Хэрэглээний үнийн индексээр илэрхийлэгдэх инфляцийг жилийн 5 хувиас хэтрүүлэхгүй байхыг зорино. Дунд болон урт хугацааны санхүүгийн хэлцлүүд буюу орон сууц, газар болон бусад үл хөдлөх хөрөнгөөр барьцаалсан зээл олголтын тогтолцоог сайжруулах эрх зүйн орчинг бүрдүүлнэ. Төгрөгийн форвард зах бий болгох дэд бүтэц, бизнес эрхлэгчдийн санаачлагыг дэмжинэ. Гадаад, дотоод зах зээлээс хөрөнгө оруулалт, хямдралтай санхүүжилтийн эх үүсвэр дайчлан эдийн засгийн эргэлтэнд оруулах эрх зүйн орчинг боловсронгуй болгоно. Мөнгөний бодлогын холбогдолтой судалгааг эрчимжүүлэн Монгол Улсын эдийн засгийг загварчлах ажлыг Засгийн газартай хамтран эхлүүлнэ. Үйлдвэрлэлийг дэмжиж, ажлын байр нэмэгдүүлэх зорилгоор гадаадаас хямд эх үүсвэртэй фонд /зээл/ дайчилж, арилжааны банкуудаар дамжуулан зээлдүүлэх нөхцөл бүрдүүлнэ.    Банк, санхүүгийн хөгжлийн тогтвортой байдлыг хадгалах, эдийн засаг дахь зээл, санхүүгийн орчныг таатай болгох зорилгоор банкны барьцаа хөрөнгийг захиран зарцуулахтай холбогдсон эрх зүйн зохицуулалтыг боловсронгуй болгох зэргээр санхүүгийн харилцаанд оролцогчдын сахилга, хариуцлагыг өндөржүүлэх чиглэл баримтална. Банк, санхүүгийн зах зээл дэх шударга өрсөлдөөнийг дэмжих, банкны үйл ажиллагааны эрсдлийг бууруулах, активын багцын чанарыг дээшлүүлэх зорилгоор олон улсын туршлага дээр үндэслэн банк, санхүүгийн шинэ үйлчилгээг нэвтрүүлэх ажлыг дэмжинэ. Банк бус санхүүгийн үйлчилгээ үзүүлэгчдийн үйл ажиллагааг зохицуулах, банк бус санхүүгийн зах зээлийн талаархи хууль тогтоомжийн хэрэгжилтийг хангах, үйлчлүүлэгчдийн хууль ёсны эрх ашиг, сонирхлыг хамгаалах үүрэгтэй Санхүүгийн зохицуулах хороог байгуулж, үйл ажиллагааг нь жигдрүүлэх арга хэмжээ авна. Хяналт шалгалтын үйл ажиллагааг эдийн засгийн ерөнхий төлөв байдалтай уялдуулах чиглэлийг баримтална. Бэлэн бус төлбөр тооцооны хэрэгслүүдийн үйл ажиллагааг жигдрүүлж, хөгжлийг нь улам боловсронгуй болгох талаар нэгдсэн зохицуулалт хийнэ.