний биелэлтийг сайд, аймаг, нийслэлийн Засаг даргаас гэрээг дүгнэсэн хувиар тодорхойлно.

5.5. Яам, аймаг, нийслэлийн Засаг даргын тухайн жилд дэвшүүлсэн зорилт нь үйл ажиллагааны хэтийн бодлого, төлөвлөгөөтэй хэрхэн уялдсаныг тодорхойлж үнэлгээ өгнө. Яам, аймаг, нийслэлийн Засаг даргын тухайн жилийн зорилт, үйл ажиллагаа нь Үндэсний хөгжлийн цогц бодлого, Засгийн газрын үйл ажиллагааны хөтөлбөрийн үндсэн зорилт, зорилтууд болон үндэсний хөтөлбөр, хууль тогтоомжоор тодорхойлогдсон Засгийн газрын бодлогын зорилтуудтай уялдсан байх бөгөөд төлөвлөгдсөн үйл ажиллагаа хэрэгжсэнээр тухайн зорилт биелсэн гэж үзнэ.

5.6. Үйл ажиллагааны ил тод байдлын үнэлгээг Засгийн газраас баталсан төрийн болон нутгийн захиргааны байгууллагын үйл ажиллагааны "Ил тод байдлыг илтгэх шалгуур үзүүлэлт"-ийн дагуу хийж, үнэлгээний дэлгэрэнгүй мэдээллийг хяналт-шинжилгээ, үнэлгээний тайлантай хамт ирүүлнэ.

5.7. Засгийн газрын үйл ажиллагааны хөтөлбөр, үндэсний хөтөлбөр, төсөл, эдийн засаг, нийгмийг хөгжүүлэх Үндсэн чиглэл зэрэг баримт бичгээр дамжин хэрэгжиж байгаа төрийн бодлого иргэдийн амьдралд ямар нөлөө үзүүлснийг эдийн засаг, нийгмийн хөгжлийн үзүүлэлтийн биелэлт болон хэрэглэгчийн үнэлгээ харуулна.

5.8. Хэрэглэгчийн үнэлгээг Засгийн газрын үйл ажиллагааны хөтөлбөр (Засаг даргын үйл ажиллагааны хөтөлбөр)-ийн хэрэгжилт, яам, аймаг, нийслэлийн Засаг даргаас иргэдэд үзүүлж байгаа үйлчилгээний чанар, хүртээмжийн талаар тухайн аймаг, нийслэл, сум, дүүргийн насанд хүрсэн иргэдийн 5 хүртэлх хувийг хамруулан явуулсан санал асуулгын дүнг үндэслэн гаргана. Санал асуулгын нэгдсэн дүнг хяналт-шинжилгээ, үнэлгээний тайлантай хамт ирүүлнэ.

5.9. Энэ журмын 5.8-д заасан санал асуулга явуулах ажлыг мэргэжлийн судалгааны байгууллагад яам, аймаг, нийслэлийн Засаг даргын Тамгын газар захиалга өгч гүйцэтгүүлнэ. Санал асуулгыг хөндлөнгийн нөлөөгүй байхаар зохион байгуулсан байна. Санал асуулга явуулахтай холбогдон гарах зардлыг яам, аймаг, нийслэлийн Засаг даргын Тамгын газрын жил бүрийн төсөвт тусгасан байна.

5.10. Үнэлгээний хувийг тавьсан зорилтын гүйцэтгэл, үр дүнг (Г) хүрэх түвшин буюу тавьсан зорилтод (З) харьцуулж хувиар илэрхийлж (Г/З*100) тодорхойлно. Энэхүү үнэлгээний хувийг 0.05-аар үржүүлж (Г/З*100*0.05) үнэлгээний оноог тодорхойлно.

5.11. Тоогоор илэрхийлж үнэлэх боломжгүй зорилтын биелэлтийн хувийг тодорхойлоход дараахь зарчмыг баримтална. Үүнд:

5.11.1. тавьсан зорилтдоо бүрэн хүрсэн, энэ талаар холбогдох шийдвэр, үр дүн гарч, тогтворжсон бол 100 хувь;

5.11.2. тавьсан зорилтдоо бүрэн хүрээгүй боловч зохион байгуулалтын арга хэмжээ бүрэн авагдсан, холбогдох байгууллагын шийдвэр гарсан, гол үр дүн нь гарч эхэлж байгаа бол 90.0 хувь /80.0-100.0 хүртэл хувь/;

5.11.3. тавьсан зорилтод хүрэх зорилгоор өөрсдөөс хамаарах шийдвэрийг гаргасан, санхүүгийн асуудал шийдвэрлэгдсэн, дээд шатны байгууллагад өргөн барьсан буюу гүйцэтгэл нь тодорхой хэмжээгээр гарч эхэлж байгаа бол гүйцэтгэлийн байдлыг харгалзан 70.0 хувь /60.0-80.0 хүртэл хувь/;

5.11.4. тухайн зорилтыг хэрэгжүүлэх бэлтгэл болон боловсруулалтын шатны ажил бүрэн хийгдсэн, ажил тодорхой хэмжээнд эхэлсэн бол хийгдэж байгаа ажлын түвшинг харгалзан 50.0 хувь /40.0-60.0 хүртэл хувь/;

5.11.5. тухайн зорилтыг хэрэгжүүлэх бэлтгэл ажил хийгдэж дуусаад боловсруулалтын шатанд байгаа бол хийгдэж байгаа ажлын түвшинг харгалзан 30 хувь /20.0-40.0 хүртэл хувь/;

5.11.6. тухайн зорилтыг хэрэгжүүлэхэд шаардлагатай тооцоо, судалгаа хийх, асуудал тодорхойлох зэрэг бэлтгэл хангахтай холбогдсон арга хэмжээг авч эхэлж байгаа бол ажлын түвшинг харгалзан 10.0 хувь /0-20.0 хүртэл хувь/;

5.11.7. тухайн зорилтыг хэрэгжүүлэх талаар ямар нэгэн ажил зохион байгуулаагүй бол биелэлтийн хувийг "0" гэж үзнэ.


                                                    6. Хяналт-шинжилгээ, үнэлгээний үр дүнг хэрэгжүүлэх

6.1. Хяналт-шинжилгээ, үнэлгээний дүнтэй холбогдуулан дараахь арга хэмжээг хэрэгжүүлнэ:

6.1.1. яам, аймаг, нийслэлийн Засаг дарга, Засаг даргын Тамгын газрын тэргүүний арга, туршлагыг түгээн дэлгэрүүлэх;

6.1.2. үйл ажиллагааны үр дүнг дээшлүүлэх чиглэлээр сургалт зохион байгуулах;

6.1.3. яам, аймаг, нийслэлийн Засаг даргад үйл ажиллагааны үр дүнг дээшлүүлэх талаар үүрэг, чиглэл өгөх, шаардлагатай тохиолдолд зохих удирдамжийн дагуу газар дээр нь шалгалт хийж, дүгнэлт гаргах.

6.2. Ерөнхий үнэлгээгээр хамгийн өндөр оноо авсны дээр Засгийн газрын үйл ажиллагааны хөтөлбөрийн хэрэгжилтээр бусдаасаа илүү үнэлгээ авсан гурван яам, таван аймаг, нийслэлийн Засаг даргын Тамгын газар тус бүрийг 10.0 сая хүртэл төгрөгөөр, гурван яамны Төрийн нарийн бичгийн дарга, таван аймаг, нийслэлийн Засаг даргын Тамгын газрын дарга нарыг нэг сарын үндсэн цалинтай тэнцэх мөнгөн шагналаар шагнаж урамшуулна.

6.3. Шагнал, урамшуулалд зарцуулах хөрөнгийг Засгийн газрын Хэрэг эрхлэх газрын төсөвт жил бүр тусгана. 




                                                                                                 --оОо--

                                                                                                                                      Журмын 1 дүгээр хавсралт