ХХЕГ-ын даргын 2009 оны 08 дугаар

           сарын 28-ний өдрийн А/22 дугаар

     тушаалын хавсралт

1.1. Хил хамгаалах байгууллагын офицер, ахлагч, гэрээт хилчдийн цэргийн мэргэжлийн зэрэг /цаашид "Мэргэжлийн зэрэг"гэх/-тэй холбогдсон харилцааг энэхүү журмаар зохицуулна.

1.2. Мэргэжлийн зэрэг нь тухайн цэргийн алба хаагчийн эзэмшсэн цэргийн хэрэг, хууль эрх зүйн мэдлэг, мэргэжлийн ур чадварын түвшинг илэрхийлнэ.

1.3. Хил хамгаалах байгууллагын офицер, ахлагч, гэрээт хилчдээс тогтоосон шалгуур үзүүлэлтийн дагуу шалгалт авч, мэргэжлийн III, II, I зэрэг олгоно.

            1.4. Мэргэжлийн зэрэг олгох, хамгаалах, ахиулах шалгалтыг ХХЕГ-ын даргын тушаалаар томилогдсон "Мэргэжлийн зэргийн шалгалт"-ын комисс авна.

2.1. Комисс нь дарга, нарийн бичгийн дарга, гишүүдээс бүрдэнэ.

2.2. Мэргэжлийн зэргийн шалгалтын комиссын бүрэлдэхүүн, шалгалт явуулах хугацааг ХХЕГ-ын даргын шийдвэрээр тухай бүр нь тогтооно.

2.3. Шалгалтын комиссын чиг үүрэг:

            2.3.1. Цэргийн алба хаагчийг мэргэжлийн зэргийн шалгалтад хамруулах тухай хилийн отрядын дарга, Улаанбаатар хүрээний ангийн захирагчийн тодорхойлолт, холбогдох баримт бичгүүдийг судлаж, дүгнэлт гаргах,

            2.3.2. Цэргийн мэргэжлийн зэрэгтэнд тавигдах шаардлага, шалгуур үзүүлэлтийг хангаж байгаа эсэхийг  хянах, тодотгол хийх,

            2.3.3. Хилийн отряд, Улаанбаатар хүрээний ангиудад мэргэжлийн зэрэгтэн бэлтгэх ажиллагаанд дэмжлэг үзүүлэх,

            2.3.4. Мэргэжлийн зэргийн шалгалт авах материалыг тухай бүр тусгайлан боловсруулах, 

2.3.5. Мэргэжлийн зэрэг олгох, хамгаалах, ахиулах шалгалт авах,

2.3.6. Шалгалтын дүнг комиссоор хэлэлцэж мэргэжлийн зэрэг олгуулах, бууруулах саналаа эрх бүхий албан тушаалтанд танилцуулах,

 

3.1. Цэргийн алба хаагчдад мэргэжлийн зэрэг эзэмшүүлэх, зэргийг нь хамгаалах, ахиулах бэлтгэл ажлыг зохион байгуулах,

3.2. Цэргийн алба хаагчдад мэргэжлийн зэрэг эзэмших, хамгаалах, ахиулах нөхцлийг бүрдүүлж, туслалцаа үзүүлэх,

            3.3.  Мэргэжлийн зэргээ ахиулах, хамгаалах цэргийн алба хаагчийг зөвлөлийн хурлаараа хэлэлцэж, шалгалтад хамруулах эсвэл мэргэжлийн зэргийг нь бууруулах, хүчингүй болгох цэргийн алба хаагчийн тухай ажил байдлын тодорхойлолт, урьдчилсан шалгалтын дүнг, саналын хамт ХХЕГ-ын мэргэжлийн зэргийн шалгалтын комиссын даргын нэр дээр ирүүлэх,

4.1. Комисс нь мэргэжлийн зэргийн шалгалтад хамрагдаж буй цэргийн алба хаагчаас:

-Мэргэжил, ур чадварын /Мэргэжлийн болон цэрэг-техникийн бэлтгэл/ түвшин,

            - Бие бялдар, сэтгэл зүйн /Буудлага, биеийн тамирын бэлтгэл/ түвшингийн шалгалт авна.

            4.2. Мэргэжлийн зэрэгтэнд тавигдах шаардлага, шалгуур үзүүлэлтийг үндэслэн мэргэжил, ур чадварын түвшинг-тест, бодлого, дадлагын ажил, дасгалаар; бие бялдар, сэтгэл зүйн түвшинг-буудлагын заавар, "Цэргийн алба хаагчдын бие бялдрын бэлтгэлжилтийн шалгуур үзүүлэлт"-ийн стандартаар үнэлнэ.

4.3. Хил хамгаалах байгууллагын офицер, ахлагч, гэрээт хилчдээс дараах мэргэжлээр мэргэжлийн зэргийн шалгалт авч зэрэг олгоно. Үүнд:

            -Офицеруудаас-оператив-тактик, команд-штаб, хилийн алба, шалган нэвтрүүлэх алба, сэтгэл зүйч, командын болон холбоо, тагнуул, хими, инженер, ар тал, зэвсэг техникийн мэргэжлээр,

            -Ахлагч нараас-хилийн харуулын дарга, хилчин-шалгагч болон холбоо, инженер, ар тал, зэвсэг техникийн мэргэжлээр,

            -Гэрээт хилчдээс-хилийн харуулын дарга, холбоочин, хөгжимчин, жолооч, хилийн манааны ахлагч мэргэжлээр шалгалт авч зэрэг олгоно.

4.4. Мэргэжлийн зэргийн шалгалтад III-I зэрэг рүү шат дараалан хамруулна.           4.5. Мэргэжлийн зэрэгтэнд тавигдах шаардлага, шалгуур үзүүлэлтийг хангах чадвартай, ажлын туршлагатай, тухайн мэргэжлээр 3-аас доошгүй жил ажилласан офицер, 4-өөс доошгүй жил ажилласан ахлагч, гэрээт хилчдийг  III зэрэг олгох шалгалтад оруулна.

4.6. Мэргэжлийн зэрэг бүхий цэргийн алба хаагчдыг зэргээ хамгаалах шалгалтад 3 жил тутам, ахиулах шалгалтад 5 жил тутам хамруулна.

            4.7. Мэргэжлийн зэргийн шалгалтын тест, дадлагын ажил, дасгал, нормативуудыг гүйцэтгэсэн үнэлгээг шалгалтын комиссын гишүүд гарын үсэг зурж баталгаажуулан, шалгалтад хамрагдсан цэргийн алба хаагчдад танилцуулна.

5.1. Мэргэжлийн зэргийн шалгалтад тэнцсэн цэргийн алба хаагчид мэргэжлийн зэрэг олгох комиссын шийдвэрийг үндэслэн ХХЕГ-ын даргын тушаалаар мэргэжлийн зэрэг олгоно.

5.2. Цэрэг, техникийн ухааны магистр, цэргийн академи төгссөн офицеруудад мэргэжлийн III зэрэг олгож болно.

5.3. Техник, холбооны мэргэжлээр Улсын аварга шалгаруулах болон бусад тэмцээнд оролцож, тухайн мэргэжлийн зэрэг хамгаалсан офицер, ахлагч нараас  бие бялдар, сэтгэл зүйн бэлтгэлийн шалгалт авч, холбогдох мэргэжлийн зэргийг олгоно.

5.4. Мэргэжлийн зэрэгтэн нь эмчлүүлэх, ээлжийн амралт эдлэх, албан томилолтоор ажиллах, сургууль, дамжаанд суралцах, цугларалт, семинарт оролцох хугацаандаа мэргэжлийн зэргийн нэмэгдлийг хэвээр авна.

5.5. Хилийн өөр ангид шилжсэн цэргийн алба хаагчид мэргэжлийн зэргээ ахиулах, хамгаалах шалгалтад орох хүртэл нь нэмэгдлийг хэвээр олгоно.  

6.1. Мэргэжлийн зэрэг хамгаалах шалгалтад тэнцээгүй цэргийн алба хаагчийн мэргэжлийн зэргийг зохих шатанд нь бууруулж ХХЕГ-ын даргын тушаалаар  баталгаажуулна.

6.2. Мэргэжлийн зэрэг хамгаалах шалгалтад хүндэтгэн үзэхээс бусад шалтгаанаар ороогүй цэргийн алба хаагчийн мэргэжлийн зэргийг хүчингүйд тооцож тушаалаар зарлана.

6.3. Албан тушаалдаа дүүрэн тэнцэхгүй байгааг нь сануулсан шийтгэлтэй, албаны бэлэн байдлыг сулруулсан, хариуцсан зэвсэг, техникийг эвдэж гэмтээсэн, мэргэжлийн алдаа, дутагдал, осол, аваар, сахилгын ноцтой зөрчил гаргасан цэргийн алба хаагчийн мэргэжлийн зэргийг хүчингүйд тооцно.

7.1. Мэргэжлийн зэргийн шалгалтад тэнцсэн цэргийн алба хаагчдад ХХЕГ-ын даргын тушаалаар мэргэжлийн зэргийн тэмдэг, үнэмлэх, Монгол Улсын Засгийн газрын 1999 оны 12 дугаар сарын 15-ны өдрийн 213 тоот тогтоолд заасны дагуу I зэрэгтэнд 15 хувь, II зэрэгтэнд 10 хувь, III зэрэгтэнд 5 хувийн мэргэжлийн зэргийн нэмэгдлийг үндсэн цалингийн хувиар бодож олгоно.

7.2. Мэргэжлийн зэргийн үнэмлэх, тэмдгийн загварыг ХХЕГ-ын дарга батална.

7.3. Офицер, ахлагч нарыг цэргийн тэтгэвэрт гарахад нь Батлан хамгаалахын сайдын 1996 оны 221 дүгээр тушаалаар батлагдсан "Зэвсэгт хүчнээс тэтгэвэрт гарч байгаа офицер, ахлагч нарт олгох нэг удаагийн тэтгэмжийн хэмжээг тогтоох журам"-ын 2 дугаар зүйлийн 6 дахь хэсэгт заасны дагуу:

 - цэргийн мэргэжлийн III зэрэгтэнд 0.5 сар,

 - цэргийн мэргэжлийн II зэрэгтэнд 1 сар,

 - цэргийн мэргэжлийн I зэрэгтэнд 1.5 сарын нэмэгдлийг тооцож олгоно.

7.4 Мэргэжлийн зэрэг хамгаалсан тохиолдолд зэргийн тэмдгийг дахин олгохгүй. Тэмдэг нь үнэмлэхийн хамт хүчинтэйд тооцогдох бөгөөд үнэмлэхэд тэмдэглэл хөтөлнө.

7.5. Мэргэжлийн зэргийн тэмдгийг хаяж, үрэгдүүлсэн тохиолдолд үнэмлэхийг үндэслэн дахин олгож болно.

7.6. Мэргэжлийн зэргийн тэмдгийг ёслол албаны хувцасны зүүн энгэрийн халаасны дээд ирмэгээс 5 мм зайд байрлуулан зүүнэ.

 

 

 

 

ХИЛИЙН ЦЭРГИЙН ШТАБ

 

 

 

           

 

 

Журмын нэгдүгээр хавсралт

 

 

 

 

 

 

 

 

 

ХИЛИЙН ЦЭРГИЙН ШТАБ