legalinfo.mn

+(976)-11-323317

info@legalinstitute.mn

A

A

A

en
Нууц үг сэргээх Шинээр бүртгүүлэх
  • Бүртгүүлэх
  • Нүүр
  • Засгийн газрын тогтоол
  • ТҮҮХЭН ҮЙЛ ЯВДЛЫН ОЙ, ТЭМДЭГЛЭЛТ ӨДРИЙГ ТЭМДЭГЛЭХ, ГАВЬЯАТ ҮЙЛСТНИЙГ АЛДАРШУУЛАХ, ДУРСГАЛЫГ НЬ МӨНХЖҮҮЛЭХ ЖУРАМ (Засгийн газрын 2019 оны 204 дүгээр тогтоолоор хүчингүй болсонд тооцсон)
Шүүлтүүр
Бүлэг: 1979
Монгол Улсын  Засгийн газрын  2010 оны
172  дугаар тогтоолын хавсралт
 
ТҮҮХЭН ҮЙЛ ЯВДЛЫН ОЙ, ТЭМДЭГЛЭЛТ ӨДРИЙГ ТЭМДЭГЛЭХ,
ГАВЬЯАТ ҮЙЛСТНИЙГ АЛДАРШУУЛАХ, ДУРСГАЛЫГ НЬ
МӨНХЖҮҮЛЭХ  ЖУРАМ

(Засгийн газрын 2019 оны 204 дүгээр тогтоолоор хүчингүй болсонд тооцсон)
 
Нэг. Нийтлэг үндэслэл
 
1.1. Нийтээр тэмдэглэх баярын болон тэмдэглэлт өдрүүдээс бусад улс, салбар, орон нутгийн чанартай түүхэн үйл явдлын ой, тэмдэглэлт өдрийг тэмдэглэх болон гавьяат үйлстнийг алдаршуулах, дурсгалыг нь мөнхжүүлэх ажлыг зохион байгуулахад энэхүү журмыг мөрдөнө. 
 
Хоёр. Түүхэн үйл явдлын ой
 
2.1. Монгол Улсын түүхэнд холбогдох дараахь онцгой үйл явдлын ойг дор дурдсан хугацаанд тэмдэглэнэ:
 
2.1.1. Хүннү гүрэн байгуулагдсаны ойг Цагаан сар-билгийн тооллын хаврын тэргүүн сарын шинийн нэгний өдөр;
           
2.1.2. Эзэн богд Чингис хаан-Тэмүүжиний мэндэлсний ой “Монгол бахархлын өдөр”-ийг жил бүр өвлийн тэргүүн сарын шинийн нэгний өдөр;/ЗГ-ын 2012 оны 197-р тогтоолоор өөрчилсөн/
           
2.1.3. Их Монгол Улс байгуулагдсаны ойг жил бүр Ардын хувьсгалын ой-Үндэсний их баяр наадмын өдөр; 
           
2.1.4. 1911 оны Үндэсний эрх чөлөөний хувьсгалын ойг жил бүр 12 дугаар сарын 29-ний өдөр;
           
2.1.5.1990 оны Ардчилсан хувьсгалын ойг жил бүр 12 дугаар сарын 10-ны өдөр;
                       
2.1.6. салбарын 100 болон түүнээс дээшхи 50 жилийн давтамжтай их тэгш ойг тухайн салбарын үүсэж байгуулагдсан өдөр;
 
2.1.7.Ардчилсан сонгуулийн ой “Бүрэн эрх, ардчилсан сонгуулийн өдөр”-ийг жил бүрийн 7 дугаар сарын 29-ний өдөр. /ЗГ-ын 2015-7-27-ны өдрийн 308-р тогтоолоор нэмсэн/  
             
2.2. Дараахь түүхэн үйл явдлын ойг дор дурдсан хугацаанд 10 жилийн давтамжтай тэмдэглэнэ:
                      
2.2.1. Халх голын байлдааны ялалтын ойг 8 дугаар сард;
                       
2.2.2. Дэлхийн II дайн дууссаны болон 1945 оны чөлөөлөх дайны ялалтын ойг 8 дугаар сард;
           
2.2.3. Монгол Улсын баруун хил дээр 1948 онд болсон зэвсэгт тулгаралт дууссаны ойг 6 дугаар сард;
           
2.2.4. Монгол хүн сансарт ниссэний болон сансрын хамтарсан нислэгийн  ойг  3 дугаар сард.  
           
Гурав. Түүхэн үйл явдлын ойг тэмдэглэх
 
3.1. Энэ журмын 2.1.1-2.1.7-д заасан их ойг тэмдэглэн өнгөрүүлэх хороог Засгийн газар байгуулна. Хороо нь ой тэмдэглэн өнгөрүүлэх арга хэмжээний төлөвлөгөө, төсвийн төслийг боловсруулж, Засгийн газарт  оруулж шийдвэрлүүлнэ. /Энэ хэсгийг 2010 оны 314, ЗГ-ын 2015-7-27-ны өдрийн 308-р тогтоолоор тус тус өөрчлөлт орсон/ 
 
3.2. Батлан хамгаалахын асуудал хариуцсан төрийн захиргааны төв байгууллага энэ журмын 2.2.1-2.2.4-т заасан ойг тэмдэглэн өнгөрүүлэх арга хэмжээний төлөвлөгөө, төсвийн төслийг боловсруулж, Засгийн газарт оруулж шийдвэрлүүлнэ.
           
3.3. Орон нутгийн байгууллагын 50 болон түүнээс дээшхи 10 жилийн давтамжтай тэгш ойг тэмдэглэх асуудлыг аймаг, нийслэлийн иргэдийн Төлөөлөгчдийн Хурал шийдвэрлэнэ.   
 
3.4. Энэ журмын 3.3-т зааснаас бусад байгууллага болон тодорхой салбарын 50 болон түүнээс дээшхи 10 жилийн давтамжтай тэгш ойг тэмдэглэх асуудлыг тухайн салбарын асуудал хариуцсан төрийн захиргааны төв байгууллага шийдвэрлэнэ.
 
3.5. Олон улсын хэмжээний түүхэн үйл явдлын тэгш, их тэгш ойг тэмдэглэх асуудлыг гадаад харилцааны асуудал хариуцсан төрийн захиргааны төв байгууллага судлан үзэж, шаардлагатай гэж үзвэл Засгийн газарт оруулж шийдвэрлүүлнэ.
           
3.6. Онцгой болон түүхэн үйл явдлын ойг тэмдэглэх ажлын хүрээнд дараахь арга хэмжээг зохион байгуулж болно:
           
3.6.1. түүхэн үйл явдлын агуулга, мөн чанар, ач холбогдол, сургамжийг олон нийтэд танин мэдүүлж, сурталчлах;
  
3.6.2. түүхэн үйл явдалтай холбогдуулан шинжлэх ухааны тодорхой салбар, чиглэлээр эрдэм шинжилгээний хурал зохион байгуулах;
  
3.6.3. уралдаан, тэмцээн, наадам, үзлэг, өдөрлөг, спартакиад, аялал зэрэг соёл, урлаг, спортын арга хэмжээ зохион байгуулах;
  
3.6.4. ном, кино бүтээх;
  
3.6.5. хөшөө, дурсгалын самбар, багана босгох.
           
3.7. Хөшөө, дурсгалын самбар, баганын загвар, түүний тодорхойлолтыг барилга, хот байгуулалтын асуудал хариуцсан төрийн захиргааны төв болон  нутгийн  захиргааны байгууллагын гаргасан мэргэжлийн дүгнэлтийг үндэслэн аймаг, нийслэлийн иргэдийн Төлөөлөгчдийн Хурлаар батлуулна.
 
3.8. Ойг тэмдэглэхэд шаардагдах хөрөнгийг тухайн жилийн улсын болон орон нутгийн төсөвт тусган батлуулна. Ойг тэмдэглэх үйл ажиллагаанд шаардагдах хөрөнгийн тодорхой хэсгийг иргэн, аж ахуйн нэгж, төрийн бус байгууллагын хандив, ивээн тэтгэгчдийн хөрөнгөөр санхүүжүүлж болно.
 
Дөрөв. Тэмдэглэлт өдөр
 
4.1. Салбарын хэмжээнд дараахь тэмдэглэлт өдрийг дор дурдсан хугацаанд тэмдэглэнэ:
 
4.1.1. Иргэний нийгмийн өдөр-жил бүрийн 1 дүгээр сарын 31-ний өдөр;
 
4.1.2. Багш нарын өдөр-жил бүрийн 10 дугаар сарын 5-ны өдөр; /ЗГ-ын 2013-12-14-ны 412-р тогтоолоор өөрчилсөн. Энэ өөрчлөлтийг 2014-2015 оны хичээлийн жилээс эхлэн дагаж мөрдөнө./
 
4.1.3. Хөдөлмөр, нийгмийн хамгааллын салбарын ажилтны өдөр-жил бүрийн 5 дугаар сарын 3 дахь Бямба гараг; /ЗГ-ын 2013 оны 120-р тогтоол, ЗГ-ын 2017 оны 157-р тогтоолоор тус тус өөрчилсөн/
 
4.1.4. Хэвлэл, мэдээллийн ажилтны өдөр-жил бүрийн 3 дугаар сарын 6-ны өдөр;
 
4.1.5. Хэрэглэгчдийн эрх ашгийг хамгаалах өдөр-жил бүрийн 3 дугаар сарын 15-ны өдөр;
       
4.1.6. Наурызын баяр-жил бүрийн 3 дугаар сарын 22-ны өдөр;
 
4.1.7. Усны болон цаг уурын өдөр-жил бүрийн 3 дугаар сарын 23-ны өдөр; /Энэ заалтыг ЗГ-ын 2017 оны 97-р тогтоолоор өөрчлөн найруулсан/
 
4.1.8. Хөнгөн, хүнсний аж үйлдвэрийн ажилтан, ажилчдын өдөр-жил бүрийн 3 дугаар сарын 26-ны өдөр /ЗГ-ын 2014 оны 98-р тогтоолоор өөрчилсөн/;
                    
4.1.9. Мод тарих өдөр-жил бүрийн 4 дүгээр сарын хоёр дахь Ням гараг;
 
4.1.10. Үндэсний бичиг үсгийн баяр-жил бүрийн 5 дугаар сарын эхний Ням гараг;
 
4.1.11. Газрын харилцааны ажилтны өдөр-жил бүрийн 5 дугаар сарын эхний Ням гараг;
 
4.1.12. Байгаль хамгаалах өдөр-жил бүрийн 5 дугаар сарын 2 дахь Ням гараг; 
 
4.1.13. Газрын тосны салбарын ажилтны өдөр-жил бүрийн 5 дугаар сарын 4 дэх Ням гараг;
 
4.1.14. Иргэний агаарын тээвэрчдийн өдөр-жил бүрийн 5 дугаар сарын 4 дэх Ням гараг;
 
4.1.15. Бурхан багшийн их дүйцсэн өдөр-билгийн тооллын зуны эхэн сарын арвантавны өдөр;
 
4.1.16. Мэргэжлийн хяналтын ажилтны өдөр-жил бүрийн 6 дугаар сарын 2 дахь Ням гараг;
 
4.1.17. Онцгой байдлын албаны өдөр-жил бүрийн 6 дугаар сарын 20-ны өдөр;
 
4.1.18. Хуульчдын өдөр-жил бүрийн 6 дугаар сарын 4 дэх Ням гараг;
 
4.1.19. Тамирчдын өдөр-жил бүрийн 6 дугаар сарын 4 дэх Ням гараг;
 
4.1.20. Хоршоологчдын өдөр-жил бүрийн 7 дугаар сарын эхний Ням гараг;
 
4.1.21. Цагдаагийн болон Дотоодын цэргийн алба хаагчдын өдөр-жил бүрийн 7 дугаар сарын 19-ний өдөр;/ЗГ-ын 2012 оны 202-р тогтоолоор өөрчилсөн/
 
4.1.22. Авто тээвэрчдийн өдөр-жил бүрийн 7 дугаар сарын 3 дахь Ням  гараг; 
 
4.1.23. Мэдээллийн технологи, харилцаа холбооны ажилтны өдөр-жил бүрийн 7 дугаар сарын сүүлийн Ням гараг; /ЗГ-ын 2013 оны 57-р тогтоол, ЗГ-ын 2017 оны 110-р тогтоолоор тус тус өөрчилсөн/
 
4.1.24. Төмөр замчдын өдөр-жил бүрийн 8 дугаар сарын эхний Ням гараг;
 
4.1.25. Эрүүл мэндийн салбарын ажилтны өдөр-жил бүрийн 8 дугаар сарын хоёр дахь Ням гараг;
 
4.1.26. Эрчим хүчний ажилтны өдөр-жил бүрийн 8 дугаар сарын 3 дахь Ням гараг;
 
4.1.27. Соёл, урлагийн ажилтны өдөр-жил бүрийн 9 дүгээр сарын 2 дахь Ням гараг;
 
4.1.28. Аялал, жуулчлалын өдөр-жил бүрийн 9 дүгээр сарын 27-ны өдөр;
 
4.1.29. Үндэсний татварын ажилтны өдөр-жил бүрийн 9 дүгээр сарын 2  дахь Ням гараг; 
 
4.1.30. Барилгачдын өдөр-жил бүрийн 9 дүгээр сарын эхний Ням гараг;  
 
4.1.31. Хилчдийн өдөр-жил бүрийн 9 дүгээр сарын 17-ны өдөр;
 
4.1.32. Оюутны өдөр-жил бүрийн 10 дугаар сарын 5-ны өдөр;
 
4.1.33. Нийтийн аж ахуй, ахуйн үйлчилгээний ажилтны өдөр-жил бүрийн        10 дугаар сарын 2 дахь Ням гараг;
 
4.1.34. Стандарт, хэмжил зүйн ажилтны өдөр-жил бүрийн 10 дугаар сарын  14-ний өдөр;
 
4.1.35. Гаалийн ажилтны өдөр-жил бүрийн 10 дугаар сарын 20-ны өдөр;
 
4.1.36. Геологичдын өдөр-жил бүрийн 10 дугаар сарын 3 дахь Ням гараг;  
 
4.1.37. Авто замчдын өдөр-жил бүрийн 10 дугаар сарын 4 дэх Ням гараг;  
 
4.1.38. Хөдөө аж ахуйн ажилтны өдөр-жил бүрийн 11 дүгээр сарын 2 дахь Ням гараг;
 
4.1.39. Шинжлэх ухааны ажилтны өдөр-жил бүрийн 11 дүгээр сарын 4 дэх Ням гараг;
 
4.1.40. Архивчдын өдөр-жил бүрийн 12 дугаар сарын 5-ны өдөр;
 
4.1.41. Санхүү, эдийн засагчдын өдөр-жил бүрийн 12 дугаар сарын 2 дахь Ням гараг;   
 
4.1.42. Уурхайчдын өдөр-жил бүрийн 12 дугаар сарын 25-ны өдөр;
 
4.1.43. Дипломат албаны өдөр-жил бүрийн 12 дугаар сарын 29-ний өдөр;  

4.1.44. Улсын бүртгэлийн ажилтны өдөр-11 дүгээр сарын 23-ны өдөр;

4.1.45. Шүүхийн шийдвэр гүйцэтгэх байгууллагын ажилтны өдөр-жил бүрийн 8 дугаар сарын 4 дэх Ням гараг /4.1.44, 4.1.45 дахь хэсгийг 2010 оны 235-р, 2011 оны 25-р  тогтоолоор тус тус нэмсэн)
 
4.1.46. Хүмүүнлэгийн өдөр-жил бүрийн 5 дугаар сарын 8-ны өдөр (Энэ хэсгийг 2011-05-03-ны өдрийн 150-р тогтоолоор нэмсэн)

4.1.47. Хөдөлмөрийн аюулгүй байдал, эрүүл ахуйн өдөр-4 дүгээр сарын 28-ны өдөр /ЗГ-ын 2012 оны 124-р тогтоолоор нэмсэн/   

4.1.48.Энхийг сахиулагчдын өдөр-жил бүрийн 5 дугаар сарын 29-ний өдөр/ЗГ-ын 2012 оны 140-р тогтоолоор нэмсэн/

4.1.49. Тагнуулын байгууллагын ажилтны өдөр-жил бүрийн 7 дугаар сарын З-ны өдөр /ЗГ-ын 2012 оны 202-р тогтоолоор нэмсэн/

4.1.50. “Хөдөлмөрийн салбарын ажилтны өдөр-жил бүрийн 9 дүгээр сарын дөрөв дэх Ням гараг /ЗГ-ын 2013 оны 120-р тогтоолоор нэмсэн/ /ЗГ-ын 2017 оны 157-р тогтоолоор хүчингүй болсонд тооцсон/
 
4.1.51. Худалдааны ажилчдын өдөр-жил бүрийн 12 дугаар сарын З дахь ням гараг /ЗГ-ын 2014 оны 98-р тогтоолоор нэмсэн/
 
4.1.52. Ой модны салбарын ажилчдын өдөр-жил бүрийн 9 дүгээр сарын гурав дахь Ням гараг /ЗГ-ын 2014 оны 103-р тогтоолоор нэмсэн/
 
4.1.53. Банкны салбарын ажилтны өдөр-жил бүрийн 6 дугаар сарын 2-ны өдөр /ЗГ-ын 2014 оны 121-р тогтоолоор нэмсэн/
 
4.1.54. Даатгалын өдөр–жил  бүрийн  11 дүгээр  сарын  24-ний өдөр /Энэ заалтыг ЗГ-ын 2014 оны 398-р тогтоолоор нэмсэн/
 
4.1.55. Прокурорын албаны өдөр-жил бүрийн 8 дугаар сарын 14-ний өдөр /Энэ заалтыг ЗГ-ын 2015 оны 229-р тогтоолоор нэмсэн/
 
4.1.56. Хүний нөөцийн ажилтны өдөр-жил бүрийн 10 дугаар сарын 15-ны өдөр /Энэ заалтыг ЗГ-ын 2016-4-18-ны өдрийн 217-р тогтоолоор нэмсэн/
 
4.1.57. Хөрс хамгаалах үндэсний өдөр-жил бүрийн 5 дугаар сарын эхний долоо хоногийн Бямба гараг /Энэ заалтыг ЗГ-ын 2017 оны 149-р тогтоолоор нэмсэн/
 
4.1.58. Маркетеруудын өдөр-жил бүрийн 10 дугаар сарын 20-ны өдөр (Энэ заалтыг Засгийн газрын 2018 оны 334 дүгээр тогтоолоор нэмсэн)
               
Тав. Тэмдэглэлт өдрийг тэмдэглэх
 
5.1. Салбарын болон зарим ажил мэргэжлийн ажилтан, ажилчдын өдрийг тэмдэглэх нь тухайн салбарын ололт амжилтыг олон нийтэд мэдээлж сурталчлах,  түгээн дэлгэрүүлэх, харилцан туршлага солилцох, иргэдэд үйлчилгээ үзүүлэх, тэдний санал, хүсэлтийг сонсож, бүтээлч ажил, үйл ажиллагаанд оролцуулах, ажилтан ажилчдын хөдөлмөр, бүтээлийг тодруулан алдаршуулах зорилго агуулна.
 
5.2. Тэмдэглэлт өдрийг тэмдэглэх асуудлыг тухайн байгууллага үйл ажиллагааны төлөвлөгөө, төсөвтөө тусган батлуулж, зардлын гүйцэтгэлд нь хяналт тавина.
 
5.З. Тэмдэглэлт өдрийг тэмдэглэх үеэр баярын болон эрдэм шинжилгээний хурал, цуглаан, уулзалт хийх, хөдөлмөрийн алдар тэмдэглэх, шагнаж урамшуулах, туршлага солилцох, үдэшлэг, өдөрлөг, оюун ухаан сорих болон биеийн тамирын  тэмцээн, ажил, мэргэжлийн уралдаан зохиох, гавьяат үйлстнийг алдаршуулах, дурсгалыг нь мөнхжүүлэх, хэвлэл, мэдээллийн хэрэгслээр сурталчлах зэрэг ажил зохион байгуулж болно.
 
5.4. Тэмдэглэлт өдрийг тухайн жилд бүтээлч ажлын хөдөлгөөн өрнүүлэн тодорхой сэдэв, уриан дор зохион байгуулж болно.
 
5.5. Тэмдэглэлт өдрийг тогтоосон хугацаанд тэмдэглэж, үр дүнг тооцож ажиллана.
 
Зургаа. Гавьяат үйлстнийг алдаршуулах, дурсгалыг нь мөнхжүүлэх
 
            6.1. Гавьяат үйлстэнд дор дурдсан хүмүүсийг хамруулна:
 
6.1.1. Монгол Улсын баатар;
 
6.1.2. Монгол Улсын хөдөлмөрийн баатар;
 
6.1.3. Монгол Улсын ардын цолтон;
 
6.1.4. Монгол Улсын гавьяат цолтон;
 
6.1.5. Монгол Улсын Төрийн шагналтан.
 
6.2. Гавьяат үйлстэн мэндэлсний 70 болон түүнээс дээшхи 10 жилийн давтамжтай тэгш ойг нь тохиолдуулан тодорхой байгууллагыг түүний нэрэмжит болгож болно.
 
6.3. Орон нутгийн байгууллагыг гавьяат үйлстний нэрэмжит болгох, урьд нь нэрэмжит болгосон шийдвэрийг өөрчлөх санал хүсэлтийг сум, дүүргийн Засаг дарга судлан үзэж, энэхүү журамд нийцэж байгаа тохиолдолд аймаг, нийслэлийн Засаг даргад дараахь баримт бичгийн хамт жил бүрийн I улиралд  багтаан хүргүүлнэ:
 
6.3.1. нэрэмжит болгох, урьд нь нэрэмжит болгосон шийдвэрийг өөрчлөх үндэслэл;       
 
6.3.2. гавьяат үйлстний намтар;
 
6.3.3. хүсэлт гаргасан байгууллагын танилцуулга, хамт олны хурлын тэмдэглэл;
 
6.3.4. сум, дүүргийн иргэдийн Төлөөлөгчдийн Хурлын тогтоол, Засаг даргын санал.
 
6.4. Аймаг, нийслэлийн Засаг дарга нь энэ журмын 6.3-т заасан санал, хүсэлт, баримт бичгийг хүлээн авч хянан үзэж 30 хоногийн дотор хариу өгөх буюу шийдвэрийн төсөл боловсруулж, аймаг, нийслэлийн иргэдийн Төлөөлөгчдийн Хуралд оруулж шийдвэрлүүлнэ.
 
6.5. Энэ журмын 6.3-т зааснаас бусад байгууллагыг гавьяат үйлстний нэрэмжит болгох, урьд нь нэрэмжит болгосон шийдвэрийг өөрчлөх санал хүсэлтийг тухайн асуудлыг хариуцсан төрийн захиргааны төв байгууллага судлан үзэж, энэхүү журамд нийцэж байгаа тохиолдолд соёлын асуудал хариуцсан төрийн захиргааны төв байгууллагад дараахь баримт бичгийн хамт жил бүрийн I улиралд багтаан хүргүүлнэ:
 
6.5.1. нэрэмжит болгох, урьд нь нэрэмжит болгосон шийдвэрийг өөрчлөх үндэслэл;       
 
6.5.2. гавьяат үйлстний намтар;
 
6.5.3. хүсэлт гаргасан байгууллагын танилцуулга, хамт олны хурлын тэмдэглэл;
 
6.5.4. тухайн ажлыг эрхэлсэн Засгийн газрын гишүүний санал, аймаг, нийслэлийн иргэдийн Төлөөлөгчдийн Хурлын тогтоол, Засаг даргын санал.
 
6.6. Энэ журмын 6.5-д санал, хүсэлт, баримт бичгийг соёлын асуудал хариуцсан төрийн захиргааны төв байгууллага хянан үзэж, энэхүү журмын шаардлагад нийцэж байгаа тохиолдолд шийдвэрийн төсөл боловсруулж, Засгийн газарт оруулан шийдвэрлүүлнэ.
 
6.7. Байгууллагыг гадаад орны төр, нийгмийн зүтгэлтэн, гавьяат үйлстний нэрэмжит болгох асуудлыг гадаад харилцааны асуудал хариуцсан төрийн захиргааны төв байгууллагын саналыг үндэслэн энэхүү журмын дагуу шийдвэрлэнэ.
 
6.8. Гавьяат үйлстний нэрэмжит болсон байгууллага нь гавьяат үйлстний үйл хэргийг мөнхжүүлэн нэр төртэй авч явах бөгөөд түүний гэр бүл, үр хүүхэдтэй холбоотой байж, харилцан дэмжлэг туслалцаа үзүүлж болно.
 
6.9. Гавьяат үйлстнийг алдаршуулах, дурсгалыг нь мөнхжүүлэх зорилгоор түүний мэндэлсний 100 болон түүнээс дээшхи 50 жилийн давтамжтай их тэгш ойг тэмдэглэнэ. Ой тэмдэглэх тухай санал хүсэлтийг тухайн салбарын асуудал хариуцсан төрийн захиргааны төв байгууллага болон аймаг, нийслэлийн Засаг дарга судалж, шаардлагатай гэж үзвэл соёлын асуудал хариуцсан төрийн захиргааны төв байгууллагад дараахь баримт бичгийн хамт жил бүрийн I улиралд багтаан хүргүүлнэ:
 
6.9.1. гавьяат үйлстний тухай дэлгэрэнгүй танилцуулга, түүний ойг тэмдэглэх үндэслэл;
 
6.9.2. ойг тэмдэглэх ажлын төлөвлөгөө, төсвийн төсөл, санхүүжилтийн эх үүсвэрийн талаархи мэдээлэл.
 
6.10. Соёлын асуудал хариуцсан төрийн захиргааны төв байгууллага дээрх санал хүсэлтийг хүлээн авч судлан, шаардлагатай гэж үзвэл шийдвэрийн төсөл боловсруулж Засгийн газарт оруулан шийдвэрлүүлнэ.
 
6.11. Гавьяат үйлстний дурсгалд зориулсан самбар, багана, суварга, цээж баримал, хөшөө босгох, гэр музей, цэцэрлэгт хүрээлэн байгуулах, гудамж, талбайг гавьяат үйлстний нэрэмжит болгох, ой тэмдэглэх асуудлыг аймаг, нийслэлийн Засаг дарга судлан иргэдийн Төлөөлөгчдийн Хуралд хэлэлцүүлж, тухайн жилийн төсөвтөө багтаан шийдвэрлэнэ.
 
Долоо. Бусад
 
7.1. Түүхэн үйл явдлын ой, тэмдэглэлт өдрийг тэмдэглэх болон гавьяат үйлстнийг алдаршуулах, дурсгалыг нь мөнхжүүлэх саналыг байгууллага, аж ахуйн нэгжийн хамт олны хурлаас өмчийн хэлбэр харгалзахгүйгээр гаргаж болно.
 
7.2. Түүхэн үйл явдлын ой, тэмдэглэлт өдрийг тэмдэглэх болон гавьяат үйлстнийг алдаршуулах, дурсгалыг нь мөнхжүүлэхэд шаардагдах төсөв батлагдаагүй, төсвийн ерөнхийлөн захирагчийн шийдвэр гараагүй тохиолдолд уг үйл ажиллагааг санхүүжүүлсэн бол зарцуулсан хөрөнгийг тухайн төсөвт байгууллагын шийдвэр гаргасан албан тушаалтнаар нөхөн төлүүлж төсөвт төвлөрүүлнэ.
 
 
 
---оОо---

 

 

Текст томруулах

A

A

A