/БОАЖС-ын 2018 оны А/98-р хүчингүй болсон/

 

Байгаль орчны сайдын 1998 оны 77 дугаар тушаалын хавсралт

 

 ҮЙЛДВЭРЛЭЛИЙН АЖИЛЛАГААГ ТҮДГЭЛЗҮҮЛЭН

 ЗОГСООХОД МӨРДӨХ ЖУРАМ   

 

1.Байгаль орчинд сөрөг, хортой нөлөөлөл үзүүлж буй иргэн, аж ахуйн нэгж, байгууллагын үйлдвэрлэлийн болон бусад үйл ажиллагааны зөрчлийг арилгуулахын тулд түдгэлзүүлэн зогсоох арга хэмжээг хэрэгжүүлэхэд энэхүү журмыг мөрдлөгө болгоно.

2.Байгаль орчны хяналтын бүх шатны улсын байцаагч /цаашид "улсын байцаагч" гэнэ/ нь байгаль орчныг хамгаалах тухай хуулийн 27 дугаар зүйлийн 3-д  заасан эрхийн дагуу иргэн, аж ахуйн нэгж, байгууллагын үйлдвэрлэлийн үйл ажиллагааг бүрэн буюу хэсэгчлэн түдгэлзүүлэн зогсоож болно.

3.Иргэн, аж ахуйн нэгж, байгууллагын эрхэлж буй үйлдвэрлэлийн ажиллагааг бүхэлд нь бүрэн зогсоолгүй байгаль орчинд сөрөг, хортой нөлөө үзүүлж буй тухайн цех, тасаг, хэсэг, шат дамжлагын үйл ажиллагааг түдгэлзүүлэн зогсоохыг үйлдвэрлэлийн ажиллагааг хэсэгчлэн зогсоох гэж үзнэ.

4.Улсын байцаагч нь аймаг, нийслэлийн Засаг дарга болон Байгаль орчны асуудал эрхэлсэн ТЗТБ-д байгаль орчинд сөрөг, хортой, нөлөөлөл бүхий үйлдвэрлэл явуулсан иргэн, аж ахуйн нэгж, байгууллагын үйл ажиллагааг бүрмөсөн зогсоох тухай санал гаргаж болно.

 

5.Улсын байцаагчид нь байгаль орчин сөрөг хортой нөлөө үзүүлж буй иргэн, аж ахуйн нэгж, байгууллагын үйл ажиллагааг түдгэлзүүлэн зогсоохдоо дор дурьдсан зүйлийг үндэслэл болгоно:

а/ "Байгаль орчныг хамгаалах тухай" хуулийн 20 дугаар зүйлд заасан "Байгаль орчны чадавхийн хэм хэмжээ", 21  дүгээр зүйлд заасан "Байгалийн баялгийн нөөцийн ашиглалтын дээд хэмжээ"-г зөрчсөн;

б/ Үйлдвэрлэлийн ажиллагааг бүрэн буюу хэсэгчлэн түдгэлзүүлэн зогсоохгүйгээр зөрчлийг арилгах боломжгүй;

в/Байгалийн аливаа баялгийн нөөц, ашиглалтын горимыг тогтоолгүй ашигласан;

г/"Байгаль орчныг хамгаалах тухай" Монгол улсын хууль болон түүнтэй нийцүүлэн гаргасан бусад хууль тогтоомж, дүрэм, журмыг удаа дараа зөрчиж, хяналтын байгууллагаас тавьсан шаардлагыг биелүүлээгүй;

д/ Хяналтын байгууллагаас тухайн зөрчилтэй холбогдуулан захиргааны болон бусад төрлийн арга хэмжээ авагдсан боловч зөрчил арилаагүй;

е/ Стандартаар тогтоогдсон шаардлага, нөхцөлүүдийг зөрчсөн

 

6.Улсын байцаагчид нь байгаль орчинд сөрөг, хортой нөлөө үзүүлж буй иргэн, аж ахуйн нэгж, байгууллагын үйл ажиллагааг түдгэлзүүлэн зогсоохдоо дараахь баримт бичгийг үйлдэнэ:

а/ Улсын ерөнхий буюу ахлах байцаагчийн шийдвэр;

б/ Улсын байцаагчийн акт;

в/ Улсын байцаагчийн дүгнэлт;

г/ Үйлдвэрлэлийн ажиллагааг түдгэлзүүлэн зогсоосон   тухай тэмдэглэл;

д/ Үйлдвэрлэлийн ажиллагааг сэргээсэн тухай тэмдэглэл.

Үйлдвэрлэлийн ажиллагааг түдгэлзүүлэн зогсоохтой холбогдох үндэслэлийг нотлох баримт, лабораторийн шинжилгээ, ажиглалтын материал зэргийг хавсаргаж болно

7.Үйлдвэрийн ажиллагааг түдгэлзүүлэн зогсоосон тухай тэмдэглэлд:

-түдгэлзүүлэн зогсоох хугацаа;

-хяналт тавих албан тушаалтны хаяг, нэр;

-үйлдвэрлэлийн техник, тоног төхөөрөмж, агуулах, эд ангиуд дээр тавьсан лацны дугаар;

-лац тавьсан он, сар, өдөр;

-лацны бүрэн бүтэн байдлыг хариуцах эзний овог нэр, албан тушаалыг тодорхой бичиж хариуцагчаар гарын үсэг зуруулж, тэмдэг даруулна.;

   8.Үйлдвэрлэлийн ажиллагааг түдгэлзүүлэн зогсоосны дараа байгаль орчинд үзүүлж буй сөрөг, хортой нөлөөллийг арилгах арга хэмжээ авч, үр дүнд хүрсэн тохиолдолд үйлдвэрлэлийг сэргээж болно

9.Үйлдвэрийн ажиллагааг  сэргээхдээ энэ тухай тэмдэглэл хөтлөх бөгөөд уг тэмдэглэлд:

-үйлдвэрлэлийг түдгэлзүүлэн зогсоосноос хойш хийсэн ажил;

-зөрчлийг арилгасан байдалд хийсэн дүгнэлт;

-лацны бүрэн бүтэн байдал;

-үйлдвэрлэлийг сэргээсэн он, сар, өдөр зэргийг тэмдэглэж нотлох баримт, лабораторийн шинжилгээ, ажиглалтын материал гэх мэтийг хавсаргана.

 

10.Улсын байцаагч нь тухайн зөрчил, сөрөг, хортой нөлөөллийг арилгуулах зорилгоор үйлдвэрлэлийн ажиллагааг зөрчлийг арилгах хүртэлх хугацаагаар түдгэлзүүлэн зогсооно.

Үйлдвэрлэлийн үйл ажиллагааг түдгэлзүүлэн зогсоохдоо түдгэлзүүлэн зогсоох хугацааг тодорхой зааж өгөх бөгөөд хэрэв зөрчил арилаагүй тохиолдолд хугацааг сунгаж болно.

11.Улсын байцаагч нь үйлдвэрлэлийг түдгэлзүүлэн зогсоох, сэргээх арга хэмжээг авахдаа энэхүү дүрмийн гуравын 6.7-д заасан баримт бичгийг бүрдүүлнэ.

12.Иргэн, аж ахуйн нэгж, байгууллагад илэрсэн зөрчил, сөрөг хортой нөлөөллийг арилгах арга хэмжээ авахыг шаардаж, гүйцэтгэлд нь хяналт тавина.

13.Үйлдвэрлэгч эрхлэгч нь улсын ерөнхий буюу ахлах байцаагчийн шийдвэр, улсын байцаагчийн акт, улсын байцаагчийн дүгнэлт, үйлдвэрлэлийн ажиллагааг түдгэлзүүлэн зогсоосон тухай тэмдэглэлд дурьдсан зөрчлийг арилгасан тухайгаа мэдэгдмэгц шалгалтыг газар дээр нь хийсний эцэст энэ дүрмийн гурвын 9-д заасан баримт бичгийг бүрдүүлэн үйлдвэрлэлийг сэргээх эсэхийг шийдвэрлэнэ.

 

14.Иргэн, аж ахуйн нэгж, байгууллага нь байгаль орчинд сөрөг, хортой нөлөө үзүүлсний улмаас үйлдвэрлэлийг  түдгэлзүүлэн зогсоосон тухай акт, тэмдэглэлд заасан зөрчлийг арилгах арга хэмжээг авч, зөрчлийг арилгамагц үйлдвэрлэлийг түдгэлзүүлэн зогсоосон, эсхүл хяналт тавих үүрэг бүхий улсын байцаагчид мэдэгдэнэ.

15.Энэхүү журмын 13-д заасны дагуу улсын байцаагч газар дээр нь шалгаж холбогдох баримт бичгийг бүрдүүлсний дараа үйлдвэрлэлийн ажиллагааг сэргээнэ.

16.Үйлдвэрлэлийн ажиллагааг түдгэлзүүлэн зогсоосноос үүссэн хохирлыг буруутай иргэн, аж ахуйн нэгж бүрэн хариуцна.

17.Иргэн, аж ахуйн нэгж, байгууллага нь үйлдвэрлэлийг  түдгэлзүүлэн зогсоох тухай шийдвэр, акт, тэмдэглэлийн талаар гомдолтой бол байгаль орчны хяналтын дээд шатны байгууллага, байцаагчид эсвэл шүүхэд хандаж болно.

 

18.Энэ журмыг зөрчсөн иргэн, аж ахуйн нэгж, байгууллагад Монгол улсын Байгаль орчныг хамгаалах тухай хууль болон тэдгээртэй нийцүүлэн гаргасан хууль, тогтоомжийн дагуу хариуцлага хүлээлгэнэ.

 

 

----------оОо----------